Yemba - 2017 CABTAL (NT) Non Drama

Yemba - 2017 CABTAL (NT) Drama

Yɛɛ́so á fhó á ajʉʼ mɛ́t, ŋ́gʉ̄ɔ mé lekwɛ̄t Methʉ́ Olive. Á kó ŋgɔ́ etsōʼ etsōʼ nzemɛ́nzēm, á zéŋ mbīŋ nzem mé Mía Ŋgyā Ndém, alāʼ ntsem á nɔŋ eshʉ̄ʼɛ njʉ́ɔ á yí. Á náŋ á atetá, ńzī á lezīʼne á wɔ́p. Wɔ kɛ́ʼte‑mbé Ndém mbɔɔ epuɔ Falísia é lɔk mmɔʼ menzwí eshʉ̄ʼ, ńtshí á yí á mvhɔ alāʼ, mbɔ mɛ́ ŋkēm á yí á nɔŋ ŋghʉ̄ɛ agā. Ńdé á mbū Yɛɛ́so ŋ́gɛ: «Ńziʼnɛ, mɛ́ é kem á menzwí wuɔ, á nɔŋ ŋghʉ̄ɛ agā. Mɔɔ́sɛ a le tí á ntē aŋwaʼne lepé, ńdé mé pek ŋ́gɛ, pek elɔ̄k metɔ́ ntémte ntií menzwí jʉɔ mɛ́t nzwhí. Ŋ́gɔ́ mé wu, mbɔ o ó lé ajú ŋ́gɛ akɔ̄?» Pɔ́ lɛ́ ndʉ́ɛ́ páʼā, ńdɔkɔ ndʉ̄ʼɛ á Yɛɛ́so letā. Élɔk ewɛ anu zīi, pɔ́ e swiŋ á yí melaʼ épúp. Táʼ, Yɛɛ́so á lɛ ŋɔ́ʼne esī, ńzī á lelɔk á thu‑apū yi, ńtí á azō á esī. Pɔ́ zɛ́t ntswīʼnɛ nzɛ́ttɛ á Yɛɛ́so menu, Yɛɛ́so á pʉ́ʼɛ nnɛ̄t, ńdé á mbū pɔ́p ŋ́gɛ: «Ŋiŋ a gɔ́ɔ á nnɔ pɛ, mbɔ a la fā á, á lɛ nzī á letēm mvhɔ tɔ́ ánɛ yí. » Ńdé épúp, ńzéŋ ŋŋɔ́ʼne á esī, ńzī á letī azō á esī. Pɔ́ júʼ páʼ Yɛɛ́so a á lé épúp, ŋgʉ̄ɔ á taʼ taʼ. Ńzī ánɛ melʉɛ, tɛ Yɛɛ́so pɔ́ menzwí wɔ̄ mé cʉ́ʼ nzɛ́t éwú. Menzwí wɔ̄ á zɛ́t ntshí áa ajʉʼ zīi, mɛ́ ntshí á yí éwú lā. Yɛɛ́so á pʉ́ʼɛ nnɛ̄t, ńdé á mbū yí ŋ́gɛ: «Maá, pɔ́ piīŋ ŋgɔ́ áa egɔ́? Ŋiŋ a ka tswá ŋgʉɔ athʉ́ lepé ánɛ wu ú lɛ̄?» Á pwɛt ŋ́gɛ: «Tsɔ ŋiŋ me Ndi. » Yɛɛ́so á lé á mbū yí ŋ́gɛ: «Mbɔɔ meŋ azá, meŋ te e tswá á wú ŋgʉɔ athʉ́ lepé ɛ́. Gʉɔ̄, te shʉ̄ʉʼ ŋké nzéŋ éfā. »]

Yɛɛ́so á zéŋ nzī á lezīʼne alāʼ, ńdé á mbū pɔ́p ŋ́gɛ: «Meŋ á si ŋgɔ́ ŋkaʼ ŋgɔŋ. Ŋiŋ a cʉ́ɛ́ á nzem meŋ, mbɔ a te e láʼ eziŋ á ntē nzém ɛ́. Mbɔ a a wɛ ŋkaʼ yīi, é kɛʼɛ eyi legɔ̄ éwú. » Epuɔ Falísia é júʼ épúp, ńdé á mbū yí ŋ́gɛ: «Wu méŋwɛ̄t é si ntswíi ntāŋ ju. Anu zīi o ó si eshúŋɔ ánɛ athū nnɛ̄t ju, á té anuúnē ɛ́. » Yɛɛ́so á pwɛt