Marcos 8
8
Jesus Quatro Mil Yine Hohluxyawaka Piranapni
1Waneya hi howukchini rapatjetatnakna hixolune yine. Malechayna hnikanruna hiyáhoni Jesus tomhatkana rasruklene waneya wla htshinna:
2— Netwamonutna nyi yine. Map-hohne hitaymana hiyrunu malechayna hnikanruna.
3Hi naluka yokanretna mnikkane hma muhrojyawakanupna hatnu hapoya klu tshinanu satkaka yineru howuka hinya.
4Waneya rasruklene hepomhalu:
— Hanhe wixa hikchikletanru pão hewi kahnete poktshiri hixolune yine wohluxyawaka?
5Waneya Jesus hepomhana:
— Hi pejnu pão-pro himwa hixa?
Waneya ruhitluna:
— Sete pão-pro wimwa.
6Waneya Jesus tshiji tuplakjixna hixolune yine. Waneya hkochtsheklu sete pão. Rali poyahnutlexinri Hoyakalu, hjiknajrotlu pão, rasruklene reneklu waneya rasruklene heneksatna hixolune yine.
7Twa koxa satokaka chima. Waneya Jesus poyahnutlu Hoyakalu waneya htowutna rasruklene reneksaxyawakapna.
8Waneya ptowru yineru nikatka, jinanutkana. Waneya rasruklene tsepotlu sete chiwatu nijittshi hixetatshrini.
9Nikatshine quatro mil yine. Waneya Jesus yokanatna hyiywakpatkana.
10Waneya chinpotukawa hpokownalo kanawa rasrukleneyma. Dalmanuta nwaka hyatkana.
Hetkalurkaka Ranjixyawakna Fariseu-ne Piranapni
11Waneya fariseu-ne hapoka hyinuwaka hihretluna Jesus retumhiywakapluna. Ranjitluna hetkalurkaka hkamhiywakapa rekhixyawakapna hpixkonu ho Hoyakallahe runya ho hike.
12Hiyáhoni Jesus hinniphata hitokoya wane htshina:
— Haklu tshinanhe xyeklu papko hiwekatshine hanjitlu hetkaluru? Seyni halikaka ntshinhi hi satukna hetkaluru rekhitkona.
13Waneya Jesus yatka. Hpokownalo kanawa waneya pa sreta hipowha wnahlu hyatka.
Fariseu-ne Hiyrunu Saduceu-ne Tserutjeru Piranapni
14Waneya rasruklene hi hichinika hanikletlu pão. Satupka pão-pro kanawa ranikna.
15Jesus towutna ruslahyawakapluna wane htshinna:
— Xako fariseu-ne hiyrunu saduceu-ne tserutjeru, Herodes tserutjer-koxa.
16Hiyáhoni hyinuwaka hihjekakletna wannakakluko. Wane htshinkakna:
— Wane htshina klu tshinanu pão hi wanikatka.
17Seyni Jesus yijnakotna ruhjekajyawakna waneya repomhana:
— Klu tshinanhe hihjekaka pão hma manijyawakanu tshinanu? Hi he himatawalu, hi he himatjemawalu klu pirana ntshinatkahi? Chik-hajirunrahhe hixa?
18Hixa kayhalmakhi seyni hi he heta? Kajnakmakhi hi he hjema? Hi he hichiniklu
19hanu nixa kanipreletlu cinco pão cinco mil yine tshinanu? Hi pejnuhe chiwatu htsepota nijittshi hixetatshrini?
Waneya ruhitluna:
— Doze chiwatu wtsepotatka.
20Waneya Jesus hiyrunuko hepomhana:
— Ha nkaniprexyawaklu sete pão quatro mil yine niklerupa tshinanu, hi pejnu chiwatu htsepota nijittshi hixetatshrini?
Waneya ruhitluna:
— Sete chiwatu wtsepotatka.
21Waneya repomhana Jesus:
— Hi he xawaka himatjemawa?
Mayhaletu Betsaida Hajeru Piranapni
22Waneya wane pnute Jesus rasrukleneyma Betsaida hapoka. Waneya satkaka yineru hanikanwakatlu mtsawa, waneya ranjitluna Jesus hyotnejyawakaplu.
