Kabavelamu 22
22
Yaubada Ebelamo navetumaqana ivekautovoni
1Diqaba puedi ikakava mulineye, Yaubada Ebelamo navetumaqana ivekautovoni. Yaubada iveqole ivo, “Ebelamo! Ebelamo!”
Inoqaya ivo, “Uuu, Yau sideqoigu.”
2Matautauda Yaubada ivo, “Natumu kaiseotoqina Aisake, gumanina nuapoumu, kumaseagai kwanaqo Molaia navikaie we tamo koya aivevemu. No waineye natumu kiluvewapai vovona matatabuna kigabuni muvelomu waigue.”
3Beqa ikawananaqai kawakawaie, Ebelamo itovoi nakaikweukweu igeidi navenapwayewa kanakai nadonikie idodoqidi. Natuna Aisake imaseagai wete natolituqavo kadikailuqa taiauda itauya inaqonaqo vikainina Yaubada ivesipupuyeniqa waineye. 4Kaiata kanavetonu waineye Ebelamo kanikie'eqa idumalagata ikisanaqo vikainina ikiseni. 5Matautauda natolituqavo kadikailuqa ivonedi ivo, “Dede waineye doniki taiauda kwaimiamia, yau gwamana taiauda kainaqo no waineye kaisobwanu inakakava wete kaivila kaimai.”
6Ebelamo natuna Aisake kaikweukweu mesikwagigina ivekavalai navelomu kanakai we taunina nakaikalakalata ikewai ikavekavini wete nanaipi siaina ikewai kadikailuqa itauya. 7Inaqonaqo kedeye Aisake ivo, “Tamagu!”
Ebelamo ivo, “Ee, natugu.”
Aisake tamana ivelautolieni ivo, “Tamagu, kaikalakalata wete kaikweukweu dede we sipi natuvauna vakaiebei, kaigodi tailuvewapai taigabuni davelomu Iave waineye?”
8Ebelamo ibaivila ivo, “Natugu, Yaubada taunina kaigodi sipi natuvauna inaveleda davelomu paipaina.” We kadikailuqa iveyoqoluqedi inaqo.
9Tutuyanina itauya inaqo vikainina Yaubada ivesipupuyeni waineye ilekwa, Ebelamo gileu ilauqi mesaida didiqa velomu kabakanigabu, we didiqanina tabwaneye kaikweukweu iliai. Matautauda natuna Aisake ikavekavini dimana wete kaqena iyoqonidi ikakava ikavalai isilagai kaikweukweu tabwaneye. 10Ebelamo dimana isiketoi nanaipi siaina ikewai natuna nigodi idaluvewapai. 11We Iave na'anelose abame'eqa iveqole waineye ivo, “Ebelamo! Ebelamo!”
We Ebelamo inoqaya ivo, “Uuu, Yau sideqoigu.”
12Iave na'anelose ivona ivo, “Iave ivo, ‘Natumu ge kiluvewapai wete ge vakai kivalabubuni waineye. Natumu kaiseotoqina ge kudavenualoloyeniqa waigue, beqa komu gunabeida ayagovimu Yau Iave mwaqitana kuvekimatanegu.’ ”
13Matautauda Ebelamo idumalagata ikisanaqo sipi lamoqina ikiseni kanasito ivesikewedi welavi siaina waineye iepaisiwa. Beqa inaqo igiatakia imaieni iluvewapai isilagai, matatabuna igabuni ikalaguali didiqa tabwaneye navelomu Iave waineye natuna kanaketopesala. 14Dede mesaida isauyeni beqa Ebelamo vikainina iqoleniqa ivo, “Iave inaveleda.” Beqa dede tutuyanina tomo'otoqa ieqole o ikinakinanana ivo, “Iave nakoya waineye inaveleda.”
15Matautauda Iave na'anelose abame'eqa wete naveqole iveluqai Ebelamo waineye ivo, 16“Iave ivona, ‘Komu kuvekimatanegu. Natumu ge kudavenualoloyeniqa, natumu kaiseotoqina nuapoumu, beqa Yau kaguwavaqaeqa avonadabadaba waimue 17avona-otoqa aivonavenapwayewemu we tubuleleleqimwavo aikavepue-otoqidi. Kadibou mesaida mwatuia abame wete magama kwadeweye, we wete kadiqaviavo inavelulunapeledi divikai inakewadi. 18#Aposi 3:25We kamukabeida komu tubuleleleqimwavo waidie'eqa tomo'otoqa dimanuqavo matatabuna pwayapwaya tabwaneye giamaina inababaneni paina komu kuvekimatanegu.’ ”
19Matautauda wete Ebelamo menatuna ivila-vaituqana inaqo natolituqavo waidie taiauda ivila inaqo Bedisiba, we no waineye imiamia.
Tutuyanina Sela kadidiqaba 127, iwapa. Ebelamo mwanena ivemoqaiedi. We ge tamo vikai idamiamia paipaina waineye inatavunidi, beqa pwayapwaya igimwanei tomo'otoqanidiavo taiauda imiamia waidie, matautauda itavunidi no waineye.
Diqaba kaitonu mulineye, Ebelamo natuna Aisake tamo Elana vavinena inaqia. Kanawavaqa Libeka Ebelamo taina Nibo natuna. Tutuyanina Aisake inaqi kanadiqaba 40. Mulineye Ebelamo iwapa, we natunavo kadikailuqa vovona itavuni mwanena vovodi itavuni vivineye. Tutuyanina Ebelamo iwapa kanadiqaba 175.
ที่ได้เลือกล่าสุด:
Kabavelamu 22: mzz
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
© 2023 (Active), Wycliffe Bible Translators, Inc. All rights reserved.
