Kodaku

हेना वरी ईसु हेना बुरू वरिय अगड़ू एना, तहाँ भीड़ रेनकू होड़कू हेंय तयोम तेकू सेनतेडा। मियाँहोड़ कुड़गा तनय होड़ हेना रे मेजकेन ते ईसुय जोहार वडा, अवुरिय कहनी तेडा, “ओ परभु, अगर अम चहोः रेदो, इंञ मी सुद्ध सकोआ।” हेना वरी ईसु तीत सुहरू केते हेंयिय छुयों तेडिया, अवुरिय कहनी तेडा, “इंञ चहोः तना, अम सूधुः मी।” हेना वरी हेंय राः कुड़गा रोग तुरेत्ते सुद्ध यनु। हेना वरी ईसु हेंय थरेय कहनी तेडा, “अँजोमेमू, कनय थरे अलोम लाय बेड़ायू, सींड़कू मड़ंग रे सखिया गोवाह होयाः लगड, सेनकोःते आजक मी तिःवा। कुड़गा वरी चिकानुअय लगड भगवान मूसा थरे नियामिय एमतेडा, हेना राः अनुसार ते पुजम एमू।”


हेना वरी ईसु कफरनहूम सहर रेय मेजेना, हेना रे मियाँहोड़ दरोगा मेजकेन ते हेंय थरेय गोड़ेन मुड़ेन एना, “ओ परभु, ईञाअय नोकर लवका रोग ते अखीरिय दुख केनते ओड़ाः रेय पड़ो केना।” हेना वरी ईसु हेंय थरेय कहनी तेडा, “इंञ मेजकोःते हेंयिंञ चिकानिया।” तहाँ दरोगा जबाब तेडा, “ओ परभु, इंञ नआँ लायिक कोवाञाँ कि अम इंञ ओड़ाः रेम मेजुऊ, लेकिन अम मेन वरी मियाँ अखर मी टेबोः गोत्ते रेदो, ईञाअय नोकर चिकानु अयू। कहेकि इंञ हो कनय राः सीमांञ रखोआ, अवुर सिपाहिकू हो ईञाः सीमा कू रखो। कनय थरेंञ कहनियू, ‘जू’ मेंडे रेदोय चलोआ, अवुर मेजुः मी मेंडे रेदोय मेजुआ। अवुर ईञाअय कनय हरवाह हो नअँम काम मेनतेंञ कहनी वय रेदोय कामेआँ। ईञाः भरोसा इदाना कि अमाः टेबोः रे सक्‍ति इदाना।”
हेना वरी ईसु नआँ टेबोईय अँजोम केतेय अहचरज यनु, तहाँ अनेज तयोम तेकू से-ने दोहोएन हेंकू थरेय कहनी तेडा, “इंञ सही मेते अपे थरेंञ कहनी यडा, इसरायिल रेहो नआँ घियाआ बिसवास मेनेंञ ञेंलगाडा। इंञ अपे थरेंञ कहनी यडा, पुरूब अवुर पछु हनवरी अखीर होड़कू मेजकोःते, अबराहम अवुर इसहाक अवुर एकूब सुदा सरग राज रेकू दुड़ूबा। लेकिन राज रेनकू चोंडिजकू, बहेर अंधरा ओत हनतेकू एर ढोकलोआ, हेना रे हेंकू ईयामा कू अवुर तिरींग तुकुकू लुकड़ूमा।” तहाँ ईसु दरोगाय कहनी वडू, “जू, जेयसे अमाः बिसवास इदाना, हेन घयते होयाऊ।” अवुर हेंय रेनिय नोकर हेनेन तोलोगिय चिकन यनु।


हेना वरी ईसु पतरस ओड़ाईय सेनेन रे पतरस हनहार जार लेनताडिय तोलोगिय सेन ञँमतेडिया। हेना वरी हेंय तीय छुवों तेडा, अवुर हेंय राः जार तुरेत्ते अगड़ू यनु, अवुर हेंय तुरेत्ते रिमकेनते आदर भोजन कू लगाडिय भिड़ो यनु। सिंगड़ एन तहाँ, जे जे थरे भूत परेतकू लगो तना, हेंकू अखीर होड़कू ईसु थरे कू इदी तेडकुआ, अवुर हेंकू भूत परेतकू, ईसु मियाँ अखारिय कहनी तेड सी कू उडूंग यनु; अवुर रोगियाकू भर दोय चिकन तेडकुआ। ताकि एसायाह भविस्यवक्‍ता राः दोवारा ते नआँ घयतेय कहनी तडा टेबोः पूरा होयाऊ, “हेंय अबू राः कमजोरी अवुर बेमारिय जोला लगड अनेज उपर रे कमजोरी अवुर बेमारिय रिमतेडा।”


