Marcos 6
6
Jesus Nazaré Tshijne Hyiywaka Piranapni
1Waneya Jesus wane hichpakamxya. Htshijne hyatka. Rimotsatluna rasrukjetanune.
2Hapnanuxikalur-hohne rixinixka hyinuwaka hasruklewleta hanjihohnewakapjiya. Hixolune yine yijnakotatshine himyekahchinikanutatka. Waneya wanna wan-tshina:
— Hanhe rukchijyalu wale xyekaka? Hanhe rukchijyalu rimatkalnu? Hanhe rixa kamhaletlu xye hetkalurkaka?
3Hi he hahmuna chpatako kamruretaklerukni wale, Maria tshinkaluro whene? Hi he repurune Tiago, José, Simão hiyrunu Judas tshinkalune? Hi he hewi wimwana repurone?
Wan-rixkalukni hike hijhatkalu Jesus.
4Waneya Jesus wan-tshina:
— Satu muphujewnakatuwa pirana hinkakletatshri kahwakpiratka ptowruchayaka seyni waleko htshijneya ho waleko himolene tsonuyma hi hkahwakpiratka.
5Hiyáhoni hi hixo hetkalurkaka hkamha Jesus wale poktshiya. Seyni satkaka yeyixatshine hoho rutakamyota rutskalajyawakapna. Wale tsonu.
6Rimyeka hmalixlenna tshinanu. Waneya pa poktshikaka nwaka hyapamta rasruklewaxyawakapa.
Jesus Hasruklene Kamrurepa Piranapni
7Jesus tomhana rasruklene doze. Hyinuwaka yokanretna hepkaka. Renekpixkonutna kamtshine htowuxyawakapna ruchpajyawakapna yine maneya.
8Htowutna hkanojerna tsonu ranijyawakapna xye yanre tshinanu. Hi hniklerna ranikanna, hi saco-ko, hi tiyiroko ranikanna.
9Rutakanrona sandalha tsonu ranikanna. Hi hepi mkatshriko ranikanna.
10Hiyrun-koxa wane htshinna Jesus:
— Hanur-pantshiktako hjihlojini, wanepji hwanu haté hichpajin-potuko.
11Hma yoptotjenepa, hma jemjenepa tshinanu, hichpakamxinpatka waneya wanna hetanu hiwlihkajpatjixitanu rimaxyawakapna hi hixako htshinanni seyni hma yoptotjene malixlenu tshinanni.
12Waneya hyatkana. Runkaklewatna hehchinikanru pirana.
13Hixo kamtshine maleka ruknokna. Nhihtshi ruyokjiwutna hixolune yeyixatshine waneya rutskalakna.
João Batista Hipninri Piranapni
14Waneya Phuru Herodes jemyehitlu Jesus klu tshinanu Jesus pirana ptowruchaka rupalpiranyehita. Hiyáhoni pimrine wan-tshina:
— João Batista-ni hetko hiwekatnaka. Wale tshinanu kpixkonru hetkalurkaka hkamhiywakapa.
15Seyni pimrine wan-tshina:
— Elias-ni hetkoni.
Pimrine wan-tshina:
— Hoyakalu tokanu heneklewatatshrini. Wale Hoyakalu tokanu hinkakletatshrini mitshikawluru pixkalutu.
16Xye hjeminixka Herodes waneya wla htshina:
— João-ni hetkokni wale! Nkastaknojikjixlerukni xawakni hipuktshi riwekkajikatka!
17Klu tshinanu Herodes mitshi kachikjixniru João-ni. Rostukjixniri, preso rutakjixniru, Herodes repuru Filipe hnunrotakanatanro Herodias tshinkaluro tshinanu.
18Klu tshinanu João-ni mitshi wan-tshinatkalu Herodes: “Hinanchitkalurni pepuru hnunro phanunroxyawaka!”
19Hiyáhoni Herodias hahnanutniru João-ni. Taluk-hiylaletmakniru seyni hi tumukata,
20klu tshinanu Herodes kahwakpiratniru João-ni. Rimatlu wale jejni kihlehchinikanurni, powrahchinikanurni. Hiyáhoni rinotniru João-ni. Waneya hjeminixniru João-ni hi rimatahchinikanuta seyni hyijnakotniru ruhlenuhchinikanuyma.
21Waneya Herodias himukaxinri hohne, Herodes hohneru tshinanu tsru niklu hkamha tsrukakalune, soldado-ne chefe-tene, hiyrun-koxa tsru hitakkalune Galileia hajene tshinanu.
22Herodias whene jihlokatkalu tsru niklu yehi. Waneya tahsata. Herodes hiyrun-koxa htshanixlene hikchikhihlenupotutlo. Waneya phuru wan-tshinro makloji:
— Panjitanno kluneruktako paluka. Hita henekanyi.
23Halikaka nunkakyi:
— Klunerukta panjitanno nenekanyi. Yáholu hanikajiko npohirewaxinri nenekanyi.
24Waneya wane tuchpajyatka. Waneya wane ttshinro tunro:
— Kluhe nanjitanu?
Waneya tunro wan-tshinro:
— João Batista jiwu panjitanu.
25Waneklukawa potuko phuru yehi tyatnaka. Waneya tanjitlu. Wane ttshinru:
— Xawakni potuko naluklu penejyawakapno prato-tlo João Batista jiwu.
26Waneya phuru wamonuwpotuta seyni runkaklexyalo htshanixlene hetanu tshinanu hi raluka yohikletlu htokanu.
27Hiyáhoni waneklukawa potuko phuru yokanatlu satu htowreru rawapjiwuxyawakaplu João. Waneya hyatka, hkastaknojitatkalu João-ni preso yehiya.
