Mataio 7
7
1Ua nole abi meratager kak nerute le, iaueakai E uabi ko nole meratager.
2Abelelam abele meratager ua abi meratager, E ko uabi meratager; abele tonar lu uaba abi detali, a E ko uabi detali.
3Nalu ma abi dasmeri lu puipi mara le la pone ge, a ma nole umer kak abele au lu mara pone ge?
4Nalugem ma detager mara le, Abkoreb kaka atperedelu lu puipi mara pone; dasmer, abele au lu nagri mara pone ge?
5Mama bes le, kekiam batauereda abele au lu mara pone ge; iaueakai ma erdali paret kak abi atperedelu abele lu puipi mara le la pone ge.
6Nole abkoreb uaba ikuar abele zogo lu omai giz, a ua nole dikri uaba penina gaire borom giz ra opem, mena esapirda uiaba teter, a ko batauered uabi eregili mogamog.
7Ua abi damsare, iaueakai uabi nakuarare; a uaba deraimerare, epe uaba erdali; a uaba abi dida mudumud iaueakai uabim diski.
8Abelelam ese le abi damsare E nagri; abele le deraimer E abi erdali; a diski abele le abi dida mudumud.
9Nete le uabim, ese mara uerem mari namosi aretoem, nako ma abi ikuar baker?
10A ko mari namosi larem, nako ma abi ikuar tabo?
11Dasmerare, uaba adud le, ese uaba umele nakuarare debe lu uaba omasker giz, nako uaba Aba penoka dali kotor ge, nole uabi nakuarare au debe lu giz uiaba le abi damsare?
12Gaire lu uridili uaba lag le giz uabi ikerare, mokakalam uabi ikerare uiabim; abelelam abele gelar gako gaire perofeta giz.
13Uaba barot abele kebi gab te ge; abelelam au te abele au gab te ge, a aule abele gab a gaire le ekaseredi bakeaud.
14Abelelam kebi te abele gab te ge, a kebi kale abele gab a bakedida eded, a neis neis le erdali.
15Ege uaba mamor dasmerare gaire perofeta bes, uiaba tabarki uabim mamoe am uali, epe muige arega luko uiabim.
16Ua erdali uiaba turum. Nako le edobemeda uina moda abele lu daradar, pako suke abele lu zegerzeger?
17Ege mokakalam debe lu giz uridili kepu debe turum, epe abele adud lu a ko adud turum nagri.
18Umer kak debe lu nagri adud turum, umer kak adud lu a ko nagri debe turum.
19Gaire lu uridili nole debe turum, a ismi batauerda abele ur ge.
20Dasmerare, uaba erdali uiaba turum.
21Umer kak barota kotor baselaia uiaba uridili kari mer mokakalam, Opole ae, Opole ae; epe abele le ikerare kara Aba ra lag penoka dali kotor ge.
22Gaire le kari detagarare niai gerger, Opole ae, Opole ae, nako keriba nole perofeta mara nei ge? a mara nei ge ko keriba dituaki gaire demoni giz? a mara nei ge ko keriba ikerare gaire adigir?
23Kaka paret kak detagerare uiabim, Kaka nole umer kak uabim; ua bakeuare adem karielam, uaba adud tonar.
24Dasmerare, ese le asoli kara mer giz peike E ko ikeli, kaka abi babisdarie E pardale, E ikeli abara meta abele neid ge;
25Epe irmir apu a dodo tabarki a uak uami abi abele meta ge; umer kak edibida, abelelam giz tumem abele neid ge.
26Ese le asoli kara mer giz ike a nole ikeli, E babisdarie abele paim le, E ikeli abara meta tumem abele ue ge;
27Epe irmir apu a dodo tabarki a uag uami abi abele meta ge; epe edibida barabeda mogmog.
28Iesu ra gaire mer eseamulu, epe gaire le lakub abi damared abara giz mer.
29Abelelam E ereuerem uiabim mokakalam le nagri sirdam, a nole mokakalam aotale giz.
ที่ได้เลือกล่าสุด:
Mataio 7: ulk1902
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
Published by the British and Foreign Bible Society in 1902.
