Mäk 7
7
Yolŋuwurum romdhu bayiŋ warri dhaŋu barꞌparyumana ŋarra God-Waŋarrwum rom
(Mathuyu 15:1-9)
1Waŋganydhum waluyu Baratji ŋurruk Rom-ŋayathandayŋu warra, ga mä ḻurrkunꞌ Djuwwu Rom-marŋgikunharami warra ŋirrima Djurutjalambuyyu guwatjman dhanal Djesuny. 2-5Ga banhayam banha yolŋu warra bayiŋ gayŋa marimin yana dhanaliŋguwaynha yana romgum bitjuwayiŋ malthun. Bilanyan mala rom gamꞌ: bayiŋ ŋarru yolŋu djälmiyi ŋathawu guwamandawu, ŋurruŋum dhanal ŋarru goŋ-rurrwuyunmi romgu yana malthun ga ŋärrun ŋatham guwaman. Ga banha dhanal ŋarru ŋatha warraṯthun ŋunhuŋ ŋalaŋa yolŋu guḻkuꞌmiŋa ŋirrimaŋa, ŋurruŋum dhanal ŋatjil ŋarru waḏapthun romgu malthun. Ga ŋärrun banikinꞌma malany rurrwuyun bilanya bitjuwayiŋ djuypanꞌ mala, ŋathawuy biyarrthanda rupa mala, ga garmakpuy wurkthunda ga gäp ga biḻit ga guḻku waripu waripu. Bukmakkum ŋarru rurrwuyun, romgu bayikuya malthun.
Ga bayiŋ ŋarru banha waripu Djuw yolŋu ŋangawul gayŋa malthun banha nhalpiyan gayŋa rom barraŋgaꞌyun, dhanalim ŋarru banha Baratjim yolŋu warra maḏakarritjtjin dhanaliŋgu.
Ga bilanyaḻi dhanal banha Djesuwum guyurrꞌmiŋuny warrany nhäŋal, bala dhanal banha Baratjim ŋurruk maḏakarritjinan dhanaliŋgu, ḻinygu dhanal gayŋan ŋatha guwaman, goŋdhu-rurrwuyundanharramiyun, ŋangawulnha bitjuwayiŋ romgu malthuwan. Bala dhanal gayŋan rom-nyamirꞌyuwanan nhanany Djesunham bitjanan, “Nhäwu bayiŋ gayŋa banha nhuŋgurum guyurrꞌmiŋuyu warrayu bitjanyam ŋatha guwaman goŋdhu-rurrwuyundanharramiyum? Banham dhanal bayiŋ gayŋa bitjanyam romnha bitjuwayiŋ ganitjuman ŋunha ŋaḻapaḻmiwuŋun!”
6-7Bala nhan Djesum ḏämbu-ganitjuman bitjanan, “Nhumam dhaŋum yolŋu warra gali-märrmaꞌ warra. Dhuṉḏaymu nhan banha yolŋuyu yäkuyu Yitjayayum bamanꞌma wukirri God-Waŋarrnham yän bitjanam gamꞌ,
‘Dhaŋum yolŋu warra bayiŋ gayŋa wokthun nyäku
yändhu yan waŋganydhu, ga ŋangawul bitjuwayiŋ ŋunhuŋum ŋayaŋuyum.
Ŋangawulnha dhanal bayiŋ gayŋa dhaŋu gulitjumanma nyäku buku-ŋalthun,
ga marŋgikumam dhanal bayiŋ gayŋa yolŋuwun yana romma malany, yana warri banhayam God-Waŋarrwun rom malany.
Ga baṯ-bitjanma dhanal bayiŋ gayŋa dhaŋu ŋayathan yolŋuwuŋun yana romma malany.’#Yitjaya 29:13
Bilanyayan dhaŋu nhumam. 8-9Guŋnharrumanan nhuma God-Waŋarrwuŋum rom nhinathuŋganda malany, bala nhuma bayiŋ gayŋa dhaŋu malthunma yolŋuwun yana romgum. Gaḏamanmin dhaŋu nhumam marimin dhaŋuyma warra bilanyawum barrakinydjumandawum djämawu!
