ମାତିସ୍ 9

ଯୀଶୁସ୍ ଅଣ୍ଟା ଏକ୍ଆଙ୍ଗିୟା ବେହ୍ମରିୟାସିନ୍ ବାନେ କାମାଲ୍‌ଦାସ୍

(ମାର୍‌କୁସ୍ ୨:୧-୧୨; ଲୁକାସ୍ ୫:୧୭-୨୬)

1ଆନ୍ତିନ୍ ଯୀଶୁସ୍ ଡଙ୍ଗାନୁ ଅକ୍କିକିରି ହଁସ୍‌ରା ପାର୍ ମାନ୍‌ଚାସ୍, ଆରୁ ତାଙ୍ଘା ସହର୍‌ଗେ ବାର୍‌ଚାସ୍। 2ଆରୁ ଏରା, କେତ୍‌କ ଲୋକ୍ ଆଲାର୍ ଅଣ୍ଟା ଏକ୍ଆଙ୍ଗିୟା ବେହ୍ମରିୟାସିନ୍ ନାଟ୍‌ରୁନୁ ଚେଡ଼ିକିରି ତାଙ୍ଘା ଚାହାଗେ ଅନ୍ଦ୍ରାର୍। ଆନ୍ତିନ୍ ଯୀଶୁସ୍ ଆବ୍ଡ଼ାର୍‌ଘି ବିଶ୍ୱାସ୍‌ବନ୍ ଏରିକିରି, ଏକ୍ଆଙ୍ଗିୟା ବେହ୍ମରିୟାସିନ୍ ତେଙ୍ଗିୟାସ୍, “ଏ ବାବୁ, ଧିରାଜ୍ ଧାରା; ନିଙ୍ଘା ଜାମା ପାପ୍‌ବନ୍ ଛେମା କାମାକେରା।” 3ଆରୁ ଏରା ପଣ୍ତିତ୍‌ଜାମାର୍‌ଘି ଭିତର୍‌ନୁ କେତ୍‌କ ଲୋକ୍ ତାହ୍ମା ମନ୍‌ନୁ ସୋଚ୍ଚାର୍, “ଇ ଆଲାସ୍‌ତା ପାର୍‌ମେଶ୍ଵାର୍‌ସ୍‌କି ନିନ୍ଦା କାମାଲ୍‌ଦାସ୍।” 4ଯୀଶୁସ୍ ଆବ୍ଡ଼ାର୍‌ଘି ମନ୍‌ତା କାତ୍‌ଥାବନ୍ ଆହିକିରି ତେଙ୍ଗିୟାସ୍, “ନିମ୍ ନିଜର୍-ନିଜର୍ ମନ୍‌ନୁ ଏନ୍ଦେର୍‌ଗେ ଖାରାପ୍ ବିଚାର୍ କାମାଲ୍‌ଦାର୍? 5ଏନ୍ଦେଦ୍ ସହଜ୍‌ଦ୍‌? ‘ନିଙ୍ଘାଏ ପାପ୍ ଛେମା ମାନ୍‌ଚାକେର୍‌କିଚି’ ବୁଲି ତେଙ୍ଗ୍‌ନାଦ୍ କା, ‘ଉସ୍‌କାରା ଆରୁ ଏକାଏକି କାମା’ ବୁଲି ତେଙ୍ଗ୍‌ନାଦ୍? 6ଲେକିନ୍ ନିମ୍ ଏତ୍‌କ ଆହା କା ମୁନୁଷ୍ ହାଦ୍ଦୁସ୍‌କେ ଦୁନିଆଁନୁ ପାପ୍ ଛେମା କାମାଗେ ହକ୍ ରାଇଦ୍।” ଆନ୍ତିନ୍ ଆସ୍ ଏକ୍ଆଙ୍ଗିୟା ବେହ୍ମରିୟାସିନ୍ ତେଙ୍ଗିୟାସ୍, “ଉସ୍‌କାରା, ଆରୁ ନିଙ୍ଘାଏ ନାଟ୍‌ରୁ ଉଠାବା ଆରୁ ଆଡ଼୍‌ପା କାଲା।” 7ଆଙ୍ଗେନ୍ ଆସ୍ ଉସ୍‌କାରାଚାସ୍ ଆରୁ ତାଙ୍ଘା ଆଡ଼୍‌ପା କେରାସ୍। 8ଆଲାର୍ ଇବନ୍ ଏରିକିରି ଏଲ୍‌ଚିୟାର୍ କେରାର୍ ଆରୁ ପାର୍‌ମେଶ୍ଵାର୍‌ସ୍‌କି ସ୍ତୁତି କାମାଗେ ଲାଗ୍ଗିୟାର୍, ଏକାସ୍ କା ଆଲାର୍‌ଗେ ଏନ୍ନେ ହକ୍ ଚିଚ୍‌କାଦାସ୍।

