Maatiyos 4
4
Yeesus cakana
(Markos 1:12-13; Luukas 4:3-13)
1Amayek sarrah lel, Quddus kin Ufayi Yeesus ibliisih yamcakkano zibolle kaa beye. 2Marootom lellectiya kee marootom bartiya yosoomemko sarrah lel safriite. 3Yascikkineti yemeeteh lel: “Yallih Barha tekkemko, ta dhayitik ‘Folo tik’ akko erhex” akko yerhxe. 4Usuk laakin:
“‘Xiyawti Yallih afko tawce umman kalimah kinni maram kibah,
foloh bisa mimara’#Gabbaacime Sercat 8:3
yarhxiinim tunkuttubeh kinni” yerhxeh alle yedebbe. 5Amayek sarrah ibliis qiddisti kin daafo fanah kaa beyeh, maqhdasti carih bukahi erherhak kaa hayeh: 6“Yallih Barha tekkemko, guballe ishe cid.
‘Ku zacabah ishi malaykut yeemereh
sinni gabubuh xaf ku ishoona kinon,
amaymih ku ibi dhayittodde gomfoyto maki’#Zaabur 91:11-12
yarhxiinim tunkuttubemhi zacabah kinni” akko yerhxe. 7Yeesus lel: “‘Maddara kin ishi Yalla tascakkano kolle mitane’#Gabbaacime Sercat 6:16 yarhxiinim gantah tunkuttubeh kinni” akko yerhxe. 8Malammih lel ibliis mangum dherh kooma fanah kaa beyeh, umbuka caalamti nigsinnan kee ten nabinta kaa yuybulluwe. 9“Cununteh yoh tucbudemko, tayim inkoh koh axawo kiyo” akko yerhxe. 10Amayek sarrah, Yeesus: “Aduu, ko Sheethano!
‘Maddara ishi Yallah ucbud,
kayyah bisa ukhdum’#Gabbaacime Sercat 6:13
yarhxiinim tunkuttubeh kinni” akko yerhxe. 11Amayek sarrah, ibliis kaa xabe, taykinna lel malaykut yemeetiinih kaa baclayshak yinin.
Yeesus ishi ciyyo erherhisha
(Markos 1:14-15)
12Yohannis yimxibbishem yoobbe gedda lel, Galiila fanah gaxe. 13Naazret xabeh lel Zebuulun kee Naftaali baarholle, igil gimamhi Kafarnaxuumulle sigo yedee. 14Nabii Isayas yerhxeh yinem takmalo ciloh:
15“Zebuulun baarho kee Naftaali baarho,
badti arax kin Yordaanos tabso, Galiilaati Aki-mara,
16ditedde sigta xiyaw, naba ifo yubliinih yanin,
amaa baarho kee rabit silaladde sigtamah,
ifi akah maaxe.”#Isayas 9:1
17Yeesus amaa waqhteeko: “Carshi nigsinna kab-terhxeh tanemhi sabbatah, otooba” arhxuk warroysho erherhishe.
Yeesus afti katattaynit doora
(Markos 1:16-20; Luukas 5:1-11)
18Yeesus Galiilaati igilhi afko gerhak lamma sacal, Simcoon (Bithroos akko yarhxinya) kee kaa sacal Indiryaas, caasa tagoofofem kuuk yiniinimhi sabbatah, caasat intile igilille cidak ten yuble. 19Usuk lel: “Yi kataanta, anu lel xiyaw tagoofofem sinak abo kiyo” akko yerhxe. 20Usun lel caasat intilel xabeenih akkanih kaa katayen. 21Amakkeeko yedee gedda, aki lamma sacal, Zibdit barha Yacqoob kee kaa sacal Yohannis, Zibdi ten abbaalih, sinni caasat intilel aymamacuk ten yuble. Akah lel deecime. 22Usun lel jalba kee sinni abba xabeenih akkanih kaa katayen.
Yeesus mango xiyaw yayduruse
(Luukas 6:17-19)
23Umbuka Galiilalle yedeeh, ten sunagoogedde aydurusuk, nigsinnat Mece Ware lel warroyshak, umman laxuu kee waaxeltaako lel xiyaw urusak hel-arhxuk yine. 24Wari lel kaa zacabah umbuka Suuriyalle faax-yerhxe. Inkoh amaa laxuuteenit, barhsime laxuu kee waaxelta lem, timjinninem, cida laxuu lem kee nabseeko kaftem alle baaheenih Yeesus lel ten uruse. 25Mango xiyaw lel Galiila kee “Tamana daafo”, Yerusaalem kee Yahuudiyaati baarhooko kee Yordaanos tabsooko lakadde akko katayen.
ที่ได้เลือกล่าสุด:
Maatiyos 4: SCC
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
©2024 Wycliffe Ethiopia