á mbū pɔ́p ŋ́gɛ: «Á anuúnē ŋ́gɛ, meŋ méŋwɛ̄t é si ntswíi ntāŋ za. Á ké ŋgɔ́ páʼā, anu zīi, meŋ mbiŋɛ eshúŋɔ, á gɔ́ anuúnē, melaʼ mīi meŋ á si nzhɛ́ɛ ajʉʼ zīi, meŋ fhɔ́ɔ éwú, ńnɔŋ nzhɛ́ɛ ajʉʼ zīi meŋ gʉɔ mé éwú. Ḿbiŋ ŋgɔ́ mé pɛ, mbɔ pɛ te si nzhɛ́ɛ ajʉʼ zīi, meŋ fhɔ́ɔ éwú ú, ńnɔŋ te nzhɛ́ɛ ajʉʼ zīi, meŋ gʉɔ mé éwú ú. Pɛ gē ezáʼ á anu ŋiŋ, ńzáʼ áa ánɛ ntií epuɔ menɔŋ. Ŋ́ké ŋgɔ́ mé meŋ, mbɔ meŋ gɛ te nzáʼa anu ŋiŋ ɛ́. A piŋɛ nzī ŋgɔ́ éyi, meŋ a záʼ anu ŋiŋ, mbɔ meŋ a lɔk áa anuúnē tɛ́ ezáʼe, melaʼ mīi meŋɛmeŋ mé té nzáʼ á. Pek ŋiŋ yīi, a le tó gá á ŋgɔŋ mé nnɔ. Mɛ́ le tí á ntē aŋwaʼne lepé zɛ́ ŋ́gɛ, wɔ njhʉɛ‑njʉ́ɔ mémpīa é nɔŋ eshúŋɔ á táʼ anu, mbɔ anu mɛ́t á anuúnē. Meŋ á si ntswíi ntāŋ za meŋ méŋwɛ̄t, Mɔʼɔ́ ga, páʼ a le tó á gá, á nɔŋ nzéŋɛ eshúŋɔ azí, ajū mīi a á si nzhɛ́ɛ ánɛ meŋ. » Pɔ́ zɛ́tte á yí ŋ́gɛ: «Mɔʼɔ́ wu mɛ́t a á egɔ́?» Yɛɛ́so á tsɔ́ʼ á mbū pɔ́p ŋ́gɛ: «Pɛ te si nzhɛ́ɛ á ŋiŋ yīi meŋ á ewiɛ́ ɛ́, ńnɔŋ te nzhɛ́ɛ á Mɔʼɔ́ ga á. Pɛ é ŋgwíʼe, ńnɔŋ nzhɛ́ɛ á gá, mbɔ pɛ é si nzéŋɛ nzhɛ́ɛ á Mɔʼɔ́ ga. »
Yɛɛ́so a le gē eshúŋ menu muɔ mɛ́t, ŋ́gɔ́ á Mía Ŋgyā Ndém nzíʼnɛ epuɔ, mé eshhʉ̄ ajʉʼ zīi mɛ́ féŋɛ ncup éwú. Ŋiŋ a te apū ánɛ yí zápa, melaʼ mīi azí afʉʼ, á le zɛ́t te kuʼ.

Yɛɛ́so á zéŋ ndé á mbū pɔ́p ŋ́gɛ: «Meŋ á si ŋgʉ̄ɔ gʉɔ. Pɛ e shʉʼ efaʼ á gá, táʼ, épiŋ ekwhʉ́ melaʼ mefa mɛ́. Ajʉʼ zīi, meŋ gʉɔ mé éwú, pɛ gɔ le kūʼ á legʉɔ éwú ú. » Mekém epuɔ Yúda é júʼ épúp, ndé ŋ́gɛ: «A gɔ́ aleʼé, mbɔ a wɛɛ̄ akwaŋte á yí á lezwhī nnɛ̄t zi, melaʼ mīi a á lé ŋ́gɛ, ajʉʼ zīi yí gʉɔ mé éwú, ḿpɛ gɔ le kūʼ á legʉɔ éwú ú. » Yɛɛ́so á pwɛt á mbū pɔ́p ŋ́gɛ: «Pɛ é si ŋgɔ́ epuɔ esī atsetsáʼ. Meŋ mbīiŋ ŋgɔ́ á ŋiŋ athʉ́ lephū. Pɛ́ é si ŋgɔ́ epuɔ ŋgɔŋ puɔ, meŋ mbīiŋ te ŋiŋ ŋgɔŋ wuɔ ɔ́. É melaʼ épúp tɛ́, meŋ á lé á mbū pɛ ŋ́gɛ, pɛ e shʉʼ ekwhʉ́ á ntē mefa mɛ́. Pɛ gɔ te véŋ ŋ́gɛ, “meŋ á kwaʼ ŋiŋ yīi, meŋ á ewiɛ́ ɛ́,” mbɔ pɛ e shʉʼ ekwhʉ́ á ntē mefa mɛ́. »
