Salmos 40
40
1Lu yöl-laʼ riböza zxön ladxiʼ quiaʼ gulözaʼ gácalenëʼ Xanruʼ nedaʼ.
Níʼirö buzë́ naguëʼ quiaʼ, en biyönnëʼ le bulidzaʼ-nëʼ.
2Bubéajëʼ nedaʼ ca tu lu yeru ga rëʼ, en lu gunaʼ zili.
Buzóëʼ nedaʼ tu lu guiö́jtoʼo, en guléquiëʼ nedaʼ tsutsu.
3Busë́dinëʼ nedaʼ tu le cubi le rul-laʼ le naca yöl-laʼ ba queëʼ Dios queëruʼ.
Zián nupa ilaʼléʼeni lë ni, en ilún Lëʼ zxön,
ateʼ uluʼzxöni ladxiʼ-nëʼ Xanruʼ.
4Bicaʼ ba bönniʼ ruzxöni ládxëʼë Xanruʼ.
Bitiʼ runëʼ tsözxö́n nu run ba zxön cuini, nu naʼ run zxön yuguʼ dios núngaca bönachi.
5Ziántërö naca le nunuʼ queë́tuʼ, Xanaʼ Dios, yuguʼ le tun ga rubánituʼ.
Ziántërö le yuʼu icja ládxiʼdoʼo ca naca le gunuʼ queë́tuʼ.
Bitiʼ caʼ gaca nu ulaba loʼ Liʼ tsca nácagaca.
Channö guë́ʼëndaʼ nu usiyöndaʼ tsca nácagaca,
nayántërö tsca le gaca ulabaʼ.
6Bitiʼ rë́ʼënuʼ gútigacaʼ-baʼ böaʼ guixiʼ loʼ, en calëga bi cuʼa loʼ.
Bitiʼ rinabuʼ uzéguiʼgacaʼ-baʼ böaʼ bëdxi loʼ,
en calëga tu le gunaʼ loʼ para ugúa dul-laʼ,
pero gusaljuʼ nagaʼ para yöndaʼ le guíoʼ nedaʼ.
7Que lë ni naʼ gunníaʼ: Ni zoa cazaʼ nedaʼ quiuʼ.
Lu guichi láʼayi quiuʼ nazúaj caz ca naca quiaʼ.
8Raza ládxaʼa runaʼ ca rë́ʼënuʼ Liʼ, Dios quiaʼ.
Naguʼa icja ládxiʼdaʼahuaʼ xibá naguixjuʼ Liʼ.
9Ga tuʼdubi bönachi guizxi yu quiuʼ, Xan,
busiyöndaʼ léguequi nacuʼ tsahuiʼ.
Bitiʼ caʼ guzóaʼ dxisö.
Nöz quézinuʼ lë ni, Xan.
10Bitiʼ bucáchiʼzaʼ icja ládxiʼdaʼahuaʼ ca ruúnuʼ tsahuiʼ bönachi.
Buluʼa lahui ca runuʼ ca rnnoʼ, en ca rusölóʼ bönachi.
Ga nudúbigaca bönachi quiuʼ bitiʼ guzóaʼ dxisö,
pero bëʼa didzaʼ ca nacuʼ dxiʼi ladxiʼ, en ca ruʼu didzaʼ le nácatë.
11Bitiʼ ugúʼ quiaʼ yöl-laʼ dxiʼi ladxiʼ quiuʼ, Xan.
Yöl-laʼ dxiʼi ladxiʼ quiuʼ, en ca runuʼ ca rnna xtídzuʼu ilún chíʼiticaʼsö nedaʼ.
12Zián le raca quiaʼ nagúʼugaca nedaʼ lë́ʼajlö, le cabí gaca nu ulaba.
Nabágaʼa yuguʼ döʼ biʼa, en bítiʼrö gaca iléʼedaʼ.
Nayanrö ca guitsaʼ icjaʼ, ateʼ rudú ládxaʼa.
13¡Busölá nedaʼ, Xan!
¡Gudáchi gácalenuʼ nedaʼ, Xan!
14Ben ga uluʼtuíʼi, en ilaʼbö́ʼ baguíʼi
nupa naʼ të́ʼëni uluʼsuniti nedaʼ.
Ben ga uluʼhuécaj, en uluʼgáʼana cáʼasö
nupa naʼ të́ʼëni gaca quiaʼ le cabí naca dxiʼa.
15Ben ga uluʼdú ládxiʼgaca tuʼ nabíxigaca
nupa naʼ tuʼtitaj nedaʼ, taʼnná: “¡Buyútsöcaʼ le raca queëʼ!”
16Ben ga uluʼdzeja, en uluʼzíʼ xibóʼ yúguʼtë nupa tuʼguilaj Liʼ.
Ben ga ilaʼnnáticaʼsö nupa taʼdxíʼi yöl-laʼ rusölá quiuʼ,
ilaʼnná: “Nayë́psëtërëʼ Xanruʼ.”
17Nacuídiʼdaʼ, en bitiʼ bi gaca gunaʼ,
pero ruíʼi ladxiʼ cazuʼ Liʼ nedaʼ, Xan.
Naca cazuʼ Nu rácalen nedaʼ, en Nu rusölá nedaʼ.
Bitiʼ tsenuʼ guíduʼ quiaʼ, Dios quiaʼ.
ที่ได้เลือกล่าสุด:
Salmos 40: zar
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
© 2009, Wycliffe Bible Translators, Inc. All rights reserved.