Maatiyos 6
6
Baaxentah yaxaynim
1“Tenah tamballawna ciloh sin xaqqe kinam aki xiyawhi afalle abtaanamko zeelita, akke wayemko carshelle geytima sin Abbaako casbe taalloona maki.
2Amaydo, baaxentah wulim taxaye gedda, tamaa munaafiqhiin xiyaw ten cawatoona ciloh sunagoogit kee shawaaricille akah abaanaaka balih, thurumba ishi nifille maatakin. Usun sinni casbe geyeenih yaniinim rummah sinak arhxiyuk ane. 3Baaxentah wulim taxaye gedda, ku mizgi gaba abak tanem, ku guri gaba aarhige waytoo, 4amayim lel ku muttuxuwa suctodde takko ciloh kinni. Suctodde yable ku Abba lel koh yafdaw kinni.
Maddari salaat
(Luukas 11:2-4)
5Tassilliin gedda lel tamaa munaafiqhiin balih takkoona sinalle mitane. Amayim lel usun aki marah yamballawna ciloh sunagoogit kee shawaaricti ongololudde daw-yarhxiinih yassilliinim kixinoonimhi sabbatah kinni. Usun sinni casbe geyeenih yaniinim lel rummah sinah warisha. 6Atu laakin tassilliye gedda, ishi buxtat caredde orobteh, caraf alifteyaako suctodde yane ku Abbah issillii. Suctodde yable ku Abba lel koh yafdaw kinni.
7 Aki-mari waani yaymangin gedda yamabbin sinne yakkaliinimhi sabbatah, tassilliin gedda tena balih gabbabbaacak foyya kin waani maymangina. 8Sin Abba kaa esserekkahko sin farhshishsham yaarhigemhi sabbatah, tena balih makkina. 9Amaydo atin taginah issilliya:
Carshelle geytima ni Abbaw, ku migac yanqaddasoo.
10Ku nigsinna tamaatoo,
kum carshelle akah tekkeekah lel ku farhi baarholle takkoo.
11Lellecti ni folo kaafa noh uxuu,
12nanu cida adde lino maralle akah xabnaakah, ni cida nolle xab.
13Uma tiyaako ni dhawurh kibah, cakanadde ni misayshin.
14Atin ten umaani alle xabteenimko, carshelle geytima sin Abba yakkeedo sinalle xabo kinni. 15Umam sinak abe maralle alle xabe wayteenimko laakin, sin Abba yakkeedo sinalle xabo maki.
Siyaam
16Tasoomin gedda lel, tamaa munaafiqhiin balih nif micabbaroyshina, amayim lel usun xiyaw akah yabloona ciloh yasoomin gedda nif yasketeeteynimhi sabbatah kinni. Usun sinni casbe kabbaateenih yaniinim, rummah sinak arhxiyuk ane. 17Laakin atu tasoome gedda, amo tussukuteh ishi nif cakalish, 18amayim lel ku siyaam suctodde yane ku Abba kiyah aki xiyaw yabliinimko ciloh kinni. Suctodde yable ku Abba lel koh yafdaw kinni.
Gadda carshelle siraaxita
(Luukas 12:33-34)
19Sinni cukra unun kee cillo alle baktah, garaacen yagdiliinih adde orobanyaako alle garacan baarholle mattakhzanintaaki, 20unun kee cillo alle bakinnixe, garaacen lel yagdiliinih adde orobenyaako garacinnixon cukra carshelle ittikhizzina. 21Amayim lel ku cukra alle tanelle, ku afcaado gantah tannaw kinamhi sabbatah kinni.
22Inti nabsi faanus kinni. Amaydo, ku inti temcemko umbuka ku nabsi ifo yaallo kinni, 23Ku inti toomemko laakin, umbuka ku nabsi dattowo kinni. Amaydo, kottadde yane ifi dite yekkemko, amaa dite ayidhdha tasrawo kinni?
24Wuli tiya yincibeh wuli tiya akxine, wuli tiya yeynebeh wuli tiya ilaace kibah, lamma maddara yakhdumeti miyane. Yalla kee gadda takhdamoona mirhictaana.
Manshaaqhalina
(Luukas 12:22-31; 16:13)
25Amaydo anu sinak arhxiyuk ane, ayim bettoona kee ayim taacaboona kitiinimih, hido sinni nabseh ayim sarittoona kitiinimih manshaaqhalina. Aniina folooko minaba? Nabsi lel sartimko minaba? 26Ubula caranti kimbir: carshelle geytima sin Abba kinni ten yayteeleem kibah, usun miyazriini, miyaciyyiini, ilaw makhaazinodde lel miyakhziniini. Atin tenko ziyaada kin limo litin makiho? 27Miyatto kinni lel sinko yemsheeqheleh ishi cumredde inki saaca oso dhiicati? 28Sartim sabbatah lel ayimih kinni tamsheeqheliinim? Zibi combooba mixawalta, mitaarufe hanuk aaginah carsimtam ubula. 29Suleymaan gantah ishi nabneelih tenko inketta balih misaritinnam rummah sinak arhxiyuk ane. 30Ko imaan dagito! Yalli kaafa lee tane, beera lee otonudde cidditto le zibi cashsho akko sarishaya, sina amayimko ziyaada sarisho mirhiica? 31Amaydo, ‘Ayim benno kino?’ hido ‘Ayim naacabo kino?’ hido ‘Ayim sarinno kino?’ terhxiinih manshaaqhalina. 32Amayim lel, tayim inkoh Aki-mari wagiyaanam kinni. Carshelle geytima sin Abba lel tayim inkoh sin farhshishsham yaarhige. 33Erherhih Yallih nigsinna kee kaa xaqqe wagiya, tayim lel inkoh sinah ossimto kinni.
34Beeri isheh yanshaaqhalooki beerah manshaaqhalina. Lellec kaa waqhaaqhac kaa dhiica.”
ที่ได้เลือกล่าสุด:
Maatiyos 6: SCC
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
©2024 Wycliffe Ethiopia