हेना वरी ईसु चरियो गतर हँडे भीड़िय ञेंलकेते चेला कुतय समुन्धर वरी मेना परोम हनतेबू चलोऊ मेनतेय कहनी वडकू। तहाँ मियाँहोड़ एहूदी नियम चेचेडय ठाँव रे मेजकेन ते ईसु थरेय कहनी तेडा, “ए गुरू, जहाँ ना अम सेनुआँ, इंञ अम तयोम तेंञ से-नेआँ।” तहाँ ईसु हेंय थरेय कहनी तेडा, “बुवाः लगड लात अवुर अगस तेनकू तितीजकू लगड तुका दोहोना; लेकिन होड़ होपोन लगड भोः छहयों मेन्हों जघा कोवाआ।” हेना वरी अवुर मियाँहोड़ चेला कहनी तेडा, “ओ परभु, पहील ते अपुंञ हर लगड इकम गोडवंञ मी।” ईसु हेंय थरेय कहनी तेडा, “अम इंञ तयोम तेम से-ने, गोजकेन हेंकू अकू राः लास मी एनेम हरवा कू।”


हेना वरी ईसु डोंगा रेय रकब एना, तहाँ चेला कुतय हो हेंय तयोम तेकू सेनतेडा। तहाँ समुन्धर रेकू दोहोएन तोलोग अचाकते एतना गरा घटा रिमेना कि हिलकोस एन हेना, डोंगा रे बोल दोहो एनु। अवुर ईसु दोय गितीज दोहो एनु। हेना वरी चेलाकू बँदेत रे मेजकेन तेकू रिमतेडिया, अवुर कू कहनी वडियू, “ओ परभु, बंचो बुमू, अबू नासुः तनाबू।” तहाँ हेंय हेंकू थरेय कहनी तेडा, “ए कमजोर बिसवासिकू, ची लगड पे बोर तना?” तहाँ ईसु रिमकेनते गरा घटा अवुर दाः हिलकोसुः हेनाय दबेट तेडा, अवुर सगोर थबदो यनु। अवुर हेंकू अहचरज यन तेकू कहनियू, “नेय करा घियाअय होड़ हवे? गरा घटा अवुर दाः घली नेय राः टेबोः अँजोमेआँ!”


ईसु समुन्धर वरी मेना परोम गदरेनिकू देस रेय सेनेना, तहाँ बा होड़ थरे भूतकू लगोतन हेंकींञ, मरघटी वरी सेनकेन ते हेंय सुदा कींञ जूमो एना। हेंकींञ एतना डरडरवन तेकींञ दोहो एना कि होड़कू हेना होर ते मेने कू सेन बेड़ाऊ। अवुर हेंकींञ ईसु ञेंलकेते अहीज केनते कींञ कहनी तेडा, “ए, भगवान होपोन! अले राः अम थरे ची काम इदाना? अम अले समय वरी पहील ते सजा ओवा ले लगड मी मेजकेना किदो?” हेंकींञ वरी दमभराआ सँगिंञ रे मियाँ लेहँड़ सुकरिकू बुरू रेकू चरोः दोहो एनु। भूतकू ना याःते ईसु थरे गोड़े पय्याँ केनतेकू कहनी तेडा, “अगर अम नेकींञ वरिम उडूंग यडले रेदो, मेकू सुकरिकू राः लेहँड़ रेम कुल गोत्तेले।” तहाँ ईसु हेंकू भूतकू थरेय कहनी तेडा, “जू चलोः पे!” हेना वरी हेंकू भूतकू हेंकींञ वरी उडूंग केनते, हेंकू सुकरिकू थरे कू झपटो एना। हेना वरी हेंकू सींड़ लेहँड़ रेनकू हुंको सेनकेनते करखा वरी दाः रेकू डुबो गोजियानू। हेना वरी सुकरी चरवाहकू ञींरेना कू, अवुर सहर रे सेनकेनते नआँ सींड़ टेबोः अवुर जे थरे भूतकू लगो तना, हेना सींड़ हाल कू लाय तेडा। तहाँ हेना सहर रेनकू सींड़ होड़कू ईसु सुदा जुमोः लगड कू सेनेना, अवुर हेंय ञेंलते सींड़कू “अले सिवन वरी चलोःमी” मेनते ईसु थरे कू गोड़े पय्याँ एना।

ฟัง मत्ती 8