Pɔ́ zɛ́tte á yí ŋ́gɛ: «Wu wɔ̄, o ó awɔ́?» Á pwɛt á mbū pɔ́p ŋ́gɛ: «Meŋ á ŋiŋ yīi, tɛ efhó tɛ afʉʼ, meŋ te si néŋɛ té shúŋ á wɛ́ ɛ́ lā. Ŋ́gɔ́ mé pɛ, mbɔ meŋ zɛɛ́t ŋgwɛ menu tɛ nzáne mīi, meŋ a shúŋ ánɛ pɛ, mbɔɔ emi meŋ a záʼe. Táʼ, ŋiŋ yīi, a le tó á gá á ŋgɔŋ, a á ŋgaŋ anuúnē. Anu zīi, meŋ ke júʼ á mbū yí, aziɛ́ tɛ́ meŋ á si eshúŋɔ á mbū ŋgɔŋ. » Á lé épúp, pɔ́ té júʼ á légɛ, a lɔkɔ eshúŋɔ anu ánɛ Mɔʼɔ́ yi í. Yɛɛ́so á lɛ ndé á mbū pɔ́p ŋ́gɛ: «Afʉʼ zīi, pɛ e shʉʼ ekɔ́ʼne á Méŋ‑Ŋiŋnɔŋ wuɔ ánɛ mbaŋne paŋné, pɛ ezhɛ́ á légɛ, “meŋ á kwaʼ ŋiŋ yīi, meŋ á ewiɛ́”. Ńzhɛ́ á légɛ, amɔ̄ʼ ajū mīi, meŋ méŋwɛ̄t mé ghʉɛ, á té éwú ú. Meŋ á si eshúŋɔ ajū mīi, Mɔʼɔ́ ga a le ziʼné á gá. Pek ŋiŋ yīi, a le tó á gá á ŋgɔŋ mé nnɔ. A ka tshi á gá néŋ, meŋ cʉ́ʼ meŋɛmeŋ ɛ́, melaʼ mīi, meŋ mbúu ŋghʉ áa ajū mīi, a pɔŋ á yí. » Yɛɛ́so á zɛ́t eshúŋne shúŋne, epuɔ tɛ nzáne é fɛ́ nnɛ̄t ŋgyá á mbū yí.

Yɛɛ́so á lɛ ndé á mbū epuɔ Yúda pīi, pɔ́ ke fɛ́ nnɛ̄t ŋgyá á mbū yí ŋ́gɛ: «Pɛ ziŋɛ páʼ menu mīi, meŋ á zíʼne á wɛ́, é si ndʉ́ɛ́ épúp, mbɔ pɛ é si ŋgɔ́ á kwaʼ epuɔ nnɔ pá. Púp, pɛ ezhɛ́ á anu zīi á anuúnē ánɛ Ndém, anuúnē mɛ́t a epiŋ ŋghʉ̄, pɛ é le zɛ́t epuʼ ɔ́. » Pɔ́ tsɔ́ʼ á mbū yí ŋ́gɛ: «Pek é si ŋgɔ́ ndhu Ablaham. Ŋiŋ a laá nzi ndɔ̄k á wék, ŋ́ghʉ̄ epuʼ tsí í. O gɔ́ epīiŋ ŋgāa ndé ŋ́gɛ, pek é le zɛ́t epuʼ ɔ́ ɔ̄?» Yɛɛ́so á tsɔ́ʼ á mbū pɔ́p ŋ́gɛ: «Kwaʼ anuúnē anuúnē, meŋ shúŋɔ á wɛ́ ŋ́gɛ, ŋiŋ ntsem yīi a naáŋ á ntē mefa, a á si ŋgɔ́ á apuʼ mefa. Apuʼ á té si ŋgɔ́ á ŋiŋ atseŋ ŋgyā á, mɔ́ ŋgyā, a puú ŋgɔ́ á ŋiŋ atseŋ ŋgyā á lemiʼɛ. Á épúp tɛ́, Méŋ Ndém, a fhɔ́ɔ á ŋgyā ŋkwa efók á wɛ́, mbɔ pɛ puú te zɛ́t epuʼ ɔ́. Meŋ á si nzhɛ́ɛ á légɛ, pɛ é ndhu Ablaham. Pɛ é si mbiŋɛ efāʼa á lezwhī meŋ, melaʼ mīi, pɛ zi te si ŋkúʼtɛ anu zīi meŋ nzíʼnɛ á wɛ́ ɛ́. Meŋ á si ŋké eshúŋɔ áa ajū mīi, Mɔʼɔ́ ga a ke tswī á gá. Ŋ́gɔ́ mé pɛ, pɛ pīiŋ nnɔ̄ŋ ŋghʉ̄ɛ áa ajū mīi, ewɛ mɔʼɔ́ a ke shúŋ á wɛ́. »