28Ranikjiwutatkalu prato-ya. Reneklo makloji. Waneya makloji heneklo tunro.
29Waneya hyijnakpiranyehixinixkaluna João hasruklene, runna. Ranikmanetanatkaluna. Hkapnatanatkaluna.
Jesus Hixolune Yine Rohluxyawaka Piranapni
30Waneya hnurrene satokanwakatlu Jesus. Runkakluna Jesus ptowruko hkamhapanruna hiyrunu rasruklewakanatanruna pirana.
31Waneya Jesus wan-tshinna:
— Hinanu. Kahnete poktshiri wyanutka wapnanuxyawakapa pchini tsonu.
Klu tshinanu Jesus rasruklen-koxa hi kapapkona hnijyawakna hixolune yine, hinamtatshine hiyrunu yatshine tshinanu.
32Hiyáhoni wannapka kahnete poktshiri hyatkana kanawaya.
33Seyni hixolune yine hetna wane ruchpajyawakna. Rimathetna. Hiyáhoni ptowru poktshikaka ruchpajyatkana yine rasukamtna Jesus hyoptoxyawakapna. Seyni Jesus hma mapokkanuklunuwa rapokatkana wanna.
34Waneya Jesus kanawa hiptejinixka, retna hixolune yine. Retwamonutna klu tshinanu carneiro-ne ruslahjerna mwikane pixkalunni. Waneya hixo pirana hyinuwaka hasrukletna.
35Kayi rixinixka rasruklene hapyehitlu Jesus. Waneya wane htshinruna:
— Kayixkani hiyrunu hewi kahnete poktshirni.
36Pyokanatanna yine hixolune poktshikaka nwaka hyiywakapna hiyrunu hsankaka wi potuko hwatshri nwaka hyiywakapna ranjixyapluna hnikanrupna.
37Seyni ruhita Jesus, wane htshina:
— Hixa henekanna hnikanrupna.
Waneya wane htshinruna rasruklene:
— Wanjiterhe pão ptowru yineru tshinanu, duzentos hohne kamrurtshi wenru pso wenejyawakapna hnijinripna?
38Waneya Jesus hihita, wla htshinna:
— Hi pejnu pão waneyhi? Hetapanu.
Waneya rimaxinixkana wane htshinruna wanna:
— Wimwalerutka cinco pão, hepi chima.
39Waneya peklomta hoho htuplakjixna yine ptowruneka pa ptohkaka rixyawakapna.
40Waneya htuplatna yine, pa ptohkaka rixna. Pa xkehkaka cem, pa xkehkaka cinquenta.
41Waneya Jesus kochtsheklu cinco pão, hepi chim-koxa. Tenhohne hyihata hpoyahnutlu Hoyakalu. Waneya hjiknajrotlu pão. Waneya rasruklene reneklu hixolune yine rapsaxyawakapna. Waney-koxa rapsatkana ptowruneko hepipkalut-koxa chima.
42Waneya ptowruneko nikatka. Jinanutkana.
43Waneya hkochtshekluna pão-ni hixetatshrini, chim-koxni, doze chiwatu t-tsepotana.
44Pão nikatshine cinco mil jejine.
Jesus Honha Hoho Hyanamxyawaka Piranapni
45Waneklukawa Jesus hixolune yokanatka pchinika hkosekjixna rasruklene pa sreta powha hkopruhaxyawakapna kanawaya Betsaida poktshi nwaka.
46Hixolune rali yokanrexinixka Jesus, walepka hipjita hya ranjihohnexyawakapa.
47Seyni kayi rixinixka kanawa hownahatkalo. Jesus-pka tshiji hwakanatawa.
48Waneya Jesus hetna hkaheknanuwaxyawakna rasruklene hsalwuhaxyawakna klu tshinanu kanniphalu satkakanna. Waneya hoprikako Jesus yanwakatna rasruklene, tsru powha honha hoho hyanamta. Raluk-hiknohlemtna.
49Seyni retamxinixkaluna Jesus tsru powha hyanamxyawaka, hkahwakluna samentshi rixyawaka. Waneya hsaplewatna.
50Klu tshinanu rexinixkaluna hpikpotuthonukna. Waneklukawa potuko Jesus hiynumatna wane htshinna:
— Hixko hchinikanuphi, Hitni! Hi hpikanu!
51Waneya kanawa hpokowna wanna yehi, kanniphalu hitukamtatka. Waneya rimyekpotutna rasruklene.
52Hkojwakahchinikanutna klu tshinanu hi rimatjemluna hetkaluru pão hixolewkajyawaka pirana. Hchikohajiwatna.
Jesus Hitskalajyawakna Genesaré Hajene Piranapni
53Waneya hkopruhaxinixkana Genesaré tshijne hyana. Rutspakatkana.
54Hajeyri kanawa ruptekawana yine hixolune himathetatkalu Jesus.
55Waneyakni yine hasuktata wale tshijne psoluka rawapyawakapna katshinomtalune. Waneya ranikkatkana katshinomtalune hijekoyna Jesus jemyehixyawaka nwaka.
56Jesus poktshikaka hya, mtserutu poktshikaka, tsru poktshikaka hiyrunu fazenda-kaka. Waneya Jesus satkaka jihlokawakako praça rutakkana katshinomtalune. Waneya ranjipotutluna yeyixatshine hyotnejyawakluna yáholu Jesus mkalustsiptoko waneya katukta yotneklu rutskalhatka.
ที่ได้เลือกล่าสุด:
Marcos 6: mpdBiblia
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
