मत्ती 10
10
1ओहाङःसैको येसुइ ओउः बारजन छ्युङ्ह्ओमयः लयःकःताङ् गोत्ती ओउःमयःकायः लान् ल्हेस्ताक्सामा सबै जीक्ओ स्याक्ताक्सामा ग्वम् बयःआथास। 2ओउः बारजन चल्ओमयः इतलेः मय्ङ्ओ खेःइतो। ङ्हापाय् सीमोन् त तोओलेः ओउःकोः अरु मय्ङ् पत्रुस् त खेःतो। फेरी पत्रुस्कोः पुः अन्द्रीयस्मा खेःतो। अरुपाय् याकुब् युहना त तोओ नीस्पुःचाः ओउःनीस्पाय् जबदी त तोओकोः चोःनीस्लेः खेःचतो। 3फेरी अरु फीलीप् बर्थोलोमा थोमा ओउः पैसा उथावओ मत्ती आल्फीयस्कोः चोः याकुब् त तोओ थादीयस् 4जेलोत्लम्कोः सीमोन्मा इस्करीयोत्कोः यहुदस्। ओउः यहुदस्इपाय् लोनेः येसुकायः सात्साकायः ल्हाआथै।
5इ बारजनकायः येसुइ ल्होक्आथास “लौ यहुदी खेःमालो मान्तालम्कःगनमा आल्लाम्। समारीया मान्तालम्कोः सहर्लम्हाङःमा पोक्लाम्। 6ओउःकःताङ् आल्माःत वेङ्तो स्याव्ओ इस्राएलीलम्कःताङ् आल्न दा। 7फेरी आल्तोक्हाङः ‘लौ परमेस्वर्कोः राजी दाह्खेःआ’ त दाय्ह्ती थोल्ह्ती तोनु। 8जीक्ओलम्कायः स्याक्ताक्नु। कोह्र्इ ङायःओलम्कायः सेलः स्याव्ताक्नु सीओकायः उह्ती च्योक्ताक्नु लान्लम्कायः ल्हेस्ताक्नु दा। नीङ्पाय् नाःतोतेः सोह्लेः दोःतेःआकाय् ओउःत झ्यान्ते सोह्लेः बयःनु। 9सुन् चान्दी पीताल् पैसा तोङःनाय्हाङः दोह्मा लात्लाम्। 10वाह्तोक्हाङः थैलोमा नीस् क्रमःनाय्मा लात्ती आलःलाम्। जुत्ता दङ्गमा लात्तेःचानी दोह् हायःती दाय्ह्सा ओउः काम् जाङ्ह्ओ मान्ताकायः दोह् दोह् राह्चाः ओउःलेः ओउःकोः जाङ्ह्झ्याङ्कोः दोःओ खेःतो। 11ओहाङःसैको गाव् गाव् सहर् गाव्हाङः नीङ् पोक्तेःनै पोक्तोक्हाङः सुसु नीङ्कायः रोम्सा ग्याओ मुनै ओउःकोः कीम्हाङः गाव्हाङः मुच्युक्कायःपाय् फेमाःत मुन। 12फेरी कीम्हाङः पोक्तोक्हाङः ‘लौ नीङ् पेतोतेः ल्हुङ् धोमाय्तोतेः स्याव्तेःपै’ त दाय्ह्ती कीम्कोः मान्तालम्कायः तोनु दा। 13ओहाङःसै ओउः मान्तालम्इ पेतो रोम्तेःइली त खेःया ओउः ङ्हा तोओ कुरा क्युम्ह्नीङ्सी। ओउःमयः पेतो हायःतेःनै त खेःया नीङ्इ तोओ कुरा मुपाः। 14सुसु कीम्कोः मान्तापाय् सहर्कोः मान्तापाय् नीङ्कायः रोम्मातेःइली नीङ्इ तोओ कुरा सायःमानीली ओउःसै आल्तोक् बेलाहाङः नीङ्इ ओहाङःकोः फुत्साः दोम्सै काह्ती गम्नु। 15दोङ्सी दाय्ह्भनाङ् ओउः वाङ्सा खेःओ तय्छनःती योसा दीन्हाङः ओउःहाङःकोः मान्तालम् सोदोम् गोमोरा त तोओनीस् रेव्ओ सहर्कोः मान्तालम्सै न्हाङ्तोलेः न्युम्ह्ताक्नाःथास बा।