Pɔ́ júʼ épúp, ḿbwɛ̄t á mbū yí ŋ́gɛ: «Ablaham mé mɔʼɔ́ wek. » Yɛɛ́so á lé mé pɔ́p ŋ́gɛ: «Á ŋgwíʼe ŋgɔ́ éyi, pɛ é epɔ̄ Ablaham, mbɔ pɛ é ghʉ páʼ a lɛɛ́ ŋghʉɛ épúp. Meŋ á shúŋ á wɛ́ anuúnē zīi, meŋ ke júʼ á mbū Ndém. Pɛ piīŋ ŋgɔ́ tsetsɔŋɔ, éfāʼa á lezwhī meŋ, mbɔ Ablaham a lɛ te épúp ghʉ. Pɛ é si ŋghʉ̄ɛ azɛ́ mefaʼ mīi, ewɛ mɔʼɔ́ a gɛ ŋghʉ̄ɛ. » Pɔ́ tsɔ́ʼ á mbū yí ŋ́gɛ: «Pek te si ŋgɔ́ epɔ̄ agā á. Pek wɛɛ̄ áa taʼ Mɔʼɔ́ ndaʼ, á gɔ́ á Ndém. » Yɛɛ́so á lé mé pɔ́p ŋ́gɛ: «Ndém a á ŋgwíʼe ŋgɔ́ á Mɔʼɔ́ wɛ, mbɔ pɛ kɔɔ̄ŋ á gá, melaʼ mīi, meŋ nde tó áa ánɛ yí, meŋ á ega páʼa, áa melaʼ mí. Meŋ méŋwɛ̄t mé lɛ te kɔ̄ŋ eshʉ̄ʼ ɛ́. Yí mé le tó á gá á ŋgɔŋ ega. Melaʼ akɔ̄ pɛ te njúʼɔ ashuŋne zá ā? Meŋ ndʉ́ɛ́ páʼa melaʼ mīi, meŋ á si njʉ́ɔ, pɛ te nzwíʼtɛ anu zīi meŋ shúŋɔ á wɛ́ ɛ́. Mɔʼɔ́ wɛ a á si ŋgɔ́ á Sɛ́ta. Pɛ pīiŋ mbɔ́ŋte á wɛ́ á leghʉ ajū mīi, a á si ŋkɔ̄ŋɔ. Tɛ efhó á anɔŋɔ́‑ŋgɔŋ, á néŋ athū zí áa lezwhī ŋiŋ. A puú te kɔ̄ŋ á yí á leziŋ ánɛ anuúnē ɛ́, melaʼ mīi a puú nzi te ŋgaŋ anuúnē ɛ́. A nɔɔ̄ŋ ŋghíɛ mela páʼā, á gɔ́ áa páʼ ntē yí é épúp. Éfhó ánɛ páʼ, yí méŋwɛ̄t a á ŋgaŋ mela, ŋ́gɔ́ á mɔʼɔ́ mela. Ŋ́gɔ́ mé meŋ, mbɔ é melaʼ mīi meŋ shúŋɔ anuúnē, tɛ́ pɛ te ŋkɔ̄ŋɔ á levēŋ anu zá á. Awɔ́ a á nnɔ pɛ yīi, a gɔ́ etswii á gá á légɛ, meŋ á fa ā? A piŋɛ ŋgɔ́ éyi meŋ shúŋɔ anuúnē, mbɔ melaʼ akɔ̄ pɛ te mvéŋɛ ɛ̄? Ŋiŋ yīi a á ŋiŋ Ndém, a juúʼ ashuŋne Ndém. Pɛ pīiŋ te epuɔ Ndém ɛ́, é melaʼ épúp tɛ́, pɛ te njúʼɔ ashuŋne zá á. »
