ମାତିସ୍ 6
6
ଯୀଶୁସ୍ ଦାନ୍ ଚିନାଘି ବାରେନୁ ଶିକ୍ଷା ଚିଆଲ୍ଦାସ୍
1ଯୀଶୁସ୍ ତାଙ୍ଘା ଉପ୍ଦେଶ୍ନୁ ତେଙ୍ଗିୟାସ୍ ହୁସିୟାର୍କିରି ରା! ନିମ୍ ଆଲାରିନ୍ ଏଦାଗେ ନିହ୍ମା ଲାଗାନ୍ ଧରମ୍ ନାଲ୍ଖୁ ଆମା କାମା, ମାଲ୍ଲାହାଲେ ନିହ୍ମା ସରଗ୍ତା ବାଙ୍ଗ୍ସ୍ତି ଏନ୍ଦେର୍ହି ଫଲ୍ ମା ହାଖ୍ଖଦାର୍।
2“ଯେତ୍କବାକେନ୍ ନିମ୍ ଗରୀବ୍ ଦୁଃଖିର୍ଗେ ଦାନ୍ ଚିଅର୍ ତା ନିହ୍ମା ଇ ବାନେ ନାଲ୍ଖୁଘି ବାରେନୁ ନାନ୍ନାର୍ଘି ଆଘ୍ଲି ଆମାତେଙ୍ଗା, ଏସ୍କେ କା ସାଭା ଆଡ଼୍ପା ଆରୁ ଗଲିନୁ କପ୍ଟୀ ଆଲାର୍ ବାଡ଼େଇ ହାଖ୍ଖାଗେ କାମ୍ନାଏ। ଏନ୍ ନିମାନ୍ ସତ୍ତୁନ୍ ତେଙ୍ଗାଲ୍ଦାନ୍ କା ଆବ୍ଡ଼ାର୍ଗେ ଇଦ୍ଘି ପୁରା ଫଲ୍ ପହ୍ଲେନ୍ତି ଚିଆ କେର୍କିଚି। 3ଲେକିନ୍ ଯେତ୍କବାକେନ୍ ନିମ୍ ଦାନ୍ ଚିଅର୍ ତା, ନିହ୍ମା ତିନା ହେଖ୍ଖା ଏନ୍ଦେର୍ କାମାଲି ଆବନ୍ ନିହ୍ମା ଡେବ୍ବା ହେଖ୍ଖା ବାଲ୍ନା କାତ୍ଥା। 4ଏସ୍କେ କା ନିହ୍ମା ଦାନ୍ ନୁହୁର୍କା ରୋ, ହାଲେ ନିହ୍ମା ସରଗ୍ତା ବାଙ୍ଗ୍ସ୍ ଏକାନ୍ ନିମ୍ ନୁଡ଼ିକିରି କାମ୍ଦାର୍ ଆବନ୍ହି ଏର୍ଦାସ୍, ଆସ୍ ନିମାଗେ ଆଦ୍ଘି ଫଲ୍ ଚିୟସ୍।”
ବିନ୍ତି କାମ୍ନାଘି ବାରେନୁ ଉପ୍ଦେଶ୍
(ଲୁକାସ୍ ୧୧:୨-୪)
5“ଯେତ୍କବାକେନ୍ ନିମ୍ ବିନ୍ତି କାମର୍ ତା କପ୍ଟୀ ଜାମାର୍ ଲେଖା ଆମ୍କେ କାମା, ଏନ୍ଦେର୍ଗେକା ଆବ୍ଡ଼ାର୍ ଆଲାରିନ୍ ଏଦାଗେ ସାଭା ଆଡ଼୍ପା ଆରୁ ସଡ଼କ୍ତା ଛକ୍ଗୁଠିନୁ ବିନ୍ତି କାମାଗେ ବାନେ ହାଖ୍ଖନାଏ। ଏନ୍ ନିମାନ୍ ସତ୍ତୁନ୍ ତେଙ୍ଗାଲ୍ଦାନ୍ ଆବ୍ଡ଼ାର୍ ତାହ୍ମା ଫଲ୍ ପୁରା ହାଖ୍ଖୀୟାର୍ କେର୍କାନାଏ। 