16लौ नीङ्कायःपाय् ङाइ रेव्ओलम्कःगन ल्होक्नेःनाङ्स इतलेः नीङ्पाय् पारःकुयःकःगन ल्होक्ओ भेदामेत्छ्याःलो लेखा स्याव्तेःनै ओउःत झ्यान्ते नीङ् आन व्हाय्तोमा छय्ङ्तोमा हायःसा खेःतेःनै। 17मान्तालम्कायः पेतो धय्ती मुन। ओउःमयःइ नीङ्कायः चुम्ती अदालात्ताङ् तय्छनःती योलाङ् दाक्मातेःनै थनःओ कीम्हाङः लाइ स्राप्मातेःनै। 18ओहाङःसैको नीङ्इ ङाकायः ङ्हाम्तेःआनाङ्स त झ्यान्ते हाकीम्कःताङ्मा राजाकःताङ्मा दाक्तेःनै। ओउःमयःकायःमा सबै अरु जात्कोः मान्तालम्कायःमा ङाकोः पेओ कुरा तोसा खाय्तेःनानी। 19ओहाङः दाक्ती आलःतोक्हाङः ‘दोह् त तोचाङः गत त्याङ्चाङः’ त ल्हुङ्तुक्हाङः रुःमाःत मुन। ओउःमयःकायः त्याङ्ती तोतोक्हाङःलेः नाङ्इ पेओ म्हुक्ओ नोःसामा त्याङ्सामा चीःतेःनानी। 20दोह् हायःती दाय्ह्सा ओउःपाय् नीङ्कोः लयःकोः ल्हुङ्तुक्कोः कुरा खेःल नीङ्कोः परमेस्वर् आपाकोः ग्वालामःइपाय् नोःसा कुरा दोह् दोह् बयःतेःनै ओउःलेः नीङ् नोःतेःनै। 21ओहाङःसैको लोनेः मान्ताइपाय् लयःकोः पुःचोङ्कायः लयःकोः चोःकायः सात्साकायः दाक्नानी चोःइपाय् लयःकोः आमा आपाकः अह्र्ती झ्यान्ते ओउःमयःकायः सात्सा बोङःनानी 22नीङ्पाय् ङाकुस् वाह्ओ लेःआः त चीःती सबै मान्ताइ अह्र्तेःनै। ओउःत स्याव्लेःनाः सुसु ङाकायः फेमाःत इत लीह्सीःओ गोरःनै ओउःलेः दल्तो स्याव्नै। 23ओहाङःसै गलखा यात्ज्योः सहर्हाङः मान्तालम्इ लीह्सीःओ बयःतेःनै त खेःया अरु सहर्ताङ् क्रव्न। दोङ्सी दाय्ह्भनाङ् मान्ताकोः चोः त तोओकोः वाङ्माच्युक्हाङः सबै इस्राएल् देस्कोः गाव् सहर्ताङ् तोमःती ङाकोः काम् दप्सा खाय्तेःनीली। 24लयःकोः गुरुसै स्यान्लाङ् सायःओ मान्ताइ चीःसा खाय्उलु फेरी मालीक्कःसै ओउःकोः काम् जाङ्ह्ओ मान्तामा ताङ्ह्ओ खेःनाः र जुगु। 25स्यान्ओ मान्तापाय् लयःकोः गुरुकुस् घार्तोलेः चीःसा ह स्याव्लेःनाः। काम् जाङ्ह्ओ मान्तापाय् लयःकोः मालीक्कुस् घार्तीमा ओउः ह ङोस्आनाः। दोङ्सीलेः मान्तालम्इ ङा नीङ्कोः गुरुकायःपाय् ‘लान्कोः राजा लेःआः’ त दाय्ह्ती तोनाःताङः ओउःत खेःया नीङ् ङाकुस् स्यान्ओमयःकायःमा न्हाङ्तोलेः रेव्तो तोतेःनै बा। 26ओउः रेव्तो तोओलम्कः रैतेःचनै। दोह् दोह् देङी नुस्ती मुलेःनाः लोने ओउःलेः सबैइ च्यवःतोलेः स्याव्नाः। फेरी दोह् दोह् द्याह् चीःमाःत मुनाः लोनेः सबैइ चीःतोलेः स्याव्आनाः बा। 27दोह् दोह् ङाइ अरुकायः चीःताक्माःत तोनेःनाङ्स ओउःलेः फुती थोल्ह्ती तोनु दा। 28नाङ्कोः आङ्कायः ह ह्र्योङःती वाय्सा खाय्ओ मान्तालम्कः रैतेःचनै ओउःमयःइ नाङ्कोः रुआङ् ह्र्योङःती वाय्सा खाय्नीली। ओउःमयःकः रैतेःचनै ओउः गोबाङ्हाङः आङ्मा रुआङ्मा ब्रक्तलेः वाय्सा खाय्ओ परमेस्वर्कः ह रैसा खेःतो। 