23Waneya Jesus kachimyotlu mtsawa. Raniklu kahnete. Waneya hitskaha hsahayhalexyalu, hkapxaklu, repomhalu, wla htshinru:
— Petluhe pa hixanu?
24Waneya jeji hetatka waneya wane htshina:
— Netmaklu yineru seyni hahmuna nyanahota.
25Waneya Jesus hiyrunukotnaka kapxaklu hiyhale. Waneklukawa retpotuthonukatka. Ruhlewatatka ptowruko kihle hetle rixatka.
26Waneklukawhapka Jesus yokanatlu jeji hipjiru hyiywakapa waneya wane htshinru:
— Hi poktshi nwakatshi psatkapanu.
Pedro Wan-tshinyawaka Jesus Hoyakalu Whene Rixyawaka Piranapni
27Waneya Jesus rasrukleneyma Cesareia de Filipe poktshistsi hyana. Waneya hyamtka pchinikna repomhana, wla htshinna:
— Kathe rikahwaknona yine?
28Waneya rasruklene hihita:
— Satkaka yineru wan-tshina pixa João Batista-yi; satuko wan-tshina Elias-yi; satuko wan-tshinyi satu mitshikawni Hoyakalu tokanu hinkakletatshriyi.
29Waneya Jesus wan-tshinna:
— Ha hixa, kathe hkahwakno?
Waneya Pedro hihita:
— Pixni Hoyakalu yokanreryi Messias-yi.
30Waneya Jesus towutlu xye pirana hike hmunkajyawakanupa.
Jesus Hinkaklexyawaklu Rupninri Hiyrunu Riwejinritnaka Pirana
31Waneya Jesus yinuwaka hasrukletna rasruklene, waneya wane htshinna:
— Hita Jeji Whene tshinkalurno, nujhalu nsalewnapotuxyawakapa. Nuknokko tsrukakalune judeu-ne yehiya hiyrunu tsru hixikatshinwa sacerdote-ne yehiya, kasruklewaklerune hinanchitkaluru pirana hasruklewatatshine yehiy-koxa. Nuylatko. Seyni map-hohne rixinri niwekanutnaka.
32Jesus phujewak-potuko runkakletlu. Waneya Pedro haniklu Jesus kahnete hyinuwaka hiykoletlu.
33Waneya Jesus heknokyehitna rasruklene, hyopukhatna waneya ruykotlu Pedro, wla htshina:
— Pasujinno, Satanás pixkalutu. Pixa hi Hoyakalu hchinikanu pimwa seyni jeji hchinikanu halikaka pimwa.
Jesus Homkahitatshri Haluklu H-cruz-te Rutaykopixyawaka Piranapni
34Waneya Jesus tomhana hixolune yine hiyrun-koxa rasruklene. Waneya wane htshinna:
— Satu yineru haluk-homkahrexinno, rujhalu wale ralujyawaka ruchoxyawaka, rutaykopitanru h-cruz-te waneya romkahitanno hita.
35Klu tshinanu katukta haluk-hiwekkakletanru riwejinri, ramtakanru riwekle; seyni katukta hamtakanru riwekle hita tshinanu ho kihle piranalu potuko hiwekkaklewatatshri pirana tshinanu riwekanu.
36Hanhe rixa hepixletlu yineru xye tshijne hihlenu psoluka hkayaxiniklunu seyni riwejinri ramtakanuna?
37Kluhe xawaka ripekotanru satu jeji riwejinri tshinanu?
38Klu tshinanu katukta hipatewatanno hita hiyrun-koxa ntokanu hipatewatatshri xye hektutu hiyrunu halixle mahle klu papko, waneya Jeji Whene tshinkalur-koxa hipatewatanru runinipa waleko royaknuyma hiyrunu Ruru hoyaknuyma rimapojinipa hiwejikalune Hoyakalu towrene tenhohne hajene potukaluneyma.
ที่ได้เลือกล่าสุด:
Marcos 8: mpdBiblia
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
