Nyiha, Tanzania: ULufingwi uLupwa (New Testament+)

ULufingwi uLupwa

Isiku lyeliila, uYeesu ahafuma mu nyumba yiila, ahasogola ahatendama pa luvhazu pa sumbi. Ivhungaana ipiti ilya vhantu lihinza pe uYeesu áamile, pe uweene ahalimbila mwi ivhooti nu kutendama muumwo. Avhantu ivho vhahasyala vhimiliiye pa luvhazu pa sumbi. Pe uYeesu ahavhavhuuzya amazwi aminji ku viholanyo. Ishiholanyo shimo ahati, “Umulimi wumo ásogooye kupesa imbeyu zyakwe. Lwe akupesa, imbeyu zimo zihagwila pa luvhazu pi idala, inyunyi zihinza, zihalya. Izyamwavho zihagwila pi iyalaawe, pe patáamile intope inyinji. Izyene zihamela naluvhiilo, mwe pe patáamile intope inyinji. Ileelo lwe ahasanya haalama, imbeyu izyo zihafwoha nu kwuma, mwe pe amazi gaakwe gatíisile pansi nkaani. Izyamwavho zihagwila pahati pa mimvwa, lwe amimvwa igo gaakula, gahazibuda. Izyamwavho zihagwila pa nsi inyinza. Pe lwe zyela, zimo zihapaapa amantonongwa 100, izyamwavho 60, izyamwavho zihapaapa amantonongwa 30.” Havhili ahati, “We ali na makutwi, atejeelezye!”


Avhasundikwa avha Yeesu vhahinza, vhahamuvhuziilizya vhahati, “Shooni she ukuyanga na vhantu ku viholanyo?” Uweene ahavhaamula ahati, “Imwe uMulungu avhapiiye kuzimanya izya kukwilu izya vhumwene vhwakwe. Ileelo avheene atavhapiiye kuzimanya zyonti izyo. Nkuyanga vhwevhulo, mwe pe umuntu wonti we azimanyile hansi inongwa izya vhumwene uvhwa Mulungu, uMulungu aliimupa kuzimanya nkaani. Ileelo umuntu we atazimanyile, uMulungu aliyeefwa poosye kumanya kwakwe ukunsi kwe ali nakwo. Ye nongwa nkuyanga navho ku viholanyo, mwe pe vhakwenya zye nkuvhomba, ileelo vhatakuzilola, havhili vhakutejeelezya zye nkuyanga ileelo vhatakwivwa, poosye kumanyinsanya. Izi zikuvhombwa ku kwavho, inga vhulunjishe uvhukuvhwi vhwe uYisaayi áyanzile kuuti,
‘Nalyoli muliyivwaga, ileelo te muhamanyinsanyaaje.
Havhili nalyoli muliyenyaaga, ileelo te muhazisinkamizyaje.
Avhantu ivha amooyo gaavho magomu,
na makutwi gaavho gatakwivwa,
na minso gaavho vhasinziliiye.
Inga te she shiyo, aminso gaavho, nkandi gakulola,
na makutwi gaavho, nkandi gakwivwa,
havhili, nkandi vhakumanyinsanya ku nsiivho zyavho,
pe vhapindushe inga mbaposhe.’”
UYeesu ahati, “Mulosiitwe imwe, mwe pe aminso giinyu gakulola na makutwi giinyu gakwivwa. Nalyoli nkuvhavhuuzya kuuti, vháliipo avhakuvhwi avhinji na vhantu avhinji avhagolosu vhe vhányonyiilwe kuzilola zye mukuzilola imwe, ileelo vhatázivhwenyi. Havhili vhahanzaga kuzyivwa zye mukuzyivwa imwe, ileelo vhatázyivuuye.”