ଯୀଶୁସ୍ ମାତିଆସ୍‌ସିନ୍ ମେହାଁଲ୍‌ଦାସ୍

(ମାର୍‌କୁସ୍ ୨:୧୩-୧୭; ଲୁକାସ୍ ୫:୨୭-୩୨)

9ଆସ୍‌ତି ଆଘ୍‌ଲି ବାଢ଼୍‌ରିକିରି ଯୀଶୁସ୍ ମାତି ନାମେଘି ଅଣ୍ଟା ମାଲ୍‌ଗୁଜାରୀ ଉକ୍‌ରୁ ଆଲାସିନ୍ ମାଲ୍‌ଗୁଜାରୀ ଉକ୍‌ରାନା ଆଡ଼୍‌ପାନୁ ଅକ୍କାନ୍ ଏରିୟାସ୍, ଆରୁ ଆସିନ୍ ତେଙ୍ଗିୟାସ୍, “ଏଙ୍ଘା ପାଛ୍‌ଲି ବାରା।” ଆସ୍ ଉସ୍‌କାରାଚାସ୍ ଆରୁ ଯୀଶୁସ୍‌କି ପାଛ୍‌ଲି-ପାଛ୍‌ଲି କେରାସ୍।

10ଯେତ୍‌କବାକେନ୍ ମାତିସ୍‌କି ଆଡ଼୍‌ପାନୁ ଯୀଶୁସ୍ ଆରୁ ତାଙ୍ଘା ଚେଲାଜାମାର୍ ଅନାଗେ ଅକ୍କାଚାର୍, ହତ୍‌କବାକେନ୍ ଢେର୍ ମାଲ୍‌ଗୁଜାରୀ ଉକ୍‌ରୁ ଆରୁ#୯:୧୦ ପାପୀ ଆଲାର୍ ଆବ୍ଡ଼ାର୍ ସତ୍ତୁନିନ୍ ପାପୀ ମାଲ୍ଲାରୁର୍, ଲେକିନ୍ ୟାହୁଦୀ ଧାର୍ମିକ୍ ଆଲାର୍ ଆବ୍ଡ଼ାରିନ୍ ପାପୀ ବୁଲିକିରି ଆବ୍ଡ଼ାର୍‌ଘି ସମାଜ୍‌ତି ଭିନେ ଉଇୟାଲିୟାର୍ ଆବ୍ଡ଼ାର୍ ଗାନେ ସମ୍ବନ୍ଧ ମା ଉଇୟାଲିୟାର୍। ପାପୀ ଆଲାର୍‌ହି ତାହ୍ମାଗାନେ ଅନାଗେ ଅକ୍କିୟାର୍। 11ଇବନ୍ ଏରିକିରି ଫାରିସୀଜାମାର୍ ଯୀଶୁସ୍‌କି ଚେଲାରିନ୍ ତେଙ୍ଗିୟାର୍, “ନିହ୍ମା ଗୁରୁସ୍ ମାଲ୍‌ଗୁଜାରୀ ଉକ୍‌ରୁ ଆରୁ ପାପୀ ଜାମାର୍‌ଗାନେ ଏନ୍ଦେର୍‌ଗେ ଅନ୍‌ଦାସ୍?” 12ଇବନ୍ ମେନିକିରି ଯୀଶୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ବାନେ ଆଲାର୍‌ଗେ ବଏଦ୍‌ସ୍‌କି ଦାର୍‌କାର୍ ମାଲ୍ଲା, ଲେକିନ୍ ବେହ୍ମରିୟାର୍‌ଗେ ବଏଦ୍‌ସ୍‌କି ଦାର୍‌କାର୍ ରାଇ। 13ହୁଦ୍‌ଘିଲାଗାନ୍ ନିମ୍ କାଲା ଆରୁ ଇଦ୍‌ଘି ମତ୍‌ଲବ୍ ଶିଖ୍‌ରା: କା ‘ଏନ୍ ବଲୀଦାନ୍ ମାଲ୍ଲା ଲେକିନ୍ ଦାୟା ଚାହ୍ଁଦାନ୍’। ଏନ୍ଦେର୍‌ଗେକା ଏନ୍ ଧାର୍ମିକ୍ ଆଲାରିନ୍ ମେହାଁଗେ ମାଲ୍ଲା ବାରୁନ୍, ଲେକିନ୍ ପାପୀ ଆଲାରିନ୍ ପାପ୍‌ତି ବାଛାବାଗେ ବାର୍‌ଚ୍‌କାଦାନ୍।”

