Luka 3
3
UYohani umwozyi mukukumusya kwakwe
1Ilelo lwʼuTibeli ayinjiye mumwaha wa kuva wʼishumi nagasano amaha gakwe ga vukesali, lwʼuPonti Pilati ali musungansi ya Yudayi, lwʼuHelodi vamupiyʼuvumwene mu-Galilayi, lwʼuFilipu vamupiyʼuvumwene namw-Itulayi namu-Talakoniti, wope nuLusani lwe vamupiyʼuvumwene mw-Abilene, 2pala pʼavaHanasi nuKayifa vahavʼavashiputʼavapiti, pʼizwi lya Mulungu lihamwagʼuYohani, umwana wa Zahaliya mulwugwa.
3-18: Mat. 3,1-12. Mal. 1,1-8.
3Pʼuwenʼahavuhʼukuvala munsi yonti yʼipalamiye kwijenje lya Yolidani, ahakumusyʼulwozyo lwa lupinduho lwe lukuti mukuposhelʼuvuswila vwa malandu. 4Inza she zizyo zisi-mṿilwe mwa kalata wa mazwi ga Yesaya umukuvwi ukuti:
Izwi lya muvilishizi mulwugwa likuti:
Simuyananye nidala lya Mwene,
mugolosye nutuswatuho twakwe.
5Inyema zyonti zifushilwaje,
namagamba gonti gatelemulwaje,
uvugombanu vugolohaje,
amalandamazu gonti gayipelajʼukuvʼamadalʼamatambalusu.
6Amavili gonti galiyenyʼuvuposhi vwa Mulungu.
7Pʼahavavuzya vonti ve vavazilʼukwozelwa kukwakwe impuga yonti ahati: Mwe luho lwa njohʼimwe, unanʼavavuzizyʼimwe ukuti muliponʼuvuhalazu vwe vukwinza? 8Muhomʼinsanga zye zihondeline nulupinduho. Mutandʼilya kuyiyanjila mweka ilya kuti: Iswe tuli nutata uAbulahamu. Muleshe mbavuzyʼine, shʼuMulungu ali namaha ga kumuvusizyʼuAbulahamu avana mumavwʼiga. 9Yope nintemo yili kumazi kumakwi lwe lutanzi. Gontʼamakwi ge gatakuhomʼinsangʼinyinza galitemangwa, galitajilwa mumwoto, 10Pe vahamuvuzilizyʼavantʼimpuga yonti vahati: Ilelo tutuvuli? 11Uwenʼahamula ahavavuzya ahati: Uno wengʼali namashati gavili, wʼamupanje lyoka wʼate nalyo nalimo. Wope nuno wengʼali niṿintu ṿwa kulya, wope ahonzyaje vovulo. 12Vahavala vope navasonkolamusonko ukwozelwa, vahamuvuzilizya vahati: We Musambilizi, ilelʼiswe tutuvuli? 13Uwenʼahavavuzya ahati: Ukusanguzyʼumusonko kwe ndali ukupitilizyʼukusenda naṿwʼumuntu atavalajizizye. 14Vahamuvuzilizya vope navasikali vahati: Ilelʼiswe tutuvuli? Uwenʼahavavuzya ahati: Iṿwa vantu kwe ndali ukusampa vusampa, kwe ndali ukumulonjelelʼumuntu izyʼilenga. Simuyanane nago ge malipilo ginyu.
15Lwʼavantu vahagulililʼizya kwinza, lwe vahasivasiva mumoyo gavo izya Yohani, ukuti ingavanga uno wʼuChilisiti, 16pʼuwenʼuYohani ahavavuzya vonti ahati: Ine nalyoli nkuvozezya ge minzi. Nkandʼakwinzʼuwene wʼandusizyʼamahʼine, uwene natwe tuhova twa mundyato zyakwe ntahondeyʼukusatulʼine. Wuyo nyene alivozezya muMupepʼuMufinjile namumwoto. 17Wʼulupe luli munyove zyakwʼuwene, aliyusʼishaniho shakwe, ingana yʼaliviha mumulaza wakwe, ilyenʼilyelelo nyene lyʼalipemba mumwoto wʼatakuzima nalumo.
18Vovulo nizinjʼinyinji zya kuvatontela ahavavuzya ninongwʼinyinza avantʼimpuga. 19Wope nawe Helodi umwene uYohani ahamulongʼuwa pa-Helodiya umushi wa munine, ahalonga gonti nagʼatazile shimʼuHelodi aganji gonti ge gahamumena. 20Pʼuwene pali gonti ganaga pʼahonjezya nuwa kumwinjizya mujelʼuYohani.
Ukwozelwa kwa Yesu
21-22: Mat. 3,13-17. Mal. 1,9-11. Yoh. 1,32.
21Ilelo pe lwe vozilwe vontʼavantu, lwʼayozilwe nawe Yesu, lwʼuwenʼahaputa, pe kumwanya kuhiguha, 22pʼuMupepʼuMufinjile ahamwishila ngati nkunda mumuvili. Lyope nizwi lihafuma kumwanya, likuti: We Mwana wane unkundwa, we nkuseshela kulʼiwe.
Uvulandatano vwa luho lwa Yesu
23-38: Mat. 1,1-17.
23UwenʼuYesu lwʼakutalihʼimbombo yakwe pʼamazilʼamahʼamashumi gatatu ukudila, vahamuyangʼukuvʼumwana wa Yosefu, umwana-Heli, 24umwana-Matati, umwana-Levi, umwana-Meliki, umwana-Yana, umwana-Yosefu, 25umwana-Matatiya, umwana-Amosi, umwana-Nahumu, umwana-Eseli, umwana-Nagayi, 26umwana-Mahati, umwana-Matatiya, umwana-Simeyi, umwana-Yoseku, umwana-Yoda, 27umwana-Yohanani, umwana-Lesa, umwana-Zelubabeli, umwana-Salatiyeli, umwana-Neli, 28umwana-Meliki, umwana-Adi, umwana-Kosamu, umwana-Elimatamu, umwana-Heli, 29umwana-Yoswa, umwana-Eliyezeli, umwana-Yolimu, umwana-Matati, umwana-Levi, 30umwana-Simeyoni, umwana-Yuda, umwana-Yosefu, umwana-Yonamu, umwana-Elyakimu, 31umwana-Meleha, umwana-Mena, umwana-Matata, umwana-Natani, umwana-Davidi, 32umwana-Yisayi, umwana-Obedi, umwana-Bohasi, umwana-Salima, umwana-Nahasoni, 33umwana-Aminadabu, umwana-Adimini, umwana-Alini, umwana-Hezeloni, umwana-Pelezi, umwana-Yuda, 34umwana-Yakobu, umwana-Yisikaka, umwana-Abulahamu, umwana-Tala, umwana-Naholi, 35umwana-Seluhi, umwana-Lagahu, umwana-Pelegi, umwana-Ebeli, umwana-Sala, 36umwana-Kenani, umwana-Alipakisati, umwana-Semu, umwana-Nwaka, umwana-Lameki, 37umwana-Metusala, umwana-Henoki, umwana-Yaleti, umwana-Mahalaleli, umwana-Kenani, 38umwana-Enosi, umwana-Seti, umwana-Adamu, umwana-Mulungu.
ที่ได้เลือกล่าสุด:
Luka 3: NYi1965
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
Nyiha New Testament © British and Foreign Bible Society, 1965.
