मत्ती 16
16
1ओउःहाङः दाह्ती वाङ्आक्तीको फरीसीलम्मा सादुकीलम्मा येसुकःताङ् वाङ्ती “लौ परमेस्वर्कायः तोती ङीकायः ग्याङ्ह्राय् छ्यानःताङी दा” त दाय्ह्ती “ओउःइ खाय्नौया खाय्उलुया” त म्हर्ती योलाङ् वाङ्ती तोआकानी। 2ओउःत तोआक्तीको “लौ नीङ्पाय् मुस् न्याम्कोः कुरा चीःतेःनानी। न्याम् ब्लक्खेःओहाङः नीङ्इ अकास् योती ‘लौ द्याह् दुस्योपाङ् च्यवःनाः स्याङ्ह्पाय् न्याम् पेनाः’ त दाय्ह्ती नोःकाय्तेःनै 3फेरी न्याम् दाह्ओ बेलाहाङःमा नीङ् योती ‘लौ गाल्ओ मुस् वाङ्नाः तेन्पाय् तीः आन वानाः’ त दाय्ह्ती नोःकाय्तेःनै। नीङ्इ न्याम् मुस्खेकोः कुराखे तय्ह्तेःनानी बा दोह् हायःतीतेः परमेस्वर्कोः राजी वाङ्सा खेःओ छ्यानःराय्कोः कुराखे नीङ्इ तय्ह्तेःनीली। ओउः छ्यानःराय् च्यवःसापाय् च्यवःतेःनानी परमेस्वर्कोः राजीकः ग्यामाःत झ्यान्ते ओउः कुरातेः तय्ह्तेःनीली। 4नीङ्लो लेखा रेव्ओमा ङ्हाम्मालो मान्तालम्इ परमेस्वर्कःसै ग्याङ्ह्राय् बोङःतेःनानी दोङ्सीलेः ओउःमयःकायः ग्याङ्ह्राय्पाय् दोह्मा छ्यानःथासल ओउः उय्ह्ले परमेस्वर्कोः कुरा छ्यानःओ योनाह्कोः ग्याङ्ह्राय्लो ओउः ह च्यवःसा दोःतेःनै” त दाय्ह्ती येसु दाय्ह्आ। ओउःत दाय्ह्आक्तीको येसु फरीसीलम्मा सादुकीलम्कायःमा फेती आल्आ।
5ओहाङःसैको ओउःमयःकायः फेती फेरी दोङ्गाहाङः लन्ह्ती येसुमा ओउःकुस् वाह्ओमयःमा दुम्हान्कोः उःसै आल्आकाय्। आल्तोक्हाङः ओउःमयःइ जेःगा वानःसा म्हेःआकानी। 6ओहाङःसैको “लौ नीङ्इपाय् धय्ती योसा खेःतेःइतो। फरीसीमा सादुकीकोः लाङ् फेताक्सा ओखोत् त्याक्तेःचानी” त दाय्ह्ती येसुइ गानाक्ती तोथासतो 7“लौ ङीइ लाङ्पाय् वानःतय्ह्नीली त खेःओ ओउःइ ओउःतलेः तोआताङी” त दाय्ह्ती येसुकुस् वाह्ओमयः लयःमयःकुस् नोःकाय्आकाय्। 8ओउःमयः नोःकाय्ओ कुरा येसुइ चीःती “नीङ् ङ्हाम्चोःचाक्मयः दोह् हायःतीतेः ‘लौ ङीइ लाङ् वानःतय्ह्नीली त खेःओ ओउःतलेः तोआताङी’ त दाय्ह्ती नोःकाय्तेःनै। ओउःपाय् खेःल बा। 9नीङ्इ ङाकोः कुरा पेतो चीःतेःधाङ्तेःनीली। अनम्ह्कोः पास्केरः लाङ् पास् हजार् मान्तालम्कायः दोल्कावःती बयःओ कुरालेः म्हेःतेःआकानी यादो। बयःआक्तीको गुच्युक् धाकर्कायः ब्लीङ्तो कातेःआकानी ओउःमा नीङ्इ म्हेःतेःआकानी यादो। 