ማ̈ቶ̈ሳ 13

ዜር ዜርቂ̇ዝ ኣስ ሚሳ̇̈ሊ

ማ̈ርቆ̈ሳ 4፡1-9፤ ሉቃ̈ሳ 8፡4-8

1ዪና̇ ኢዝ ጋላሲ̇ን ዬሱ̈ሲ ኬ̈ፖ ኬስካ̇ሪ ባሃ̈ሪን ላፍ ዶኢዴ። 2ዎይሊን ኣሲ ኢ̈ክ ዬ̈ር ሺ̈ቂኖኮታ̇ቦ ኢ ጎጛ ጋርታ̇ ጌላር ዶኢዴ፤ ዎርዣ̈ዳር ዎይ ባሃ̈ሪን ቡጊዲን ጋልዳ ኤቂ̇ኔ። 3ዪኒ̇ፖ ዎሃ ዎይሊን ባዝ ሚሳ̇̈ሊባራ ኢንታ̇ቦ ሶ̈ሊርዶሪ “ፔቲ̇ ኣሲ ዜር ዜርቃንዳብ ኬስኪዴ። 4ኢ ዜርቃ̇ምባራ ፔታ̇ን ፔታ̇ናን ጎይ ቡጊድ ጋልዳ ኬዲ̇ን ካፊ ዬ̈ሪ ኢንታ̇ ሱ ሙይዴ። 5ሜላ ዜርን ዎይሊን ሳ̈ዚ ባዮ̇ ቤስ̇ ቁ̈ኣ ጋልዳ ኬዲ̇ዴ፤ ዎይሊን ሳ̈ዚ ባዮ̇ኮታ̇ቦ ዜርን ኤሊ̇ባር ፉዳዴ። 6ማ̈ቂ̇ናካሬ ኣዋ ኬ̈ስኪ̇ን ሹላ̇ዴ፤ ጳሪን ጻጳ ሳዳ̇ ሚሻካ̇ዮኮታ̇ቦ ሜላዴ። 7ሜላ ዜርንሬ ኣጚ ጋርታ̇ ኬዲ̇ዴ፤ ኣጚን ዲጫ̇ሪ ፉዲኖ ጫ̈ቺ̇ን ባቃ̇ር ዲቻ̇ካ̇ይ ኣሺ̇ዴ። 8ሜላ ዜርን ኢጊስ ሳ̈ዝ ጋልዳ ኬዲ̇ ፉዳሪ ዎይሊን ኣ̈ፍ ካጺ̇ዴ ኢናፖ̇ ፔታ̇ኒ ጼ̈ታ፣ ፔታ̇ኒ ሌሂ ታጳ̇፣ ፔታ̇ኒ ዓይዚ̇ ታጳ̇ ኣ̈ፍ ካ̈ጺ̇ዴ። 9ሲስኪ̇ዝ ዋይ ዎ ኣሲ ዪኖ̇ ሲስኮጋ̈ቤ” ጌይዴ።

10ዪኒ̇ፖ ዎሃ ኢ ታማ̈ራን ኢ̈ክ ዬ̈ሪ “ኔ̈ኒ ዎርዣ̈ቦ ኣባብ ሚሳ̇ሊባር ሶ̈ላ̈ራ?” ጌይዴ። 11ኢያር ኢንታ̇ኮ “ዪንታ̇ቦ ጾ̈ሳ̇̇ ካ̈ቲቲ ሚ̈ስጢሪን ኤራምፔ̈ን ኢሚ̇ንቲ̇ኔ፥ ኢንታ̇ብ ኢሚ̇ንታ̇ካዬ። 12ዎ ና̈ሳቦ ጉ̈ዢንቲሬ ኢ̈ብ ዎይሊ̈ሬ፤ ባዮ̇ ና̈ሳ ጋልዳ̇ፖ ሜላ ኣቲ̇ን ኢ̈ብ ዎን ኢዛር ኤኪ̇ንታ̇̈ሬ። 13ኢንቲ̇ ቤቂ̇ሙታ̇ዶሪ ቤቂ̇ባ̈ሶ ኣስፌ̈ን፥ ሲስኪ̈ርዶሪ ሲስኪባ̈ሶ ኣስፌ̈ን ዎይ ቆፒ̇ባ̈ሶ ኣስፌ̈ን ማ̈ቂ̇ኖኮታ̇ቦ ቴ ኢንታ̇ብ ሚሳ̇̈ሊባር ሶ̈ላ̈ሬ።

