Matius 12

Sabat Ya Naei A Usaei

(Mrk. 2:23-28; Luk. 6:1-5)

1Sabat ya mbai Yesus na moisa orowate yo bele gandum heke nolora ewate. Moni kowatene gandum ani hokayeke anayeke. 2Farisi holona yo erekaimilene Yesusre wainye, “Ereimi, Yahudi naei era hena huluinye Sabat ya omokoijae eleukoke rambunbe wa moisa orate yo mokate.”

3Nebeibe Yesus yae weumi, “Naendae wanen, aei yobe Ondofolo kaban Daud na moisa hakainyekoke orayeke yo bele monine kowatene mokouboke u mekai mayae homone okoikoi? 4Allahre ei mom-mom imae eise eweufike imam yoni-yoni yae mo anenaikonde feube yaroukoke na moisa hakainyekoke ro miyae bele ikeumi anaikoke. Musale walora wali heere foloukoke a huluinye nebei feu ro miyae hosoro anei sului. 5Nane merau Musale walora wali heere foloukoke homone moloukoke mayae okoikoi. Nebei homone molaikoke Sabat yare kalia omokoijaebe, nebeibe imam yoni-yoni Allahre ei mom-mom imae na kaban sele kiyaene kalia imokowate. Nebei naeise Allah yae bekore eleikoi. 6Reyae mare wamale, Reyae mai nolone hebale Kiyae Allahre ei mom-mom imae na kaban sele kiyaere hameungekokale. 7Allahle yendo kayaalo Hosea yae nda Allah ukeunge a moloukoke, ‘Yanekoi yase bele wali mekaise Raei kena kale, Rare hili era akau erare ongkou wae felennekonde Reyae kena ban.’#12:7 Hosea 6:6 Nebei a faeu naei no isaeyaeubokena, mayae Raei moisa orande yo beko omokoi holore me onoyoi sului. 8Rabuhine ban Reyae Allahle bokora mekale ro miyae uware yeubokale Kiyae Sabat ya na yunde yeubokale Reyae niyae.”

9Nebei anuwaufa alainyekoke ewate, aibaleke yona Allahre ei mom-mom imae mbainye Yesus eweufike. 10Nebeinye ro mbai na me reufi nimainyekoke nangkele eweufike. Nda yo Yesusre kemere nenainyebonderene a melaeli wanen mae nainyeboke wainye, “Sabat ya yae ro miyaere na hului onomi inyaimile?”

11Yesus yae weumi, “Mayae ro miyae nemene mai domba naendae mekai horo a bulune Sabat ya yae ruweubere bae mayae kaeuboube. 12Ro miyae bae Allahle ro be ro yoinye berei sele nda domba yoni-yonira. Nebeinye Reyae wamale, Ro miyaere Sabat ya na hului hakomambonde?”

13Yesus euweke nda rore weunge, “Wa me neinye!” Nebei ro na me nekeunge na hibi na me reufina me wanen onomi yeuboke. 14Nebei aerene Farisi holona yo Allahre ei mom-mom imaera aibaleke Yesusre honaibonde naei a meraunge kolowainyele.

15Nda yo na merau kolowainyele Yesus isaeyeubokene nebei ei mom-mom imaera eukuke anuwau hire ewole. Ro miyae helen Yesus ewolene hakainyekoke ewate era yo buloo yo nanemene onomi iwoumi.

16-17Allahle yendo kayaalo Yesaya yae Yesusle naeise nuleungekoke a na hului yembonde naeise, nda ro miyaere a hun kolowoumi Naei uwa naeise hiwa yore ehuweijae. 18Nda Wali Ondofolo naeise Allah ukeunge are Yesaya yae moloukoke,

“Erenne, Raei yebaei bubaei eleubokale ukanale endere Reyae buhaere haenaele Kiyae nane merau Raei kenare foise mokoyeufe Kiyae.

Raei Roh Nare arembonde.

Neyae Yahudi ban ro miyaere wali ijen are huwemmile.

19Neyae nibi enene a kaban mae ekaengkoi,

ro kabande ebaei.

20Hila rabo holei-holei an ro miyae wali o ha ba bele wanen nane merau ye rondon wanen.