ଯୀଶୁସ୍ ଉପାସ୍‌ଘି ବାରେନୁ ଉପ୍‌ଦେଶ୍ ଚିଆଲ୍‌ଦାସ୍

(ମାର୍‌କୁସ୍ ୨:୧୮-୨୨; ଲୁକାସ୍ ୫:୩୩-୩୯)

14ଆନ୍ତିନ୍ ଯୋହାନ୍‌ସ୍‌କି ଚେଲାଜାମାର୍ ଯୀଶୁସ୍‌କି ଚାହାଗେ ବାର୍‌ଚାର୍ ଆରୁ ତେଙ୍ଗିୟାର୍, “ଫାରିସୀଜାମାର୍ ଆରୁ ଏମ୍ ଉପାସ୍ କାମ୍‌ଦାମ୍, ଲେକିନ୍ ନିହ୍ମା ଚେଲାଜାମାର୍ ଏନ୍ଦେର୍‌ଗେ ଉପାସ୍ ମା କାମ୍‌ନାଏ?” 15ଯୀଶୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ଯେତ୍‌କତକ୍ ବର୍‌କୁକ୍କସ୍ ବର୍‌ତିଆର୍‌ଗାନେ ରସ୍, ଆତ୍‌କତକ୍ କାଁଏ ବର୍‌ତିୟାର୍ ଶୋକ୍ କାମା ଅଙ୍ଗର୍? ଲେକିନ୍ ଆ ଉଲ୍ଲାଦ୍ ବାର ଏକ୍‌ଲା ବର୍‌କୁକ୍କସ୍ ବର୍‌ତିଆ ଜାମାର୍‌ସ୍‌ତି ଭିନେ ମାନସ୍‌କସ୍, ଆଙ୍ଗେନ୍ ଆବ୍ଡ଼ାର୍ ଉପାସ୍ କାମର୍। 16ନେଦ୍‌ହି ପୁନା ଚିଢ଼ାନ୍ ଚାର୍‌ରିକିରି ପାଚ୍ଚା ଚିଢ଼ାନୁ ମା ସାଟ୍‌ନାଏ, ମାଲ୍ଲାହାଲେ ପାଚ୍ଚା ଚିଢ଼ାଦ୍ କକ୍‌ଣାରିକି ଆରୁ ବାଗ୍ଗେ ଏଟ୍‌ରି କାଇ। 17ଆରୁ ଆଲାର୍ ପୁନା ଦାଖ୍‌ରାସ୍‌ବନ୍ ଚାପ୍‌ଟାତି ତିଆର୍ ମାନ୍‌ଚ୍‌କା ପାଚ୍ଚା କୁପାନୁ ମା ଉଇନାଏ, ଏନ୍ଦେର୍‌ଗେକା କୁପାଦ୍ ହଟ୍‌ରିକାଇ, ଆରୁ ଦାଖ୍‌ରାସ୍ ବର୍‌ବାଦ୍ ମାନିକାଇ ଆରୁ କୁପାଦ୍ ନଷ୍ଟ ମାନିକାଇ; ଲେକିନ୍ ପୁନା ଦାଖ୍‌ରାସ୍‌ବନ୍ ପୁନା କୁପାନୁ ଉଇନା କାତ୍‌ଥା ହାଲେ ଯୋଡ଼େଦିନ୍ ବାଛ୍‌ରିଦ୍।”

ଯୀଶୁସ୍ ଅଣ୍ଟା କେଚ୍ଚକା କୁକାଏନ୍ ଉଜ୍ଜତାଲ୍‌ଦାସ୍ ଆରୁ ପାର୍‌ଦା ବେହ୍ମରିୟା ଆଲିନ୍ ବାନେ କାମାଲ୍‌ଦାସ୍

