Matyê 11
11
Ngaŋə-ntə̂u Jâŋ Mbaptísʉ
1Yěso lə lâʼ no zêi mbó ngaŋə-jyêʼ-no* yé ntsap pwô lə̂ ləghə̂m tə ə́ kuʼ, a fû yʉʼ wó ndə́r, ə́ ŋə̌i njyêʼ pye zə̂u ə́ mbóu ndêʼtə Nkəʉ Shʉʼʉ cər mətúsoŋ lə́ zêi paghʼə-ngoŋ.
2Ə́ pə̂ mpfu wêi, Jâŋ Mbaptísʉ pə̂ ndə̂-tsâŋ, ə́ nzúʼ pə́ pə̂ mbyêtə məno mi Yěso yi â Kəlísto pə̌ ngʉ̌. A tə̂u có ngaŋə-jyêʼ-no* yé ńgó gháp wó ntúŋú yé ngô: 3«ô Nzaʼ-nkʉ* yi pə́ zʉ́ʼtə yé lə̂, kəʉ paghʼ kə́ mə́ nzʉ̂ʼtə pə̂ cǒ yi ndeʼe?» 4Gháp wo njwó Yěso, a pwôr lə́ páp ngô: «Pei wó mbyétə́ zə̂u yi pei zǔʼ tə mbaa yi pei jwǒ ə́ ndǎʼ Jâŋ, 5ə́ ndǎʼ yé ńgó pəfwoghʼ-mə́nyôghʼ pə́ njwô yʉʼ, pəkə́niʼí-ku pə̂ ŋə̂i shʉʼʉ, pəghaŋə-nkâʼ pə̂ shwítə́, pəkʉʉ-mə́tuŋú pə̂ nzûʼ yʉʼ, pəpfû pə̂ nzʉ́ʉ lə̂ ləwʉ̂, pə́ pə̂ ntsə̂tə Nkəʉ Shʉʼʉ mbó pəghaŋə-ngwôʼ. 6Ndʉʉ-mboŋ â ŋuu yi a wo kotə yé lə́ Môu Ŋuu*, ə́ mpfúŋ sê po!»
7Pəghaŋə-ntə̂u Jâŋ lər, Yěso cʉ̂ʼ ndáʼ no ńté Jâŋ, ə́ mbó lâʼ yi ə́ pə́ yʉʼ wó, ə́ ntúŋú gháp ngô: «Ə́ lə pə́ lə̂ mpfu yi Jâŋ, pei wô koŋə-məkwaʼá ə́ njwó hó? Ə́ tâʼ kəkaʼa yi kəfwor pə̂ ncʉʼtə́ áa? Ə́ ngə́ áa? 8Tə pei kə wo pə́ njwô hó? Ə́ ŋuu yi a mǎʼ məndǐ nkâp áa? Lə́ pə maʼ zêi mbə̂u məndǐ ə́ ndághʼ ńnyâŋ pə́ ntôʼ. 9Tə pei kə wô pə́ njwô wǒ? Ə́ ntsətə-nkəʉ Sê* áa? Ə̂ŋ cʉ̂ʼ n ńdáʼ wéi, a kə pə́ wěi, tə ndêi mbaa ntsətə-nkəʉ Sê*. 10Jâŋ wêi yaa mbə́ ŋuu yi pə́ lə ŋwáʼá no náŋtə́ yé cər pǎp ŋwaʼa yo ngô: “Zûʼ, n ngwo tə́u ngaŋə-ntə̂u ghâa a pyə̂ghʼ ńtó, ə́ mə́ ntsúŋu laŋə́-ndə̂u zô o poŋə́ tó.” 11Yěso kə̂ ncí nkʉ́ʼʉ́ mə́ ndâʼ ngô: Məŋ ndaʼ wéi kwaʼ lə́nə́ʉ, cǒ ŋuu yi məngyě lə nyáŋ sê njí yé laa kə́ pə́ wó tə ndêi Jâŋ Mbaptísʉ. Lə́ ə́ yo, mə́i ŋuu yi a fǔ nkhwóghʼ lə̂ no Ləfou Sê*, ghǔʼ nděi Jâŋ. 12Tə fú lə̂ mpfu yi Jâŋ Mbaptísʉ, ə́ ntó nkə́u mpfu wo, pə́ pə̂ nzóŋə lə̂ nkə́u lə̂ no Ləfou Sê*. Pye pi gháp laghʼ pə̂ təʉ ńgʉ̂ məno máp pə́ ndôu lə̂ fú nkâŋ Ləfou Sê* zei tə ə̂ cʉ́ʼ mbə́ pə̂ zə̂u záp. 13Ńté no Mə̌usə̂i gháp pə pətsətə́-nkəʉ Sê pə́tsəm lə lâʼ no tə ngwó nkə́u lə̂ mpfu yi Jâŋ. 14Pei lə̌i mbóu mə́ nkôŋ lə̂ njí ŋuu yi Jâŋ pə̌ zʉ́, mə́i məŋ ngwo lǎʼ wéi ńgó a laghʼ mbə̂ Elyê* yi a lə təi kə́ cí tó. 15Ŋuu lə̌i ngwô mətuŋú lə̂ ndághʼ ńzúʼ no a zûʼ!»