Nebei yo Neyae mokommile naei hila rabo elae halenate.

Nebei me u Neyae mokonde mende ro miyae nemene Allah Naei me kelee u keleene enayorulengkonde nekenayende.

21Nare mbaibe nda kani kelana Yahudi ban ro miyae wali hena bonare rabo enainyehalende.”#12:21 Yesaya 42:1-4

Yesus Bele Beelzebul Bele

(Mrk. 3:20-30; Luk. 11:14-23)

22Nebeisa ro mbai alo yae ainyebokene na ijoko kumba yeuboke nane merau a mun yeuboke Yesusle bokore yawainyehoke mekate. Yesus onomi ikeungera a elewole ijoko erewole. 23Nebeinya ro miyae nanemene fa yae bowate elate, “Ondofolo kaban Daudle orona mena are nulainyekoke Ro nda niyae era!”

24Farisi holona borokate bae nda ro miyaere waimi, “Beelzebul, walobo yun mae elae ikeungebe, walobore hukeumi.”

25Farisi holona yo naei u benena a Yesus naeisaeinye weumi, “Yo yan mbai na ro miyae be hun ma hun nekenatena, nebei yo yan here ware wembonde. Nane merau yo mbai na ro miyae naeise naeise kena ikele nekenatena, nebei yona ro miyae here ware wembonde. 26Nebei sului mbai walobo yun na walobo akobaere hukennehindena, nauware uware fela roronete. Nebei mekai yae na yo yan kerensonde. 27Beelzebulle elae yae Reyae nda walobore hukeungehikale elaubena, ndele elae yae mai moisa orate yo walobore hukaimi? Nebeinye mai moisa orate yo yae mai beko mokaubere me nonayemombe. 28Nebeinye nda walobo yoni-yoni Allahle Roh elae yae hukamaelena, nana hesele Allah Rare eleufeboke nda kani kelana ro miyae me mokoremile.

29“Elae bele ro naei imaene nekelena, naei rambun yaroikoise ro miyae na hului ban sele. Nebei imaena ro na bere ha yae ikilenainyekonde helere nebeisa naei rambun yaronaikonde.

30“Nde yae Raei a elalere ehakoyei kiyae, nebei kiyae Rangkele yokeijobe nekende. Nde yae Raei me kelee u keleene nekate holona ro miyae inyaibondere moi eneisi, nebei kiyae ro miyaere here warebe boumi. 31Nebei aerene Reyae mare wamale, nde yae me hila u hilae Rare konsele, a beko faeu beko Rare wensele kiyae Allah naei beko bako faeinyennebonde. Nebeibe nde yae Allahle Roh Naei me u mokole walobolena elae walora mokale yae elengkondena, Allah nare buhae eheikoi sului. 32Reyae Allahle bokora mekale ro miyae uware yeubokale Kiyaere ro miyae mbai a beko wenselena, Allah naei beko bakore faeinyennebonde. Nebeibe nde yae Allahle Rohre a beko wennele kiyae Allah naei beko bako efaeinyeiboi mo nekenende nda kani kela huba mennemokonde yane.

33“Raei u mekai kombo mahu ani mokoyate wanen mae ahunerebonde. Mayae Raei u mekai ma elengko! Raei me u Allahle walora mokalene u mekai foi ma nekale, nebei banna, Raei me u walobo yun elae walora mokalene u mekai beko ma nekale. Rabuhine ban anira nebei o no roiboyainye wanen mae ro miyae naei me u mokate yae na hului ronainyebonde. 34Mayae rami holona wanen ro miyae yaeuboke. Mai u mekai beko nolone nekeimeyaubene, mayae a foi faeu foise eleikoi sului! Rabuhine ban mai kena beko u beko eisa are faeufe elaube. 35U mekai foi bele ro miyae foi yae maemae koikoyeunge na kena einye honainyene, foi naei rambunde mo eyelewole. Nebei sului mbai beko yae maemae koikoyeunge na kena einye honainyele kiyae beko naei rambunde mo eyelewole. 36Nebeinye bene nekenayembe, Allah yae ro miyae naei walire hului enengkolombe yane, mayae nanemene mai a faeu mekai ban elewaube wo engkongkombe. 37Rabuhine ban menaeijae elaube a faeu huluinye Allah yae foi yo kaenenembe, beko yo naei ehee bukulu inyembe.”