6ଲେକିନ୍ ଯେତ୍କବାକେନ୍ ନିମ୍ ବିନ୍ତି କାମର୍ ତା, ନିଜର୍ ବାଖ୍ରାଗେ କାଲା ଆରୁ ବାଲି ମୁଚ୍ଚିକିରି; କାଡ଼େ-କାଡ଼େ ନିହ୍ମା ସରଗ୍ତା ବାଙ୍ଗ୍ସାନ୍ ବିନ୍ତି କାମା, ନିହ୍ମା ସରଗ୍ତା ବାଙ୍ଗ୍ସ୍ ଏକାସ୍ କା ନିହ୍ମା ନୁଡ଼ିକିରି କାମ୍ଚ୍କା ନାଲ୍ଖୁନ୍ ଏର୍ଦାସ୍ ଆସ୍ ନିମାଗେ ଫଲ୍ ଚିୟସ୍। 7ଆରୁ ନିମ୍ ଯେତ୍କବାକେନ୍ ବିନ୍ତି କାମର୍ ତା ଦୁସ୍ରା ଜାତିୟାର୍ଘି ଲେଖା ବେକାର୍ କାତ୍ଥାବନ୍ ଧିୟାନ୍-ଧିୟାନ୍ ଆମ୍କେ ଦୋହ୍ରା, ଏନ୍ଦେର୍ଗେକା ଆବ୍ଡ଼ାର୍ ସୋଚ୍ନାଏ କା ଆବ୍ଡ଼ାର୍ଘି ବାଗ୍ଗେ ତେଙ୍କାନ୍ତି ଆବ୍ଡ଼ାର୍ଘି ବିନ୍ତି ମେନାକୋ। 8ହୁଦ୍ଘିଲାଗାନ୍ ନିମ୍ ଦୁସ୍ରା ଜାତିୟାର୍ଘି ଲେଖା ଆମ୍କେମାନା, ଏନ୍ଦେର୍ଗେକା ନିହ୍ମା ବାଙ୍ଗ୍ସ୍ ନିହ୍ମା ନିନାଘି ଆଘ୍ଲି ଆହ୍ଦାସ୍ କା ନିମାଗେ ଏନ୍ଦେର୍ ଦାର୍କାର୍ ରାଇଦ୍।”
9“ହୁଦ୍ଘିଲାଗାନ୍ ନିମ୍ ଏନ୍ନେ ବିନ୍ତି କାମ୍କେ।
‘ହେ ଏହ୍ମାଏ ବାଙ୍ଗ୍, ନିମ୍ ଯେ ସରଗ୍ନୁ ରାଦାର୍; ନିହ୍ମା ନାମେ ପାବିତାର୍ ମାନ୍ନାଦ୍।’
10‘ନିହ୍ମା ରାଜୀଦ୍ ବାର୍ନାଦ୍।’
‘ନିହ୍ମା ଇଚ୍ଛା ଏସ୍କେ ସରଗ୍ନୁ ରାଇଦ୍,’
‘ଆନ୍ନେନିନ୍ ଦୁନିଆଁନୁହି ପୁରା ମାନ୍ନାଦ୍।’
11‘ଏମାଗେ ଇନ୍ନା ଉଲ୍ଲା ଅଣ୍ଟାନ୍ତା ଆହାର୍ ଚିଆ’
12‘ଆରୁ ଏମ୍ ଏସ୍କେ ଏହ୍ମା ଦୋଷୀରିନ୍ ଛେମା କାମ୍ଚ୍କାଦାମ୍,’
‘ଆନ୍ନେ ନିମ୍ହି ଏହ୍ମା ଦୋଷ୍ଗୁଠିନ୍ ଛେମା କାମା।’
13‘ଆରୁ ଏମାନ୍ ପରୀକ୍ଷାନୁ ଆମାଟିଡ଼ା, ଲେକିନ୍ ଏମାନ୍ ଜାମା ରକମ୍ଘି ଖାରାପ୍ତି ବାଛାବା,’
(‘ଏନ୍ଦେର୍ଗେକା ରାଜୀ, ଶକ୍ତି ଆରୁ ମାହିମା ଯୁଗ୍-ଯୁଗ୍ ନିହ୍ମାଏଦ୍।’ ଆମେନ୍।)”
14“ହୁଦ୍ଘିଲାଗାନ୍ ଯଦି ନିମ୍ ନିହ୍ମା ବିରୋଧିର୍ଘି ଦୋଷ୍ବନ୍ ଛେମା କାମର୍ ତା, ନିହ୍ମା ସରଗ୍ତା ବାଙ୍ଗ୍ସ୍ହି ନିମାନ୍ ଛେମା କାମସ୍। 15ଆରୁ ଯଦି ନିମ୍ ନିହ୍ମା ବିରୋଧିର୍ଘି ଦୋଷ୍ବନ୍ ଛେମା ମା କାମର୍ ତା, ନିହ୍ମା ସରଗ୍ତା ବାଙ୍ଗ୍ସ୍ହି ନିହ୍ମା ଦୋଷ୍ବନ୍ ଛେମା ମା କାମ୍ଦାସ୍।”
