Text: © Wycliffe India Audio: ℗ Hosanna 2024 and WPT

Pangwali 2023 WBT (NT) Drama

(तेन्हि दिनि यीशु अपफ मेह्‍णु ना चुसताथ, तसे चेले चुसतेथ।) पर तसे बारे मेह्‍णु ईं बोते फरीसी शुणे कि “यीशु यूहन्ना केआं बि ज्यादा चेले बणान्ता त तेन्हि पाणि अन्तर चुसता”। एस बोकी यीशु पता लग गा। त से यहूदिया राज्य छड़ दी कइ गलील राज्य जे दुबारी घेई गा। त तस सामरिया राज्य बइ घेणे जरूरी थिउ। त से सूखार नओएं यक सामरी शेहर पुजा, जे तेस जिमि भेएड़ असा जे पुरखे याकूबे अपु कुआ यूसुफे धे सुआ सौ सालुं पेहले दुतो थी। तठि याकूबे खुआ बि थिआ। त हंट हंट कइ बक भुणे बझई जुओई, यीशु तस खुए भेएड़ बिश गा। तपल दिसाई कोई बाराह बजो थी।
तसे चेले तपल कुछ खांजे खरीदण जे ग्रां गो थिए। त यक सामरी जिल्हाणु पुओणि नेण जे तठि आई। यीशु तस जे बोलु, “छने, मेन्धे पीण जे धिक पुओणि दे!” तेन बोलु, “तुस यहूदी जाति भोई कइ बि मोउं केआं कीं मगण लगो असे? अउं त यक सामरी भो!” (तेन ई बोक इस बझई जुए बोली, किस कि यहूदी मेह्‍णु सामरी मेह्‍णु जुए कुछ लेण देण ना रखते।)
त यीशु बोलु, “भिलिआ, तोउ कि पता असा ना अउं जे तोउ केआं पीण जे पोण मगण लगो असा, कोउं भो? तु जाणती ना परमेश्वरे की वर दुतो असा? अगर तोउ सच्चे पता भुन्ताथ त तु मोउं केआं मगतीथ त अउं तेन्धे जीवन देण बाड़ु पुओणि देन्ताथ।” तेन जिल्हाणु बोलु, “भाई साहबा! तुसी केईं त बाल्टी नेईं। पुठे केआं पुओणि बि सुआ टुन असु। त ए जीवन देण बाड़ु पुओणि तुसी केईं कोढ़िआ आउ? तुस की हें पुरखा याकूब केआं बोडा असे ना, जेन हें धे ए खुआ दिता त तेन अपफ, अपु गभुर त गुओरु इस खुए केआं पिआउ?” यीशु जवाब दिता, “जे बि एस पाणि पीन्ता, तस दुबारी टिश लगती। पर जे पुओणि अउं देन्ता, अगर तस कोई पियाल त तस कदी टिश ना लगती। पर से तस अन्तर यक पुओणि सुजले ईं बण कइ तसे धे अमर जीवन देन्ता।” तपल तेन जिल्हाणु तस जे बोलु, “भाई साहबा! छने मेन्धे ईं पुओणि दिए, ताकि मोउं कदी टिश ना लगियेल त मोउं पुओणि नेण जे इठि एणे जरूरत ना पड़ियेल।”
यीशु तस जे बोलु, “गा त अपु धाणि इए भिआ।” त तेन जिल्हाणु बोलु, “मेईं कोई धाणि नेईं रखो।” यीशु तस जे बोलु, “आं आं! तु सही बोलुण लगो असी कि तोउ केईं कोई धाणि नेईं। किस कि तेईं पंज पंज धाणि रख छओ असे, त अभेईं बि जे असा, से तें धाणि ना भो।” त तेन जिल्हाणु तस जे बोलु, “महाराज! मोउं लगता कि तुस यक भविष्य वक्ता भो। हें सामरी के पुरखी इस फाटे चोटि पुठ परमेश्वरे पूजा की, पर तुस यहूदी मेह्‍णु बोते कि असी सद यरुशलेम अन्तर ईं पूजा करीण लौती।” यीशु बोलु, “भिलिआ! में बोक मान कि से टेम एण लगो असा, जपल मेह्‍णु परमपिता परमेश्वरे पूजा ना त इस फाटे चोटि पुठ होर ना यरुशलेम अन्तर कते। तुस सामरी तसे पूजा कते जेसे बारे तुसी कुछ पता नेईं, पर अस यहूदी तसे पूजा कते जेस अस जाणते; किस कि परमेश्वरे यहूदी जाति बेलि मनख बचाणे वादा किओ असा। पर से टेम एणे बाड़ा असा त एई बि गो असा, जपल परमपिता परमेश्वरे सच्चे भक्त तसे पूजा तसे आत्माई मदते बेलि त परमेश्वरे बोलो सच्चाई बेलि कते, किस कि परमपिता परमेश्वर ईं पूजा करणे बाड़ा तोपता। परमेश्वर आत्मा भो, त ए जरूरी असु कि तसे पूजा करणे बाड़े बि शुची आत्माई मदते बेलि त परमेश्वर बोलो सच्चाई बेलि तसे पूजा करे।” त तेन जिल्हाणु तस जे बोलु, “मोउं पता असा कि मसीह, जेस ‘ख्रिस्तुस’ बोते, एणे बाड़ा असा; जपल से एन्ता, त असी सोब बोक शिचालता।” यीशु तस जे बोलु, “अउं, जे तोउ जे बोक करण लगो असा, से भो”।
तिखेईंए, तसे चेले एई गे त ई हेर कइ हैरान भोई गे कि से एस सामरी जिल्हाणु जुए बोक करण किस लगो असा। तोउं बि केनि जेईं ना पुछा “तोउ कि लौतु” या “किस तस जुए बोक करण लगो असा।” तोउं, से जिल्हाणु अपु घाड़ु छड़ दी कइ ग्रां जे घेई गई त मेह्‍णु जे बोलुण लगी, “इएर एईए! तस मेह्‍णु हेरे, जेन में किओ हर यक कमे बारे मोउं बोताउ। ए मसीह त ना भो?” त शेहर केआं मेह्‍णु यीशु केईं एण लगे।
तपल, यीशु चेले तस जे बोलुण लगे, “ए गुरु, तुस कुछ खाण दिए!” पर तेन तेन्हि जे बोलु, “मोउं केईं ई खांजे असु, जेसे बारे तुसी कोई पता नेईं।” त चेले अपफ बुच बोलुण लगे, “शेहरे मेह्‍णु तसे धे खांजे कुछ दुतो त नेईं?” पर यीशु तेन्हि जे बोलु, “मोउं खांजे खाणे बेलि ना, बल्कि परमेश्वरे इच्छा मानणे बेलि त तसे कम पूरा करणे बेलि ताकत मेती। तुस ना बोते ना कि फसल लुणुण जे होता चोउर मेहने बाकी असे? पर अउं तुसी जे बोता अभेईं ए लुणणे भोई गो असी। जे मेह्‍णु एण लगो असे एन्हि हेरे। से पक्को फसले ईं असे। लुणणे बाड़े अपु मजूरी पान्ते त अमर जीवने लिए परमेश्वर केईं जे मेह्‍णु अण्हुण लगो असे, ताकि बाणे बाड़े त लुणणे बाड़े दुहिए मी कइ खुशी मनाई बटियेल। आं आं! ईं यक उजवाण नेईं ना कि ‘बांता कोउं त लुणता कोउं?’ से यकदम सच्चु असु, किस कि अउं तुसी फसल लुणुण जे तेस बग लंघा, जेठि तुसी कोई कष्ट नेईं किओ; पर होरी किओ थिआ। तेन्के कमे फल तुसी मेण लगो असा।”
तेस शेहरे सुआ सामरी मेह्‍णु तेस जिल्हाणु बोलुणे बेलि यीशु पुठ विश्वास किआ। किस कि तेन उगाही दुतो थी कि “जे जे कम मेईं किओ थिए, एनि से सोब मोउं बोताउ।” जपल से सामरी तस केईं ए त तस जे हथ जोड़ कइ छनेअरे की कि तेन्हि जुए बिशे। त से दुई रोज तकर तठि तेन्हि जुए बिशा। तसे शिक्षा बेलि होरे बि सुआ मेह्‍णु तेस पुठ विश्वास किआ। त तेस जिल्हाणु जे बोलु “अब अस सद तें बोलुणे बेलि विश्वास ना कते; किस कि असी अपफ तस केईआं शुणु त पता लग गा कि ए सेईंए मनख बचाणे बाड़ा भो।”

