MATIYU 10

1Ka u daa ti booli u nyaandɔliba piiya ni ayi na ka daa ti ba yiiko ni ba katti arizimbeeri m‑basira ka tibri dooru balibu kam zaa ni baaridima zaa. 2U tuumudima pii ni ayi wa yuya nŋɔa#:- ŋɔn daŋŋi tooni n daa nyɛ Saimoon, sɔ ban daa pa yupaa, ni ‘Piita’ la, ni u tunzɔ Anduru; ka Gyeemsi, Zɛbidii bii la, n daa bɛ ni, ni u tunzɔ Gyɔni; 3ni Filipi, ni Baatɔlɔmiyu, ni Tɔmaasi ni Matiyu lampoo karikyi la; ni Alifiisi Gyeemsi, ni Taddiyusi, 4ni Saimoon Kyɛna'an doowa, ni Gyuudasi Isikariyɔti (ŋɔn mun daa ti figsi Yisa n‑ti u dindaandima maa).

5Tɔ, ka niriba pii ni ayi wa ka Yisa daa tum, ka kpaasi ba zugu ni n‑yɛli, ni, “Ya di kyaŋŋi ban pa Yɛhudiyadima maa saani, ya mun di kpɛ Samɛrii dima tinseelli ni. 6Amaa ya kyɛma Izraɛli dima ban bɔrigri hoo peesi la saani. 7Ka ya yi kyɛnna, ya moolima n‑yɛtti, ni, Arizana naam bɛ la ba saani. 8Ya tibma baaridima, ka kyɛ ka kpiimma neaai, ka kɔnsi kpaŋŋi. Ya karima arizimbeeri gba m‑basira. Ya bu nya? yarima daa deaai di la yɔri, ka ya gba tisima di yɔri.” 9Ka u daa laa n‑yɛli ba, ni, “Ya di mari ligri n‑suuri gyɛfa ni, la'akara halli ni la'abisi gba. 10Yan di zaŋŋi booriga m‑paasi ya kyɛnni maa ni, bee bunyeera ayiyi bee namna, halli zangbeaa gba. Dama tuntumna zaa sumni ni ba ti u u bundirigu.” 11Ni, “Ya yi ti kpɛ tiŋŋa bee tinkpaŋŋa ni, ya boosima n‑nya ninvugsuŋŋu ziiya n‑kpɛ u yiri m‑bɛ ni halli ni ya ti yi tiŋŋa maa ni. 12Ya yi ti kpɛ yiriseelli, ya puusim ba puusisuŋŋu. 13Ka yiri maa yi nyɛ yirisuŋŋu, yan kyɛ ka ya puusigu sufudoaa kpalim m‑bɛ bɛni; amaa ka yi pa la yirisuŋŋu, ya nin kyɛ ka ya puusigu sufudoaa maali n‑labi ya mammaŋŋa saani. 14Ka sɔ yi bu ti deaai ya, bee, n‑za'asi ya yɛligu wumpu, ya yi ti ya yi yiri maa ni, bee, tiŋŋa maa ni, ya kpaasim ya napɔna tankpoo m‑basi. 15Yɛlimaŋni ka n yɛtti ya wa, ni, toom seebu Sɔdoom ni Gɔmɔra tinsi ninvugbeeri ŋɔn nin ti nya Zaadaari maa ku ti ŋmanni lala tiŋŋa niriba toom maa ŋɔn nin nyɛ seem.”

16Ka Yisa daa laa n‑yɛli ba, ni, “Ya bu nya? - n tumni ya, ni ya kyaŋŋi nti ŋmanni la peesi ban bɛ kunduna sunsukkuni seem la. Dizugu ya mari yam hoo wugi la ŋɔn mari seem, ka bɛ baalimm hoo naŋmana la ŋɔn bɛ seem maa. 17Amaa ya gbaam ya mansi ninsaalidima saani: ba nin ti gbaai ya n‑taasi ba kootudima ni, ka feebi ya ba la'aŋŋu duri ni. 18Ba nin zaŋŋi ya n‑taasi gɔmnadima ni nadima saani, man zugu; ka lala nin ti wulisi yɛlimaŋni yɛla n‑tiri ba, ni tinsi zaa niriba m‑paasi ba zugu. 19Dizugu ban ti ya gbaai ya n‑taasi sariya karibu ziiya, yan di kyɛ ka ya sufu birisiri yan yɛ ti yɛli seem, bee, n‑tɔ'asi seem zugu: dama di saha maa yi ti paai ya nin ti baŋŋi yan yɛ n‑yɛli seem. 20Dama di pa yarima n ya n‑tɔ'asi amaa ya Ba Naawunni Sii maa nin bɛ ya saani n‑tɔ'asira. 21Dɔseeba nin gbaai ba mabiisi n‑tisi ka ba ku ba, bee ba nin gbaai ba biisi, ka biisi mun nin yisigi n‑zabi ba badima ni ba madima halli nti ku ba gba. 22Ba zaa nin yaai ya man yuuri zugu, amaa sɔ zaa ŋɔn nin kpaŋŋi u maŋŋa m‑bari n‑zaani halli nti paai yɛla wa tariga maa nin nya tiliginsim. 23Ba yi ti mugsi ya tinseaa ni, ya kur yima n‑zɔ n‑kyaŋŋi tinseaa yaasa. Dama yɛlimaŋni ka n yɛtti ya wa, ni, ya na ku kyaŋŋi n‑dɔli Izraɛli tingbaŋŋu tinsi zaa n‑naai ka Ninsaala Bii ti kyɛ na.

