San Mateo 11

Uxeꞌla Juan Bautista bee beneꞌlla lu Jesuse

(Lc. 7:18-35)

1Chenu ulaxu nú unibiyaꞌ Jesuse lu chiꞌchiucu bee beneꞌnu nú xi che riꞌi beella, che uchiuꞌunu nze zeteꞌnu nu nze tixiuleꞌenu Stichiaꞌ Diose lubee bene lubee eyeche nú nchiucuꞌ lu iliu zeꞌe.

2Nu chenu nchiñi Juan Bautista niꞌcuꞌ ubeneꞌlla luye nú rriꞌi Jesuse. Che uxeꞌlalla chiucu chuna bee beneꞌlla, 3para nú che nedichiaꞌ beella lu Jesuse:

―¿Liꞌilu necalu Cristo enu nzu nú nzeꞌta la, urre lluaquieeru stucu enu enta la?

4Che ucuaqui Jesuse lubeella:

―Uquia tixiuleꞌehua lu Juan Bautista lunú rlañiꞌhua nu lunú rieneꞌhua. 5Udixiuleꞌehua lulla nú rlañiꞌlaꞌ bee bene enu nequieꞌlu nu bee bene enu necuxu see la bee nzeꞌe, nu leꞌca uyecaꞌlaꞌ bee bene enu seca elichia nú lee lepra, nu bee bene enu nenguataꞌ rieneꞌlaꞌ, nu bee bene enu unguti uhuañi zeca bee nzeꞌe, nu bee bene enu seca elitsi rieneꞌlaꞌ bedichiaꞌ nzeꞌcaꞌ Diose nú tsilaꞌa liꞌibeei. 6Ñia neca lu cuendaꞌ bee bene enu la chiecuꞌ arquiꞌ nú nzeli arquiꞌ liꞌá.

7Chenu nziue bee beneꞌ Juan enu uya lu Jesuse, che uquixie Jesuse nú uninu lubee bene zeꞌe equie cuendaꞌ Juan, nu uninu lubeella:

―¿Ti uya biꞌyahua lu yuu achi elu la nucuaꞌa bee bene? ¿Ti secahua nú neca bene enu uya biꞌyahua, tucu etaa nú rcuñi bii la? 8Urre ¿xa naa bene enu uya biꞌyahua? ¿Xieꞌ uya biꞌyahua tucu bene enu nutu laquie fiñu la? Liꞌihua nediyaꞌhua nú bee bene enu rutu laquie fiñu liñi palacio nucuaꞌa beella. 9¿Ti uya biꞌyahua che? ¿Uya biꞌyahua tucu profeta la? Neli nú scua necane, pero masescaꞌlá neca equiella luquela tucu profeta. 10Equie cuendaꞌ Juan quieꞌ rni lu ichiꞌ Stichiaꞌ Diose elu rni:

Xeꞌlaa tucu benea cha rluti lulu,

para nú recheꞌlla inziuꞌlu.

11Liꞌá nia luhua nu luye bee bene enu nucuaꞌa lu iliulabe lá chuꞌu niꞌ tucu bee bene enu masescaꞌlá neca equie tucu nú neca equie Juan Bautista. Pero bene enu menola neca equie liñibe elurnibiyaꞌ Diose nzeꞌe mase neca equie luquela Juan.

12’Desde bichia nú ubeꞌta Juan Bautista nu hasta nee, huaxi bee benechiquiꞌ rcuaꞌna xa modo chuꞌu elurnibiyaꞌ Diose. Nu bee bene enu neli rcuaꞌna nú chuꞌu elu rnibiyaꞌnu, liꞌibeella neca beella enu chuꞌu zeꞌe. 13Ley nú udeteꞌ Diose lu Moisés cuna yebee profeta udixiuleꞌe beella nú xi nzeꞌta aca, hasta bichia nu uriña Juan, 14nu tunu liꞌihua chili arquiꞌhua nú nia luhua, nú Juan neca profeta Elías enu uni bee profeta nú riña. 15Titse bee bene enu niarquiꞌ nú yeneꞌ nú rnia, quieꞌe diaca nzeꞌe.