“Ishi pe mutejeelezye inongwa izya shiholanyo isha mulimi we ahapesaga imbeyu. Umuntu wonti we akulitejeelezya izwi ilya vhumwene uvhwa Mulungu ileelo atakulimanyinsanya, pe uMuvhiivhi ula akwinza nu kulisompola lye uMulungu alivhwaye mu mwoyo waakwe. Umuntu uyo akuholana ni mbeyu ye yágwiliiye pa luvhazu pi idala. Imbeyu zye zyágwiliiye pansi pi iyalaawe shiholanyo isha vhantu vhe vhakwivwa izwi ilya Mulungu nu kuliposheela naluvhiilo ku luseshelo. Ileelo, mwe pe amazi muhati yaakwe gatiisile pansi nkaani, izwi ilyo likutendama ku havhaliilizyo hansi vhweleele. Amayimba poosye amalavha inga gamwaga kuzya izwi ilya Mulungu, naluvhiilo akulileha. Imbeyu zye zyágwiliiye mu mimvwa, shiholanyo isha vhantu vhaala vhe vhakwivwa izwi ilya Mulungu, ileelo pisinda mu vhulanzi vhwavho, vhakulemwa na maganigani nu kutepushila mu vhudumbwe na mu nyinza izya mu nsi. Izyo zikuliviganya izwi ilyo nu kulivhiiha kuuti lipootwe kupaapa. Imbeyu zye zyágwiliiye pa nsi inyinza, shiholanyo isha vhantu vhe vhakulitejeelezya izwi nu kulimanyinsanya. Avhantu ivho vhe vhamo vhakupaapa amantonongwa 100, avhamwavho 60 na vhamwavho vhakupaapa amantonongwa 30.”

UYeesu ahavhavhuuzya ishiholanyo ishamwavho ahati, “Uvhumwene uvhwa Mulungu vhuholiine nu muntu we ápesile imbeyu inyinza mu mugunda waakwe. Ileelo lwe avhantu vhonti vhakaasite, umulugu waakwe ahinza kupesa indezye mu ngana, pisinda aheepa. Lwe ingana yaamela nu kwanda kufumwa amatwe, indezye zyope zihamela. Pe avhavhomvi avha muhaata mugunda vhahinza kumuvhuziilizya kuuti, ‘We mwene, wápesile imbeyu inyinza mu mugunda waaho. Ishi indezye zyafuma kwoshi?’ Ahavhaamula ahati, ‘Umulugu we avhomvile izyo.’ Avhavhomvi vhaakwe vhahamuvhuziilizya vhahati, ‘Vhuli, ukwanza tusogole tusaagule?’ Ahati, ‘Ndaali, lwe mukusaagula indezye, mungasagulila pooka ni ngana. Muleshe vwonti vikule pooka, kufishila ahavhaliilizyo aha kuvuna. Ahavhaliilizyo iho, ndivhavhuuzya vhe vhakuvuna kuuti vhalundishe suuti indezye nu kuzipinya zivhe nsunzo, inga vhazipembe. Ileelo ingana vhayilundishe nu kuyisengula mu shanga shaane.’”


UYeesu ahavhavhuuzya ishiholanyo ishamwavho ahati, “Uvhumwene uvhwa Mulungu vhuholiine ni mbeyu iya haladaali, ye umuntu ányatuuye nu kuvhwala mu mugunda waakwe. Ileelo poosye she nyinsi kuluusya imbeyu zyonti, yikukula kuluusya amakwi gonti aga mu shilimbika, ni nyunyi zikutenjela mu nsamba zyakwe.”


UYeesu ahayanga ishiholanyo ishamwavho ahati, “Uvhumwene uvhwa Mulungu vhuholiine nu mulembo uwa kuluzizya we umwantanda wumo áwunyatuuye nu kuwusangaanya nu vhusu uvhwa ngana ivitundu vitatu. Lwe aahanya, umunya wonti wuhalula.”


Zyonti izyo uYeesu ahagavhuzyaga amavhungaana aga vhantu ku viholanyo. Atahavhavhuzyaga naashimo ishisita ishiholanyo. Izyo zyávhombesile, inga lilunjishe izwi lye umukuvhwi áyanzile átili,
“Ndiyanga na vhantu kwi idala ilya viholanyo.
Ndivhavhuuzya zye zyázyihiime
kufuma ku vhwandilo uvhwa nsi.”

