Matyê 4
4
Sə́tə kwaʼtə́ Yěso
(Mks 1.12-13; Lks 4.1-13)
1Ə́ pə̂ yə́rə́, Zəghʼə Sê fû yʉʼ wó, ə́ ndághʼ Yěso ńdə́r lə̂ koŋə-məkwaʼá, ghíʼ Sə́tə wo kwaʼtə́ yé. 2A nyâŋ wó leʼé lâʼ mə̂m-ləkwo tə́ zʉ́ zə̂u, tə nji záŋə yé. 3Sə́tə tô ńkwáʼtə́ yé, ə́ ndǎʼ ngô: «Ghíʼ ô Môu Sê lə̂, lǎʼ lə́ məghǒ mwo ńgó ə́ shə́rə́ ńcʉ́ʼ məzʉ̂, ô zʉ́.» 4Yěso pwôr ngô: «Pə́ lə ŋwaʼá cər ŋwaʼa Sê ngô: “Káa ŋuu lâghʼ yé pə̂ ndaʼ məzʉ̂ mbə̂ wó, ŋuu pə̌ ndaghʼ mbaa tsâr tsəm yi ə́ kwǎr ntsʉ Sê ə́ mbə̂ wó.”»
5Sə́tə lâghʼ Yěso ńdə́r lə̂ túsoŋ Yelúsalêm, ə́ tû-mbəʉ túsoŋ Sê, ə́ ntághʼ yé ntsoʼ ndə̂ Sê; 6ə́ ndáʼ lə́ zʉ́ ngô: «O lə̌i mbə́ Môu Sê lə́nə́ʉ, o fû yaʼa ntyár ńtsə́ʉ sê; ńté no pə́ lə ŋwaʼá cər ŋwaʼa Sê ngô:
“Sê wo lǎʼ lə́ pəcwôʼ* pé
ńgó gháp lághʼ mbô máp khwǒr ghô,
ə́ mbóghʼ no mboʼ ô tô ku zô lə̂ ləghǒ.”»
7Yěso pwôr lə́ zʉ́ ngô: «Pə́ lə kə́ ncí ŋwaʼá cər ŋwaʼa Sê ngô: “Koo ŋuu cʉ́ŋə Nde Sê ye cʉ́ŋə ńgó a ghʉ́ zə̂u lə́ zʉ́.”»
8Sə́tə kə̂ ncí ndághʼ yé ńdə́r, ə́ ngwo ntághʼ yé ndəu có ləkôr, ə́ kwaʼ tâʼ ləkôr jwǐ, ə́ ntə́ʉ yʉʼ wó, ə́ nyárə́ yé məngoŋ mə́tsəm mi ə́ pə́ cər nzʉ̂ mbaa məzə̂u ləghûʼ máp, 9ə́ ndáʼ lə́ zʉ́ ngô: «O lə̌i nkʉ́ʼtə́ sê mbi məŋ ńgúʼtə́ ghâa, n ŋə̂ měi mə́tsəm lə́ gho.» 10Yěso lâʼ lə́ zʉ́ ngô: «Sə́tə, fú mbəʉ məŋ ncʉ́ŋtə́! Ńté no pə́ lə ŋwaʼá cər ŋwaʼa Sê ngô: “Ghúʼtə́ pə́ ndaʼ Nde Sê zô zə́ghʼə́-zʉ́, ə́ mbou nzúʼ pə́ ndaʼ ntsʉ yé.”» 11Sə́tə cʉ̂ʼ nkə́ nyér Yěso. Pəcwôʼ Sê* tô, ə́ mə́ mpfútə́ yé.
Yěso pəʉ lə̂ Galilêi lə̂ njí faʼ yé
(Mks 1.14-15; Lks 4.14-15)
12Yěso ghʉ̂ nzúʼ ńgó pə́ cóghʼ Jâŋ ndə̂-tsâŋ, ə́ ndə́r lə̂ Galilêi; 13ə́ nkə́u Nǎzalêi, ə́ nděi-lěi ngwo nyáŋ Kapérnawûm. Ə́ pə̂ túsoŋ yi ə́ pə́ mbəʉ lətʉŋ-nci Galilêi, ə́ lâʼ yi Zabulôŋ gháp Neftalî twóʼtə́ ńŋə́ soŋ. 14Ə́ pə̂ yə́rə́, ə́ ndaghʼ ḿbə̂utə lə̂ no yi Esǎya ntsətə-nkəʉ-Sê* lə lǎʼ ngô: 15«Pei pye Zabulôŋ mbaa pei pye Neftalî,
pei pi pei pə̌ lə̂ cǒ njʉŋə́ nci Yuudêŋ, ə́ nyáŋ mbáatə́ mə̂i-nci,
pei pye Galilêi pi pei pə̌ pətəpə̌i-no Sê
16Pei pi pei kə nyáŋ cər nzə̌m,
zei nzʉ̂ fǒghʼ.
