ยอน 4
4
เยซู เคิบ อัหเม ซะมาเรีย
1-2ทาเน เยซู ก็ กุญ ลูกนอง ออ ดก กวา ยอน วัล นำ จุบ อัห ตัก นอก ดก กวา ยอน วัล แต นังเลาะ แลว ไอ แมน เยซู จุบ อัห ตัก นอก ลูกนอง นำ จุบ อัห ตัก นอก ฮัก ทาเน ปึง ฟาริซี อัห ก็ เม็จ คาว เค็ย เยซู กุญ ลูกนอง ออ ดก ญาม เยซู เม็จจึด ปึง ฟาริซี เม็จ คาว เลือง นัง ออ แลว 3นำ ก็ ปัด เริล ตี ซอ นำ ทอก เจ็น จังวัด ยูเดีย นำ อง เริล จังวัด กาลิลี วัล
4แต ญาม เยซู เคิบ ลูกนอง เริล จังวัด กาลิลี นัน อัห ก็ ต็อง พาน จังวัด ซะมาเรีย วาล นอ 5ญาม อัห เล็ห ตัก จังวัด ซะมาเรีย แลว เจ็นนัน อัห ก็ เล็ห ตัก งวัล ซีคา งวัล ซีคา นะ อุ ตัก จังวัด ซะมาเรีย นัน งวัล ซีคา นะ อุ ติ ซะ เคิบ แซ ยาโคบ ตัก อิง ตี แซ นัน ยาโคบ อน ตัก ควัน ออ ตัก โยเซบ แลว 6-8ตัก นัน ก็ มี นำบอ อุ มี นำบอ นำบอ นะ เป็น นำบอ ยาโคบ เพิก ระ อน ตัก อิง นัน#เกาตีนา 33:19, โยซูวา 24:32
ทาเน ปะมาน เตียง แลว เยซู เคิบ ลูกนอง ก็ โตะ ตัก นำบอ นะ อัห นจาง โตะ เจ็น จังวัด ยูเดีย เยซู ก็ ฮิว นำ ก็ คุด มโบละ อุ นดิ นำบอ นัน ปึง ลูกนอง นำ ก็ เริล ทน ซะ ป็อง ใน งวัล เยซู ก็ คุด อุ นดิ นำบอ นัน ทาเน ก็ โตะ อัหเม มี ล็อง เป็น ครำ ซะมาเรีย นัน นำ โตะ ปัด ออก ตัก นำบอ นัน เยซู ก็ ซ็วน ออก ตัก นำ “เอิญ ครอ ออก มี ติด ดาย” เยซู อัง
9อัหเม ล็อง นะ ก็ งึด ตี เยซู ซ็วน ออก ตัก นำ ทำมาดา ครำ ยิว เคิบ ครำ ซะมาเรีย เน อัห ไอ มี จับ อัง นอย ซัก มี ติด เตาะ อัหเม ล็อง นะ ก็ ไล เยซู คือเน “มัห ซ็วน ออก ตัก เอิญ อังวะ มัห ครำ ยิว เอิญ ครำ ซะมาเรีย ดุห มัห ซ็วน ออก ตัก เอิญ อังวะ” นำ อัง#เอซรา 4:1-5, เนฮะมี 4:1-2 10แต เยซู ซวัล นำ มี ยาง วัล คือเน “เอิญ ครอ ออก ตัก มัห แต มัห ไอ มี เม็จจึด เอิญ เป็น ซีเอ นอ เอาซาง เพีย เตียม ซะ เลาะ อน ตัก มัห มัห ก็ ไอ มี เม็จ กัน มัห เม็จ มัห ก็ ครอ ออก นัน#ค 10 ตี เยซู เค็ย ออก นัน ก็ ซีแล็ม เค็ย ซีเอ ตี เจือ นำ ก็ กุญ รีด อุ ตลอด เยซู ก็ เป็น ออก นัน ตัก เอิญ ฮัก เอิญ ก็ อน ออก นัน ตัก มัห ออก นัน ก็ ระ ครำ รีด อุ ตลอด ฮัก” เยซู อัง
11อัหเม ล็อง นะ ก็ ไล เยซู คือเน “นำบอ เน จุ ซีเละ ดาย มัห ไอ มี นำทุง มัห ก็ ไอ มี ทาล มัห ปัด จังนัก ออก ตี ระ ครำ รีด อุ ตลอด นัน มัห ปัด ตัก นเดย บ็อห 12ยาโคบ เป็น เอาจ็อง อิห ตัก อิง นำ เป็น ครำ อน นำบอ เน ตัก อิห แลว ออก ตัก นำบอ เน เลาะ ซีเละ ยาโคบ ก็ ออก ตัก เน ควัน นำ จู ล็อง ก็ ออก ตัก เน แปะ แกะ ตี นำ เลียง ก็ ออก ตัก เน มด ซีวะ มัห เค็ย ออ มี ออก เลาะ กวา ออก เน วัล” อัหเม ล็อง นัน อัง
