If you would like a copy of this version please contact info@davaraudiobibles.org

Bodo Parja New Testament, CC-BY-SA-4.0, The Love Fellowship. Bodo Parja New Testament Audio Bible, CC-BY-SA-4.0, Davar Partners International, The Love Fellowship, 2023.

Bodo Parja New Testament

Bodo Parja Bible (ବ୍‌ଡ଼୍ ହ୍‌ର୍‌ଜା) by The Love Fellowship is licensed under Creative Commons Attribution-ShareAlike 4.0 License.

ବେସି ଲକ୍‌ମ୍‍ନ୍‌କେ ଦ୍‍କି ଯୀଶୁ ଡଙ୍ଗୁର୍ ଉହ୍‍ରେ ଚ୍‌ଗି ସେମ୍‍ନ୍‍‍କେ ଶିକ୍ୟା ଦେମ୍‌କେ ବ୍‍ସ୍‍ଲା, ହ୍‌ଚେ ତାର୍ ଚେଲାମ୍‌ନ୍ ତାର୍ ଲ୍‌ଗେ ଆଇଲାଇ।


ସେଡେବ୍‍ଳ୍ ଯୀଶୁ ସେମ୍‍ନ୍‍‍କେ ଶିକ୍ୟା ଦେମ୍‌କେ ଆରମ୍ କ୍‍ରି କଇଲା,
“ଇଶ୍ୱର୍‌‍କେ ନିଜାର୍ ଜୀବନେ ଦ୍‌ର୍‌କାର୍ ବ୍‌ଲି ବାବ୍‌ତା ଲକ୍ ଦନ୍ୟ, କାଇତାକ୍ ସ୍‌ର୍‌ଗ୍‌ ରାଇଜ୍‍‍ ସେମ୍‍ନ୍‍କାର୍।
ଦୁକାର୍ ଲକ୍ ଦନ୍ୟ, କାଇତାକ୍ ଇଶ୍ୱର୍‌ ସେମ୍‍ନ୍‍‍କେ ଶାନ୍‌ତି ଦେଇଦ୍।
ଦ୍‌ର୍‌ମ୍ ଲକ୍‍ମ୍‍ନ୍ ଦନ୍ୟ, କାଇତାକ୍ ସେମ୍‌ନ୍‌କେ ଇଶ୍ୱର୍‌ ହୁର୍‌ତିବିର୍ ସ୍‍ବୁ ବିଷୟେ ଅଦିକାର୍ ଦେଇଦ୍।
ଦ୍‌ର୍‌ମ୍ କାମ୍ କ୍‌ରୁକେ ବେସି ଇଚା କ୍‌ର୍‌ତା ଲକ୍ ଦନ୍ୟ, କାଇତାକ୍ ଇଶ୍ୱର୍‌ ସେମ୍‍ନ୍‍‍କେ ସୁସ୍‌ତା କ୍‍ରେଦ୍।
ଦୟା କ୍‌ର୍‌ତା ଲକ୍ ଦନ୍ୟ, କାଇତାକ୍ ଇଶ୍ୱର୍‌ ସେମ୍‍ନ୍‍‍କେ ଦୟା ଦ୍‍କାଇଦ୍।
ଜୁଇଲକ୍ ମାପ୍‌ରୁକେ ମାନ୍‍ତି ସେଲକ୍ ଦନ୍ୟ, କାଇତାକ୍ ସେମ୍‍ନ୍ ଇଶ୍ଵର୍‍କେ ଦ୍‌କୁ ହାର୍‍ତି।
ଶାନ୍‌ତି କାମ୍‌କ୍‌ର୍‌ତା ଲକ୍ ଦନ୍ୟ, କାଇତାକ୍ ସେମ୍‍ନ୍ ଇଶ୍ଵରାର୍ ହିଲା ଟକି ବ୍‌ଲି ଜାଣାଇ ଅଉତି।
ଦ୍‌ର୍‌ମ୍ ସ୍‌ଙ୍ଗେ ଜିଉତା ଗିନେ ଲିନ୍ଦାକ୍‍ତା ଶୁଣ୍‍ତା ଲକ୍ ଦନ୍ୟ, କାଇତାକ୍ ସ୍‌ର୍‌ଗ୍‌ ରାଇଜ୍‍‍ ସେମ୍‍ନ୍‍କାର୍।
ଲକ୍ ଜ୍‍ବେ ତୁମୁକ୍‌ମ୍‌ନ୍ ମର୍ ଚେଲା ଅଇଲାର୍ ଗିନେ ଲିନ୍ଦା ଆର୍ ତାଳ୍‌ନା କ୍‌ର୍‌ତି, ଆରେକ୍‌ ମିଚ୍ କ୍ଇ ତୁମାର୍ ବିରୁଦେ ସ୍‍ବୁ କ୍‍ରାପ୍ କ୍‌ତା କ୍ଉତି, ତ୍‍ବେ ତୁମିମ୍‍ନ୍ ଦନ୍ୟ। ସ୍‍ର୍‍ଦା କ୍‍ରା ଆର୍ ଆନନ୍ଦେ ରିଆ, କାଇତାକ୍ ସ୍‌ର୍‌ଗେ ତୁମୁକେ ଗଟେକ୍ ବ୍‍ଡ୍ ଇନାମ୍ ଦେମ୍‌କେ ଇଶ୍ୱର୍‌ ସ୍‍ଙ୍ଗାଇ ଆଚେ। ସେନ୍‍କ୍‌ରି ତ ସେମ୍‍ନ୍ ବେସିଦିନ୍‌ ଆଗେ ତୁମାର୍ ଆଗେ ଆସିରିଲା ବବିଶତ୍ କ୍‌ତା କ୍‌ଉତା ଲକ୍‌ମ୍‌ନ୍‌‍କେ ତାଳ୍‌ନା କ୍‍ରିରିଲାଇ।”


