Matayi 5

“Ukukumusya kwʼizwi pigamba”

Mat. 5-7: Luk. 6,20-49.

1Uwene lelo lwʼavawenyʼavantʼimpuga, pʼahazuva pigamba ilelo lwʼatendime pupo, pe vahapalamilʼavasundikwa vakwe. 2Pʼahavusyʼilomu ahavasambilizya ahati:

Intimo zya vasangalusu

3Vasangalusu vuvo ve vapina mumupepo wa muhati,

she vʼishinamwene sha kumwanya shavo.

4Vasangalusu vuvo ve vakusungama,

she valipumilizilwa.

5Vasangalusʼavatelefu,

shʼinsi yonti vupwano vwavo.

6Vasangalusu ve ninzala nishinyoto sha vugolosu shikuvaluma,

she valiyikuta.

7Vasangalusu vuvo vʼulupepelezyo lukuvalema muhati,

she valiyagʼulupepelezyo vope.

8Vasangalusʼavamoyʼamazelu,

she valimwenyʼuMulungu.

9Vasangalusʼavapelavwihalo,

she ve valiyitwa vana va Mulungu.

10Vasangalusu vuvo ve vakuṿwimilwa she vagolosu,

she vʼishinamwene sha kumwanya shavo.

11Mwe vasangalusʼimwe ingʼavantu vakuvaliga, inga vaku-vaṿwima, inga vakuvayanjila havivi izyʼilenga she mwe vantu vanʼine. 12Simuseshele mudovele she iṿwa kuvalipila ṿwinji kumwanya. Nkwe she vahonzizye vovulo ukuvaṿwima navakuvwi vonti, lwe mushili namwenemwe.

Insambilizyo kushiholanyo shʼiveya nisha nyale

13Mwe liveya lya nsʼimwe. Apene lelʼingʼiveya lisufile, amwe pe ṿilipo lelo iṿwa kulihozya? Pe lite nimbombo nimo, pe pakuti litagwaje kunzi, valisyusyutanye niṿinamʼavantu. 14Mwe luhozyo lwa nsʼimwe. Inkaya yʼili pamwanya pigamba yitakuvwama. 15Yope ninyale ingʼumuntu ayiholelezizye, pe vatakuyikupishila nishivo ndali, vakuyiviha pamwanya pashilemo sha nyale, ilelo pʼikuvahozezya vonti ve vali munyumba. 16She lwahaje vovulo lelo uluhozyo lwinyu lwe vakwenyʼavantu, pe valimutimʼuSo wʼali kumwanya, lwe vawenyʼimbombo zyinyʼinyinza zye mukuvomba.

Inkomelezyʼlukali ninkomelezyo zya Yesu

17Mutasivajʼukuti: Ingavangʼayinzilʼukuvindula ninkomelezyo navakuvwi ine. Ntinzilʼukuvindulʼine ndali, ninzilʼu-kulunjisya. 18Nalyoli lyoli nkuvavuzyʼine nkuti: Ukufiha pupo pe zilimongolwa niya kumwanya niya pansʼinsi hatakumongoha nahamo naha-i nahagwanule ahansi aha munkomelezyo. Zikwinza suti zyonti. 19Uno wengʼakuvindula hoka vwelele ahahomelezyo nukuvasambilizyʼavantu vovulo, wʼalitashilwa munsi kuli vonti mushinamwene sha kumwanya. Nkandʼuno wengʼakuzilandatʼinkomelezyo nukusambilizyʼavantu, wʼalitashilwa ukuva mupiti mushinamwene sha kumwanya. 20She nkuvavuzyʼine nkuti: Uvugolosu vwinyu inga vutalusizyʼuvugolosu vwa vamanyakalata nuvwa vaFalisayi pe mutaliyinjila mushinamwene sha kumwanya.

Uvupitwe nuvugozi

21Mwiṿuyʼukuti vavuzilwʼavalulwo ukuti:

Utahagoje. Uno wengʼakugogʼumuntu we wa kulongwa.

22Nkandʼine nkuvavuzya nkuti: Uno wengʼakumuṿitililwʼuwamwavo, we wa kulongwa, uno wengʼakumusufwʼuwamwavo akuti we njunjʼiwe, wʼatazilʼumulandu wa kulongwa mubalaza, uno wengʼakuligʼuwamwavo akuti we lipukupuku, we wakutajilwa mugehena lya mwoto. 23Iwe lelo ingʼuvusilʼukufinjila vimo pashifinjilo pupo lwʼukukumbuha ukuti uwamwinyu ali nahafwishi kukwaho, 24pʼuṿileshe suti pupo kunsi kushifinjilo viṿwo ṿwʼulesitʼiṿwa kufinjila, uvale sutʼiwe ukukundana nuwamwinyu, inga pʼuyinzʼukufinjila ṿiṿwo ṿwʼulesitʼukufinjila. 25Utontaje luvilo luvilo numulonjelezi waho, lwe muli mwenti mwidala, uyo umulonjelezi atahakutwale kumulonzi, numulonzi atahakutwale kumusikali, utahatajilwe mujela. 26Nalyoli lyoli nkuvavuzyʼine nkuti: Utalifuma mumwo lwʼutalifile nahahela aha kumpelela.

