Иоанн 4
4
Иисүүс ба самаряан эхэнэр
1-3Иисүүс Иоаннһаашье олон шабинартай боложо, Иоаннһаашье олон хүнүүдые уһаар арюудхана гэжэ фарисейнүүд дуулаба. (Үнэхөөрөө Иисүүс Өөрөө хэнииешье уһаар арюудхадаггүй, харин Тэрэнэй шабинарынь арюудхадаг байгаа.) Иисүүс энээниие мэдээд, Иудейһээ гаража, һөөргөө Галилейдэ ошобо. 4Тэрэнэй харгы Самариин газар дайдаар ошоһон байна. 5Тиин Сихар гэжэ нэрэтэй самаряан хотодо Иисүүс хүрэжэ ерэбэ. Тэрэ хотонь Иосиф гэжэ хүбүүндээ Яковай үгэһэн хубита газарһаа холо бэшэ оршодог һэн. 6Тэндэнь Яковай худаг байдаг һэн ха. Иисүүс харгыдаа эсээд, тэрэ худагай хажууда ерэжэ, амархаяа һууба. Тиихэдэ хахад үдэр боложо байгаа.
7Худагһаа уһа удхахаяа самаряан эхэнэр ерэбэ.
– Намда уһа уулгажа хайрлыт, – гэжэ Иисүүс тэрэ эхэнэртэ хандаба. 8(Тэрэ үедэ Иисүүсэй шабинар эдихэ юумэ худалдажа абахаяа хото ошоһон байгаа.)
9– Иихэдээ хайшаа юм бэ? Та еврей хүн аад, самаряан эхэнэрһээ уһа эринэ гүт? – гэжэ тэрэнь Иисүүстэ гайхан хэлэбэ. (Ушарынь гэхэдэ, еврейнүүд самаряануудтай нэгэ амһартаһаа юумэ уудаг эдидэггүй һэн.)
10– Бурханай юу үршөөдэгые, шамһаа уһа эриһэн хүнэй Хэн байһые мэдэжэ байгаа һаа, ши өөрөө Тэрэниие гуйха бэлэйш, тиихэдэшни Тэрэ шамда амидаралта уһа үгэхэ һэн, – гэжэ Иисүүс харюусаба.
11– Эзэмни аа, энэ худаг гүнзэгыл, харин Та уһа удхаха хүнэггүйлта. Тиигээд амидаралта уһа хаанаһаа олохобта? 12Манай үбгэ эсэгэ Яковай манда орхиһон энэ худагһаа тэрэ өөрөөшье, тэрэнэй хүбүүдыньшье, мал адууһанииньшье уудаг һэн лэ. Та Яковһаа дээгүүр хүн гүт?
13– Энэ уһа ууһан хүн дахин ундаа хүрэхэ. 14Харин Минии үгэхэ уһа ууһан хүн хэзээдэшье ундаа хүрэхэгүй. Минии үгэхэ уһан тэрэ хүнэй досоо булаг болон дэлгэржэ, мүнхын амидарал олгохо.
15– Эзэмни аа, намда тиимэ уһа үгыт даа, тиигээ һаатнай, би ундаа хүрэхэеэ болижо, иишэ уһанда ерэхэеэ болихолби.
16– Ошожо, үбгэеэ наашань дуудаад ерэ, – гэжэ Иисүүс хэлэбэ.
17– Би нүхэргүйб, – гэжэ тэрэ эхэнэр харюусаба.
– Нүхэргүйб гэжэ ши зүб хэлээш. 18Ши таба дахин хадамда гарааш, мүнөө шамтай һуугша хүн үбгэншни бэшэ. Ши үнэн зүбөө хэлээш, – гэбэ Иисүүс.
19Тиихэдэнь эхэнэр:
– Эзэмни аа, Танай лүндэншэ байһые би ойлгожо байнаб, – гэжэ Иисүүстэ хэлэбэ. – 20Манай үбгэ эсэгэнэр энэ хада дээрэ гаража Бурханда мүргэдэг һэн, тиихэдэ таанар гансал Иерусалимда Бурханда мүргэхэ газар бии гэнэлта.
