Mutendeko 16
16
Hagara na Ishimaele
1Sarayi, muwoli wa Abramu, kuti wakamubabira mwana na yumoza chara. Kweni wakaŵa na muteŵeti-kazi muEguputo zina lakhe Hagara. 2Sono Sarayi wakati kwa Abramu, “Fumu yili kundijara ine kubaba ŵana. Ntheura njira mu muteŵeti-kazi wane mwakuti panyakhe ndingaŵa na ŵana kwizira mwa iyo.” Abramu wakamupulikira Sarayi. 3Ntheura para Abramu wakakhara virimika khumi mu charu cha Kanani, Sarayi, muwoli wakhe, wakatora Hagara muEguputo, muteŵeti-kazi wakhe, na kumupereka kwa Abramu, mufumu wakhe, kuti nayo waŵe muwoli wakhe. 4Abramu wakamumanya Hagara, ndipo wakaŵa na nthumbo. Para Hagara wakawona kuti wali na nthumbo, wakamba Sarayi fumukazi yakhe.
5Ntheura Sarayi wakati kwa Abramu, “Ubudi uwu wachitikira ine uŵenge pa iwe. Ine ndine nkhamupereka muteŵeti-kazi wane kwa iwe. Ndipouli na umo wakawonera kuti wali na nthumbo wandiyuyura pera ine. Fumu ndiyo yeruzge uyo wananga pakati pa iwe na ine.”
6Kweni Abramu wakati kwa Sarayi, “Uyu ndi muteŵeti-kazi wako ndipo wali pasi pa iwe. Chita nayo umo ukukhumbira.” Penepapo Sarayi wakamba kumuyuzga Hagara mwakuti wakamuchimbira.
7 Mungelo wa Fumu wakakumana nayo Hagara pa mbwiwi mu mapopa, pa nthowa ya kuruta ku Shuru. 8Mungelo wakati, “Hagara, muteŵeti-kazi wa Sarayi, kasi wafuma nkhu ndipo ukuruta nkhu?”
Iyo wakazgora wakati, “Nkhuchimbira fumukazi yane Sarayi.”
9Mungelo wa Fumu wakamuphalira wakati, “Werera kwa fumukazi yako ndipo ukayipulikirenge.” 10Mungelo wa Fumu wakatiso, “Nditi ndandaniske chomene ŵa mphapu yako mwakuti ŵamkupendeka chara chifukwa cha unandi wawo.” 11Mungelo wa Fumu wakatiso, “Wona, uli na nthumbo ndipo utibabenge mwana mwanarume. Uti umuthyenge zina lakhe Ishimaele,#16.11 Ishimaele: Lizgu ili mu chiHebere likung'anamula kuti “Chiuta wakupulika”. chifukwa Fumu yapulika suzgo yako. 12Wati waŵenge nga ndi boli. Wati waŵe wakwimikana na munthu waliyose, ndipo munthu yose wati wimikane nayo. Ndipo wizamkukhara wakupindikana na ŵabali ŵakhe wose.”
13Ntheura Hagara wakayithya Fumu iyo yikayowoyanga nayo kuti, “Imwe ndimwe Chiuta wakuwona.” Pakuti wakati, “Kasi ndawona nadi Chiuta na kuŵa wamoyo pamanyuma pakumuwona?”#16.13 pakumuwona: Vesi ili likung'anamulaso kuti “asi ndamuwona pano uyo wakundiwona”. 14Pa chifukwa ichi mbwiwi yira yikathyika “Mbwiwi ya uyo ngwamoyo mweneuyo wakundiwona.” Yili pakati pa Kadeshi na Beredi.
15Ntheura Hagara wakamubabira Abramu mwana mwanarume. Ndipo Abramu wakamuthya mwana wakhe mweneuyo Hagara wakababa zina lakuti Ishimaele.#Gal 4.22 16Abramu wakaŵa wa virimika 86 apo Hagara wakamubabira Abramu, Ishimaele.
ที่ได้เลือกล่าสุด:
Mutendeko 16: Tumbuka
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
Bible Society of Malawi