16’¿Xa nia luhua nú xa neca bee bene enu nehuañi lu iliulabe quieꞌ nee? Liꞌá nia luhua nú neca beei xi neca bee enduꞌ enu rcuaꞌa ruꞌu iꞌya rita nu rixiali beei lusaꞌ beei, nú rnibeei: 17“Ungularu chí para nú yeꞌehua nu né yeꞌehua, nu leꞌca ungularu canción nú nehuana se, nu né unaꞌhua.” 18Scua necahua xne uriña Juan Bautista nú lá aculla nu leꞌca la hueꞌlla viñu nu rnihua nú nchiñi benechiquiꞌ arquiꞌlla. 19Neequie uriña liꞌá Bene enu uxeꞌla Diose, nú racua nu rueꞌa biñu, nu rnihua nú racuxetaꞌa nu riuꞌ arquia rueꞌa viñu nu rquietea bee bene enu rluꞌcu dula nu cuna bee bene enu rriꞌi cubre impuesto para Roma. Pero yebee bene rriꞌi beyaꞌ, liꞌibeella nediyaꞌ beella nú neca nzeꞌca lunú rriꞌi Diose.

Bee eyeche nú la niarquiꞌ zucuꞌ Stichiaꞌ Diose

(Lc. 10:13-15)

20Chequie uquixie Jesuse nú uquiꞌyaꞌnu bee bene bee eyeche elu mase uriꞌinu bee milagro, xne né tsanaꞌ arquiꞌbeei stula beei. Nu uninu lubeei:

21―¡Cueꞌhua bee bene Corazín! ¡Cueꞌhua bee bene Betsaida! Xne tunu eyeche Tiro cuna eyeche Sidón a aca bee milagro nú unga lachihua, xi tiembula a tsanaꞌ arquiꞌ bee bene zeꞌe stula beei, nu leꞌca a utu beei laquie natsa nu a tiqui beei tii equie beei, xi neca tucu seña nú lubeꞌ nú nehuana nzu arquiꞌbeei. 22Pero liꞌá nia luhua nú bichia chenu laxu iliulabe, maselá juerte castiya zecahua luquela nú zeca bee bene eyeche Tiro cuna eyeche Sidón. 23Nu liꞌihua bee bene eyeche Capernaum, ¿la zaꞌ arquiꞌhua nú riala chuꞌuhua liñibe? ¡Xne liꞌihua riala chuꞌuhua hasta elu mase aquié rquiꞌ ebila! Xne tunu eyeche Sodoma a aca bee milagro nú unga lachihua, che pianu hasta bee bichia quieꞌ nchiucuꞌscaꞌ bee eyeche cuaꞌ che. 24Pero liꞌá nia luhua nú bichia chenu laxu iliulabe mase juerte castiya nú zecahua luquela castiya nú zeca bee bene eyeche Sodoma.

Tucutsia Jesuse nediyaꞌ ti neca Pa liñibe

(Lc. 10:21-22)

25Bee bichia zeꞌe uni Jesuse: “Pa liñibe liꞌilu enu rnibiyaꞌ liñibe cuna lu iliulabe, zucu ayaa liꞌilu xne ulubeꞌlu lubee bene enu lecaxi reca, nu ucachiꞌlu lubee bene enu reca nu rriꞌi beyaꞌ. 26Scua necane Pa liñibe, xne scua niarquiꞌlu nú acane.

27’Uliquiꞌ Pa Diose nú nibiyaꞌa luye beenú nuꞌ. Lecati nediyaꞌ ti neca Jesucristo lliꞌñi Diose, Diose tsia nediyaꞌ nucuaꞌ, leꞌca tucutsia Jesucristo cuna bee bene enu nzeli arquiꞌ liꞌinu nuꞌlu Diose. 28Yehua bee bene enu nellaca nzenala lunú neca bee custumbre, nu yehua bee bene enu nellaca lu stula, utehua cuna liꞌá nu liꞌá riꞌá nú tsulachihua. 29Uzuꞌcuꞌhua stichiaꞌa, nu zeꞌtehua nú acahua bene nzeꞌca enu lleꞌna nzu arquiꞌ tucu nú necaa. Che riꞌá nú huañi nzeꞌcahua. 30Xne laca neriñaꞌ nú zucuꞌhua stichiaꞌa nu leꞌca laca neriñaꞌ nú riꞌihua lunú niarquia.

ที่ได้เลือกล่าสุด:

San Mateo 11: zpl

เน้นข้อความ

แบ่งปัน

คัดลอก