10फेरी लोनेःकोः सात्केरः लाङ् चार् हजार् मान्तालम्कायः बयःआक्तीको गुच्युक् धाकर्कायः ब्लीङ्ताक्तेःआकानी। 11मेस्लोहाङः फरीसीमा सादुकीकोः लाङ् त्याक्तेःचानी त दाय्ह्ती तोतोक्हाङः ङाइ दोङ् जेःसा लाङ्कोः कुरा तोङल बा दोह् हायःतीतेः चीःतेःधाङ्तेःनीली। फरीसीमा सादुकीकोः लाङ् फेताक्सा ओखोत् त्याक्तेःचानी” त दाय्ह्ती येसुइ तोआथास। 12एत तोआक्ती “फरीसीकोः दोङ् लाङ्खे खेःल ओउःमयःकोः स्यान्राय्खे इपाय् सायःती त्याक्सा स्याव्ल” त दाय्ह्ती येसुइ मेस्लोहाङः तोओ खेःतो त चीःआकानी।
13एत चीःआकानी ओहाङःसैको येसुमा ओउःकुस् वाह्ओमयःमा सीजारीया फीलीपी त तोओ देस्ताङ् दाह्ती वाङ्आकाय्। ओहाङः दाह्ती वाङ्तोक्हाङः “लौ ङा ओउः मान्ताकोः चोः त तोओकायः ‘इपाय् सुलो’ त व्हत्तोक्हाङः मान्तालम्इ गत गत त्याङ्नै” त दाय्ह्ती येसुइ लयःकायः तोती ओउःकुस् वाह्ओमयःकायः व्हत्आकान्। 14“यात्नीस्खे नाङ्कायः ‘बाप्तीस्मा बयःओ युहनापाय् फेरीलेः वाङ्ओआः’ त नोःलेःनै अरुखे ‘एलीयालेः’ अरुखे ‘यात्चाक् परमेस्वर्कोः कुरा छ्यानःओ मान्ता लेःआः’ ओउःतलेः दाय्ह्ती नोःनै” त दाय्ह्ती येसुकुस् वाह्ओमयः त्याङ्आकाय्। 15“ओउःत खेःया नीङ्खेइ गतलो तोतेःनानानाङ्स” त दाय्ह्ती येसुइ व्हत्थासतो 16“नाङ्पाय् परमेस्वर्इ तोती गम्ओ ख्रीस् लेःतेःआः ओउः दोङ् जीङः नाःओ परमेस्वर्कोः चोःलेः” त दाय्ह्ती पत्रुस् त्याङ्आ। 17“लौ योनाह्कोः चोः सीमोन् त तोओ नाङ्कायः परमेस्वर् आन पेतो दोःताक्तेःआ बा। नाङ्इ देङी त्याङ्ओ कुरा मान्तालम्इ स्यान्ओ खेःल ङाकोः परमेस्वर् आपाइ ह स्यान्ती बयःओ लेःआः। 18लौ द्याह् पत्रुस् त बाङ्कोः मय्ङ् बयःनेःनाङ् इलो लेखा चेनःबाङ्हाङः ङाइ ङाकोः मान्तालम् देती गम्लेःनाङःसु ओउःमयःकायः दोह्इमा क्लीमःसा गलमा खाय्उलु 19नाङ्कायः ङाइ लाङ्काकोः फोल्सा खाय्ओ सान्चो बयःतेःनाः दोह् दोह् ल्हाव्ह्दैबाङ्हाङः नाङ्इ पानःतेःनौ ओउःलेः लाङ्काहाङः पानःओ लेःआः। दोह् दोह् ल्हाव्ह्दैबाङ्हाङः नाङ्इ फेन्तेःनौ ओउःलेः लाङ्काहाङः फेन्ओ लेःआः” त येसु दाय्ह्ती तोआथै। 20“लौ ङापाय् ओउः ख्रीस् त तोओलेः अरु सुकायःमा छ्यान्ह्तेःचानी” त दाय्ह्ती तोआथास।