“ତୁମିମ୍‍ନ୍ ଇ ଜୁଗାର୍ ଲକ୍‍ମ୍‍ନ୍‍କାର୍ ଗିନେ ହୁର୍‌ତିବିର୍ ନଣ୍ ହର୍, ମ୍‍ତର୍ ନଣ୍ ଯଦି ନିଜାର୍ ସୁଆଦ୍ ଆରାଇଦ୍, ତ୍‍ବେ ସେରି ଜୁଇତି ହେ ହ୍‍କାଇଲେକ୍ ଅଲଣା ଅଇଦ୍। ସେରି କାଇରି ହେ କାମ୍ ଦେଇ ନ୍‌କେରେ, ସେରି ହ୍‍ଦାଇ ହିଙ୍ଗି ଲକ୍‍ମ୍‍ନ୍‍କାର୍ ଗଡ୍‌ତ୍‌ଳେ ମାଡାଇ ଅଉତା ସ୍‍ମାନ୍। ତୁମିମ୍‍ନ୍ ସାରା ଜ୍‍ଗତ୍‍ ଗିନେ ଉଜାଳ୍ ହର୍। ଡଙ୍ଗୁର୍ ଉହ୍‍ରେ ରିଲା ସ୍‌ହର୍ କ୍‌ବେ ଲୁକିକ୍‌ରି ରେମ୍ ନାହାରେ।
କି ଲକ୍‍ମ୍‍ନ୍ କୁପି ଲାଗାଇ ମାଣ୍ ବିତ୍‌ରେ ସ୍‍ଙ୍ଗାଇ ନ୍‌କେର୍‌ତି, ମ୍‍ତର୍ କୁପି ବ୍‍ତା ଉହ୍‍ରେ ସ୍‍ଙ୍ଗାଉତି, ସ୍‌ଡେବ୍‌ଳ୍ ସେରି ଗ୍‍ରେ ରିଲା ସ୍‍ବୁ ଲକ୍‌କେ ଉଜାଳ୍ ଦେଇଦ୍। ସେନ୍‍କ୍‌ରି ତୁମାର୍ ଉଜାଡ୍ ଲକ୍‌ମ୍‌ନ୍‌କାର୍‌ ମୁଏ ଅନ୍‌କାର୍ ଚ୍‌ମ୍‌କ। ଜ୍‌ନ୍‌କ୍‌ରି ସେମ୍‍ନ୍ ତୁମାର୍ ବ୍‌ଲ୍‌କାମ୍ ଦ୍‍କି ତୁମାର୍ ସ୍‌ର୍‌ଗେ ରିଲା ଉବାର୍ ମଇମା କ୍‌ର୍‌ତି।”

