ข้อพระคัมภีร์ยอดนิยมจาก Ephèsianaich 4

แบ่งปัน

'S ann a bu chòir dhuibh a bhith coibhneil agus blàth-chridheach ri càch-a‑chèile, 's a' toirt mathanas dha chèile cuideachd, dìreach mar a thug Dia mathanas dhuibh fhèin ann an Crìosd.

Bithibh daonnan iorasal, caomh agus foighidneach, agus dèanadh an gràdh sibh fad-fhulangach ri càch-a‑chèile.

Na leigibh le cainnt ghrod sam bith tighinn as ur beul, ach cleachdaibh cainnt fhallain a neartaicheas 's a chuidicheas 's a nì feum dhan luchd-èisdeachd.

Cuiribh uaibh gach gamhlas, gach trod, gach fearg is gach cuthach. Air falbh leis gach toibheum is droch-rùn.

Ma bhios sibh feargach, na leigibh leis an fheirg ur toirt a thaobh gu peacadh, agus na cumaibh ga h‑altram o mhoch gu dubh. Na toiribh cothrom sam bith dhan Diabhal.

Cuiribh cùl ris an dòigh-beatha a b'àbhaist a bhith agaibh, an seann nàdar a bha a' dol a dhìth le tograidhean meallta. Feumaidh ur spiorad agus ur n‑inntinn a bhith air an nuadhachadh. Cuiribh oirbh an nàdar ùr a tha coltach ri nàdar Dhè, 's a tha ga fhoillseachadh fhèin ann am fìreantachd 's ann an naomhachd a tha stèidhichte air an fhìrinn.

'S e sìth a tha gur ceangal ri chèile; dèanaibh mar sin dìcheall air an aonachd a th'agaibh san Spiorad a ghleidheadh.

Thug e cuid gu bhith nan abstoil, cuid nam fàidhean, cuid nan soisgeulaichean, agus cuid nam buachaillean agus nan luchd-teagaisg. Bha e airson gum biodh sluagh Dhè air an ullachadh gus seirbhis a dhèanamh agus corp Chrìosd air a dhaingneachadh. Mar sin ruigidh sinn uile aonachd anns a' chreideamh agus ann an eòlas air Mac Dhè. Fàsaidh sinn gu ìre duine coileanta gus an ruig sinn fìor inbhe na lànachd a th'ann an Crìosd.

Mar thoradh air seo, cha bhi sinn tuilleadh nar leanabain air ar luasgadh air na tuinn 's air ar riasladh leis gach gaoth teagaisg a thig bho dhaoine carach, a tha cur feadhainn eile air seachran len cuid innleachdan seòlta. Ach 's ann le bhith a' bruidhinn na fìrinn ann an gràdh a dh'fhàsas sinne suas anns a h‑uile dòigh gu bhith coltach ri Crìosd, oir is esan an ceann.