Pei pi pei kə nyáŋ cər ngoŋ yi shî nzə̌m yi ləwʉ̂ kə pə́ wó,
wei mə́nəu saʼ mə́ tə mə́ ntə́.»
17Yěso pə̂ Kapérnawûm yə́rə́, ə́ njǐ lə̂ ndeʼtə́ tsâr Sê, ə́ mə́ ndâʼ ngô: «Pei kə́p cî zéi, ńté no mpfu yi Sê wo nyarə Ləfou yé cʉ́ŋə mə́ tə mbáatə́.»
Yěso tsôʼ pye ləkwo ə́ ndághʼ ńgʉ̌ ngaŋə-jyêʼ-no yé
(Mks 1.16-20; Lks 5.1-11)
18Yěso ghʉ̂ mə́ ŋə̂i nkaŋ lətʉŋ-nci Galilêi, ə́ njwó Síməu yi pə́ kə́ ncí mə́ fúŋ yé ńgó Pyêh, tə mbaa Ndeléya yi â fə̌r Síməu wêi. Gháp pə̂ mâʼ lənkʉ nci lə̂ ndághʼ ńgǒu shû. 19Yěso lâʼ lə́ páp ngô: «Pei tsə́ʉ nzəm məŋ, n ngwo ghʉ̌, pei cʉ́ʼ ngôu pə́ pye-mə́soŋ.» 20Gháp lêi-lěi nyér mənkʉ máp, ə́ ntsə́ʉ nzəm zʉ́.
21Gháp cʉ́ŋə ńkə́u mbi, Yěso jwô Jâghʼ gháp fə̌r ye Jâŋ, ə́ pə̂ ghəpə́ Zebede, gháp pə tə́ ghap nâa mbə́ cər kənyúʼ ə́ mə́ ntsúŋu mənkʉ máp, a fûŋ gháp. 22Gháp kə̂ ntóghʼ nyér kənyúʼ tə mbaa tə́ ghap, ə́ ntsə́ʉ nzəm zʉ́.
23Yěso lə pə́ ŋáa ŋə̂i yʉʼ tsəm cər paghʼə Galilêi, ə́ njyêʼ pye no Sê cər məndə̂ cûʼtə pəyúda*, ə́ mə́ ndêʼtə Nkəʉ Shʉʼʉ yi ə́ lâʼ pye ghíʼ Ləfou Sê* pə̂, ə́ mə́ ngʉ́ pye pə̂ shwítə lə̂ məghou mbə̂u lə̂ mbə̂u, ə́ mbou mə́ ngʉ́ məlǒʼ mbə̂u lə̂ mbə̂u mi ə́ pə́ lə́ pye mé. 24Ə́ pə̂ yə́rə́, pə́ laghʼ ləjôghʼ yé ńsár ngoŋ Silə̂i tsəm. Pə́ pə̂ ndâghʼ pye pə́tsəm pi məghou mbə̂u lə̂ mbə̂u pə́ lə́ páp, mbaa pye pi məzəghʼə tə́poŋ* pə́ mbə̂u gháp, tə mbaa ngaŋə kəpfuʼ gháp pə pəghaŋə pwóʼtə́ ńtó ńcə̂r yé, a ghʉ̂ gháp shwítə. 25Mənou lâʼ fû Galilêi, ə́ fú cər mətúsoŋ ləghə̂m, ə́ fú Yelúsalêm, ə́ fú Yudêi tə mbaa lə́ cǒ njʉŋə́ nci Yuudêŋ ńtó ńtsə́ʉ nzəm zʉ́.
ที่ได้เลือกล่าสุด:
Matyê 4: NLA
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