29दोङ्सी नीस्ज्योः चोःवाः यातै रुपीयाहाङः लेःसा दोःनाः बा। ओउःच्युक् मोल् नाःमालो वाःखेपाय् परमेस्वर्इ आःताः चीःमामाःत याज्याङ्मा सील। 30नीङ्खेकायः याज्याङ् म्याङ्ला मीह्आ त खेःया परमेस्वर्इ चीःनौ बा। 31ओउःत झ्यान्ते नीङ् वाःसै परमेस्वर् आन झाह्ओ मान्तालम्पाय् जुगाङ् रैसा परतेःइली। 32सुसुखेइ मान्तालम्कःताङ् ‘ङापाय् ख्रीस्कोः मान्ता लेःआः ङ’ त फुती तोनौ ओउःकायःलेः ‘लौ इपाय् ङाकोः मान्ता लेःआः बा’ त दाय्ह्ती ङाकोः लाङ्काहाङः मुओ परमेस्वर् आपाकायः तोनाङः। 33सुसुखेइ मान्तालम्कःताङ् ‘लौ ङा ख्रीस्कोः खेःङल’ त दाय्ह्ती तोचौ ओउःकायःलेः ‘लौ इपाय् ङाकोः मान्ता खेःबाय्ल’ त दाय्ह्ती ङाकोः परमेस्वर् आपाकायः तोमानाङः।
34लौ ङा ल्हाव्ह्दैबाङ्हाङः वाङ्आक्तीको मान्तालम् काय्काय्ओमा मीन्ह्काय्ओमा फेनानी ततेः ताःतेःचानी। खेःल ओउःमयः न्हाङ्तोलेः काय्काय्मानै मीन्ह्काय्मानै। 35ङा वाङ्आक्तीको आपाचाःमा आमाचाःमा आय्चाःमा लयःकुस् काय्काय्तो स्याव्नै। 36यातैज्योः कीम्कोः मान्ता लःलयः अह्र्तो स्याव्काय्नै। 37सुसुखे ङाकायःसै लयःकोः आमा आपाकायः राप्नानी ओउःलेः ङाकुस् ब्राङ्इली। फेरी सुसुखे ङाकायःसै लयःकोः चोःकायः राप्चनौ ओउःमा ङाकुस् ब्राङ्इली। 38फेरी सुसुखे परमेस्वर्कोः काम् जाङ्ह्साकायः ङालो लेखा वाह्ती लीह्सीःओ गोरःसामा ग्याइली सीसामा ग्याइली ओउःलेः ङाकुस् ब्राङ्इली। 39सुसुखे इ ल्हाव्ह्दैबाङ्कोः जीङः सेती गम्सा म्हर्नै ओउःकोः लाङ्काकोः जीङः म्हीत्ओ स्याव्नाः सुसुखे ङाकोः काम् जाङ्ह्ती इ ल्हाव्ह्दैबाङ्कोः जीङः मीह्ताक्चानी ओउःखे लाङ्काकोः जीङः दोःनै। 40सुसुइ नीङ्कायः रोम्तेःनै ओउःइलेः ङाकायःमा रोम्नाःताङः। फेरी सुखेइ ङाकायः रोम्नाःताङः ओउःइलेः ङाकायः ल्होक्ओ आपाकायःमा रोम्नानी। 41सुसुखे ‘ओउःइपाय् परमेस्वर्कायः चीःलेःनौ’ त म्हर्ती यात्चाक् परमेस्वर्कोः कुरा छ्यानःओ मान्ताकायः रोम्नाःथै ओउःलेः परमेस्वर्कोः कुरा छ्यानःओ मान्तालो लेखा परमेस्वर्कःसै जाङ्ह्झ्याङ्कोः दोःनै। फेरी सुसुखे ‘ओउःइ परमेस्वर्कोः काम् पेतोलेः जाङ्ह्नौ’ त म्हर्ती पेओ मान्ताकायः रोम्नाःथै ओउःलेः पेओ मान्ताकोः जाङ्ह्झ्याङ्कोः दोःनै। 42दोङ्सी दाय्ह्भनाङ् सुसुखेइ ‘इपाय् येसुकुस् वाह्नाः’ त दाय्ह्ती यात्चाक् ङाकुस् वाह्ओमयःकायः तुङ्सा तीः बयःनाःथै ओउःलेः परमेस्वर्कःसै जाङ्ह्झ्याङ्कोः दोःलेःनै” त दाय्ह्ती येसुइ तोआथास।
ที่ได้เลือกล่าสุด:
मत्ती 10: CDM93
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
© 1993 Wycliffe Bible Translators Inc., All Rights Reserved.