13เยซู ก็ ไล นำ ฮุนเน “ออก เน แอ ออก แลว ไอ มี อิง ก็ โซะ ออก วัล 14แต ออก ตี เอิญ อน มัห นัน กัน ซีเอ ออก อัห ก็ ไอ มี โซะ ออก วัล ออก ตัก เอิญ อน นัน กัน ซีเอ ออก แลว อัห ก็ อิม อุ ตลอด ฮัก อัห ก็ รีด อุ ตลอด จำ นเดย จำ กวา” เยซู อัง
15ทาเน อัหเม ล็อง นะ ก็ ครอ ออก ตัก เยซู ซีเละ “นไจ เอิญ ครอ ออก นัน ตัก มัห ดาย กัน มัห อน ออก นัน ตัก เอิญ เอิญ ก็ ไอ มี จำเป็น โซะ ออก วัล เอิญ ก็ ไอ มี จำเป็น โตะ ปัด ออก ตัก เน วัล เตาะ” นำ อัง
16ทาเน เยซู ก็ ไล นำ เริล มพอล คล็อง ออ “มัห เริล มพอล คล็อง ออ โตะ ตัก เน กา” เยซู อัง 17นำ ก็ เค็ย ไอ มี คล็อง “เอิญ ไอ มี คล็อง” นำ อัง เยซู ก็ เค็ย “แมน กา มัห เค็ย ไอ มี คล็อง ก็ แมน ซีเละ นะ 18มัห เกย มี คล็อง ฮา ล็อง แลว มานะ เน มัห ก็ มี อัหคล็อง มี ล็อง วัล โตะ อุ เคิบ มัห แต อัหคล็อง ล็อง นัน นำ ก็ ไอ แมน คล็อง คอง มัห ซีเละ ดาย มัห เค็ย ไอ มี คล็อง ก็ แคระ ซีเละ” เยซู อัง
19อัหเม ล็อง นะ เคาใจ เค็ย เยซู เม็จจึด ปะวัด ออ มด นำ ก็ ซวัล เยซู ฮุนเน “เอิญ เม็จ แลว มัห เป็น ลาม เอาซาง นอ 20กัน จังนะ ก็ ครอ ระ มัห ไล เอิญ ดาย แป ตี เป็น ครำ ยิว ซีวะ แป เค็ย ต็อง ไว เอาซาง ตัก เมือง เยรูซาเล็ม งคม ฮัก ครำ ซะมาเรีย อิห เน เอาจ็อง เมจ็อง อิห ตัก อิง อัห ก็ ไว เอาซาง ตัก ญวัง เกราซิม เน อิห เค็ย ไว เอาซาง ตัก ญวัง เน ซัง เลาะ เปียะ ตี เน แอ ไว เอาซาง ตัก นเดย เลาะ บ็อห” อัหเม ล็อง นะ อัง
21ทาเน เยซู ก็ ซวัล อัหเม ล็อง นัน ฮุนเน “ควน เจือ เอิญ กา บัดนะ แอ ไอ มี จำเป็น ไว เอาซาง ตัก ญวัง เน แอ ไอ มี จำเป็น ไว เอาซาง ตัก เมือง เยรูซาเล็ม วัล เตาะ แอ ไว เอาซาง ตัก นเดย ก็ กุญ มด บัดนะ 22แต นังเลาะ แลว ครำ ซะมาเรีย แป เน แป ทือ ซะ ตี แป ไอ มี กิว เม็จจึด ครำ ยิว อิห เน อิห ทือ ซะ ตี อิห กิว เม็จจึด เลาะ#ค 22 ครำ ยิว มี แญง เอาซาง อัห ก็ ลด เม็จจึด เค็ย เอาซาง กิว ไล ซีวะ เจ็น อิง เพาะวา รวง ครำ ปน แอ็ม เจ็น ลุห นัน ก็ เล็ห เจ็น กรอก ยิว อิห วาล อิห ก็ ลด ทือ ซะ ตี อิห กิว เม็จจึด ซีเละ 23มานะ เน ครำ แอ เคาใจ ไอ มี เมือนนอย นอ แต บัดนะ ไอ มี อิง โตะ ซีมาล เอาซาง แลว ซีมาล นำ ก็ ซับรวง ครำ แอ เน ทือ เอาซาง นังเลาะ ฮัก นำ จวย ระ แอ เคาใจ ต็อง ทือ เอาซาง แบบ นัก ซัง แคระ ซัง นำ ปอใจ อัง นังเลาะ แลว ซีมาล เอาซาง จวย ระ แอ ทือ เอาซาง แบบ แคระ ฮัก เพาะวา เอาซาง ต็องกาน ครำ ตี ทือ ออ แบบ แคระๆ ฮัก
