Mataayo 4

Yesu ˆaghasakibhu ne Erishambu

(Maariko 1:12–13; Ruuka 4:1–13)

1Akamara Yesu aghakangatu na Akörö Ahörëëru ghuye mwibhara kubha asakibhu ne Erishambu. 2Yesu akamara iyo chaasiko miröngö ene obhotiko no omwishe ataakurë egheghiro ghyokyose. Antenero, akooghu anchëra. 3Niho Erishambu rekaacha komusaki, rerabhugha, “Aribha iye n‑Omoona o Ryobha onyi, ghabhoorere amabhohe ghano ghiigharure ghabhe emighaate.”

4Yesu akarigharokeri akabhugha, “Mööhi, yandëkuru mo‑Mandëkö Amatööbhiyu kubha,

‘Omughaate oweene tooghughëri omooto abhe no obhuhöru,

amare nakumanya kwo ngʼana ino ekoru mo‑monu o Ryobha.’#4:4 Mööhi Kohiita kwo Meghiro 8:3.”

5Niho Erishambu rekamwimoki Yesu reeghaye nawe mo‑moghya omutööbhiyu o Yerusareemu, rekamwimeereri ighoro arososooni ro Risëngërö, 6rekamobhoorera rekabhugha, “Aribha iye n‑Omoona o Ryobha onyi, nwirëkërë haase, gho kubha yandëkuru mo‑Mandëkö Amatööbhiyu kubha,

‘Eryobha ndeghoghotomera bhamarayika bhaache bhaghochonge,

na mbaghoghughëgha mo‑mabhökö ghaabho,

amaghoro ghaacho ghataacha ghwituuratuura mwitare.’#4:6 Mööhi Sabhuri 91:11–12.”

7Yesu akamugharokeri akabhugha, “Mööhi, wiiki yandëkuru kubha, ‘Otamusaki Omutëmi Waryobha waacho.’#4:7 Mööhi Kohiita kwo Meghiro 6:16.”

8Rekamara, Erishambu rekamwimoki Yesu reeghaye nawe ighoro arososooni ro gheghoro kire, rekamwërëki obhutëmi bhoose bho chaase choose no obhwame bhooche, 9rekamobhoorera rekabhugha, “Aribha orabhuna ebheru ambërë yaane na ghusëngëra, neghokuha bhyose bhino.”

10Yesu akarebhoorera akabhugha, “Iye Erishambu, nooru hano! Mööhi, yandëkuru mo‑Mandëkö Amatööbhiyu kubha,

‘Nekwëndëru omusëngëra Omutëmi Waryobha waacho,

no omuhökëri iwe omwene chiri.’#4:10 Mööhi Kohiita kwo Meghiro 6:13.”

11Niho Erishambu rekamotigha Yesu hayo, hayo hayo bhamarayika bha Ryobha bhakaacha komuhökëri.

Yesu ˆaghasëëma kuraghani Angʼana Anchömu

(Maariko 1:14–15; Ruuka 4:14–15)

12Mbe, Yesu hano oghwire kubha Yohana Omubhatisaachi nabhöhuru mwighërëcha, aghaye mo‑mukööwa o Ghariraaya. 13Hano are Ghariraaya, Yesu akaru mo‑moghya o Nasareeti, aghaye ghwikara mo‑moghya o Kabherenawumu. Kabherenawumu n‑omoghya uno onyi rubhareka ro nyancha e Ghariraaya, mo‑robhebhe ro se e Sabhurooni na Nabhutaari. 14꞉Niibheere hangʼu kubha ehikeerane angʼana ino Eryobha resiikiire gho kohetera omurööti Isaaya kubha,

15“Ase e Sabhurooni ne e Nabhutaari,

ncheenyi mo‑nchëra e kwërëkëra mo‑nyancha,

amwambuko e rooche ro Yorotaani.

Ghariraaya hayo niho ꞉bhaamanyiri abhaato bha matöngö.

16Abhaato bhano bhaare bhamanyiri mo‑kengʼuuri,

mbarooche emirëngaari mekoro,

na bhano bhamanyiri mo‑kiriiri ke roko,

emirëngaari ngebharëngaariri.”#4:15–16 Mööhi Isaaya 9:1–2.

17Korwera eriibhagha riyo, Yesu nasëëmiri kuraghani arabhugha, “Motuukuune amasari ghaanyu, gho kubha obhutëmi bho Mwishaaro ˆbhoghatingʼi.”

Yesu ˆaghasëëma kobhabherekera abhaanabheegha bhaache

(Maariko 1:16–20; Ruuka 5:1–11)

18Hano Yesu are araghënda rubhareka ro nyancha e Ghariraaya, ꞉naarooche abhaweesani bhabhere, Simiyooni uno ꞉abherekiiru Bheetero na Andereya ömööbhö. Bhayo bhabhere mbaare bhararëkëra charwërö mo‑nyancha, gho kubha m‑bhaweesani ꞉bhaare. 19Yesu akabhabhoorera akabhugha, “Muuche muntambane! Eni nekobhaköra mubhe abhaweesani bha bhaato.”

20Hayo hayo, bhaghatigha charwërö cheebho bhakamutambana.

21Hano Yesu aghëndiri ghuye ambërë hasuuhu, akabharighi abhaato abhande bhabhere, bhërëëti bha Sebhetaayo Yakobho na Yohana. Bhayo bhabhere mbaare mo‑bhwato haghirohamu na Sebhetaayo ishe waabho, mbaare bharaköra charwërö cheebho. Yesu akabhabherekera.

22Hayo hayo bhaghatigha hayo obhwato ni ishe waabho, bhakamutambana Yesu.

Yesu nakweghi abhaato bhaaru na kuhöri abhabhabharu

(Ruuka 6:17–19)

23Yesu ꞉niinaariri Ghariraaya yoose, areeghi mo‑masinaghooghi ghaabho, na kuraghani Angʼana Anchömu e bhutëmi bho Mwishaaro, na kobhahöri amabhabharu ghaabho ghoose. 24Mbe, amangʼana ghaache ghaghasancha chwee mo‑chambaara choose che mukööwa o Siiriya. Abhaato bhakahira abhabhabharu bhoose bha mashaagha haghare haghare. Ghate yaabho, mbaare‑mu abhabhabharu chwee, bhano bhaghööturu ne emisambu, na bhano ꞉bhaare na amarimo, na bhano ꞉bhaare bhakuure eribhaara. Yesu akabhahöri bhayo bhoose. 25Mbe, abhaato bhaaru chwee koru Ghariraaya, na Tekabhoori, na Yerusareemu, na Yuteya, na amwambuko e rooche ro Yorotaani bhakamutambana.

ที่ได้เลือกล่าสุด:

Mataayo 4: ntk

เน้นข้อความ

แบ่งปัน

คัดลอก