10Dhaŋum banha rom nhanguŋ God-Waŋarrwuŋ, banha nhan guŋan Mawtjitjkuḻ bilanya gam', ‘Mä-ŋalthuwa nhuŋguway ŋäṉḏi'miŋuwum ga mori'miŋuwum.’ Ga biyapulma nhan bitjan gam', ‘Bayiŋ ŋarru yolŋu dhä-warranydjaḻ'yi garrun ŋäṉḏi'miŋuwu ga mori'miŋuwu, ŋunha gayŋa romma barraŋga'yun banha bilanyanham yolŋuny ŋalmam ŋarru guwatharaman waŋayumana yana.’#Dhawaṯthun Yetjipŋuru 20:12; 21:17; Rom Mala Ḏalkarramiwu 20:9; Ḏämbu-wiḻꞌyundami Rom 5:16 11-12Yo, bitjanya nhan banha God-Waŋarryum rom nhinathuŋgan, ŋarru nhumam bayiŋ gayŋa dhaŋu waripuyumana marŋgiyuman bilanyan gamꞌ, ‘Ŋunha nhuŋgu ŋäṉḏiꞌmiŋu ga moriꞌmiŋu gayŋa djälmiyi ŋunhuŋ nhäwu bitjuwayiŋ, ŋarru nhunum banha ḻinygun banhayam dhawuꞌ-nhinathuŋgan God-Waŋarrnhan, ŋarru baḏak yana nhunum gayŋa banha mäyu-ḏapthuman, ga ŋangawulnha nhunu ŋarru banha dhupalinham bitjuwayiŋ guŋan.’ 13Ga bilanyawuyan ŋaya banha bitjanyam rakaran nhumaliŋgu ŋätjilim, nhumam banha barꞌparyumanan nhangum God-Waŋarrwum rom, bala bilumanan nhuma, ga waripun rom nhinathuŋgan. Ga guḻku mu nhuma gayŋan dhaŋu romma malany biluꞌ-biluman.”
Barrakinyma rom bayiŋ walma yolŋuwuru ŋayaŋuŋuru
(Mathuyu 15:10-20)
14Dhurrwaraŋuru bewaḻiyam nhan Djesu guykuyyuwanan yolŋuwun warrawu bala bitjanan garruwan, “Dharr-bitjan warra ŋäkam, mä nhuma ŋarru dharaŋgan yana. 15Nhä bayiŋ banha gulŋiya ŋunha guḻunḻi, ŋangawul bayiŋ banha bayiŋuyam yolŋuny ŋayaŋu-barrakinydjuman. Ga nhä bayiŋ dhawaṯthuna ŋalmaliŋguru ŋayaŋuŋurun, bayiŋuyan bayiŋ banha barrakinydjumanma. 16[Bayiŋ nhuma mäkiriꞌmim warra, ŋäkam warra ŋuwaḻyuman!]”#7:16: Ŋunha ŋurruŋuŋam djorraꞌŋa Gurikmurrum yänmurru, dhaŋu namba 16-ma ŋangawul gayŋa djingaryun.
17Bala nhan Djesum ga guyurrꞌmiŋum warra nhangu ŋaykanan guŋnharrumanan yolŋunham warrany bala gulŋiyanan buṉbuḻin. Bala dhanal dhä-wirrkaꞌyuwanan Djesunham bitjanan, “Marrkapmi, ŋatjil rakaraŋ ŋanapiliŋgu banha mayaliꞌ bayikuy dhäwuꞌwuy.”
18-19Ga nhanmam Djesum ḏämbu-ganitjuman dhanaliŋgu bitjanan, “Nhalpiyan nhuma gayŋa dhaŋu ŋangawul yana dharaŋganma, ŋatja? Bilanya nhan banha mayalim' gam': nhä bayiŋ yolŋuyu guwaman banhayam ŋuwakurru, ḻinygu ŋarru banha walma mu. Ŋarru nhä banha bayiŋ walman ŋayaŋurun, banhayan nhan bitjuwayiŋ barrakinyma.” (Ga bitjanam nhan banha garruwan, ḻinygu bukmakma dhaŋu ŋatha malany ḏarrtjalk yana guwamandawum.)