“ମୁଇ ଯେ ମୋଶାର୍ ନିୟମ୍ ଆର୍ ବବିଶତ୍ କ୍‌ତା କ୍‌ଉତା ଲକ୍‌ମ୍‌ନ୍‌‍କାର୍ ଲେକ୍‍ଲା ପବିତର୍‌ ଶାସ୍‌ତର୍ କେ ନାସ୍ କ୍‌ରୁକେ ଆସିଆଚି, ଅନ୍‌କ୍‌ରି ବାବାନାଇ। ନାସ୍ କ୍‌ରୁକେ ଆସି ନ୍‌କେରି, ମ୍‍ତର୍ ହୁରାକ୍‌ରୁକେ ଆସିଆଚି। କାଇତାକ୍ ମୁଇ ତୁମୁକ୍‌ମ୍‌ନ୍ ସ୍‌ତ୍ କ୍‌ମ୍‌ଲେ, ଜ୍‌ଡେବ୍‌ଳ୍ ହ୍‍ତେକ୍ ଆକାଶ୍‌ ମ୍‌ଣ୍ତଳ୍ ଆର୍ ହୁର୍‌ତିବି ନାସ୍ ଅଇନ୍‌କେରେ, ଆର୍ ବିଦିବିଦାନ୍ ଶାସ୍‌ତରାର୍ ଲ୍‌ଗେ ଲେକା ରିଲା ସ୍‍ବୁ ବବିଶତ୍ କ୍‌ତା ହୁରା ଅଇନ୍‌କେରେ, ସେଡେବ୍‍ଳ୍ ହ୍‍ତେକ୍ ଇଶ୍ଵରାର୍ ବାକ୍ୟର୍ ଗଟେକ୍ ଚିନା କି ଗଟେକ୍ ବିନ୍ଦୁ ହେ କ୍‌ବେ ନାସ୍ ନଇ।
ତ୍‍ବେ ଯେ କେ ଇ ସ୍‌ବୁ ସାନ୍ ଆଦେଶ୍ ବିତ୍‌ରେ କୁଇରି ଗଟେକ୍ ସାନ୍ ଆଦେଶ୍ ନ୍‌ମାନ୍‌ତି, ଆର୍ ଲକ୍‌ମ୍‍ନ୍‌କେ ସେନ୍‍କ୍‌ରି ଶିକ୍ୟା ଦେଇଦ୍, ସେ ସ୍‌ର୍‌ଗ୍‌ ରାଇଜେ ସାନ୍‌ବ୍‌ଲି ଜାଣାଇ ଅଇଦ୍। ମ୍‍ତର୍ ଯେ କେ ସେ ସ୍‍ବୁ ଆଦେଶ୍ ପାଳନ୍ କ୍‍ରେଦ୍ ଆର୍ ସେରି ଲକ୍‌ମ୍‍ନ୍‌କେ ଶିକ୍ୟା ଦେଇଦ୍, ସେ ସ୍‌ର୍‌ଗ୍‌ ରାଇଜେ ବ୍‍ଡ୍‌ବ୍‍ଲି ଜାଣାଇ ଅଇଦ୍। କାଇତାକ୍ ମୁଇ ତୁମୁକେ କ୍‌ମ୍‌ଲେ, ତୁମିମ୍‍ନ୍ ମୋଶାର୍ ନିଆଇ ଶିକାଉତା ଲକ୍ ଆର୍ ଫାରୂଶୀମ୍‍ନ୍‍କାର୍ ତ୍ଇହ୍‍ଣି ବେସି ବ୍‌ଲ୍‌କ୍‍ରି ନିୟମ୍‌କେ ମାନା, ନ୍‌ଇଲେକ୍ ତୁମିମ୍‍ନ୍ କ୍‍ନ୍‍କ୍‍ରି ହେଁ ସ୍‌ର୍‌ଗ୍‌ ରାଇଜେ ଜ୍‌ମ୍ ନାହାରାସ୍।”