(ମାର୍‌କୁସ୍ ୫:୨୧-୪୩; ଲୁକାସ୍ ୮:୪୦-୫୬)

18ଯୀଶୁସ୍ ଆବ୍ଡ଼ାରିନ୍ ଏନ୍ନେ ତେଙ୍ଗାଲିୟାସିନ୍ କା ଏରା, ୟାହୁଦୀ ଜାମାର୍‌ଘି ଅଣ୍ଟା ମୁଖିଆ ଆଲାସ୍ ଯୀଶୁସ୍‌କି ଚାହାଗେ ବାର୍‌ଚାସ୍ ଆରୁ ହାଁଠୁୱାରାଇକିରି ଆର୍‌ଜୀବିନ୍ତି କାମ୍‌ଚାସ୍ ଆରୁ ତେଙ୍ଗିୟାସ୍, “ଏଙ୍ଘାଏ କୁକାଏ ହାଦ୍ଦୁ ଆକ୍କୁନ୍-ଆକ୍କୁନ୍ କେଚ୍ଚାକେରା, ଲେକିନ୍ ନିମ୍ ବାରା ଆରୁ ନିହ୍ମାଏ ହେଖ୍ଖାନ୍ ଆଦ୍‌ଘି ମିଆଁ ଉଇୟା ଆରୁ ଏଙ୍ଘା ହାଦ୍ଦୁ ଉଜ୍ଜକୋ।” 19ଆଙ୍ଗେନ୍ ଯୀଶୁସ୍ ଉସ୍‌କାରାଚାସ୍ ଆରୁ ତାଙ୍ଘା ଚେଲାଜାମାର୍‌ଗାନେ ଆ ମୁଖିଆସ୍‌କି ପାଛ୍‌ଲି-ପାଛ୍‌ଲି କେରାସ୍। 20ଆରୁ ଏରା, ଅଣ୍ଟା ଆଲିଘି ବାର ବଛର୍‌ତି ପାର୍‌ଦା ବେମାର୍ ରାଚା, ଆ ଆଲିଦ୍ ପାଛ୍‌ଲି ତାର୍‌ତି ବାରିକିରି ଯୀଶୁସ୍‌କି ଆତ୍ତ୍‌କା ଚିଢ଼ାଘି ପାଣ୍‌ତୁନ୍ ଏସ୍‌ରା। 21ଏନ୍ଦେର୍‌ଗେକା ଆଦ୍ ତାଙ୍ଘା ମନ୍‌ନୁ ସୋଚାଲିୟାଦ୍, “ଯଦି ଏନ୍ ଯୀଶୁସ୍‌କି ଚିଢ଼ାବନ୍ ଖାଲି ଏସ୍‌ରନ୍ ହାଲେ ବାନେ ମାନନ୍‌କନ୍।” 22ଯୀଶୁସ୍ ପାଛ୍‌ଲି କିର୍‌ରେଚେ ଏରିକିରି ଆ ଆଲିନ୍ ତେଙ୍ଗିୟାସ୍, “ଏ ହାଇ ଧିରାଜ୍ ଧାରୁ; ନିଙ୍ଘା ବିଶ୍ଵାସ୍ ନିଙ୍ଗାନ୍ ବାନେ କାମ୍‌ଚା।” ହୁଙ୍ଗେନିନ୍ ଆ ଆଲିଦ୍ ବାନେ ମାନ୍‌ଚାକେରା। 23ଯେତ୍‌କବାକେନ୍ ଯୀଶୁସ୍ ଆ ମୁଖିଆ ଆଲାସ୍‌କି ଆଡ଼୍‌ପାଗେ ଆଣ୍‌ସିୟାସ୍ ତା ଆସାନ୍ ବାଇଁଶ୍‌ରି ଉରୁ ଆରୁ ହୋ ହାଲ୍ଲା କାମୁ ଆଲାରିନ୍ ଏରିୟାସ୍ ଆରୁ ତେଙ୍ଗିୟାସ୍, “ଉର୍‌ଖାକାଲା, 24କୁକାଏ ମାଲ୍ଲା ଖିଉ, ଲେକିନ୍ ହାନ୍ଦ୍ରାଲି।” ଇବନ୍ ମେନିକିରି ଆବ୍ଡ଼ାର୍ ଯୀଶୁସ୍‌କି ମାଜାକ୍ ଉଡ଼ାବାଗେ ଲାଗ୍ଗିୟାର୍। 25ଲେକିନ୍ ଯେତ୍‌କ ଆଲାର୍‌ଘି ଭିଡ଼୍ ରାଚା ଜାମାରିନ୍ ବାହ୍‌ରି ଅଥ୍‌ରାକେରା, ଆରୁ ଯୀଶୁସ୍ ଉଲା କାଇକିରି କୁକାଏଘି ହେଖ୍ଖାନ୍ ଧାର୍‌ଚାସ୍ ଆରୁ ଆଦ୍ ଉଜ୍ଜିୟାକେରା। 26ଆରୁ ଇ ଘାଟ୍‌ଣାଘି ବାରେନୁ ହୁ ରାଜୀନୁ ଜାମାତାରା ଫାଏଲାରାଚା କେରା।

