Mose I, 10
10
Noa bimɛ ɔmɛ a nina
(Kronika I, 1.5-23)
1Noa binyumuhi, Shem, Ham, kɛ Yafet ɔ, a binyumuhi nɛ a fɔ ngɛ nyu kpekpemi ɔ se ji nɛ ɔmɛ nɛ.
2Yafet bimɛ ji Gomer, Magog, Madai, Yavan, Tubal, Meshek, kɛ Tiras bi. 3Gomer nina ji Ashkenaz, Rifat, Togarma bi. 4Yavan nina ji Elisha, Spania, Kipro, kɛ Rodo bi. 5Nihi nɛ ngɛ wo nya zugba amɛ kɛ wo kpɔ ɔmɛ a nɔ ɔ, a nɛmɛ ji ni nɛ ɔmɛ nɛ. Yafet nina ji mɛ tsuo. A ngɛ mɛ nitsɛmɛ a zugbahi a nɔ wɛtso nya wɛtso nya, nɔ tsuaa nɔ kɛ e ma mi gbi.
6Ham bimɛ ji Kush, Egipt, Libia, kɛ Kanaan bi. 7Kush nina ji Seba, Havila, Sabta, Raama, kɛ Sabteka bi. Raama nina ji Sheba kɛ Dedan bi. 8Kush binyumu ji Nimrod, nɛ Nimrod nɛ ɔ ji kekleekle tatsɛ kpanaa ngɛ je ɔ mi. 9Yawɛ gbaa lɛ nɛ e ba pee detsɛ ngua. Enɛ ɔ he je ɔ, a kɛ e biɛ buu abɛ ke, “Yawɛ nɛ ha nɛ o ba pee detsɛ ngua kaa Nimrod!” 10Kekleekle ɔ, Nimrod nɔ yemi he ɔmɛ ji Babilon, Erek, kɛ Akad ngɛ Babilonia zugba a nɔ. 11Se e je lejɛ ɔ kɛ ya Asiria, nɛ e ya po mahi ngɛ Nineve, Rehobot Ir, Kala, 12kɛ Resen nɛ ngɛ Nineve kɛ ma ngua a nɛ a tsɛɛ Kala a kpɛti ɔ.
13Egipt bi a nina ji Lidia, Anam, Lehab, Naftu, 14Patrus, Kaslu (he nɛ Filisti bi ɔmɛ je ɔ), kɛ Kaftor bi.
15Kanaan bitɛte ji Sidon, kɛ e senɔ nyumu Het. 16Kanaan nina ji Yebus bi, Amor bi, Girgash bi, 17Hiv bi, Ark bi, Sin bi, 18Arvad bi, Zemar bi, kɛ Hamat bi. Pee se ɔ, Kanaan wɛtso slɔɔto ɔmɛ gbɛ fĩa. 19Kanaan bi ɔmɛ a zugba a ngɛ kɛ je Sidon kɛ gu Gera hluu kɛ ya pi Gaza. Jehanɛ, zugba a ya gu Sodom, Gomora, Adma, kɛ Zeboiim blɔ, kɛ ya pi Lasha. 20Ham nina ji nɛ ɔmɛ nɛ; nɔ tsuaa nɔ kɛ e wɛtso, kɛ ma mi he nɛ e je, kɛ gbi nɛ e tuɔ.
21Yafet wetsɛ Shem ji Hebri bi ɔmɛ tsuo a nɛ̃. 22Shem binyumuhi ji Elam, Ashur, Arpakshad, Lud kɛ Aram. 23Aram binyumuhi ji Uz, Hul, Geter, kɛ Meshek. 24Arpakshad ji Shela tsɛ, nɛ Shela ji Eber tsɛ. 25Eber ngɛ binyumuhi enyɔ; a wo e bitɛte ɔ biɛ ke Peleg,#10.25Peleg: Ngɛ Hebri gbi mi ɔ, biɛ nɛ ɔ pɛɛ kaa munyu nɛ sisi ji “a gba mi.” ejakaa jamɛ a be ɔ mi ɔ, a gba nyu dɔ ngɛ zugba a mi; Peleg senɔ ɔ biɛ ji Yoktan. 26Yoktan nina ji nɛ ɔmɛ nɛ: Almodad bi, Shelef bi, Hazarmavet bi, Yera bi, 27Hadoram bi, Uzal bi, Dikla bi, 28Obal bi, Abimael bi, Sheba bi, 29Ofir bi, Havila bi, kɛ Yobab bi; Yoktan nina ji ni nɛ ɔmɛ tsuo. 30A sihi he ngɛ kɛ je Mesha kɛ ya Sefar ngɛ yoku zugba a nɛ ngɛ beleku je ɔ nɔ. 31Ni nɛ ɔmɛ ji Shem nina; nɔ tsuaa nɔ kɛ e wɛtso, kɛ ma mi he nɛ e je, kɛ gbi nɛ e tuɔ.
32Ni nɛ ɔmɛ tsuo kulaa ji Noa nina, ngɛ mahi kɛ wekuhi a mi hehi nɛ a je ɔ. Nyu kpekpemi ɔ se ɔ, ni nɛ ɔmɛ a mi je ma amɛ tsuo je gbɛ fĩa je ɔ mi tsuo.
ที่ได้เลือกล่าสุด:
Mose I, 10: Dangme
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
Bible in Dangme © Bible Society of Ghana, 2018.