Mat 3
3
Etib bi Jon ji nwohngalahb jo tiingi
(Mak 1:1-8; Luk 3:1-18; Jon 1:19-28)
1Ngare nyio Jon ji nwohngalahb kehm lohngo ba, ba kehme elbungu go elka emahng nio ni Judea re, 2“Yaangen elkpin enahne, tibre etul bi Esowo ebkabbe.”
3Jon wo jolo nne no nnyehnamahr Aisaya jo bung bada ne, eji á jo bung re,
“Nne noa,
kpꞌrabe go elka emahng re,
‘Tuungen mbang nyi Ntul bum-e.
Limen mbang tꞌtor,
nyi á bahke sehnge.’ ”
4Nsol nyi Jon jo kak, bo limi go anyar nyam nyi bo kpo lung re ekamel. Á jo gbaange egbaange ji bo limi go ngunyam. Á jo li agohrobi, fere jo yab akehng ekon. 5Ane jo lohngo go Jerusalem je go ege, a ane ba jolo go Judea kpee, go ane kpee ba lene ajahbe nya jolo egbuk ebbal ebbal bi aya ma bo kpo lung re Jodan. 6Bo jo fvvrv abiafem ebo, á jo wohngo bo alahb go Jodan.
7Eji Jon nyehne aneb Farisi, a anebe Sadusi gbalee kpꞌbake re á wohngo bo alahb, á kehm tongo bo re, “Wahn ane ba li ana akumbad ba! Nne awo tong-n re, ḿ bahke foro go erakatahng ji Esowo ji kpꞌbake? 8Limen nsol nyi bahke tibi re, wahn eblohko yaange elkpin enahne. 9Kana kpe laange, fere jo bung go egahna ntim re, ‘Ebraham wo li nso ejahre.’#3:9 Jon 8:33-39; Rom 2:28-29; 4:12. N kp-n tongo re, Esowo bahke ma ko atal nyaa, lim abon ka Ebraham.#3:9 Gal 3:26-29.
10“Bobtoobo elfuk bum, ni bo bahke kiimi alohk nti, melle nti nyio. Eti ajehng ajehng ji tohko kab akab nya nno, bo bahke mehle tub, fere rod kak agun.#3:10 Luk 13:7-9.
11“N kp-n wohngo alahb mao ma egbokondon. Nne no kpꞌbake toon-m wo ga gbal sehnge me. Jol me n fuumem re me n sol akpaketa enye. Á bahk-n wohngo alahb go Etingi Etohko, a agun.#3:11 Elt 1:5; 2:3. 12A fili edꞌda go ebo, kpꞌfebe arasi enye. Á bahke kpuku arasi enye, song kak go ege ekpꞌkpa, fere jahm awal go agun nya lꞌkꞌtiki lahme elahmelahme.”
Ana Jisos bele ewohngalahb
(Mak 1:9-11; Luk 3:21-22)
13Ngare nyio Jisos kehm tahme go Galili, song rehng go Jodan goji Jon re Jon wohng-e alahb.#3:13 Luk 12:50; Jon 1:29-34. 14Jon jo gare re á sahd-e, kehm-e tongo re, “Kehn wo wo nobo re wo wohngo na me alahb, wo ma fere ba na ga egame.”
15Owo Jisos kehm-e faange re, “Nong jol ano! Tibre fuumu re wahr lim nsol kpee nyi Esowo sebe re wahr lim.”#3:15 2 Kor 5:21. Jon kehm taame.
16Tvtv o eji Jisos ma bel ewohngalahb, á kehm lohngo go alahb. Ngare nyio ejahbetul Esowo eblennge ka-e. Owo á kehm nyehne etohko ji Esowo go elfoongo ni ebbehl kpꞌbadde abake, kehm ba jol a ne. 17Owo bo kehm wuku ellum go ejahbetul Esowo ni bungu re, “A wo li akor-m mmon ewame, no kpo kor-m sꞌsehng.”#3:17 Mak 9:7.
Kasalukuyang Napili:
Mat 3: ekaNT
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
© 2012, The Nigeria Bible Translation Trust and Wycliffe Bible Translators, Inc. All rights reserved.