ଯୀଶୁସ୍ ଦୁଇ ଲୋକ୍ କାଁଣାରିନ୍ ଏରାଗେ ଶକ୍ତି ଚିଆଲ୍‌ଦାସ୍

27ଯେତ୍‌କବାକେନ୍ ଯୀଶୁସ୍ ଆସ୍‌ତି ଆଘ୍‌ଲି କେରାସ୍ ତା, ଦୁଇ ଲୋକ୍ କାଁଣାର୍ ଆସ୍‌କି ପାଛ୍‌ଲି-ପାଛ୍‌ଲି କାଇକିରି ଜୋର୍‌ସେ ଚିର୍‌ରାରିକିରି ତେଙ୍ଗାଗେ ଲାଗ୍ଗିୟାର୍, “ହେ ଦାଉଦ୍‌ସ୍‌କି ହାଦ୍ଦୁ, ଏହ୍ମା ମିଆଁ ଦାୟା କାମା!” 28ଆରୁ ଯେତ୍‌କବାକେନ୍ ଯୀଶୁସ୍ ଆଡ଼୍‌ପା ଉଲା କର୍‌ଚାସ୍ ତା, ଆ କାଁଣାର୍ ଯୀଶୁସ୍‌କି ଚାହାଗେ ବାର୍‌ଚାର୍ ଆରୁ ଯୀଶୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ଏନ୍ ଏନ୍ନେ କାମା ଅଙ୍ଗନ୍‌ବୁଲି ନିମ୍ ବିଶ୍ୱାସ୍ କାମାଲ୍‌ଦାର୍ କାଁଏ?” ଆବ୍ଡ଼ାର୍ ଆସିନ୍ ତେଙ୍ଗିୟାର୍, “ହଁ, ପ୍ରାଭୁ!” 29ଆନ୍ତିନ୍ ଆସ୍ ଆବ୍ଡ଼ାର୍‌ଘି ହାନ୍ନୁବନ୍ ଏସ୍‌ରିକିରି ତେଙ୍ଗିୟାସ୍, “ନିହ୍ମା ବିଶ୍ଵାସ୍‌ଘି ଲେଖା ନିହ୍ମା ଲାଗାନ୍ ମାନ୍ନାଦ୍।” 30ଆରୁ ଆବ୍ଡ଼ାର୍ ଏରା ଅଙ୍ଗିୟାର୍ ଯୀଶୁସ୍ ଆବ୍ଡ଼ାରିନ୍ ଶକତ୍ ଚେତାବାନୀ ଚିଇକିରି ତେଙ୍ଗିୟାସ୍, “ଏରା, ଇ କାତ୍‌ଥାବନ୍ ନେଦ୍‌ହି ବାଲ୍‌ନା କାତ୍‌ଥା।” 31ଲେକିନ୍ ଆବ୍ଡ଼ାର୍ ଆସ୍‌ତି ଉର୍‌ଖିକିରି ଆ ରାଜୀନୁ ଯୀଶୁସ୍‌କି ବାରେନୁ ଫାଏଲାଚାର୍।