“ତୁମିମ୍‍ନ୍ ଶୁଣିଆଚାସ୍ ଯେ, ଇଶ୍ୱର୍‌ ଅମାର୍ ହୁର୍‍ବାର୍ ଲକ୍‌ମ୍‍ନ୍‌କେ କଇରିଲା, ‘ମାନାଇ ମାରାନାଇ, ଆରେକ୍‌ ଯେ ମାନାଇ ମାରେଦ୍ ତାର୍ ବିଚାର୍‌ ଇଶ୍ୱର୍‌ କ୍‍ରେଦ୍।’ ମ୍‍ତର୍ ମୁଇ ତୁମୁକ୍‌ମ୍‌ନ୍ କ୍‌ମ୍‌ଲେ, ଯେ ହେଁ ନିଜାର୍ ବାଇ ଉହ୍‍ରେ ରିସା ଅଇଦେ, ସେ ବିଚାର୍‌ ତେଇ ଡ୍‌ଣ୍ଡ୍ ହାଉତାର୍ ଅଇଦ୍। ଆରେକ୍‌, ଯେ ହେ ନିଜାର୍ ବାଇକେ ମୁର୍‌କ ବ୍‌ଲି କଇଦ୍, ସେ ପରିଷଦ୍ ସବା ଲ୍‌ଗେ ଡ୍‌ଣ୍ଡ୍ ହାଇଦେ। ଆରେକ୍‌ ଯେ ହେଁ ପାଷାଣ୍ଡ ବ୍‌ଲି କଇଦ୍, ସେ ନ୍‌ର୍‌କାର୍‌ ଜୟ୍‌ଲ୍‌ଗେ ଡ୍‌ଣ୍ଡ୍ ହାଉତାର୍ ଅଇଦେ।
ତ୍‍ବେ ଯଦି ମନ୍ଦିର୍ ଲ୍‌ଗେ ତୁମି ନିଜାର୍ ମାନତ୍ ଆଣ୍‌ତା ବ୍‍ଳ୍, ତୁମି ଲକାର୍‌ ଅନିଷ୍ଟ କ୍‍ଲାକ୍‌ତା ତୁମାର୍ ମ୍‌ନେ ହ୍‍ଳେଦ୍, ସେରି ଅଇଲେ ସେ ଜାଗାଇ ବେଦି ମୁଏ ତୁମାର୍ ମାନତ୍‌କେ ସ୍‍ଙ୍ଗାଇ ଦିଆସ୍, ଆର୍ ହ୍‌ର୍‍ତୁ ଜାଇ ସେ ଲକ୍‌ସ୍‍ଙ୍ଗ୍‍ ମିସା, ଆର୍ ହ୍‌ଚେ ଆସି ତୁମାର୍ ମାନତ୍ ଦାନ୍ କ୍‍ରା।
ତୁମାର୍ ବିରଦ୍ ଅଇରିଲା ଲକ୍‌ସ୍‍ଙ୍ଗ୍‍ ବିଚାର୍‌ ଅମ୍‍କେ ଜାତିରିଲାବ୍‍ଳ୍ ଜାତାବାଟେ ତାର୍‌ସ୍‍ଙ୍ଗ୍‍ କ୍‌ତାବାର୍‍ତା ଅଇ ମିଳାମିସା ଅଉଆ, କ୍‌ଡେବ୍‌ଳ୍ ସେ ଉଳାଉଳି ଅଇଲା ଲକ୍ ତୁମୁକେ ବିଚାର୍‌ କ୍‌ର୍‌ତା ଲକାର୍‌ ଆତେ ସ୍‌ହ୍‍ରି ଦେଇଦ୍, ଆର୍ ସେ ସ୍‌ଇନ୍ ମ୍‌ନ୍‌କାର୍ ଆତେ ତୁମୁକେ ସ୍‌ହ୍‍ରି ଦେଇଦ୍, ଆର୍ ତୁମି ଜେଇଲ୍ ଜାହାସ୍। ମୁଇ ତୁମୁକ୍ ସ୍‌ତ୍ କ୍‌ମ୍‌ଲେ, ତୁମି ସ୍‍ବୁ ତାକାର୍ ଡାବୁ ସୁଜି ନ୍‌କେର୍‌ତା ହ୍‍ତେକ୍ କେ ହେଁ ସେ ଜାଗାଇ ହ୍‍ଣି ବାରି ଆସୁ ନାହାରାସ୍।”