16Yěso kə̂ ncí ndáʼ ngô: «Tə məŋ ngwo lǎghʼ hó pyé fəiʼ lə́ pye pi ə́ pə́ cər nzʉ̂ mpfu wo? Gháp cʉ́ʼ mbə́ pə́ ghíʼ ghəpə́ yi gháp nyáŋtə́ ndəu zǎa, ə́ mə́ nzâp təcər páp, ə́ ntô zap ə́ mbə̂i ngô: 17“paghʼ kə pə̂uʼ ləluŋú káa pei píŋ, ə́ máʼ ləwʉ̂ káa pei lâa.” 18Zə̂ kwaʼ ghíʼ gháp lə ghʉ̌ lə́ Jâŋ. A lə tó káa pə́ zʉ̂ yé zə̂u, káa pə́ nô yé məluʼ, gháp laʼ ńgó â pə. 19Môu Ŋuu* pou ntô yé mpfu wo, ə́ mə́ mpfâr zə̂u ə́ mbóu mə́ nô məluʼ, gháp laʼ ńgó pə́ náŋ yé njwó, ŋuu wə̂ pə̌ pə̂ fou məzʉ̂, ə́ mbə́ nó-nó, ə́ mbə́ sə̌u pəpfǔ-ntsəp Pəlóma* tə mbaa yi pəcó pye tə́poŋ. Lə́ pə́ pə̂ njwô ngô: “Pə́ lei lə̂ məfaʼ Sê, ə́ njwó ńgó jîno yé pə́ faʼ shʉʼʉ.»
Mətúsoŋ mi ə́ ləʼ lə̂ nzúʼ no Sê
(Lks 10.12-15)
20Yěso lâʼ yə́rə́, ə́ njǐ lə̂ shúŋtə́ mətuŋú pye cər mətúsoŋ mi a lə wǒ wó, ə́ ngʉ̌ mənkəʼə məno tə nzáa, lə́u gháp pə̂i gháp lə̂ shə́rə́ ńtsə́ʉ nzəm Sê po. 21A lâʼ lə́ páp ngô: «Ndou wə́ tû pei pye Kolazêŋ, tə mbaa tû pei pye Mbetsayída, ńté ńgó məno mwo mi pə́ lə ghʉ̌ təcər pei lo, ə́ lə pə́ ghíʼi mbə́ pə́ cər túsoŋ Tîr gháp túsoŋ Sidôŋ, mə́i gháp kə mə́ ndáʼ nkə́p cǐ záp, ə́ fʉ̌, ə́ sə̌ məpaa ngwér, ə́ nzóʼ pfû ndaghʼ ńdúŋ. 22Ə̂ zə̂u yi ə́ ghʉ̌, n ndâʼ ńgó ə́ táa pə́ leʼé yi Sê wo nzáʼ kôr təcər páp pə pye-mə́soŋ, ə zei ngwôʼ lêi yi pye Tîr gháp pə yi pye Sidôŋ. 23Ə́ ngwo lə́ pei pye Kapérnawûm, pei nkwaŋ ńgó Sê wo koʼó wéi koʼó tə pei kə́u ləfaŋ áa? N ndaʼ wéi ńgó ə ngə́, a wo shúʼú wéi shúʼú, pei shíʼ tə nkə́u lâʼ pəpfû-sê. Ńté no pə pəndǎa-jwô-mə́no mi pə́ lə ghʉ̌ lâʼ pei, pə́ lə ghíʼi ngʉ́ pə́ túsoŋ Sodôm, mə́i Sodôm pə́ yé pə́ wó tə nkə́u leʼé wo. 24Ə̂ zə̂u yi ə́ ghʉ̌ n ndâʼ ńgó ə́ táa pə́ leʼé yi Sê wo nzâʼ kôr təcər páp pə pye-mə́soŋ, zei ngwôʼ lêi yi pye Sodôm.»
Pyeʼ Yěso záŋə zaŋə́
(Lks 10.21-22)
25Yěso ghʉ̂ ndâʼ ngô: «Tǎa, ə́ Nde gho yi o sâʼ tʉ̌-lə́pû tə mbaa ndesé, m mə̌ ŋə̂ nkhwo lə́ gho ghíʼ o kə nyarə́ mwo məno ə́ mbó məghəghəʉ, ə́ ndwǒ měi mbó pənjino gháp pə pye pi pə́ lə jyéʼ gháp měi. 26Ə̂ŋ Tǎa, o lə jwó ńgó o wo ghʉ̌ no zêi pə́ yə́rə́.»
27Yěso kə̂ ncí ndâʼ ngô: «Tə́ ghaa lə nyêr zə̂u tsəm mbó məŋ. Mboʼ cǒ ŋuu jî yé ŋuu yi Môu pə̌ zʉ́ po, tə ndyéʼ Tə́. Káa ŋuu póu nkə́ mə́ njî yé ŋuu Tə́ ye pə̌ zʉ́, tə ndyéʼ Môu ye, ə́ mbǒu ngʉ́ ŋuu yi Môu kǒŋ lə̂ ngʉ̂ ńgó a jí ŋuu yi Tə́ ye pə̌ zʉ́.»
28«Pei pə́tsəm pi pei khwor pyeʼ yi ə́ pə́ njwər wéi, pei pôu mə́ nkáa, pei tó ńcə́r ghâa, n ngʉ́ pei zə́tə́. 29Pei wé kəʼtə́* zâa lóŋ pei, ə́ mbǒu mbə́i ńgó n njyêʼ wéi ghíʼ pei wo ghʉ̌, ńté no m mbworə̂, ə́ mbou ngwô shúʼu-mbəʉ, pei lə̌i ngʉ̂ yə́rə́, mə́i pei wo ghwǒ mə́shwítə cər məntə̂ʉ pei. 30Kəʼtə́* zâa pwórə, pyeʼ yi n ngwo ghʉ̌ pei khwôr, ə́ záŋə lə̂ khwôr.»
ที่ได้เลือกล่าสุด:
Matyê 11: NLA
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