ଉପାସ୍ଘି ବାରେନୁ ଉପ୍ଦେଶ୍
16“ଯେତ୍କବାକେନ୍ ନିମ୍ ଉପାସ୍ କାମର୍ ତା, କପ୍ଟୀ ଜାମାର୍ ଲେଖା ଚେହେରା ଉଦାସ୍ ଆମ୍କେ କାମା, ଏନ୍ଦେର୍ଗେକା ଆବ୍ଡ଼ାର୍ ଉପାସ୍ କାମାଲ୍ଦାମ୍ବୁଲି ଆଲାର୍ସାନ୍ ଏଦ୍ରାଗେ ତାହ୍ମା ଚେହେରାନ୍ ଉଦାସ୍ ଉଇନାଏ। ଏନ୍ ନିମାନ୍ ସତ୍ତୁନ୍ ତେଙ୍ଗାଲ୍ଦାନ୍ କା ଆବ୍ଡ଼ାର୍ ତାହ୍ମା ଫଲ୍ ପୁରା ହାଖ୍ଖୀୟାର୍ କେର୍କାନାଏ। 17ଲେକିନ୍ ଯେତ୍କବାକେନ୍ ନିମ୍ ଉପାସ୍ କାମର୍ ତା ନିହ୍ମା କୁକ୍କୁନୁ ଇସୁଙ୍ଗ୍ ଖାସ୍ରା ଆରୁ ଚେହେରାନ୍ ମୁଜ୍ଜରା, 18ତା ଆଲାର୍ ଇବନ୍ ମା ଆହର୍ କା ନିନ୍ ଉପାସ୍ କାମାଲ୍ଦାଏ, ଲେକିନ୍ ନିଙ୍ଘା ସରଗ୍ତା ବାଙ୍ଗ୍ସ୍ ନେକାନ୍ କା ନିନ୍ ଏରା ପଲ୍ଲଦାଇନ୍ ଆସ୍ ଏର୍ଦାସ୍ କା ନିନ୍ ଉପାସ୍ କାମାଲ୍ଦାଏ, ନିଙ୍ଘା ସରଗ୍ତା ବାଙ୍ଗ୍ସ୍ ଏକାସ୍ କା ନିଙ୍ଘା ନୁଡ଼ିକିରି କାମ୍ଚ୍କା ନାଲ୍ଖୁବନ୍ ଏର୍ଦାସ୍ ଆସ୍ ନିଙ୍ଗାଗେ ଫଲ୍ ଚିୟସ୍।”
ସରଗ୍ତା ଧାନ୍ନୁ
(ଲୁକାସ୍ ୧୨:୩୩,୩୪)
19“ନିଜର୍ଘି ଲାଗାନ୍ ଦୁନିଆଁନୁ ଧାନ୍ନୁ ଆମା ଠୁଡ଼ିୟା, ଏକାସାନ୍ କା ପୋକୁ ଆରୁ ମାର୍ଚା ମହିଁକିରି ବାଗ୍ଡ଼ିଚି ଆରୁ ଚର୍ହାର୍ କାଥି ତୋଡ଼ିକିରି ହୋନାଏକାନାଏ। 20ଲେକିନ୍ ନିମ୍ ନିଜର୍ଘି ଲାଗାନ୍ ସରଗ୍ନୁ ଧାନ୍ନୁ ଠୁଡ଼ିୟା, ଏକାସାନ୍ କା ନା ପୋକୁ ଆରୁ ମାର୍ଚା ମହିଁକିରି ବାଗ୍ଡ଼ାରି ନା ଚର୍ହାର୍ କାଥି ତୋଡ଼ିକିରି ହୋନାଏକାନାଏ। 21ଏନ୍ଦେର୍ଗେକା ଏକାସାନ୍ ନିହ୍ମା ଧାନ୍ନୁ ରାଇଦ୍ ଆସାନିନ୍ ନିହ୍ମା ମନ୍ଦ୍ହି ରଦ୍।”
ହାନ୍ନୁଦ୍ ମେଦୁନ୍ତା ବିଲ୍ଲୀଦ୍
(ଲୁକାସ୍ ୧୧:୩୪-୩୬)