20“Ga nhä banha bayiŋ yolŋuwuḻ dhawaṯthun ŋayaŋuŋuru, bayikuyam nhan bayiŋ gayŋa God-Waŋarrma marimin yana milnyaŋꞌthun, gulumana bayiŋ ŋalmaliny nhangurun God-Waŋarrwurun. 21Djinaŋ malaŋuyu barrakinydhu ŋalmaliny bayiŋ banha gulumanma nhanguḻ gamꞌ: guyaŋi ŋarru gayŋa barrakinynha yana nhä mala, ga marrambaꞌ-djakawarrundami rom, ga manaŋgan rom ga guwatharam yolŋuny mokuy-yupthuman ga 22räy-wanyuyi, goṯa-wakalmiŋgandami rom, ga dhuwurr-barrakinydji, ga djängum, ga mayaliꞌ-wilkthundami rom, ga djäl-gänaŋumi, ga maŋutji-ḏiyꞌ rom, goṯa-garrundami rom, ga marŋgi-rakaranhami rom, ga räy-ŋarrꞌŋarr rom, ga ŋayaŋu-wanyu rom.
23Yo, bilanyayan banha barrakinyma mala bayiŋ gayŋa walma dhawurum ŋayaŋuŋurum, ga barrakinydjumana ŋalmaliŋgu ŋayaŋunhan. Ga bitjanya ḻinygu bayiŋ banha God-Waŋarrnham bitjuwayiŋ gulumana ŋalmaliŋgurun, banhayam nhanguḻim God-Waŋarrwuḻim milnyaŋꞌmin.”
Djesuyu guŋgaꞌyuwan baṯaminy ŋarru nhan banha yaka Djuw
(Mathuyu 15:21-28)
24Bewaḻiyam dhanal Djesuyum ga nhanguru guyurrꞌmiŋuyum warrayu guŋnharrumanan banhayam ŋirrima. Ga ŋarranam dhanal ŋirrima-guḻkumiḻin ŋirrimaḻi yäkuḻi Däyaḻin. Ga waythuwan dhanal banhalaya ŋirrimaŋa bala dhanal gulŋiyanan buṉbuḻin, ḻinygu ŋangawul nhan gayŋan banha Djesum ḏukṯukmiyin dhanal ŋarru yolŋum warra nhangu marŋgiyi banha nhan gayŋan banhalayam bitjuwayiŋ nyenan. Ŋarru gulkurun nhan banha djuḻuḻꞌyuwanam.
25-26Ga banhalaya gayŋan baṯami nyenan ŋarru nhan banha ŋangawul Djuw bäpurrum. Ga yolŋum nhan banha waŋgala-wuyaŋinyaram ga Bänitjawuy, makaŋam Djiriya. Ga banha nhan Djesunham ŋäkul waythundam bala nhan ŋarranan bala garruwanan nhangu bitjanan, “Buku-djulŋi, ŋatjil ŋunha barrakinynha birrimbirrnha ḏupthuwa wakuꞌmiŋuwuru nyäkuru baṯamiwuru.”
27Bala nhan Djesum mayaliꞌmurrun garruwan, “Dhaŋum ŋarru ŋurruŋum ŋatha guwaman yumurrkuꞌyu, ga muṉguynha ŋarru banha wärruŋdhum guwaman.” [Bilanya banha mayalimꞌ gamꞌ: ŋurruŋum nhan ŋarru Djesuyu guŋgaꞌyun nhanguway nhan yolŋuny warrany Djuw malany ga ŋärrun nhan ŋarru guŋgaꞌyun waripunham bäpurruny yolŋuny warrany.]
28Bala nhan banha baṯamim ḏämbu-ganitjuman bitjanan, “Gulitj yana marrkapmi. Ŋarru bayiŋ banha wärruŋdhum guwaman yana gälkinyaram ŋatha bewalim banha yumurrkuꞌwurum biḻitŋuru.” [Ga djinalaŋam banha bilanya mayaliꞌ gamꞌ: banha nhan gayŋa Djesuyu nhanguwayma yolŋuny warrany guŋgaꞌyun, ga bitjanya ḻinygu nhan ŋarru banha waripunham yolŋuny warrany guŋgaꞌyunya.]