Pe uYeesu ahalilaga ivhungaana ilya vhantu, ahinjila mu nyumba. Avhasundikwa vhaakwe vhahinza, vhahayanga vhahati, “Tulondovholele ishiholanyo isha ndezye zye zyámile mu mugunda.”
UYeesu ahavhaamula ahati, “Umuntu we ávhwaye imbeyu inyinza neene ne Mwana wa Aadamu. Umugunda ula, insi, imbeyu inyinza, vhaana vha vhumwene uvhwa Mulungu, ni ndezye, vhaana vha Muvhiivhi ula. Umulugu we ávhwaye indezye, wu mukwalanzi. Kuvuna, lisiku ilya kumpeleela ilya vhulonzi uvhwa nsi. Vhe vhakuvuna vhe vhahavhizya. Inza vwe indezye zikusaagulwa nu kupembwa mu mwoto, vwe ziliivha ku vhusililishilo uvhwa nsi. Ne Mwana wa Aadamu ndivhatumiilizya avhahavhizya vhaane, inga vhavhavhungaanishe nu kuvhafumwa mu vhumwene vhwane, avhantu vhonti vhe vhakuvhapuvwa avhamwavho na vhasambusu. Avhahavhizya ivho vhalivhasumba avhantu ivho mwi ipalaazya ilya mwoto, umwo vhalikuutaga nu kuyimba nkaani. Ileelo ahavhaliilizyo iho avhagolosu vhalilamaga mu vhumwene uvhwa Taata waavho ngati lizuvha. We ali na makutwi, atejeelezye!”

“Uvhumwene uvhwa Mulungu vhuholiine ni shintu isha nsavho she shizyisiilwe mu mugunda. Lwe umuntu wumo ashaaga, ahashizyiha havhili munuumwo. Pe ku luseshelo, ahasogola kukazya ivintu vwonti vwe áamile navwo, ahawukala umugunda uwo.
“Havhili, uvhumwene uvhwa Mulungu vhuholiine nu muntu wumo we akutaanania, we ásogooye kulondola ivhwe ilya nsavho. Lwe alyaga ivhwe ilya nsavho impiti nkaani, ahasogola kukazya ivintu vwonti vwe áamile navwo, ahinza ahalikala.”

“Havhili, uvhumwene uvhwa Mulungu vhuholiine nu lwelo lwe vhátezile mwa sumbi. Ulwelo ulwo luhalema inswi izya mavhiila mu mavhiila. Lwe ulwelo ulwo lwizula, vhahalukwesela kunzi kwa sumbi. Pe vhahatendama pansi nu kusevha inswi inyinza nu kuzivhiiha mu viseje, ileelo inswi imbiivhi vhahazisumba. Vwe ziliivha ku vhusililishilo uvhwa nsi. Avhahavhizya vhaliyinza nu kuvhasavhulanya avhatalamalandu kufuma mu vhagolosu. Avhahavhizya ivho vhalivhasumba avhatalamalandu mwi ipalaazya ilya mwoto, umwo vhalikuutaga nu kuyimba nkaani.”

UYeesu ahavhavhuziilizya avhasundikwa vhaakwe ahati, “Vhuli, mwazimanyinsanya zyonti izi zye navhavhuuzya?” Vhahamwamula vhahati, “Twazimanyinsanya.” Pe woope ahavhaamula ahati, “Umusambiilizi uwa ndajizyo izya Moose we musundikwa mu vhumwene uvhwa Mulungu, akuvha inza umuhaata nyumba we akufumwa ivintu ivipwa ni vikaali mu nkoma yaakwe.”


Lwe uYeesu aamala kuyanga iviholanyo ivwo, aheepa paala. Lwe aafiha mu nkaaya iya ku mwavho, ahataliha kuvhasambiilizya avhantu mwi isinagoogi lyavho. Avhantu ivho vhahasukumila nu kuvhuzilizanya kuuti, “Umuntu uno avhwazile kwoshi uvhushindamu uvhwa njeele na maha aga kuvhomba amafindango iga? Uno te mwana wa selemaala? Unyina te wu Maliiya? Havhili avhanine vhaakwe te vhe vha Yaakobu nu Yoosefu nu Siimoni nu Yuuda? Vhuli, avhanine avhalindu vhataliipo pa mwitu panaapa? Ishi azyaga kwoshi zyonti izi?” Vhahaviitwa nkaani nu kuhaana kumwitiha. Ileelo uYeesu ahavhavhuuzya ahati, “Umukuvhwi akushindikwa ukunji kwonti, ileelo ku mwavho, na ku vhantu avha mu nyumba yaakwe atakushindikwa.” UYeesu atávhomvile amafindango aminji ukwo, mwe pe avhantu ivho vhatámwitisile.

Makinig sa uMataayi 13