22“ହାନ୍ନୁଦ୍ ମେଦୁନ୍ତା ବିଲ୍ଲୀଦ୍: ହୁଦ୍ଘିଲାଗାନ୍ ଯଦି ନିହ୍ମା ହାନ୍ନୁଦ୍ ସାଫା ରାଇଦ୍ ହାଲେ ନିହ୍ମା ପୁରା ମେଦୁଦ୍ହି ବିଲ୍ଲୀ ଲେଖା ମାନଦ୍। 23ଲେକିନ୍ ଯଦି ନିହ୍ମା ହାନ୍ନୁ ଖାରାପ୍ ରାଇଦ୍ ତା ନିହ୍ମା ମେଦୁଦ୍ ପୁରା ଉହା ମାନକୋ; ହୁଦ୍ଘିଲାଗାନ୍ ନିହ୍ମାଏନୁ ରାନା ବିଲ୍ଲୀଦ୍ ଯଦି ଉହା ମାନିକାଇ ତା ଆ ଉହାଦ୍ କେତ୍କ ଭାୟାନାକ୍ ମାନଦ୍।”
ଏନ୍ଦେର୍ଗେହି ଚିନ୍ତା ଆମା କାମା ପାର୍ମେଶ୍ଵାର୍ସ୍ ଜାମାନ୍ ଚିୟସ୍
(ଲୁକାସ୍ ୧୬:୧୩; ୧୨:୨୨-୩୧)
24“ଅଣ୍ଟା ଆଲାସ୍ ଯୋଡ଼େ ମାଲିକ୍ର୍ଘି ସେବା କାମା ପଲ୍ଲଦାସ୍। ଏନ୍ଦେର୍ଗେକା ଆସ୍ ଅଣ୍ଟାସିନ୍ ବାନେ ହାଖ୍ଖସ୍ ଆରୁ, ଆରୁ ଅଣ୍ଟାସିନ୍ ହାଁଣସ୍ ତୁପ୍ଫସ୍। ଚାହେ ଅଣ୍ଟାସ୍ଗାନେ ମେଲ୍ପ୍ରେମ୍ନୁ ରସ୍ ଆରୁ, ଆରୁ ଅଣ୍ଟାସିନ୍ ହିନିସ୍ତା କାମସ୍। ନିମ୍ ପାର୍ମେଶ୍ଵାର୍ ଆରୁ ଧାନ୍ନୁ ଯୋଡ଼େନିନ୍ ସେବା କାମା ପଲ୍ଲଦାର୍। 25ହୁଦ୍ଘିଲାଗାନ୍ ଏନ୍ ନିମାନ୍ ତେଙ୍ଗାଲ୍ଦାନ୍ ନିଜର୍ ଜୀବନ୍ଘି ଲାଗାନ୍ ଚିନ୍ତା ଆମାକାମା କା, ଏମ୍ ଏନ୍ଦେର୍ ଅନମ୍ ମହମ୍ ଆରୁ ନା ନିଜର୍ ମେଦୁଘି ଲାଗାନ୍ କା ଏମ୍ ଏନ୍ଦେନ୍ ଆତ୍ତମ୍। ଜୀବନ୍ଦ୍ ଅନ୍ନା ମହଁନାସ୍ତି ଆରୁ ମେଦୁଦ୍ ଚିଢ଼ା ପାଟାସ୍ତି ବାଡ଼୍କା ମାଲ୍ଲିଦ୍ କାଁଏ? 26ଆକାଶ୍ ତା ଓଡ଼ା ଗୁଠିନ୍ ଏରା! ଆବ୍ଡ଼ାଦ୍ ନା ତା ଚାହିଦ୍ ନା ହୋୟିଦ୍ ଆରୁ ନା ତା ଆବ୍ଡ଼ାଦ୍ ମଁଣା ବାଖ୍ରାନୁ ଠୁଡ଼୍ୟିଦ୍; ହାଲେହି ନିହ୍ମା ସରଗ୍ତା ବାଙ୍ଗ୍ସ୍ ଆବ୍ଡ଼ାଗେ ଅନାମହାଗେ ଚିଦାସ୍। ହାଲେ ନିମ୍ ଆବ୍ଡ଼ାସ୍ତି ବାଗ୍ଗେ ମୂଲ୍ୟବାନ୍ ମାଲ୍ଦାର୍ କାଁଏ? 27ନିହ୍ମା ଭିତର୍ନୁ ନେଦ୍ ଏନ୍ନେ ରାଦାର୍ କା ଚିନ୍ତା କାମ୍ଚ୍କୁନ୍ହି କାଟେ ସାମାୟଘି ଲାଗାନ୍ ନିହ୍ମା ବୟସ୍ବନ୍ ବାଢ଼ାବାଗେ ଅଙ୍ଗର୍?”