21– Эхэнэр аа, Намда этигэлши: таанад Эсэгэ Бурхандаа энэ хада дээрэшье гаража, Иерусалимдашье ошожо мүргэхэгүйт, тиимэ саг ерэжэ байна. 22Хэндэ һүзэглэн мүргэдэгөө таанад мэдэнэгүйт, харин бидэ хэндэ һүзэглэн мүргэжэ байдагаа мэдэнэбди: юртэмсэ дэлхэйн абаралга еврейнүүдһээ ерэхэ. 23Бурханай Һүлдын үнэн зүбэй һургаһан ёһоор Эсэгэ Бурханда үнэн зүбөөр һүгэдэн мүргэхэ саг ерэжэ байна, ерээдшье байна! Энэнь үнэн бодото һүгэдэлгэ мүн. Эсэгэ Бурхан Өөрыень иигэжэл хүндэлхые хүсэнэ. 24Бурхан болбол Һүлдэ мүн; тиин Бурханиие үнэн дээрээ хүндэлхэнь Һүлдын үнэн зүбэй һургаһан ёһоор Тэрээндэ һүгэдэн мүргэхэ болоно.
25– Бурханай табисуурта (ондоогоор хэлэбэл Христоос) ерэхэ, тиигээд бүгэдые манда ойлгуулха гэжэ мэдэнэб, – гэжэ эхэнэр хэлэбэ.
26– Тэрэшни Биб, шамтай мүнөө хөөрэлдэгшэ, – гэжэ Иисүүс харюусаба.
27Энэ үедэ Тэрэнэй шабинар бусажа ерэбэ. Иисүүсэй самаряан эхэнэртэй хөөрэлдэжэ байхада ехээр гайхалдабашье, юумэ асуубагүй. 28Тэрэ эхэнэрынь домбоёо хаяжа, хото ошожо, хүнүүдтэ:
29– Наһаараа хэһэн бүхы юумэнүүд тухаймни намда хэлэжэ үгэһэн Хүниие таанар ошожо харагты. Магад, Тэрэ Бурханай табисуурта аалам? – гэжэ дуулгаба.
30Тэдэ хүнүүд хотоһоо гаража, Иисүүстэ ошобо. 31Энэ үедэ шабинарынь:
– Рабби аа, эдеэлэгты! – гэжэ гуйба.
32– Эдихэ юумэн Намда бии, тэрээн тухаймни таанад мэдэнэгүйт, – гэжэ Иисүүс харюусаба.
33– Магад, Энээндэмнай хэн нэгэн эдихэ юумэ асараа гү даа? – гэжэ шабинарынь өөһэд хоорондоо хөөрэлдэбэ.
34– Намайе эльгээһэн Бурханай хүсэл дурыень бэелүүлэн, Намда даалгаһан ажалыень түгэсхэхэ – Минии хоол мүн, – гэжэ Иисүүс тэдэндээ ойлгуулба. – 35«Үшөө дүрбэн һараһаа таряа хуряаха саг ерэхэ» гэжэ таанар хэлэдэг бэшэ гүт? Харин мүнөө нюдөө нээгээд, таряалангай газар тээшэ харагты даа: талха таряан эдеэшэжэ, хадаха хуряахаар бэлэн болоод, халюуран сайран байна лэ. 36Таряа хадагша өөрынгөө түлөөһэ абадаг, мүнхэ амидаралай тула ургаса хуряадаг юм, тиин таряа таригшашье, таряа хадагшашье адли баясадаг байна. 37«Нэгэниинь таридаг, нүгөөдэнь хададаг» гэһэн оньһон үгэ мүнөө баталагдаба гээшэ. 38Таанарай урдань ажаллаагүй, бусадай хэһэн ажалай үрэ дүндэ хүртэхынтнай тула таряа хадахыетнай Би эльгээнэб.