24Ya bu nya? - karimbii bu gatti u karimba, ka daabri bu gatti u dugma. 25Karimbii yi ti paai u karimba tataabu, di nin sakki u ni. Ka daabri yi paai u dugma saani gba, di sakkiya. Ba yi zaŋŋi Arizimbeeri Naa yuuri m‑pa yiriseaa yiridaana, ni, Biyɛlizibuli n nyɛ u, ba bu ya booli u yiri maa dima lala? - halli ni yuseesi an bɛ n‑gaari lala.”

26Ka u daa laa n‑yɛli ba yaasa, ni, “Dizugu yan di kyɛ ka dabeem mari ya ninsaalidima zugu. Bunseelli zaa kan pili ka bu nyara, ba nin piligi ka ka sɔkam ti nya; ka yɛttɔ'asɔ'ara zaasa muna - sɔkam nin baŋŋi a gbinni ŋɔn nyɛ seem. 27Man sɔ'ari zibsim ni n‑tɔ'asiri n‑tiri ya yɛttɔ'aseesi zaasa, ya kyɛ ka ba wum a la wuntampeeliga; man kpɛ duu puuni ka waasiri n‑yɛtti ya yɛliseesi la, yan duum saazugu m‑mooli a ka sɔkam zaa wum.” 28Ni, “Yaasa, yan di zɔri ninvugseeba ban kuuri niriba ningbina, ka ku toaai n‑kuuri ba siisi m‑paasi. Amaa ya zɔm sɔ ŋɔn nin toaai n‑sa'am ningbina ni siisi zaa ka zaŋŋi a n‑lɔsi bugum ni la. 29Ba bu zaŋŋi la'abila yinni n‑daari niimbisi ayi? Amaa din zaa yɔri, niimbila yinni ku toaai n‑lu tiŋŋa ka di pa la ya Ba maa yuubu ni. 30Yarima muna, Naawunni mi halli ya zɔbri gba yɛla, ka baŋŋi a zaa yinni yinni kaaligu ŋɔn nyɛ seem maa. 31Dizugu yan di zɔri dabeem, dama yarim mari bukyi pam n‑gaari niinsi maa zaa.”

32Ka Yisa daa laa n‑yɛli ba, “Ŋɔnkam zaani niriba tooni n‑yɛli, ni, u nyɛ la man dinni, man gba nin ti zaani m Ba tooni arizana ni, n‑yɛli, ni, ŋɔn nyɛ la n dinni. 33Ka ŋɔnkam mun yi za'asi ma niriba tooni, man gba nin za'asi u m Ba tooni arizana ni.”

34Ni, “Ya di teesi, ni, m mari la nangbanyinni beesigu n‑kyɛ duniya wa na. Ay! M bu kyɛ na ni m mari nangbanyinni yɛla na, see zaba. 35N kyɛ na ni n tugli la doowa ni u ba, ni bipuŋŋa ni u ma gba, ni bii pɔ'a ni u dinyaampɔ'a m‑paasi, ka ba zabi. 36Lala ka nira yi ti mari dindaana, u toori yiri puuni ka di daama nin bɛ ni. 37Ŋɔn wuri u ba, bee, u ma, n‑gaari ma, di daama bu sumsi ni u bɛ n saani; ka ŋɔn laa n‑wuri u biiya, doo bee pɔ'a, n‑gaari ma, ŋɔn gba bu sumsi ni u bɛ n saani. 38Halli ŋɔn mun ku sakki n‑zaŋŋi u kum dɔpulli n‑dɔli n nyaaŋŋa, ŋɔn gba bu sumsi ni u bɛ n saani. 39Ŋɔnkam zaa yi boori u nyɔvuri maa nin kɔŋŋi ka; ŋɔn mun yi sakki ni u kɔŋŋi u nyɔvuri, mani zugu, ŋɔna n nyɛ sɔ ŋɔn nin nya nyɔvuri.”

40Ka u daa laa n‑yɛli ba, “Ŋɔnkam zaa gyaari ya, mani ka u gyaari. Ka ŋɔnkam gyaari ma, Naawunni ka u gyaatira, dama ŋɔn Naawunni n tum ma na. 41Ŋɔnkam zaa gyaari anabi ŋɔn nyɛ anabi maa zugu, ŋɔn gba nin deaai laara seaa kan nyɛ anabi dinni. Ka ŋɔnkam mun gyaari yɛlimaŋni daana ŋɔn nyɛ yɛlimaŋni daana maa zugu, ŋɔn gba nin deaai laara seaa kan nyɛ yɛlimaŋni daana dinni. 42Halli ŋɔnkam zaa mun yi ti zaŋŋi kɔmaasim n‑ti n nyaandɔlisɔ ni u ti nyu, ŋɔn nyɛ n nyaandɔla maa zugu, yɛlimaŋni ka n yɛtti ya wa, di daama gba ku toaai n‑kɔŋŋi u laara.”

ที่ได้เลือกล่าสุด:

MATIYU 10: maw

เน้นข้อความ

แบ่งปัน

คัดลอก