14ናባ ኢሳ̈ሳ ማጻ̈ፋ ጋልዳ፦

‘ዪንቲ̇ ሲሲ̇ን ሲስኪርዶ̈ን ቆፒ̇ባ̈ሴ፤

ዪንቲ̇ ቤቂን ቤቂ̈ርዶ̈ን ኤልቅ ዎቲ̇ባ̈ሴ፤

15ዓ ዎርዣ ቡ̈ዳ ዛቢሴ፤

ኢንታ̇ ዋይ ዱሊ̇ኔ፥ ኢንታ̇ ኣ̈ፋዳሬ ጊጲኔ።

ዪ̈ፌን ማ̈ቃካ̇ይኮ ዎን ፌ ኣ̈ፊምባ̇ር ቤቂ̇፥

ፌ ዋይምባ̇ር ሲስኪ̇፥

ፌ ቡ̈ዲምባ̇ር ቆፓ̇ሪ፥

ታ̈ክ ማ̈ቂ̇ኖኮ ታ̈ናር ኢንታ̇ ፋ̈ርዶን’ ጋ̈ሪ ካ̈ዪኖን ኢንታ̇ ጋልዳ ፎቲንታ̈ሬ።

16“ዪንታ̇ ኣ̈ፊን ቤ̈ቃ̇ዚንኮታ̇ቦ ዪንታ̇ ዋይን ሲስካ̇ዚንኮታ̇ቦ ኢንቲ̇ ኣንጂንቲኖን። 17ቴ ዪንታ̇ክ ኪን ጋ̈ሬ ዎይሊን ናባንኬ ዎይሊን ጺላ̇ ኣሳን ዪንቲ̇ ቤቂ̇ኖን ቤቃ̇ንዳ̇ቦ ኢኒ̇ቲንዶን ቤቃካ̇ይ ኣቲ̇ዴ፥ ዪንቲ̇ ሲስኪ̇ኖን ሲስካ̇ንዳ̇ቦ ኢኒ̇ቲንዶ̈ን ሲስካካ̇ይ ኣቲ̇ዴ።

18“ዪዚ ዪንቲ̇ ና̈ሳ ዜር ዜርቂዛ̈ኮ ሚሳ̇ሊን ኢዛ ኣብዝኮ ሲስኪ̇ብቴ̇። 19ጾ̈ሳ̇̇ ካ̈ቲቲንኮን ቃ̈ሊን ሲስካ̇ሪ ማሂ ኤልቅ ዎቲባ̈ሶ ና̈ሳ ጋልዳፖ̇ ሴ̈ጣኖ ዬ̈ሪ ኢ ቡ̈ዲን ጋርታ̇ ዜርቂ̇ንቲ̇ኖ ቃ̈ሊን ቡሪ ኤኪ̇̈ሬ። ዪና̇ ዪዚ ጎይ ቡጊድ ጋልዳ̇ ኬዲ̇ኖ ዜር ጋ̈ዚንዶ፤ 20ቁ̈ኣ ሳ̈ዝ ጋልዳ̇ ዜርቂ̇ንቲ̇ኖ ዜር ጋ̈ዚንዳ ቃ̈ሊን ሲስካ̇ሪ ኡፋይቲ̇ ኤኪ̇ዝ ና̈ሳዲፌ̈ኔ። 21ዎቲናካሬ ዓት ዪንዳ̇ ኢናብዶኬ ጻጳ ሚ̈ሻካ̇ዮኮታ̇ቦ ፔቲ̇ ሜታ ዎይ ዳስ̇ ፌ̈ኖ ባዚ ዬሌ̇ጌይን ኤሊ̇ባር ካ̈ዲ̈ሬ። 22ኣጚ ጊዳ̇ ጋርታ̇ ኬዲ̇ኖ ዜር ጋ̈ዚንዳ ጾ̈ሳ̇̇ ቃ̈ሊን ሲስኪ̇ዝ ኣሴ፥ ዎቲናካሬ ዓና̇ ኣላሚን ጋልዶ ቆፊኬ ቆሊን ካን ኢ ቡ̈ዲን ጋርታ̇ ጌላሪ ኢ ሲስኪ̇ኖ ቃ̈ሊን ቶ̈ራ ጩ̈ላ̇ክ ኤ̈̇ን ኣ̈ፍ ካጻካ̇ይ ኣቲ̈ሬ። 23ኢጊስ ሳ̈ዝ ጋልዳ ዜርቂ̇ንቲ̇ኖ ዜር ጋ̈ዚንዳ ቃ̈ሊን ሲስካ̇ር ፌ ቡ̈ዳ ጋርታ̇ ኤኪ̇ዝ ኣሴ። ዪዚ ዪ̈ዲ ኣ̈ፍ ካጺ̇̈ሬ፤ ፔታ̇ና̈ዲ ጼ̈ታ̇፣ ፔታ̇ና̈ዲ ሌሂ ታጳ̇፣ ፔታ̇ናዲ ዓይዚ̇ ታጳ̇ ኣ̈ፍ ካጺ̇̈ሬ” ጌይዴ።