39«Тэрэ хүн наһаараа хэһэн бүхы юумэнүүд тухаймни намда хэлэжэ үгөө» гэһэн эхэнэрэй ашаар, энэ хотын олон тоото самаряан зон Иисүүстэ этигэбэ. 40Самаряанууд Иисүүстэ ерэжэ, маанадтай үлыт даа гэжэ гуйба. Иисүүс тэндэ хоёр үдэрөөр үлэбэ. 41Самаряануудтай хөөрэлдэхэдэнь, Иисүүстэ бүри олон хүн этигэбэ.
42– Бидэ Танай хэлэһэнээр тухайлна бэшэбди, харин энэ Хүнэй хэлэһые өөһэдөө шагнаад байхадаа, энэ Хүн үнэхөөрөөл дэлхэйн зоной Абарагша байна гэжэ одоол мэдээбди, – гэжэ тэрэ эхэнэртэ самаряанууд хэлэбэд.
Түшэмэлэй хүбүүе абарба
43Хоёр хоноод, Иисүүс тэндэһээ Галилей ошобо. 44«Лүндэншые түрэһэн нютагтань хүндэлдэггүй», – гэжэ Иисүүс Өөрөө хэлээ һэн. 45Галилейдэ ерэхэдэнь, галилейнхин баяртайгаар угтаба, юундэб гэхэдэ, Иерусалимда болоһон найрта хабаадалсажа, тэндэ Иисүүсэй бүтээһэн бүхы гайхамшаг хэрэгүүдые хараһан байгаа бшуу.
46Иисүүс Галилейн Каанада дахин ерэбэ. Түрүүн энэ һуурида юрын уһа үзэмэй дараһан архи болгоо һэн. Капернаумда ажаһуудаг нэгэ түшэмэлэй хүбүүниинь ехээр үбдэжэ байгаа. 47Иисүүс Иудейһээ Галилейдэ бусаа гэжэ дуулаһаар, тэрэ түшэмэл Иисүүстэ ерэжэ:
– Капернаумда ерэжэ, үхэхэеэ байһан хүбүүем аргалыт даа, – гэжэ гуйба.
48– Гайхамшаг дүлгэ тэмдэгүүдые, хэрэгүүдые үзөөгүй һаа, хэнтнайшье этигэхэгүйл! – гэжэ Иисүүс харюусаба.
49– Эзэмни! Хүбүүнэймни наһа бараагүйдэ Капернаум ошоёл даа! – гэбэ түшэмэл.
50– Гэртээ хари, хүбүүншни амиды мэндэ байха, – гэбэ Иисүүс.
Тиихэдэнь тэрэ хүн Иисүүсэй хэлэһэн үгэнүүдтэ этигэжэ, замдаа мордобо. 51Бүри харгыдаа ябахадань, түшэмэлые зарасанарынь угтажа, хүбүүншни элүүр мэндэ болоо гэжэ дуулгаба.
52– Хүбүүнэймни бэень хэды сагта бараг болооб? – гэжэ тэрэ асууба.
– Үсэгэлдэр, үдэрэй нэгэ сагта халууниинь буураа, – гэжэ тэдэ харюусаба.
53«Хүбүүншни амиды мэндэ байха», – гэжэ Иисүүсэй хэлэһэн эгээл тэрэ сагта хүбүүмни эдэгээ гэжэ эсэгэнь мэдэрбэ. Тиигэжэ түшэмэл өөрөөшье, тэрэнэй гэртэхиньшье Иисүүстэ этигэбэ.
54Энэ Иудейһээ Галилейдэ ерэхэдээ Иисүүсэй харуулһан хоёрдохи гайхамшаг хэрэг мүн.
ที่ได้เลือกล่าสุด:
Иоанн 4: BurBBL2024
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
© Институт перевода Библии, перевод, комментарии, 2024
© Российское Библейское Общество, перевод, комментарии, 2024
© Оформление. Институт перевода Библии, 2024