“ତୁମିମ୍‍ନ୍ ଶୁଣିଆଚାସ୍, ଦ୍‌ର୍‌ମ୍ ଶାସ୍‌ତର୍ ଲ୍‌ଗେ ଲେକାଆଚେ, ‘ଦାରିକାମ୍ କ୍‍ରାନାଇ।’ ମ୍‍ତର୍ ମୁଇ ତୁମୁକ୍‌ମ୍‌ନ୍ କ୍‌ମ୍‌ଲେ, ଯେ କେ କୁଇ ଟକିକେ ମ୍‌ନେ କ୍‍ରାପ୍ ବାବି ଦ୍‍କେଦ୍, ସେ ତାର୍ ସ୍‌ଙ୍ଗେ ମ୍‌ନେ ମ୍‌ନେ ଦାରିକାମ୍ କ୍‌ଲାନି।
ଆରେକ୍‌ ତୁମାର୍ କାତା ବାଟାର୍ ଆକି ଯଦି ତୁମୁକେ ପାପ୍ କ୍‍ରାମ୍‍ଲି ବ୍‍ଲେକ୍, ସେ ଆକିକେ କାଡି ହ୍‍କାଉଆ, କାଇତାକ୍ ତୁମାର୍ ସ୍‍ବୁ ଗ୍‌ଗାଳ୍ ନ୍‌ର୍‌କେ ଜାତା ବାଟା ତୁମାର୍ ଗ୍‍ଗାଳାର୍ ଗଟେକ୍ ବାଗ୍ ନ୍‍ଷ୍ଟ ଅଇଲେକ୍ ତୁମାର୍ ଗିନେ ବ୍‍ଲ୍। ଆରେକ୍‌, ଯଦି ତୁମାର୍ ଆତ୍ ତୁମୁକେ ପାପ୍ କ୍‍ରାମ୍‍ଲି ବ୍‍ଲେକ୍, ସେ ଆତ୍‍କେ କାଟି ହ୍‍କାଉଆ, କାଇତାକ୍ ତୁମାର୍ ସ୍‍ବୁ ଗ୍‌ଗାଳ୍ ନ୍‌ର୍‌କେ ଅଦୁର୍‌ତା ବାଟା ତୁମାର୍ ଗ୍‌ଗାଳ୍ ଗଟେକ୍ ବାଗ୍ ନ୍‍ଷ୍ଟ ଅଇଲେକ୍ ତୁମାର୍ ଗିନେ ବ୍‍ଲ୍।”


“ଆରେକ୍‌ ଇରି ପବିତର୍‌ ଶାସ୍‌ତର୍ ଲ୍‌ଗେ ଲେକାଆଚେ, ‘ଯେ ନିଜାର୍ ମାଇଜିକେ ଚାଡେଦ୍, ସେ ତାକେ ଚାଡ୍‌ହ୍‌ତାର୍ ଦେଉଅ।’ ମ୍‍ତର୍ ମୁଇ ତୁମୁକ୍‌ମ୍‌ନ୍ କ୍‌ମ୍‌ଲେ, ଯେ କେ ନିଜାର୍ ମାଇଜିକେ ଦାରିକାମାର୍ ଦସ୍‌କେ ଚାଡି ବିନ୍ ଦସାର୍ ଗିନେ ତାକେ ଚାଡେଦ୍, ସେ ତାକେ ଦାରିକାମ୍ କ୍‌ରାଇଦ୍। ଆରେକ୍‌ ଯେ କେ ସେ ଚାଡଲା ମାଇଜିକେ ବିବା କ୍‍ରେଦ୍, ସେ ଦାରିଆ କାମ୍ କ୍‍ରେଦ୍।”