Allahle Yendo Kayaalo Yunus Nekewole Hee Wanen

(Mrk. 8:11-12; Luk. 11:29-32)

38Nebei hee yae Musale walora wali heere foloukoke isaeyaeiboke kelewaimi holona yo bele Farisi holona yo bele Yesusre wainye, “Guru, meyae kena hele kande Weyae rambun emere-emere mokoubonde eremabondere.”

39Nebeibe Yesus yae weumi, “Mayae u hila wa hilaere kaube ro miyae, rambun hoime bahe Allah merau wae ei molaungele lonbe, iwau emere mokorebondere riyaufe. Mare iwau eme Reyae omokoi, Allahle yendo kayaalo Yunusle iwau mbaibe kelerembombe. 40Yunus reniai ya name ka kaban yarele einye nekeukoke naei wanen mbai, Reyae Allahle bokora mekale ro miyae uware yeubokale Kiyae reniai ya name kani einye erenekengkonde. 41Allah ro miyae naei walire hului emmikolonde yane, Niniwe yone nendahina hele nekewate ro miyae bele nda kulunne yo bele nanembaisa anainyunde. Niniwena yo nda kulunna yore me nonaimiyonde. Rabuhine ban Niniwe ro miyae na mene ban une ban Yunus Allahlena a yae huwoumine hee rorowate nulu keumiboke. Mana Reyae mekale, Yunus yae ehameikoi Kiyae wamalebe, nebeibe mayae nulu ekeiboi sele. 42Allah ro miyae naei walire hului emmikolonde yane miyae Ondofolo Hilo Norona nda holona yo bele mbainye anainyunde, na beko mokowatera me nommiyonde. Rabuhine ban nda miyae Ondofolo kani kela hubara Ondofolo Salomole isaei hebaende borombonderene mewole. Mana Reyae nda nekale Salomo yae ehameikoi Kiyae, nebeibe Raei isaei hebaende oboroiboi sele kaube.

43“Nda kulunna ro miyae walobo nansau wae beko yae ei aungeboke wanen. Nebei walobo nansau ro miyae naei uwara etuwele hee, nore yembonde naei a kala-kala anuwaunge baeyele anne. 44Nebei walobo elele, ‘Reyae nukeubokale role uwa eise berehonde erelere.’ Eke bae nebei ro naei wali erele bangka, niki ban, nambai mokoungehake. 45Nebeinye nda walobo eukuke eke walobo na beko hele kayeero mehine bee yaweumiboke ayeuboke nekewate. Nda ro naei wali beko hele bena nekewolera. Nebei sului mbai nda u hila wa hilae ma kulunna ro miyae mai wali beko hele yembombe. Rabuhine ban Reyae mai nolone nekale heene, walobo yoni-yoni aibaleke. Nebeibe mayae Raei a elale hila rabo ehaleinye, Reyae erele heene walobo yoni-yoni helen bukenaibonde menate.”

Yesus Nenake Naei, Naei Aka Baeke Bele

(Mrk. 3:31-35; Luk. 8:19-21)

46Ro miyae helende Yesus ane weumi hee yae, nenake nauwake wa bele mekate. Yesus naei are elenaikonderene moinye hebewate. 47Ro miyae helen nolona ro mbai yae Yesusre eke weunge, “Ereibo ba, ana wauwake wa bele moinya mekaisebate Wangkele hubayengkombere.”

48Nebeibe are ukeunge rore Yesus yae weunge, “Nde menake wanen? Nde raei aka baeke wanen?” 49Na moisa orowate yore me yae keleumi wa elele, “Nda niyae menake naei rauwake wa naei. 50Rabuhine ban nde yae Maeko surgana naei kena kole huluinye hakonde mokonde, nebei kiyae Raei aka baeke wa yae menake naei yae elerekonde.”

ที่ได้เลือกล่าสุด:

Matius 12: setDBL

เน้นข้อความ

แบ่งปัน

คัดลอก