Salmos 34
34
1¡Innë́ticaʼsaʼ queëʼ Xanruʼ náquiëʼ dxiʼa!
¡Cúʼuticaʼsaʼ Lëʼ yöl-laʼ ba!
2Böʼ naca cazaʼ gun zxön Xanruʼ.
Nupa nácagaca nöxaj ladxiʼ ilaʼyöni lë ni, en uluʼdzeja.
3Guliʼgüíʼ zxönëʼ Xanruʼ tsözxö́n len nedaʼ,
en tsözxö́n usiyönruʼ bönachi ca naca Lëʼ Laʼayi.
4Bulidzaʼ-nëʼ Xanruʼ, ateʼ bubiʼë didzaʼ quiaʼ,
en busölë́ʼ nedaʼ lu yuguʼ le gúdxidaʼ.
5Nupa nácagaca queëʼ bilaʼdxín lahuëʼ, en buluʼzíʼ xibë́ʼ.
Bítiʼrö caz uluʼtuíʼi nupa naʼ.
6Bulidzaʼ-nëʼ Xanruʼ, ateʼ biyönnëʼ quiaʼ nedaʼ, bönniʼ yechiʼ,
en busölë́ʼ nedaʼ lu yúguʼtë le guca quiaʼ.
7Gubáz láʼayi que yaʼabá queëʼ Xanruʼ tapa chiʼë nupa tadxi Lëʼ,
en tuʼsölë́ʼ léguequi lu yúguʼtë le raca quéguequi.
8Guliʼsíʼ bëʼë, ateʼ inö́ziliʼ náquiëʼ Xanruʼ dxiʼa.
¡Bicaʼ ba bönniʼ ruzxöni ládxëʼë Lëʼ!
9Guliʼgadxi Xanruʼ, libíʼiliʼ nácaliʼ quez queëʼ,
tuʼ cabí bi ilaʼyadzaj nupa tadxi Lëʼ.
10Taʼyadzaj taʼyúdxibaʼ bëdxi guixiʼ, en taʼdunbaʼ,
pero nupa tuʼlidza Xanruʼ bitiʼ caʼ taʼyadzaj le naca dxiʼa.
11Guliʼdá libíʼiliʼ, bíʼidoʼ, en buliʼzë́ nágaliʼ xtídzaʼa.
Uzéajniʼidaʼ libíʼiliʼ para gádxiliʼ-nëʼ Xanruʼ.
12¿Nuzxi caz bönniʼ rë́ʼënëʼ soëʼ ibanëʼ,
en rë́ʼënëʼ soëʼ iz zián para uziʼë xibé le naca dxiʼa?
13Ben chiʼi lúdxuʼu para cabí guʼu didzaʼ xihuiʼ,
en para cabí siʼ yéʼenuʼ luzóʼo.
14Bucáʼana le cabí naca tsahuiʼ, en ben le naca dxiʼa.
Bëʼ ladxiʼ cözuʼ dxiʼa tsáhuiʼdoʼ,
en ben bayudxi gunuʼ yuguʼ lë ni.
15Ruyúticaʼsëʼ Xanruʼ nupa nácagaca tsahuiʼ,
en riyö́n quézinëʼ cateʼ tuʼlidza Lëʼ.
16Uzáguëʼë Xanruʼ xinö́zgaca nupa tuáʼ döʼ,
en gunëʼ ga cuntu nu tsöjné léguequi.
17Nupa nácagaca tsahuiʼ tuʼlidza Xanruʼ, ateʼ riyönnëʼ quéguequi,
en rusölë́ʼ léguequi lu yuguʼ le raca quéguequi.
18Xanruʼ zóalen cazëʼ nupa tuʼhuíʼini ladxiʼ,
en rusölë́ʼ nupa nácagaca nöxaj ladxiʼ.
19Zián le riguíʼi rizáquëʼë bönniʼ tsahuiʼ,
pero Xanruʼ rusölë́ʼ lëʼ lu yúguʼtë lë naʼ.
20Xanruʼ rapa chiʼë yúguʼtë dxita yuʼë,
ateʼ bitiʼ gatsaj nitú dxita queëʼ.
21Le xihuiʼ run nu ruáʼ döʼ gun ga gati nu naʼ,
ateʼ ilaʼbagaʼ xiguiaʼ nupa bitiʼ taʼléʼe dxiʼa le naca tsahuiʼ.
22Xanruʼ caz ruhuöáʼuëʼ böʼ nácagaca caz huen dxin queëʼ,
ateʼ bitiʼ irugu que nitú nupa naʼ tuʼzxöni ladxiʼ Lëʼ.
ที่ได้เลือกล่าสุด:
Salmos 34: zar
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
© 2009, Wycliffe Bible Translators, Inc. All rights reserved.