21ओहाङःसैको येसुइ अरु कुरालेः स्यान्ती तोती “लौ ङापाय् यरुसालेम्ताङ् आल्सा खेःनाङः। ओहाङःकोः तोङ्ह्ओ मान्तालम्मा धर्मा स्यान्ओमयःमा ताङ्ह्ओ पुरोहीत्लम्इमा ङाकायः आन लीह्सीःतो जाङ्ह्ती लोनेः सात्लेःनाःताङः। सात्सापाय् सात्ताङःतो सुम्दीन् पुत्आक्तीको ङा उह्ती च्योक्लेःनाङः” त दाय्ह्ती येसुइ लोनेः स्याव्सा कुरालेः स्यान्ती तोआथास 22ओउःत तोओ कुरा सायःआक्तीको पत्रुस्इ येसुकायः एकान् मुसा थाव्ताङ् आलःती “अ प्रभुय नाङ्इ मेस् तोओकायः परमेस्वर्इ ताक्लाम् इलो ताङ्ह्ओ कुरापाय् नाङ्कायः स्याव्सा स्याव्लाम्” त दाय्ह्ती काय्थातो 23येसुखे ल्हेःती “लौ पाय्ह्अ नाङ्इ सैतान्कोः कुरा तोती ङाकायः परमेस्वर्कोः काम् फेताक्सा बोङःतेःनाःची दोह् हायःती दाय्ह्सा नाङ् परमेस्वर्कोः कुरापाय् म्हर्माःत मान्ताकोः कुरा झुङ्आले म्हर्तेःनाः” त दाय्ह्ती पत्रुस्कायः जान्आकान्। 24ओउःत जान्ती तोआक्तीको “सुसु ङाकुस् वाह्सा म्हर्नै ओउःलेः लयः झाक्ओ कुरा म्हयःसती ङाकुस् वाह्सा थेङा लीह्सीःओ गोरःसामा सीसामा ग्याती मुसा खेःतो। 25सुसुखे ङाकोः काम् जाङ्ह्सा थेङालेः ‘लौ इ ङा झाक्ओ कुरा फेसामा ग्याङल ङा सीसामा ग्याङल’ त म्हर्चै ओउःलेः लोन्ते सीती वाय्तो स्याव्आनै। सुसुखे ङाकोः काम् जाङ्ह्सा थेङा सीबत्नाःताङः ओउःलेः लोन्ते रौ जीङः दोःनै। 26माः रैस यात्चाक्इ ल्हाव्ह्दैबाङ्कोः सबै दोःसाकायः लयःकोः जीङः वाय्तो स्याव्नाः त खेःया ओउः मान्तालेः सामान्पाय् आह्रे दोःओ ह बा। लयःकोः जीङःपाय् मान्ता लेःसा जुगाङ् दोःल दोह् खेःयामा बयःती लेःसा दोःल। 27ओउः वाङ्सा खेःओ दीन्हाङः ओउः मान्ताकोः चोः त तोओपाय् परमेस्वर् आपालो लेखा अङ्ग थङ्ग त ताङ्ह्तोलेः ल्होक्ओमयःकुस् वाङ्नै। वाङ्आक्तीको मान्ता मान्ताकायः पेपेओ जाङ्ह्ओलम्खेकायः पेतो जाङ्ह्झ्याङ्कायः बयःनौ रेव्ओ जाङ्ह्ओलम्खेकायः पेमालो बयःनौ 28दोङ्सी दाय्ह्भनाङ् यात्नीस् इहाङः सायःती मुओ मान्तालम्इ लयः सीमाच्युक्हाङःलेः ओउः मान्ताकोः चोःकोः राजी च्यवःसा दोःनै” त दाय्ह्ती येसुइ तोआथास।
ที่ได้เลือกล่าสุด:
मत्ती 16: CDM93
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
© 1993 Wycliffe Bible Translators Inc., All Rights Reserved.