Mekém epuɔ Yúda é pwɛt á mbū yí ŋ́gɛ: «Pek ka fā á légɛ, o ó ŋiŋ Samalía, ńzéŋ ŋgɔ́ á ŋiŋ yīi, esī é lé gɔ á yí í. » Yɛɛ́so á pwɛt á mbū pɔ́p ŋ́gɛ: «Esī e la á gá gɔ̄ ɔ́. Meŋ á si ŋgyáa áa mekuʼ Mɔʼɔ́ ga. Pɛ ké mbīŋ nnɔŋ mmāʼa esē á athū meŋ. Meŋ zi nnɔ̄ŋ te efāʼa ŋ́gɛ, mɛ́ ewūʼte á gá á. Ŋiŋ a á éwú yīi, a á si efāʼa ŋ́gɛ, mɛ́ ewūʼte á gá. Ŋgaŋ mé pɔŋteé á letɔ̄k nzem za. Kwaʼ anuúnē anuúnē, meŋ shúŋɔ á wɛ́ ŋ́gɛ, ŋiŋ a ziŋɛ páʼ ashuŋne zá á si ndʉ́ɛ́ épúp, mbɔ ŋgaŋ a te e láʼ ekwhʉ́ ɛ́. » Mekém epuɔ Yúda é lɛ ndé á mbū yí ŋ́gɛ: «Pek é ké mbū nzhɛ́ɛ tsetsɔŋɔ á légɛ, esī e lē ŋgɔ á wú. Ablaham a lē ŋkwhʉ́, metswi‑ŋke Ndém é zéŋ ŋkwhʉ́te azɔ́p. Wu wɔ̄, o pīiŋ ŋgɔ́ ega ndʉ́ɛ́ ŋ́gɛ, ŋiŋ a ziŋɛ páʼ ashuŋne jú á si ndʉ́ɛ́ épúp, mbɔ a te e láʼ ekwhʉ́ ɛ́. Mɔʼɔ́ wek Ablaham á lē ŋkwhʉ́. O ó páʼa ndɔkɔ ŋ́gɛ, o tsyaā á yí lɛ́? Metswi‑ŋke Ndém é le zéŋ ŋkwhʉ́te azɔ́p. O ó páʼa njʉ́ɔ ŋ́gɛ, o gɔ́ áa awɔ́?»
Yɛɛ́so á pwɛt á mbū pɔ́p ŋ́gɛ: «Á ŋgwíʼe ŋgɔ́ éyi, meŋ á si ntɔ̄ʼɔ acɔʼ, ńtswīi mé apū, mbɔ leŋia mɛ́t a te azō ɔ́. Mɔʼɔ́ ga mé gɔ eghʉ̄ʉ, mɛ́ kɔ́ʼne nzwiŋ gá, á yí yīi, pɛ é si ndʉ́ɛ́ ŋ́gɛ, a á Ndém wɛ lā. » Pɛ te si nzhɛ́ɛ á yí í, meŋ mbīiŋ ŋgɔ́ si nzhɛ́ɛ á yí. Meŋ ndʉ́ɛ́ ŋ́gɛ, meŋ te si nzhɛ́ɛ á yí í, mbɔ meŋ á páʼa, ńdɔk ŋgɔ́ á ŋgaŋ mela páʼ pɛ lā. Meŋ á si ŋké mbiŋɛ nzhɛ́ɛ á yí, ńnɔŋ nzīŋɛ páʼ ashuŋne zí, á si ndʉ́ɛ́ épúp. Mɔʼɔ́ wɛ Ablaham a le kwaŋtē páʼ meŋ a fú eshʉʼ á ŋgɔŋ, ŋgɔŋ é pɔŋ á yí tɛʼ. Ŋ́kwāŋte épúp, ńzéŋ njʉ́ɔ, ḿbú nnáŋ mé lekāk. » Yɛɛ́so á lé páʼa mɛ́t, mekém epuɔ Yúda é lé á mbū yí ŋ́gɛ: «O zi te kūʼ ŋguʼ megēm táa á, ḿbiŋ ŋgɔ́ egā ŋ́gɛ, o le jʉ́ɔ́ á Ablaham lɛ́?» Á pwɛt á mbū pɔ́p ŋ́gɛ: «Kwaʼ anuúnē anuúnē, meŋ shúŋɔ á wɛ́ ŋ́gɛ, meŋ á éwú, tɛ mɛ́ zi nzɛ́t te zhí á Ablaham. » Pɔ́ júʼ épúp, ḿbɛ́te metɔ́ ŋgɔ̄ elɔk etémte á yí, táʼ, á lɛ ŋgwhʉ̄ á esī mbí, éfhó á ntē Mía Ŋgyā Ndém ntó.

Makinig sa Jáaŋ 8