ሌ̈ሻ ሚሳ̇̈ሊ

24ዬሱ̈ሲ ኢንታ̇ቦ ሜላ ሚሳ̇ሊ ዪዝ ጋር ሶ̈ሊዴ፤ “ጾ̈ሳ̇̇ ካ̈ቲቲንዳ ፌ ዎት ጋዲን ጋርታ̇ ኮሽ ዜር ዜርቂ̇ኖ ና̈ሳ ማይጻ̈ሬ። 25ዎቲናካሬ ኣሲ ዎይ ሱርቂ̇ኖፖ ዓኒ ኢ ጻላ̈ታ ዬ̈ሪ ኢ ዜርቂ̇ኖ ዜርቂን ጋርታ̇ ሌ̈ሻ ዜርቃ̇ር ሉኪ̇ዴ። 26ዜርቂ̇ን ዲጫ̇ራ ካጻ̇ዚምባ̇ራ ሌ̈ሺንዳ̇ር ዪና̇ ኢዝባር ቤንታ̇ዴ። 27ኢናፖ̇ ዎት ጋዲን ላ̈̈ቦ ኣሽካ̇ራን ኢ̈ክ ዬ̈ሪ ‘ጎዳ̈ዶ ኔ ኔ ዎት ጋዲን ጋርታ̇ ኮሽ ዜር ዜርቂናባያ̇? ዓት ዪ̈ዶኮ ሌ̈ሾ ዎይዲፖ̇ ዬዬ?’ ጌዪ ኦይጪ̇ዴ።

28“ኢያር ኢንታ̇ኮ ‘ዪኖ̇ ዎቲኖ ጻላ̈ታ’ ጌይን ኢንታ̇ር ኢ̈ኮ ‘ዓት ዪ̈ዶኮ ኑ ሉካ̇ር ሌ̈ሺን ሚዳ̇ምፔ̇̈ን ኔ ኮያ̈ራ?’ ጌይዴ። 29ኢያር ኢንታ̇ኮ ‘ዪ ማ̈ቂ̇ባ̈ሴ ዪንቲ̇ ሌ̈ሺን ሚዲ̈ርዶሪ ዜርቂ̇ን ኢዝባር ዎልኣ ሚዲዝዳ። 30ቴይሲ̇ዝ ኬል̇ ዬሊ̇ዝ ዲራ̈ስ ዜርቂ̇ንዲኬ ሌ̈ሺንዲክ ዎልኣ ዲጫ̇ጋ̈ቤ ኣሺ̇ብቴ̇፤ ቴይሲ̇ዝ ኬል̇ባራ ታ̈ኒ ቴይሲ̇ዝ ኣሳንኮ ቲ̈ኒታር ሌ̈ሺን ቆሪብቴ̇ ታማባር ሚቻ̇ንዳብ ሴ̈ራር ጋዲ̇ብቴ። ዜርቂ̇ን ሺ̈ሻ̇ር ቴ ዲኢን ጋርታ̇ ሚሺብቴ̇ ጋ̈ንዳ̇’ ” ጌይዴ።