24เอาซาง เป็น ซีมาล ครำ แอ เน ก็ ต็อง มี ซีมาล เอาซาง ซับรวง ซัง แอ กุญ เม็จจึด เอาซาง เป็น ซีเอ นังเลาะ ซัง แอ ทือ นำ ไว นำ แบบ แคระ กุญ” เยซู ไล อัหเม ล็อง นัน จังนะ
25ทาเน อัหเม ล็อง นะ ก็ ไล เยซู คือเน วัล “บัดนะ เมซียา ตี อัห เค็ย คริด นัน นำ กิว โตะ ซีเละ เลือง เน เอิญ เม็จ แลว กัน โตะ นำ แลว นำ ก็ ไล อน จู มบลึ ตัก แอ ระ แอ เคาใจ มด” อัหเม นัน อัง 26เยซู ก็ ซวัล นำ เค็ย “เอิญ เน ตี จ็อก อุ เคิบ มัห เน เอิญ เป็น เมซียา ล็อง นัน ดาย” เยซู อัง
27ท็อบ เยซู ไล นำ เค็ย ออ เป็น เมซียา นัน ปึง ลูกนอง นำ ก็ วัล เจ็น ทน ซะ ป็อง พอดี อัห เม็จ เยซู จ็อก อุ เคิบ อัหเม ล็อง นัน อัห ก็ งึด อัง นำ แต อัห ไอ มี ฮาน ซ็วน นำ อัหเม ล็อง นัน ต็องกาน ซีวะ อัห ก็ ไอ มี ฮาน ซ็วน ตี เยซู จ็อก อุ เคิบ อัหเม ล็อง นัน อัห ก็ ไอ มี ฮาน ซ็วน เมือนนอย
28ทาเน โตะ ปึง ลูกนอง เยซู แลว อัหเม นัน ก็ พระ ระ ปม ออก ตัก นัน นำ ก็ วัล ออ นำ เริล ไล อัห ตัก งวัล ซีคา นัน มด นำ ไล อัห ฮุนเน 29“เวิดๆ ดาย แป เจ็ย โตะ ดอม อัหคล็อง ล็อง นะ วาล นำ เม็จจึด เอิญ มด เอิญ เกย แอง ซีวะ นำ ก็ ไล อน มด นำ เป็น เมซียา ตี เอาซาง ซันญา โตะ จวย แอ นัน ก้า” อัหเม ล็อง นะ อัง 30ครำ งวัล นัน เม็จ อัหเม ล็อง นัน ไล ออ แลว อัห ก็ เลอะ มพอล นอย โตะ และ เยซู ทึดๆ
เยซู มเบิด เลือง เกียว ซา
31ญาม อัหเม ล็อง นัน เริล ไล ครำ ตัก งวัล นัน ปึง ลูกนอง เยซู ก็ วาง มพอล เยซู ป็อง จะ แต เยซู นำ ก็ ไอ มี งเคาะ ป็อง เตาะ 32เยซู ไล อัห คือเน “เอิญ มี ซะ ป็อง ตี แป ไอ มี เม็จจึด” นำ อัง 33ปึง ลูกนอง ก็ งึด อัห ก็ ซ็วน นอย “เอ เคิน ญาม ไอ มี ควะ แอ มี ครำ ซับ ซะ ป็อง อน นำ บ็อห” อัห อัง เค็ย นอย
34ทาเน เยซู ก็ ไล อัห คือเน “ซะ ป็อง คอง เอิญ ก็ ฮุนเน ดาย เอิญ แอง มอก เอาซาง ไล อน นัน เอิญ ก็ อิม แลว เอิญ โตะ ตัก โลก เน เอิญ โตะ แอง ตาม ใจ เอาซาง ฮัก เป็น เอาซาง นัน ฮัก ระ เอิญ โตะ ตัก โลก เน เอิญ ก็ ต็อง แอง มอก นำ กึด ระ อน ฮัก กัน เอิญ แองกาน ตาม แพนกาน เอาซาง แลว มด เอิญ ก็ อิม เน เป็น ซะ ป็อง คอง เอิญ