तेन्हि दुई रोजी पता, यीशु त तसे चेले तठिआ घेई कइ गलील राज्य जे गे। यीशु अपफ बोलो थिउ कि “केसे बि भविष्य वक्ते अपु देश अन्तर लेएखे लान्ते” त जपल से गलील राज्य पुजा त गलीले मेह्‍णु तसे अग्रोई जे ए, किस कि जे जे चमत्कारे कम तेन यरुशलेम शेहर अन्तर यहूदी के बचणे त्योहारे टेम किओ थिए, तेन्हि से सोबी काओ थिए।
तोउं यीशु गलील राज्ये काना शेहर जे दुबारी आ, जेठि तेन पुओणि अराख बणो थिआ। तठि यक राजे अधिकारी थिआ, जेसे कुआ कफरनहुम शेहर अन्तर बीमार थिआ। यीशु यहूदिया राज्य केआं गलील राज्य जे एई गो असा, शुण कइ तेन यीशु केईं घेई कइ तस जे हथ जोड़ुण लगा त बोलु, “छने, एई कइ में कुआ ठीक करीण दिए! से मरणे बाड़ा असा।” यीशु बोलु, “जोउं तकर तुस सोब बोडे चमत्कार ना हेरते, तोउं तकर में बोक ना मानते।” राजे अधिकारी तस जे बोलु, “साहब! में कुआ मरुण केआं पेहले चले।” यीशु तस जे बोलु, “घिए, तुं कुआ ठीक भोई घेन्ता”। त तेन राजे अधिकारी यीशु बोलुण पुठ विश्वास किआ त तठिआ घेई गा।
होउस ब्यागे से बते थिआ दे तसे नौखर तस मेई गे त बोलु, “तुं कुआ ठीक भुण लगो असा।” त तेन तेन्हि केआं पुछु, “कपल केआं से ठीक भुण लगा?” त तेन्हि तस जे बोलु, “कोई ही दिसाई यक बज केआं तसे सेक मुक गा।” त से राजे अधिकारी बिझ गा कि ईं तिखेईं भुण लगु जपल यीशु तेस जे बोलु, “तें कुआ ठीक भोई घेन्ता।” त अपु सम्हाई टब्बर जोई मी कइ तेन यीशु पुठ विश्वास किआ। ए दोका चमत्कारे कम थिआ, जे यीशु यहूदिया राज्य केआं एई कइ गलील राज्य अन्तर किआ।

Makinig sa यूहन्ना 4