ଯୀଶୁସ୍ ଅଣ୍ଟା କୋନ୍ଦାସିନ୍ ବାନେ କାମାଲ୍‌ଦାସ୍

32ଯେତ୍‌କବାକେନ୍ ଆବ୍ଡ଼ାର୍ ବାହ୍‌ରି ଉର୍‌ଖାଲିୟାର୍, ତା ଏରା ଆଲାର୍ ଅଣ୍ଟା ଭୁତ୍ତୁ ଲାକ୍କା କୋନ୍ଦାସିନ୍ ଆସ୍‌କି ଚାହାଗେ ଅନ୍ଦ୍ରାର୍; 33ଆରୁ ଯେତ୍‌କବାକେନ୍ ଭୁତ୍ତୁନ୍ ଅଥ୍‌ରାକେରା, ତା ଆ କୋନ୍ଦାସ୍ କାଚ୍‌ନେଖ୍‌ରା ଲାଗ୍ଗିୟାସ୍। ଇବନ୍ ଏରିକିରି ଆଲାର୍ ଆଚ୍‌ମିତ୍ ମାନିକିରି ତେଙ୍ଗିୟାର୍, “ଇସ୍ରାଏଲ୍‌ନୁ ଏକ୍‌ଲାହି ଏନ୍ନେ ମାଲ୍ଲା ଏର୍‌କାରୁମ୍।” 34ଲେକିନ୍ ଫାରିସୀଜାମାର୍ ତେଙ୍ଗିୟାର୍, “ଆସ୍ ଭୁତ୍ତୁର୍‌ଘି ମୁଖିଆସ୍‌କି ମଦେତ୍‌ତି ଭୁତ୍ତୁବନ୍ ଅଥ୍‌ର୍‌ଦାସ୍।”

ଯୀଶୁସ୍ ଆଲାର୍‌ଘି ମିଆଁ ସୋଗ୍ଗେ କାମାଲ୍‌ଦାସ୍

35ଯୀଶୁସ୍ ଜାମା ସହର୍ ଆରୁ ପାଡ଼ାନୁ କୁଦ୍ଦାଲିୟାସ୍ ଆରୁ ଆସ୍ ଆବ୍ଡ଼ାର୍‌ଘି ସାଭା ଆଡ଼୍‌ପାନୁ ଉପ୍‌ଦେଶ୍ ଚିଆଲିୟାସ୍, ପାର୍‌ମେଶ୍ଵାର୍‌ସ୍‌କି ରାଜୀଘି ବାରେନୁ ସୁସାମାଚାର୍ ଶୁଣାବାଲିୟାସ୍ ଆରୁ ଜାମା ରକମ୍‌ଘି ବେହ୍ମରିୟା ଆରୁ ଜାମା ରକମ୍‌ଘି କମ୍‌ଜୋର୍‌ବନ୍ ବାନେ କାମାଲିୟାସ୍। 36ଯେତ୍‌କବାକେନ୍ ଆସ୍ ଭିଡ଼୍‌ବନ୍ ଏରିୟାସ୍ ତା ଯୀଶୁସ୍‌କେ ଆଲାର୍‌ଘି ମିଆଁ ମୁରୁକ୍ ସୋଗ୍ଗେ ଲାଗ୍ଗିୟା, ଏନ୍ଦେର୍‌ଗେକା ଆବ୍ଡ଼ାର୍ ଚାର୍‌ୱାହା ମାଲ୍‌କା ଭେଡ଼ି ଲେଖା, ବାଣାଁ ମାନ୍‌ଚ୍‌କା ଆରୁ ଥାକ୍‌ର୍‌କା ଲେଖା ରାଚାର୍। 37ହତ୍‌କବାକେନ୍ ଆସ୍ ତାଙ୍ଘା ଚେଲାରିନ୍ ତେଙ୍ଗିୟାସ୍, “ଫସଲ୍‌ତା ବାଗ୍ଗେ ରାଇ ଲେକିନ୍ ନାଲ୍‌ଖୁ କାମୁର୍ ଥୋଡ଼େ ରାନାଏ। 38ହୁଦ୍‌ଘିଲାଗାନ୍ ହାଲ୍ଲୁଘି ମାଲିକ୍‌ସାନ୍ ଆର୍‌ଜୀ କାମା କା ଆସ୍ ନିଜର୍ ଫସଲ୍‌ବନ୍ ହୟାଗେ ଲାଗାନ୍ ନାଲ୍‌ଖୁ କାମୁରିନ୍ ତାଇୟ ଚିୟସ୍।”

ที่ได้เลือกล่าสุด:

ମାତିସ୍ 9: xis

เน้นข้อความ

แบ่งปัน

คัดลอก