35แป ก็ เม็จ แลว นอ แป เค็ย ‘ซิห ซา ซี ซัวะ ก็ เกียว กุญ’ แป อัง นอ แต เอิญ ไล แป ร็อห ดอม แซ มานะ เน ดาย ดอม เลาะๆ มานะ เน ซา ก็ แคร็ห มด แลว เล็ห เวลา เกียว แลว
36ทาเน ครำ เกียว ซา นัน ซีแล็ม เค็ย ครำ แองกาน อน เอาซาง อัห ซับรวง ครำ ซอ โตะ และ เอาซาง ระ ครำ ซอ กุญ รีด อุ จำ นเดย จำ กวา ตี อัห ซับรวง ครำ ซอ โตะ และ เอาซาง นัน ก็ เป็น ญิม อัห แองกาน นัน
ทาเน ครำ ตี ซิห ซา เคิบ ครำ ตี เกียว ซา นัน อัห ก็ เลาะใจ เลิม บัดนะ 37งาน เอาซาง ก็ มอก เน ดาย อัห เค็ย ‘มี ล็อง นัน ซิห มี ล็อง นัน เกียว’ อัห อัง 38ครำ ตี ซิห ซา นัน ก็ ซีแล็ม เค็ย ครำ เริล ไล แญง เอาซาง อน ตัก อัห วาล ครำ ตี เกียว นัน ก็ ซีแล็ม เค็ย ครำ ตี เริล ไล แญง เอาซาง ตอ วัล มานะ เน เอิญ ไล แป เริล ไล แญง เอาซาง อน ตัก อัห ตอ วัล ระ อัห เคาใจ เลาะๆ บัดนะ ครำ ตี ไล วาล เคิบ แป ตี ไล แทะ นัน ก็ กุญ รางวัน เลิม บัดนะ” เยซู อัง
ครำ ซะมาเรีย เจือ ดก ล็อง
39ทาเน มี ครำ ซะมาเรีย ดก ล็อง ตัก งวัล ซีคา นัน อัห โตะ และ เยซู ก็ ญอน อัหเม ล็อง นัน ซับรวง อัห ฮัก เป็น เคิบ อัหเม ล็อง นัน ไล อัห เค็ย เยซู เม็จจึด จู มบลึ ตี อัหเม นัน เกย แอง อัห ก็ ลด เจือ เยซู ดก ล็อง ญอน อัหเม ล็อง นะ 40อัห ก็ โตะ และ เยซู อัห มพอล นำ พัก อุ เคิบ ออ ตัก งวัล ซีคา นัน นำ ก็ พัก อุ เคิบ อัห เปียะ งิ วัล 41เยซู อุ เคิบ อัห เปียะ งิ นัน อัห ก็ กุญ ปัง แญง เยซู อัห ก็ เจือ เยซู ดก ล็อง วัล
42ทาเน ปึง ครำ งวัล นัน โตะ ปัง เยซู แลว อัห ก็ ไล อัหเม ล็อง นัน ฮุนเน “มานะ เน อิห เจือ ซีเละ ดาย ไอ แมน อิห เจือ ญอน มัห ไล อิห เตานะ ดาย อิห เจือ ญอน อิห กุญ ปัง กุญ เม็จ นำ จ็อก เคิบ มัด เคิบ มุห ออ ฮัก มานะ เน อิห เม็จจึด แลว เค็ย นำ เน เป็น ล็อง ตี โตะ จวย ครำ ทัว โลก เน ระ ปน แอ็ม เจ็น ลุห” อัห อัง
เยซู ระ ควัน เจานาย งาล โซะ