“ଆରେକ୍‌, ତୁମିମ୍‍ନ୍ ଶୁଣିଆଚାସ୍ ଯେ ଇଶ୍ୱର୍‌ ଅମାର୍ ଆଗାର୍ କାଳାର୍ ଲକ୍‌ମ୍‍ନ୍‌କେ କଇରିଲା, ‘ତୁମି ମିଚ୍ ହ୍‍ର୍‍ମାଣ୍ କ୍‍ରାନାଇ, ମ୍‍ତର୍ ନିଜାର୍ ସ୍‍ବୁ ଶପତ୍ ଇଶ୍ଵରାର୍ ଆଦେଶ୍ ମାନୁକେ କ୍‍ରା।’ ମ୍‍ତର୍ ମୁଇ ତୁମୁକ୍‌ମ୍‌ନ୍ କ୍‌ମ୍‌ଲେ, କ୍‌ବେ ହେଁ ହ୍‍ର୍‍ମାଣ୍ କ୍‍ରାନାଇ। ସ୍‌ର୍‌ଗାର୍ ହ୍‍ର୍‍ମାଣ୍ କ୍‍ରାନାଇ, କାଇତାକ୍ ହାଇରି ଇଶ୍ଵରାର୍ ରାଜ୍‌ଗାଦି। କି ହୁର୍‌ତିବିର୍ ହ୍‍ର୍‍ମାଣ୍ କ୍‍ରାନାଇ, କାଇତାକ୍ ହାଇରି ତାକାର୍ ହାଦ୍ ସ୍‍ଙ୍ଗାଉତା ହିଳା ହାଟା। ଯିରୁଶାଲମାର୍ ହ୍‍ର୍‍ମାଣ୍ କ୍‍ରାନାଇ, କାଇତାକ୍ ହାଇରି ବ୍‍ଡ୍ ର୍‍ଜାର୍ ସ୍‍ହର୍‍।
କି ନିଜାର୍ ମୁଣ୍ତାର୍ ହ୍‍ର୍‍ମାଣ୍ କ୍‍ରାନାଇ, କାଇତାକ୍ ତାର୍ ଗଟେକ୍ ବାଳ୍ ଦବ୍‍ଳା କି କ୍‍ଳିଆ କ୍‌ରୁକେ ତୁମାର୍ ଶ୍‌କ୍‌ତି ନାଇ। ମ୍‍ତର୍ ତୁମାର୍ ହେଁ କ୍‌ତା ହେଁ ଅଉଅ, ନାଇ କ୍‌ତା ନାଇ ଅଉଅ। ଇତିହ୍‍ଣି ଯାଇରି ବେସି, ସେରି ଶଇତାନ୍ ତ୍ଇହ୍‍ଣି ଜ୍‍ର୍‍ନ୍‌।”


“ତୁମିମ୍‍ନ୍ ଶୁଣିଆଚାସ୍, ଇରି ମୋଶାର୍ ନିୟମ୍‌ତ୍‌ଇ ଲେକା ଅଇଲିଆଚେ, ‘ଆକିର୍ ବାଦୁଲେ ଆକି ଆର୍ ଦାତାର୍ ବାଦୁଲେ ଦାତ୍।’ ମ୍‍ତର୍ ମୁଇ ତୁମୁକ୍‍ମ୍‌ନ୍‍କେ କ୍‌ମ୍‌ଲେ, କ୍‍ରାପ୍ ଲକାର୍‌ ବିରଦ୍ କ୍‍ରାନାଇ, ମ୍‍ତର୍ ଯେ କେ ତୁମାର୍ ଡେବ୍‌ରି ହାକାର୍ ଗାଲେ ଚାହୁଳ୍ ମାର୍‍ଲେକ୍, ତାକେ ଆର୍‍ଗଟେ ଗାଲ୍ ହେଁ ଦ୍‍କାଇ ଦିଆସ୍।
ଆରେକ୍‌ କେ ଯଦି ତୁମାର୍ ସ୍‍ଙ୍ଗ୍‍ ବିଚାର୍‌ ଅଉତା ଜାଗାଲ୍‌ଗେ ମାଡ୍‌ଗଳ୍ କ୍‍ରି ତୁମାର୍ ଆଙ୍ଗି ନେମ୍‍କେ ମ୍‍ନ୍‍କ୍‌ରେଦ୍, ତାକେ ତୁମାର୍ ଚାଦର୍ ହେଁ ଦେଇ ଦିଆସ୍। ଆରେକ୍‌, ଯେ କେ ତୁମୁକେ ଅଳକ୍ ଦୁରି ଜୁମା ବ୍‍ଲି ବିଜାର୍ କ୍‍ରେଦ୍, ତାର୍‌ସ୍‍ଙ୍ଗ୍‍ ବେସି ଦୁରି ହ୍‌ତେକ୍ ଯା। ଯେ ତୁମୁକେ ମାଗେଦ୍, ତାକେ ଦିଆସ୍, ଆରେକ୍‌, ଯେ ତୁମାର୍ ତ୍ଇହ୍‍ଣି ରୁଣ୍ ନେମ୍‍କେ ମ୍‍ନ୍‍କ୍‌ରେଦ୍, ତାକେ ରୁଣ୍ ଦିଆସ୍।”