ሳና̈ፊጫ ጋዝ ታ̈ኪልቲ̇ን ኣ̈ፊን ሚሳ̇̈ሊ

ማ̈ርቆ̈ሳ 4፡30-32፤ ሉቃ̈ሳ 13፡18-19

31ዬሱ̈ሲ ሜላ ሚ̈ሳሊ ኢንታ̇ቦ ሶ̈ሊርዶሪ “ጾ̈ሳ̇̇ ካ̈ቲቲንዳ̇ ፔቲ̇ ኣሲ ፌ ዎት ጋዲን ጋርታ̇ ኤ̈ጛር ዜርቂ̇ኖ ሳና̈ፊጫ ዜርን ማይጻ̈ሬ። 32ኢዛ ዜር ጌይዛ ዎይ̈ፖ ጉ̈ጻ̇̈ሬ ማ ዲጫ̇ራ ታ̈ክሊታ̇ ዎይፖ̇ ሺራ ጴች ሚ ማ̈ቃ̇̈ሬ። ኢዝ ሻቃን ጋልዳ ካፊ ፌ ኬ̈ ኬ̈ጺ̇ ኢና ዶኢ̈ሬ” ጌይዴ። 33ዓታ̇ር ዬሱ̈ሲ ኢንታ̇ቦ ሜላ ሚሳ̇̈ሊባራ “ጾ̈ሳ̇̇ ካቲቲንዳ ፔቲ̇ ማጪ̇ን ዎይሊን ̈ል ኤካ̇ራ ኢዝ ጋርታ̇ ̈ሊ̇ን ካጺሳምፔ̈ን ሚሺኖ ሹ̈ሚን ማይጻ̈ሬ” ጌይዴ።

ዬሱ̈ሲ ኣባብ ሚሳ̇ሊባር ታማ̈ርሴ

ማ̈ርቆ̈ሳ 4፡33-34

34ዬሱ̈ሲ ዪ ዎይ ባዝ ሚሳ̇̈ሊባራ ዎርዣ̈ቦ ሶ̈ሊዴ፤ ኢ ሚሳ̇̈ሊ ባዪዶ̈ን ኣባካር ኢንታ̇ብ ሶ̈ላካ̇ዬ። 35ዪና̇ ማ̈ቂ̇ኖንዳ ናቢባራ፥

“ቴ ቴ ሶ̈ሊን ሚሳ̇̈ሊባር ሶ̈ላንዳ፤

ኣላሚን ኮቺ̇ንቲ̇ኖፖ̇ ኤ̈̇ር ኣ̈ቺ̇ንታ̇ር ዎ ባዛን ቴ ሶ̈ላንዳ̇” ጋ̈ር ሶ̈ሊንቲ̇ኖ ቃ̈ሊን ፎቲንታ̇ምፔ̈ኔ።

ዬሱ̈ሲ ሌ̈ሺንኮ ሚሳ̇̈ሊን ቢርሺቺ̇ን ሶ̈ሊዴ

36ዪኒ̇ፖ ዎሃ ዬሱ̈ሲ ዎርዣ ኣ̈ል ሚሻሪ ኬ̈ ጌሊዴ። ኢ ታማ̈ራንሬ ኢ̈ክ ኡካ̈ሪ “ዎት ጋዶ̇ ሌ̈ሺንኮን ሚሳ̇̈ሊን ቢርሺቺ̇ን ኑ̈ብ ሶ̈ላቤ” ጌይዴ።

37ዬሱ̈ሳር ኢንታ̇ኮ “ኮሽ ዜርን ዜርቂ̇ኖ̈ዲ ቴ ኣሳ ናኣዳ። 38ዎት ጋዴ ጋ̈ዚንዳ ዓና̇ ኣላሚንዶ̇፤ ኮሽ ዜር ጋ̈ዚንዳ ጾ̈ሳ̇̇ ካ̈ቲቲን ጋርቶ̇ ኣሳን፤ ሌ̈ሻ ጌይዛን ሴ̈ጣናብ ናኢ ማ̈ቃ̇ር ዎን። 39ሌ̈ሺን ዜርቂ̇ኖ̈ዲ ሴ̈ጣና። ቴይሲ̇ዝ ኬሌ̇ ጋ̈ዚንዳ ኣላሚን ዉርሲንዶ፤ ቴይሲ̇ዛን ኪ̈ታንቻ̇ን።