43เยซู อุ งวัล ซีคา เปียะ งิ แลว นำ ก็ ลด เริล จังวัด กาลิลี วัล 44ทาเน เยซู เกย ไล ลูกนอง ออ แลว คือเน “กัน ลาม เอาซาง ไล แญง เอาซาง ตัก ครำ งวัล ออ ตัก ครำ กรอก ออ นัน ฮัก ครำ มี งวัล เลิม นัน อัห ก็ ไอ มี อน เกียด ตัก ลาม นัน เตาะ ลาม เอาซาง ต็อง เริล ไล ครำ ตี ซอ ไล ครำ กรอก ซอ ซัง อัห อน เกียด ตัก ลาม นัน” เยซู เกย ไล ลูกนอง ออ จังนะ แลว นอ 45แต นังเลาะ แลว ญาม โตะ เยซู ตัก จังวัด กาลิลี นัน อัห ตอนฮับ นำ ยาง เลาะ แปลก นอ ครำ มี จังวัด เดียว เลิม อัห ปัง นำ เลาะ ก็ ญอน อัห เกย เม็จ เยซู ตัก เมือง เยรูซาเล็ม แลว อัห เริล ซะลอง งิ เปซา ตัก เมือง เยรูซาเล็ม นัน อัห ก็ เม็จ จู มบลึ ตี เยซู แอง ตัก เมือง เยรูซาเล็ม นัน ญาม โตะ เยซู ตัก จังวัด กาลิลี นัน อัห ก็ ตอนฮับ นำ ยาง เลาะ#มัดทิว 13:57, มาระโก 6:4, ลูกา 4:24, ยอน 2:23
46ทาเน เยซู ก็ ลบ เริล งวัล คานา ตัก จังวัด กาลิลี นัน วัล ตัก งวัล คานา นัน กำนา นำ เกย แอง ออก ระ เป็น เล็ห ปุจ องุน ทาเน ก็ มี เจานาย มี ล็อง อุ งวัล คาเปอนาอุม นัน ควัน นำ ก็ โซะ เท็ม ซีเละ 47นำ เม็จ คาว เค็ย เยซู วัล เจ็น จังวัด ยูเดีย เล็ห ตัก จังวัด กาลิลี แลว นำ ก็ เริล และ เยซู ตัก งวัล คานา นำ โตะ ครอ ระ เยซู จวย ควัน ออ ตัก งวัล คาเปอนาอุม ควัน นำ แร็ง โซะ โซะ เท็ม ซีเละ บัก และ เปิล นำ ก็ ครอ ระ เยซู จวย ควัน ออ ยอน 2:1-11
48ทาเน เยซู ก็ ไล นำ “บา นอ กัน เอิญ ไอ มี แอง ซะ แปลก อน แป ดอม แป ก็ ไอ มี ญอม เจือ เอิญ” เยซู อัง 49แต เจานาย ล็อง นะ นำ วาง ครอ ระ เยซู เริล จวย ควัน ออ ติกๆ “ครอ โตะ จวย ควัน เอิญ วาล ดาย ระ นำ ไอ มี เปิล” เอา นัน อัง 50เยซู ก็ ไล นำ ฮุนเน “มัห วัล เจิง นทึห เตาะ ควัน มัห ไอ มี เปิล ซัง” เยซู อัง เจานาย ล็อง นะ นำ ก็ เจือ แญง เยซู นำ ก็ วัล เจิง
51ญาม เจานาย ล็อง นัน วัล เจิง ออ นเซ็บ นัน นำ ก็ ปัก เม็จ ลูกนอง ออ โตะ และ นำ ตัก รวง นัน ลูกนอง นำ นะ ก็ ไล เค็ย ควัน นำ เลาะ แลว งาล โซะ นำ แลว 52เจานาย ล็อง นะ ก็ ซ็วน ลูกนอง เค็ย “งาล โซะ นำ ญาม นเดย แซะ โมง” เจานาย อัง อัห ก็ เค็ย “งิ เซ็น บาย โมง งาล คัด นำ แลว” อัห อัง 53เจานาย ล็อง นะ ก็ ลด เคาใจ เค็ย งิ เซ็น บาย โมง เยซู เค็ย ควัน นำ เลาะ เล็ห นำ เคาใจ จังนะ แลว นำ ก็ ลด เจือ เยซู ครำ ใน เจิง นำ นัน ก็ เลอะ เจือ เยซู มด จู ล็อง 54เจ็น เยซู ทอก เจ็น จังวัด ยูเดีย เล็ห ตัก จังวัด กาลิลี เน นำ แอง ซะ แปลก เปียะ ลบ ตึง เน ตี นำ แอง ซะ แปลก เน ก็ ระ อัห เม็จจึด เค็ย นำ มี แร็ง มี อำนาด เอาซาง อุ เลิม
ที่ได้เลือกล่าสุด:
ยอน 4: Prai
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
Global Partners
