ADECHHÜ 19
19
Sodom Nyithu Kesami
1Tsü ghanan minulen wi tangnyilo keni Sodom wi gho nan Lot na anyunuti khweti wi donki benla. Ma manyi muya meyi bvü wa manyi metu. Ma manyi tuwi kukedu 2nu khi, “Kediwa keni, hi nshinyi ketsikina tenle, ijjen wi gholo. Nshinyi ccü bhuya nu shita ijjen wi benlo. Ghanen wi mitu na shagha nu waya mehai.”
Isala manyi luneng “Nye le, ishinyi shita anyunuti lentonti hawi benden.”
3Ma mataghang manyi ci khvu sa, nu manyi ma gweghe ma jjen wi wha. Lot na amaghathu kiza nu amesa gü thsü, nu kijünyi ghena kedsakejjü kemehai kiden thsü. Kuggü cenkeya seng wi manyi na dsajjüya.
4Kijünyi keni awe wi npi kedu wi Sodom nyithu na wa ajjen vüya. Anyunuti wi anyi tsüdi, ghanyi keqhai ciwi gho. 5Mathu Lot cichi nu keü, “Shita njjen wi benle gho keben anyi keni tsü khiewa ben nu? Manyi ssi shhugho ikhang cülo.” Sodom nyithu na tsü keni ssimehaile sa.
6Lot na akhemi wi shhu nu ajjenkhen sha. 7Ma mathu wi kiza, “Ipvüshangthu, gheshighena kekuli hati nsa lalo; hi nthu wi khieben! 8#Pen 19.22-24. Ghangchilo, hi inga pvünyimetha keni ben. Hi wa manyi ssi shhugho nthu cüa na, nthu manyi pi mangwa samvu khe sayalo. Isala anyi ha keni miwi tsü mangla nsa lalo; manyi ijjen wi kijünyi ghaben, nu hi manyi khwe meyathu yishü.”
9Isala mathu khi, “Ikhang wina bvülo, no asang! No thowa lenu ikhang mangwa salo kiza ben nu? Ikhang wina bvülo, nye lethu ikhang na manyi miwi la nmiwa nkemehai sa cüben.” Mathu na Lot deshen pi aseng wi chi nu ajenka pakhhile wa. 10Isala meshu keni tsüna nduku wi ben nu Lot zan neng pi ajjen non wi chiya, nu ajenka khenya. 11#2 Kad 6.18. Tsaseng wi manyi amei wi kebenthu tsüdi sapi anyon nmu thsüla nu ajenka bha kevüli wa.
Lot na Sodom Nyunuti Keteshi
12Anyi meshu keni tsüna Lot wi kiza, “Keujüla no anyi kepa wi — atsangathu, ndemyithu, nyelela nshilithu kepa lela anyunuti hewi hang ben lethu mathu ya hewi na bvü thsülo. 13Kepaghenanye ishinyi na apen ha yasa tendha. Apvüwa na nyu anyi hathu shun nu kethen hhai zaya nu Sodom yasale ishinyi kesun chile.”
14Tsaseng wi Lot na ma demmi sale kebenthu wi wa nu khi, “Shagha nu wan apen ha teshilo, Apvüwa na anyunuti ha yasale bendha.” Isala mathu na ma ponsa benle meshen wa.
15Atsathang wa keten pang wi nyilo keni na Lot ya kaghaji thsü nu khi, “Wanlo, nwubvü nu n-nga keni ssinu bvülo, anyunuti ha keyasa wi nthu kahang ndedile kesalina.” 16#2 Pi 2.7. Lot na kesütu wa. Isala Apvüwa na ma nantizenya, tsalina anyi keni na ma, ma wubvü, nu ma nga keni kwen zanya nu anyunuti wina shhua. 17Nyilo kesü kekhina, “No hangyale kesalina bvülo! Aseng wi n-ghang nengla nu yyiketijü wi khiela n-ngan lalo. Nthu nmecang ghu thsüle kesalina bvü sen nu ayikha wi walo.”
