Ge’ez - 2021 - BSE (NT) Non Drama

Ge’ez - 2021 - BSE (NT) Drama

ወበውእቱ መዋዕል ሰምዐ ሄሮድስ ንጉሥ ነገሮ ለእግዚእ ኢየሱስ። ወይቤሎሙ ለአግብርቲሁ ዝ ውእቱ ዮሐንስ መጥምቅ ውእቱ ተንሥአ እሙታን ወበእንተ ዝንቱ ይትገበራ ኀይላት ቦቱ። እስመ ውእቱ ሄሮድስ አኀዞ ለዮሐንስ ወሞቅሖ በቤተ ሞቅሕ በእንተ ሄሮድያዳ ብእሲተ ፊልጶስ እኁሁ እስመ ኪያሃ አውሰበ እስመ ይቤሎ ዮሐንስ ሎቱ ኢይከውነከ ታውስብ ብእሲተ እኁከ ፊልጶስ። ወእንዘ ይፈቅድ ይቅትሎ ይፈርሆሙ ለሕዝብ እስመ ከመ ነቢይ ይሬእይዎ ለዮሐንስ። ወከዊኖ ዕለተ ልደቱ ለሄሮድስ መጽአት ወለተ ሄሮድያዳ ወዘነፈት ሎቱ በማእከሎሙ ወአደመቶ ለሄሮድስ። ወበእንተዝ መሐለ ላቲ ከመ የሀባ ዘሰአለቶ። ወይእቲሰ አቅደመት አእምሮ በኀበ እማ ወትቤሎ ሀበኒ በዝየ በጻሕል ርእሶ ለዮሐንስ መጥምቅ። ወተከዘ ንጉሥ በእንተ መሐላሁ ወበእንተ እለ ይረፍቁ ምስሌሁ ወአዘዘ ከመ የሀብዋ። ወፈነወ ሶቤሃ መስተራትዓተ ሐራ ወመተሩ ርእሶ ለዮሐንስ በቤተ ሞቅሕ። ወአምጽኡ ርእሶ በጻሕል ወወሀብዋ ለይእቲ ወለት ወይእቲሰ ወሰደት ወወሀበት ለእማ። ወመጽኡ አርዳኢሁ ወነሥኡ በድኖ ወቀበርዎ ወመጺኦሙ ዜነውዎ ለእግዚእ ኢየሱስ።

ወሰሚዖ እግዚእ ኢየሱስ ተግኅሠ እምህየ በሐመር ውስተ ገዳም እንተ ባሕቲቱ ወሰሚዖሙ አሕዛብ ተለውዎ በእግር እምአህጉር። ወወፂኦ ርእየ ብዙኃነ አሕዛበ ወምሕሮሙ ወአሕየወ ድዉያኒሆሙ። ወምሴተ ከዊኖ ቀርቡ ኀቤሁ አርዳኢሁ ወይቤልዎ ገዳም ውእቱ ብሔር ወሰዓቱኒ ኀለፈ ፈንዎሙ ለአሕዛብ ከመ ይሑሩ ውስተ አህጉር ወይሣየጡ ለርእሶሙ መብልዐ። ወይቤሎሙ እግዚእ ኢየሱስ አኮ መፍትው ይሑሩ ርኁባኒሆሙ አላ ሀብዎሙ አንትሙ ዘይበልዑ። ወይቤልዎ አልብነ ዝየ ዘእንበለ ኀምስ ኅብስት ወክልኤቲ ዓሣ። ወይቤሎሙ አምጽእዎን ሊተ ዝየ። ወአዘዞሙ ለሰብእ ይርፍቁ ዲበ ሣዕር ወነሥአ ውእተ ኀምሰ ኅብስተ ወክልኤ ዓሣ ወነጸረ ኀበ ሰማይ ወባረከ ወፈተተ ወወሀበ ለአርዳኢሁ ወአርዳኢሁኒ አቅረቡ ለሕዝብ። ወበልዑ ኵሎሙ ወጸግቡ ወአግኀሡ ዘተርፈ ፍተታተ ወመልአ ዐሠርተ ወክልኤተ መዛርዐ ምሉአ። ወእለሰ በልዑ እሙንቱ ሰብእ የአክሉ ኀምሳ ምእት ብእሲ ዘእንበለ አንስት ወደቅ።

ወአዘዞሙ ሶቤሃ ለአርዳኢሁ ከመ ይዕርጉ ውስተ ሐመር ወይቅድምዎ ወይሑሩ ኀበ ማዕዶተ ባሕር እስከ ሶበ ይፌንዎሙ ለአሕዛብ። ወእምዝ ፈትሖሙ ለአሕዛብ ወዐርገ ውስተ ደብር እንተ ባሕቲቱ ይጸሊ ወምሴተ ከዊኖ ባሕቲቱ ሀሎ ህየ። ወሐመርሰ ናሁ ሀሎ ማእከለ ባሕር ርኁቀ መጠነ ዕሥራ ወኀምስቱ ምዕራፍ ወይትሀወክ እሞገድ ወያመነድቦ ማዕበለ ባሕር እስመ እምቅድሜሁ ውእቱ ነፋስ። ወበራብዕት ሰዓተ ሌሊት መጽአ ኀቤሆሙ እግዚእ ኢየሱስ እንዘ የሐውር ዲበ ባሕር። ወሶበ ርእይዎ አርዳኢሁ እንዘ ዲበ ባሕር የሐውር ደንገፁ ወፈርሁ እንዘ ይብሉ ምትሐት ውእቱ ወእምግርማሁ ዐውየዉ። ወበጊዜሃ ተናገሮሙ እግዚእ ኢየሱስ እንዘ ይብል ተአመኑ አነ ውእቱ ኢትፍርሁ። ወአውሥአ ጴጥሮስ ወይቤ እመሰ አንተሁ እግዚኦ አዝዘኒ እምጻእ ኀቤከ እንተ ዲበ ማይ፤ ወይቤሎ ነዓ ወወሪዶ ጴጥሮስ እምዲበ ሐመር ሖረ ዲበ ማይ ይብጻሕ ኀበ እግዚእ ኢየሱስ። ወሶበ ርእየ ነፋሰ ኀያለ ፈርሀ ወአኀዘ ይሰጠም ወዐውየወ ሶቤሃ እንዘ ይብል እግዚኦ አድኅነኒ። ወሶቤሃ ሰፍሐ እዴሁ እግዚእ ኢየሱስ ወአኀዞ ወይቤሎ ውኁደ ሃይማኖት ለምንት ናፈቀ። ወዐሪጎ ውስተ ሐመር ይእተ ጊዜ ኀደገ ነፋስ። ወእለ ውስተ ሐመር ሰገዱ ሎቱ እንዘ ይብሉ አማን ወልደ እግዚአብሔር አንተ። ወዓዲዎሙ ባሕረ በጽሑ ምድረ ጌንሴሬጥ። ወአእመርዎ ሰብአ ውእቱ ብሔር ወፈነዉ ኀበ ኵሉ አድያም ወአምጽኡ ሎቱ ኵሎ ሕሙማነ። ወአስተብቍዕዎ ከመ ይግሥሡ ጽንፈ ልብሱ እስመ ኵሎሙ እለ ገሠሥዎ የሐይዉ።

Makinig sa ወንጌል ዘማቴዎስ 14