28“ଆରୁ ନିମ୍ ଚିଢ଼ା ପାଟାଗେ ଏନ୍ଦେର୍ଗେ ଚିନ୍ତା କାମ୍ଦାର୍? ଜଙ୍ଗଲ୍ ତା ପୁଁପୁଗୁଠିନ୍ ଏରା, ଆବ୍ଡ଼ାଦ୍ ଏସ୍କେ ପାର୍ଦିଦ୍, ଆବ୍ଡ଼ାଦ୍ ନା ମେହ୍ଁନତ୍ କାମିଦ୍, ନା ନିଜର୍ଲାଗାନ୍ ଚିଢ଼ା ତିଆର୍ କାମିଦ୍। 29ହାଲେହି ଏନ୍ ନିମାନ୍ ତେଙ୍ଗାଲ୍ଦାନ୍ କା ଶୁଲେମାନ୍ ରାଜାସ୍ ତାଙ୍ଘା ଆତ୍ତନା ପୁନ୍ଦର୍ନାନୁ ଆବ୍ଡ଼ାସ୍ତି ଅଣ୍ଟାଗାନେହି ବାରାବୁରି କାମା ପଲ୍ଲିୟାସିନ୍। 30ଲେକିନ୍ ଏକା ଘାଁସିଦ୍ ଇନ୍ନା ହାଲ୍ଲୁନୁ ରାଇଦ୍ ଆରୁ ନେଲା ଏକାଗଡ଼ାନୁ ବାସ୍ସା ଚିଆକାଇଦ୍, ଆବନ୍ ଯଦି ପାର୍ମେଶ୍ଵାର୍ସ୍ ଏନ୍ନେ ସାଜାବାଦାସ୍ ହାଲେ, ହେ କମ୍ ବିଶ୍ୱାସ୍ କାମୁ ଆଲାରୋ ଆସ୍ ନିମାଗେ ଇଦ୍ଘିନ୍ତି ଏନ୍ଦେର୍ଗେ ବାଗ୍ଗେ ଚିଢ଼ାପାଟା ମା ଚିୟସ୍?”
31“ହୁଦ୍ଘିଲାଗାନ୍ ନିମ୍ ଏନ୍ଦେନ୍ ଅନମ୍ ମହମ୍ ଆରୁ ଏନ୍ଦେନ୍ ଆତ୍ତମ୍ ବୁଲି ଚିନ୍ତା ଆମ୍କେ କାମା। 32ଏନ୍ଦେର୍ଗେକା ଦୁସ୍ରା ଜାତିୟାର୍ ଇବ୍ଡ଼ା ଜାମା ଜିନିଷ୍ଘି ଖଜାର୍ନୁ ଲାକ୍କାରାନାଏ, ଲେକିନ୍ ନିହ୍ମା ସରଗ୍ତା ବାଙ୍ଗ୍ସ୍ ଆହ୍ଦାସ୍ କା ନିମାଗେ ଇ ଜାମା ଜିନିଷ୍ଘି ଦାର୍କାର୍ ରାଇଦ୍। 33ହୁଦ୍ଘିଲାଗାନ୍ ପହ୍ଲେ ନିମ୍ #୬:୩୩ ନିମ୍ ନିଜର୍ ଜୀବନ୍ନୁ ପାର୍ମେଶ୍ୱାର୍ସିନ୍ ରାଜା ବାନାବା ଆରୁ ପାର୍ମେଶ୍ୱାର୍ସ୍ ଏସ୍କେ ଚାହ୍ଦାସ୍ ଆନ୍ନେ ପାବିତାର୍ ଜୀବନ୍ ଉଜ୍ଜା।ପାର୍ମେଶ୍ଵାର୍ସ୍କି ରାଜୀ ଆରୁ ତାଙ୍ଘା ଧରମ୍ଘି ଖୋଜ୍ କାମା ହାଲେ ଇ ଜାମା ଜିନିଷ୍ଦ୍ ହି ନିମାଗେ ହାଖ୍ଖରଦ୍ କଦ୍। 34ହୁଦ୍ଘିଲାଗାନ୍ ନିମ୍ ନେଲାନ୍ତା ଚିନ୍ତା ଆମା କାମା। ଏନ୍ଦେର୍ଗେକା ନେଲାଦ୍ ନିଜର୍ଲାଗାନ୍ ନିଜେ ଚିନ୍ତା କାମୋ। ଇନ୍ନାନ୍ତା ଦୁଃଖୁ ଇନ୍ନାଘି ଲାଗାନ୍ ଢେର୍ ରାଇଦ୍।”
ที่ได้เลือกล่าสุด:
ମାତିସ୍ 6: xis
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
© (Active) Wycliffe Bible Translators, Inc. All rights reserved.