Uvuhandamanu

27Mwiṿuyʼukuti liyanzilwe lye likuti:

Utahavembuhaje.

28Nkandʼine nkuvavuzya nkuti: Uno wengʼakwenyelezyʼumwantanda nukumusungwa, wʼavembusile nawo mumwoyo wakwe. 29Ilelʼingʼilyinso lyaho lya kumulilo likukupuṿwʼiwe, pʼulyipe ulitagaje. She pʼukuva we mwinza, inga hakufwa ahantu hoka aha mumuvili waho, ukuti uwenʼumuvili waho wonti atahatajilwe mugehena. 30Havilʼumuhono waho wa kumulilo ingʼakukupuṿwʼiwe, pʼuwudumulaje uwutagaje. She pʼukuva we mwinza inga hakufwʼahantu hoka aha mumuvili waho, ukuti uwenʼumuvili waho wonti atahatajilwe mugehena. 31Lyope liyanzilwe ilya kuti:

Uno wengʼakutavulʼumushi wakwe,

uyo amupanjʼukalata wʼitalaka.

32Nkandʼine nkuvavuzya nkuti: Uno wengʼakumutavulʼumushi, nashengʼatatazilʼumulandu wa kuvembuha, pʼamupeleyʼukuva wa kuvembuha. Havili wengʼakumusenda we vamutavuyʼavamwavo, pʼavembusile.

Iyilapo nuvusuvilwa

33Havili mwiṿuye ukuti vavuzilwʼavalulwo ukuti:

Utalapajʼizyʼilenga, nkandʼumutwalilʼuMwene

ṿwengʼumulapiye, ṿwʼutili nkumutwalila.

34Nkandʼine nkuvavuzya nkuti: Utalapilaje muhamo, utatinji “inza she nakumwanya” she shitengo sha Mulungu, 35utatinji “inza she pansʼipa”, she hatengo ha ṿinama ṿwa wuyo, utatinji “inza she namu-Yelusalemu”, she ye nkaya ya mwene umupiti; 36utalapilajʼilya kuti “inza she ndi nitwe”, she nulusisi nalumo utamanyile nukuluzelufwa nukulwilufwa iwe. 37Muyanje lye likuti “ena” inga mukwitiha, nilya kuti “ndali” inga mukuhana. Aga kwonjezya pamwanya pali gugo gafumile mumuvivi.

Ukugalushizanya imbivi pambivi

38Mwiṿuye ukuti liyanzilwe ilya kuti:

Ukulanduzanya nilyinso palyinso nilyino palyino.

39Nkandʼine nkuvavuzya nkuti: Mutalwanje nawʼumuntʼumuvivi. Uno wengʼakukuhomʼikofi kuvudili vwa kumulilo, wʼumugalulile nuvwamwavo vwope. 40Uno wengʼakuti imulanduzyʼishatʼiwe akuti lye ndinyatule, wʼumupanje ninkanzu. 41Uno wengʼakukuṿijilizyʼidala ulutala lwoka, wʼujende nawo zivili. 42Uno wengʼakulavʼiṿwa kulava kukwaho, wʼumupanje. Uno wengʼakwanzʼukupava yimo kukwaho, wʼutamugunjile.

Ishikunzi numwatʼumwinza

43Mwiṿuyʼukuti liyanzilwe ilya kuti:

Mukundane nuwamwinyu, mupatane numulugu.

44Nkandʼine nkuvavuzya nkuti: Muvakundajʼavalugu vinyu, muvaputilaje nave vakuvaṿwima. 45Pe mukuva mwe vana va So wa kumwanya. Shʼuwenʼizuva lyakwe akuvatukuzizya navavivi navinza, imṿula yakwe akuvatonyelezya navagolosu navagombanu. 46Apene inga muvakunzite vuvo ve vavakunzite namwe, pe mulonsilʼamalipilo vuli? Avenʼavasonkolamusonko amwe vatakuhonzya vovulo? 47Havili inga mukulamunkana mwe vuvo vatupu mwe vanamuntu, pe mukuvomba zinizi hamo aha kulusya? Avenʼavakunzi vatakuhonzya vovulo vope? 48Mwe mumwo lelo muvanje mwe vila, inza she wope nuSo wa kumwanya mwila.

ที่ได้เลือกล่าสุด:

Matayi 5: NYi1965

เน้นข้อความ

แบ่งปัน

คัดลอก