40“ሌ̈ሺን ሚዳሪ ሴ̈ራር ሚቻ̇ዚንዲፌ̈ኒ ኣላሚን ዉርሲን ጋልዳ ዪና̇ ኢዝፌ̈ን ማ̈ቃ̇̈ሬ። 41ዪኒ̇ባራ ቴ ኣሳ ናኣ̈ዲ ቴ ኪ̈ታንቻ̇ን ሚሻ̈ሬ፥ ኢንታ̇ሬ ኣሲ ናጋራ ኦ̈ምፔን ዎቲዛንኬ ማ ኢ̈ት ኦ̈ዛን ዎይ ሺ̈ሻ̇ሪ ጾ̈ሳ̇̇ ካ̈ቲቲን ጋርታ̇ፖ ኬሲ̇̈ሬ። 42ኢንታ̇ ኬሳ̇ሪ ቴይቂ̇ባ̈ሶ ታማ ጋርታ̇ ቶጚ̈ሬ። ኢና ኢንታ̇ቦ ዬ̈ፊኬ ኣቺ̇ ሙንትኬ ማ̈ቃ̇̈ሬ። 43ኢናፖ̇ ጺላ̇ ኣሳን ፌ ባ̈ባ̈ ካ̈ቲቲ ጋርታ̇ ኣዋ̈ፍፌ̈ን ፎ̈ኢ̈ሬ። ሲስኪ̇ዝ ዋይ ዎ ኣሲ ዓኖ̇ ሲስኮ ጋ̈ቤ” ጌይዴ።

ኣ̈ቺንቲ̇ኖ ቆሊንኬ ኢንቁ ጋዚን ኣልኣ ሹቺ̇ን ሚሳ̇̈ሊ

44“ጾ̈ሳ̇̇ ካ̈ቲቲንዳ̇ ዎት ጋድ ጋርታ̇ ኣ̈ቺ̇ንቲ̇ኖ ቆሊንን ማይጻ̈ሬ። ፔቲ̇ ኣሲ ዪኖ̇ ቆሊንን ዲጛሪ ማሂ ቤስ̇ ኢና ኣ̈ቺ̇ዴ። ኢ ዎይሊን ኡፋይቲ̇ኖኮታ̇ቦ ሉካ̇ሪ ፌ̈ብ ዎ ባዝ ዎይ ኤ̈ጚ ዎጛር ዪኖ̇ ዎት ጋዲን ፌ̈ብ ዎጚ ኤኪ̇ዴ።

45“ማ ጾ̈ሳ̇̇ ካ̈ቲ̇ቲንዳ ኢንቁ ጋዝ ኣልኣ ሹቺ̇ን ኮዪዝ ዛላ ዛልኢዝ ና̈ሳ ማ̈ይጻ̈ሬ። 46ዪ ና̈ሳ̈ዲ ዎይሊን ቦንቺ̇ንቲ̇ኖ ኣልኣ ሹቺ̇ን ዲጛሪ ሉካ̇ር ፌ̈ብ ዎ ባዚን ዎይ ኤ̈ጚ ዎጛሪ ዪኖ̇ ኣልኣ ሹቺ̇ን ዎጚ ኤኪ̇ዴ።

ሞላ ኤ̈̇ዝ ማጋላባ ሚሳ̈̇ሊ

47“ማ ጾ̈ሳ̇̇ ካ̈ቲቲንዳ̇ ሞላ ኤ̈̇ንዳብ ባሃ̈ራ ጋርታ̇ ሚሺኖ ማጋላቢን ማይጻ̈ሬ። ዪና̇ ማጋላቢንዳ̇ ዱማ ዱማ ሞላ ኮቺ̇ ፌ ጋርታ̇ ሺ̈ሻ̇̈ሬ። 48ኩሚኖፖ̇ ዓኒ ሞላ ኤ̈̇ዝ ኣሳን ጎ̈ቻ̇ር ባሃ̈ሪን ቡጊድ ኬሳ̇ሪ ኢዝ ጋርታ̇ፖ̇ ኮሺ̇ን ኮሺ̇ን ቆራሪ ጋዲ̇̈ሬ፥ ኢ̈ቲን ኢ̈ቲን ጌዳ ቶጚ̈ሬ። 49ኣላሚን ዉርሲን ጋልዳ ዪና̇ ኢዝፌ̈ን ማ̈ቂ̇̈ሬ፤ ጾ̈ሳ̇̇ ኪ̈ታንቻ̇ን ዬ̈ሪ ናጋራንቻ̇ን ጺላ̇ን ጋርታ̇ፖ ቆሪ̈ሬ። 50ኢ̈ት ኦ̈ዝ ኣሳን ቴይቂ̇ባ̈ሶ ታማ ጋርታ̇ ቶጚ̈ሬ፤ ቤስ̇ ኢና ኢንታ̇ቦ ዬ̈ፊኬ ኣቺ̇ ሙንትኬ ማ̈ቃ̇̈ሬ” ጌይዴ።