18Isala Lot na luneng “Nyele, kediwa keni, ikhang ya tsüti nsa thsü lalo. 19No hi kenen sachi nu hi kahangli hangsha cüdha. Ayikhathu tsüna alensie mtsü, hi wa tsü npi kecu jü agükeccü na imiwi gho lethu hi shüaben. 20No anyuti kizzau katsü mu ben ma? Tsüna akete le. Hi yala ciwi wa thsülo— tsüna apen kizzau nu hi kahangli hangsha yaben.”
21Nyilowa na luneng “Anlo, no kekhie sa cü na. Hi anyuti tsü yasa nben. 22Kaghaji bvülo! Hi no wa tsü npi kecu chu mangla sa nben.”
Lot na anyuti tsüpi kizzau le kekhi ghena tsü nyan pi Zoar#19.22: Zoar: Anyan hawa h Ibri jüh wina “kizzak”. le cia.
Sodom Nu Gomorrah Nyunuti Kededi
23Lot na wa Zoar cukeya wi aghani na shhughoa. 24Apvüwa na zuli anni tsangho pi Sodom nu Gomorrah nyunuti keni miwi chi 25nu anyunuti keni nu yyiketijü maben, anyunuti wi kahang nyithu nu ayyi wi shigü keten tsüdi yasa pia. 26#Luk 17.32. Isala Lot wubvü na aseng wi ghangchi nu amcü tsen ceng wa.
27Dhitsüwa ghanen mitu Abraham na bvü sen nu ma Apvüwa tuwi kangan pen witsü wa. 28Ma wa Sodom, Gomorrah nu yyiketijü maben ghangchi nan ayyi ciwi anniqhe ntsa kesa nikhu ti shhugho keben muya. 29Isala Anyiza na yyiketijü wi Lot na hang keten nyunuti keni tsü keyasa wi ma Abraham meshenya nu Lot yala bvü shhu yathsüa.
Moab nu Ammon Nyithu Hang keshagha
30Lot na Zoar wi hang kemessi ghena ma nu ma nga keni mathu na apen ketsen sen nu yyishiphon wi wa alonshi ku kesü wi hang wa. 31Anga keqhaiwa na ma pvünonwa wi kiza, “Ishinyi ba na qhai wadha, ayyi he wi #19.31: ayyi hewi; nyelela ayyi maben iwe anyi thola ishinyi yaya nu ishinyi tsanga mukeya nmi. 32Ghalo, ishinyi ba ya ma dinaya thsü nu ishinyi ma ssijen nu ma wina ashicü muya na.” 33Tsü ghaja manyi kisengtssü pi ma jjü thsü, nu anga keqhaiwa na ma ba ssijen. Isala ma adina ntsa sa kesalina ma nchü.
34Dhitsüwa wi anga keqhaiwa na ma pvünonwa wi kiza, “Hi khija iba ssijendha; shita la ma ya adinaya thsü nu no wa ma ssijenlo. Isanu ishinyi qho ishinyi ba wina ashicü muya na.” 35Tsalina tsü ghaja la manyi ma ya adinaya thsü nu anga ghanyiwa na wa ma ba ssijen. Isala ma adina ntsa sa kesalina ma nchü. 36Tsütinu Lot nga keni qho manyi ba wina atsa-npvüya. 37Anga keqhaiwa na atsa kesü muya nu ma nyan pi Moab #19.37: Moab: Anyan hawa ha Ibri jüh wi “iba wina” kekhi hhai ti ciya. Ma nansü Moab nyithu baqhai. 38Anga ghanyiwa la atsa kesü muya nu ma nyan pi Benammi #19.38: Benammi: Anyan hawa ha Ibri jüh wi majjügi “ishiliwa tsa” nu Ibri jüh wi “Ammon nyi” kekhi hhai ti ciya. Ma nansü Ammon nyithu baqhai.
ที่ได้เลือกล่าสุด:
ADECHHÜ 19: RENGNBSI
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
Rengma (N) (Re-editing) Bible - Kemethajüh (N)
Copyright © 2016 by The Bible Society of India
Used by permission. All rights reserved worldwide.