“ତୁମିମ୍‍ନ୍ ଶୁଣିଆଚାସ୍, ଇରି ମୋଶାର୍ ନିୟମ୍‌ତ୍‌ଇ ଲେକାଆଚେ, ‘ତୁମାର୍ ଲ୍‌ଗାର୍ ଲକ୍‌କେ ଲାଡ୍‌କ୍‌ରା ଆର୍ ତୁମାର୍ ଶ୍‌ତ୍‍ରୁକେ ଘୃଣା କ୍‍ରା।’ ମ୍‍ତର୍ ମୁଇ ତୁମୁକ୍‌ମ୍‌ନ୍ କ୍‌ମ୍‌ଲେ, ତୁମିମ୍‍ନ୍ ତୁମାର୍ ଶ୍‍ତ୍‍ରୁମ୍‍ନ୍‍କେ ଲାଡ୍‌କ୍‌ରା, ଆରେକ୍‌ ଜୁଇଲକ୍ ତୁମୁକ୍‌ମ୍‌ନ୍ ଲିନ୍ଦା କ୍‌ର୍‌ତି, ସେମ୍‍ନ୍‍କାର୍ ଗିନେ ପାର୍‌ତେନା କ୍‍ରା, ଜ୍‌ନ୍‌କ୍‌ରି ତୁମିମ୍‍ନ୍ ତୁମାର୍ ସ୍‌ର୍‌ଗାର୍ ଉବାର୍ ହିଲା ଟକି ଅଉଆସ୍। ସେ ତ ଦୁଷ୍ଟ ଆର୍ ଦ୍‌ର୍‌ମ୍ ଦୁଇଲକାର୍ ଉହ୍‍ରେ ନିଜାର୍ ବେଳ୍ ବାର୍ କ୍‌ର୍‌ତି, ଆରେକ୍‌ ଦ୍‌ର୍‌ମାର୍ ଲକ୍ ଆର୍ ଦୁଷ୍ଟ ଲକାର୍‌ ଉହ୍‍ରେ ହ୍‍ଣି ଆଶା କ୍‌ର୍‌ତି।
ଆରେକ୍‌ ଜୁଇ ଲକ୍‌ମ୍‌ନ୍‌ ତୁମୁକ୍‌ମ୍‌ନ୍ ଲାଡ୍‌କ୍‍ର୍‍ତି, ସେମ୍‍ନ୍‍‍କେ ଲାଡ୍ କ୍‌ଲେକ୍ ତୁମାର୍ କାଇ ଲାବ୍? ସିସ୍‌ତୁ ଆଦାଇ କ୍‌ର୍‌ତା ଲକ୍ ହେଁ କାଇରି ସେରି ନ୍‌କେର୍‌ତି? ଆରେକ୍‌ ତୁମିମ୍‍ନ୍ ଯଦି ତୁମାର୍ ନିଜାର୍ ନିଜାର୍ ବାଇମ୍‌ନ୍‌କେ ଜୁଆର୍ କ୍‍ରାସ୍, ତ୍‍ବେ ତୁମି ଅଦିକ୍ କାଇରି କ୍‍ରାସ୍? ଯିହୁଦି ଜାତି ନଇଲା ଲକ୍‍ମ୍‍ନ୍ ହେଁ ସ୍‌ତେନ୍ କ୍‌ରୁଲାଇ, ଜୁଇ ଲକ୍‌ମ୍‌ନ୍‌ କି ଇଶ୍ଵରାର୍ ନିୟମ୍‌କେ ମାନି ନ୍‌କେର୍‌ତି? ଆରେକ୍‌ ତୁମାର୍‌ମ୍‌ନ୍‌କାର୍ ସ୍‌ର୍‌ଗାର୍ ଉବା ଜ୍‌ନ୍‌କ୍‌ରି ବ୍‍ଲ୍, ତୁମିମ୍‍ନ୍ ହେଁ ତାର୍ ହର୍ ବ୍‍ଲ୍ ଅଉଆ।”

ฟัง ମାଥିଉ 5