51ማ ዬሱ̈ሲ ኢንታ̇ኮ “ዪና̇ ዎይ ዪንታ̇ብ ጌሊና?” ጋ̈ር ኦይጪ̇ን፥ ኢንታ̇ር ኢ̈ኮ “ኣ ጎዳ̈ዶ ጌሊኔ” ጌይዴ።

52ኢያር ኢንታ̇ኮ “ዪ̈ኮታ̇ቦ ጾ̈ሳ̇̇ ካ̈ቲቲ̈ኮ ሚስጢራ ኮሺንቺ̇ ኤሪዝ ሂጋ̇ ኣስታማ̈ሪ፥ ፌ̈ብ ዎ ቆሊንን ሺሺ̇ ጋዲ̇ዝ ኬ̈ን ጋርታ̇ፖ ኦራ ማ̈ቂ̇ኖንዲኬ ሲላ ማ̈ቂ̇ኖን ኬሲ̇ ኤሄይዝ ቆሊን ባ̈ባ̈ ማይጺ̈ሬ” ጌይዴ።

ና̈ዝሬ̈ት ካታሚን ጋርታ̇ ዎ ኣሳን ዬሱ̈ሳ ቦንቻ̇ካ̇ይ ኣቲ̇ዴ

ማ̈ርቆ̈ሳ 6፡1-6፤ ሉቃ̈ሳ 4፡16-30

53ዬሱ̈ሲ ዪን ሚሳ̇̈ላን ሶ̈ሊ ዉርሲ̇ኖፖ̇ ዓኒ ቤስ̇ ኢናፖ̇ ሉኪ̇ዴ። 54ፌ ጋዳ̇ ና̈ዝሬ̈ት ካታሚን ጋርታ̇ ዬ̈ሪ ኣይሁዳን ዎ̈ሳ ኬ̈ ጋርታ̇ ዎርዣ ታማ̈ርሳ̇ምባ̇ራ ኢ ቲሚርቲ̇ን ሲስኪ̇ኖን ዎይ ጋራ̇ሚንታ̇ሪ “ዓ ና̈ሳ̈ዲ ዓና̇ ኤሪንዲ̇ኬ ታ̈ሚ̇ራታ ኦ̈ሲን ዎይዲፖ̇ ኤሬ? 55ዓዲ ና̈ሳ ሚ ማሲ̇ዛ ናኣ̈ዳ ባያ? ኢ ኢንዲ̇ንዳ̇ ማ̈ራሚ ጋዚንዲ̇ባያ? ኢ ኢና̇ኣን ዓይቆባ፣ ዮ̈ሴ̈ፋ፣ ሲሞ̈ናኬ ዪሁዳክ ባያ? 56ኢ ኢና̇ኣን ማጫናን ዎይ ኑባር ዎባያ? ዓት ዪ̈ዶኮ ዓ ና̈ሳ ዓ ዎይ ኤራ ዎይዲፖ̇ ዲጜ? 57ዎቲናካር ዪኮታ̇ቦ ኢ ሶ̈ሊኖን ኤካካ̇ይ ኣቲ̇ዴ።

ዬሱ̈ሲ ኢንታ̇ኮ “ናቢ ቦንቺ̇ንቲባ̈ሶንዳ ፌ ጋዳ̇ኬ ፌ ኣ̈ላ ጋርታ̇ ሙታ̇” ጌይዴ። 58ኢንቲ̇ ኢ ኦ̈ሲምባር ኣማ̇ናካ̇ዮኮታ̇ቦ ዬሱ̈ሲ ቤስ̇ ኢና ዎይሊን ታ̈ሚ̇ራ̈ታ ኦ̈ካይ ኣቲ̇ዴ።

ที่ได้เลือกล่าสุด:

ማ̈ቶ̈ሳ 13: ኦጫ̈ቃማ

เน้นข้อความ

แบ่งปัน

คัดลอก