29Ga banha nhan Djesuyu bilanyawuyma ŋäkul bala nhan bitjanan garruwan, “Way, dhaŋum nhunu mä-wulitjnha yana garruwan. Gatjuy maŋgarran ŋirrimaḻin, ḻinygun banha barrakinyma birrimbirr gätthuwanan wakuꞌmiŋuwurum nhuŋguru.”
30Bala nhan banha baṯamim ḏirruwanan ŋirrimaḻin. Ga banha nhan ŋirrimaŋam waythuwan, nhäŋalam nhan banha wakuꞌmiŋunham nhan gayŋan gayŋiyanan yakurr-ŋuwatjinan, ḻinygun nhanguru banha barrakinyma birrimbirr walmanan.
Djesuyu ḏukthuman dhoŋulunyꞌ
31Ga dhurrwaraŋuru bewaḻiyam Djesuyum guŋnharrumanan banhayam ŋirrima Däyam, bala ŋarranan balan Djaydanḻin, ŋarru batjiwarrma nhan warraṯthuwan ŋunha räy-warruwan, gumurr-djawꞌyuwan ŋoymurru ŋarkulaꞌmurrun. Ga mä-waŋganynha ŋaykan balan Galaliḻin guḻunḻi ga waythuwan dhanal banhalayan ŋirrimaŋa makaŋa yäkuŋa ‘Dikapulitjnha’. 32Ga banhalaya gayŋan yolŋu nyenan dhoŋuluꞌ banha ḻunduꞌmiŋuyu warrayu nhanany gutjparruwan balaya Djesuwuḻ. Ga ŋäŋꞌthuwan dhanal bitjan, “Buku-djulŋi ŋatjil goŋ-ŋalthuwa djinakuḻ yolŋuwuḻ mä nhan ŋarru ŋuwatji.”
33Bala nhan Djesuyum gaḏaymanan banhaya dhoŋuluꞌnham gänaŋuḻin, bala nhan ŋarambiyan gulŋiyan nhanguḻ buthuruḻin, burrparḻi yana. Ga ŋarambiyaḻ nhan nhanguwaywuḻ dhupthuwan, bala ŋayathanan banha yolŋunhan ŋäṉarrnha. 34Ga ḏämbu-garramattjin nhan djiwarrꞌḻi bala yindi-ŋirꞌyuwanan bala garruwanan yänmurrun nhanguwaywurumurru Arrammurrun bitjanan, “Yipatha!” Bilanya gamꞌ mayaliꞌ, “Ḻapthuwan!”
35Ga bitjanam nhan banha garruwan bala banha yolŋuwum buthurum ḻapthuwanan, ga ŋäṉarrma nhangu banha dhayaḻyinan ŋuwatjinan yana, bala nhan gayŋan garruwanam ŋuwatjumanan.
36Bala dhupal ḏirruwanan balaya yolŋuwuḻ warrawuḻ. Ga bitjan nhan Djesuyu dhanaliny dhurrwara-mukthumanam, “Ŋangawul nhuma ŋarru rakaram yolŋuwuḻim banha ŋaya dhaŋu yolŋuny bitjuwayiŋ ḏukthuman.” 37Ga yolŋuyum warrayu banha ŋäkulan dhäwum, ga mariminan dhanal banha mä-maŋmaŋdhuwanam. Ga bitjanan dhanal gayŋan banha rakaranhaminam, “Nhän dhaŋum ŋayaŋu-ganyimꞌthundamin rom, ŋatja! Djinaŋum yolŋuyu gayŋa ŋuwakurrun marimin djäma. Buthuru-dhumukthum gayŋa ŋäman ga yännharram gayŋa garruna.”
Kasalukuyang Napili:
Mäk 7: wee
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
© (Active) Wycliffe Bible Translators, Inc. All rights reserved.
