Kaba for CAR - ACATBA; 2020  Drama (NT)

Nayn ndɔ misan karə ndɔ Pakə asə a, Jeju aw Betani bbe lə Lajar kə̂ oy bba n̂-ndole le. N̂-dda nɛ̂n-kusa darə Jeju lo tə̂ənn. Martə â aw kə nɛ̂n-kusa le. Lajar ee horo dəwje tə̂ kə̂ isije ta nɛ̂n-kusa tə̂ kə Jeju le. Mari unn yambo kə̂ gatɛ̂ ngəng nya, kə̂ n̂-dda kə nɛ̂n kə̂ ria nan nar. Yambo le uwa kar ku. Nungu gɔl Jeju tə̂ ngaâ n̂-bɔru kə biin-dɔɛ̂. Bayn yambo le taa mə kəy le tɔyn. Marə nje-nja go Jeju tə̂ kə̂ ria nan Judas Iskariyotə kə̂ a kila Jeju ji dəwje tə̂ le pa nan: «Mba ddi bba n̂-labbə yambo nəənn kandə narɛ kɔr mota n̂-kayn narɛ̂ njê-ndooje ang wa?» N̂-pa tar baann mba to kəm-to-ndoo lə njê-ndooje â naw noo ang. N̂-pa baann mba n̂-to nje-bboko. Ne â naw ngəm bbɔl narɛ arə naw bboko marə narɛje kə̂ daw dungu məɛ tə̂ le. A Jeju pa nan: «Inyɛ̂ ddekeke! N̂-dda nɛ̂ɛnn kete ta nginan nɛ̂n ndɔ kə̂ dâ kilam mə buwa-yo tə̂. Njê-ndooje a naynje kə se kə ndɔ tɔyn. A əman, mâ nayn kə se kə ndɔ tɔyn ang.»

Jiipije tokə banya ooje nan Jeju ee Betani. A dawje Betani le mba Jeju kə karɛ̂ ang. Dawje ta koo Lajar kə̂ oy bba Jeju ndole le tɔ. Mbayje lə njê-poloje Lubba unnje ndude ta tɔl Lajar le tɔ, mba Jiipije nya inyaje gode ɔju dɔɛ̂ ngaâ ooje məde tə̂ kə Jeju.

Lo-karɛ̂ a, dəwje kə̂ banya kə̂ ddeeje Jerujalɛm mba kusu Pakə le ooje nan Jeju aw ddee kə Jerujalɛm. Dede tɔyn njaa n̂-tije kam mburuje duwaje jide tə̂ ngaâ dinje mə bbe tə̂ le n̂-tilaje kəmɛ̂. Duruje əkii nan: «Jɔsuje gaji Lubba! Maji karə Lubba bbar tar kə̂ maji dɔ dəw tə̂ kə̂ ddee kə ri Əbbə-dəwje! N̂-to tɔkə mbay kə̂ Ijarayɛl!» Jeju inga marə ngonn kororo ngaâ aal isi dɔɛ̂ tə̂ tokə Makəturu lə Lubba kə̂ pa nan:
«Ə-bbəəlje ang, see dəwje kə̂ tɔkə bbe tə̂ kə̂ Sinyɔ!
Ooje, tɔkə mbay ləse aw ddee,
nisi dɔ ngonn kororo tə̂.»
Njê-njaje goe tə̂ gərəje gəl nɛ̂njeenn le dɔngɔr ang. A kar kə̂ Jeju inga piti ngaa bba doleje məde dɔ tar tə̂ kə̂ Makəturu lə Lubba pa kete ɔju dɔɛ̂ le. Dəwje ddaje nɛ̂ɛnn le mbɛɛ̂.
Dəwje tɔyn kə̂ arje kə Jeju kar tə̂ kə̂ n̂-bbar Lajar buwa-yo tə̂ narə ndol le aw paje tarɛ̂ arə dəwje. Mba yeenn bba, dəwje kə̂ banya tilaje kəmɛ̂ mba dooje nan n̂-dda nɛ̂n-mɔri nəənn le. Yeenn ngaâ Parijinyɛje paje horo naan tə̂ nan: «Ooje, â kumanje nɛ̂n pin. Dəwje tɔyn kə̂ duninya tə̂ njaa ngaa â aw unnje goe.»

Marə Gɛrɛkəje eeje horo dəwje tə̂ kə̂ awje Jerujalɛm ta polo Lubba ndɔ kusu tə̂ le. N̂-ddeeje ngɔsi kə Pilipi dəw kə̂ Betesayida nangə tə̂ kə̂ Galile ngaâ n̂-dujeje nan: «Əbbəjeje, n-ndiki ta koo Jeju.» Pilipi le aw pa arə Andere ngaâ dawje joo kəm daw paje darə Jeju. Jeju ilade tə̂ nan: «Kar kə̂ Lubba a piti nɛ̂n Ngonn lə dəw asə ngaa. Tɔkɔrɔ njaa, m-pa marəse, bbo kandə-ko kə̂ to ble oso nangə̂ ngaâ oy ang a, n̂-nayn to kandə ble kə̂ kâra le njaa. A bbo noy a, nandə banya banya. Dəw kə̂ ndiki təbbə laa a, təbbə laa le a nayn kə kɔrɔ̂. A dəw kə̂ oo təbbə laa dɔ nangə tə̂ nəənn to nɛ̂n ang, təbbə laa le a nayn kə lo-toe mba təbbə kə̂ to kə ndɔ kə ndɔ. Bbo dəw ndiki ta dda kula ləm a, maji karə nunn gom. Baann bba lo kə̂ mee tə̂ a, nje-kula ləm a kee tə̂ tɔ. Bbo dəw aw dda kula ləm a, Bɔmje a walɛ̂.»

«Bbasinɛn nəənn kəjə ləm to kə dannâ ang. A mâ pa nan ddi wa? Bɔy ɔrum ta nɛ̂n kəm-to-ndoo tə̂ kə̂ a ta ddee kar tə̂ nəənn kə ddang wa? A m-ddee mba yeenn le njaa. Bɔy, ɔsu gaji rii.»
Yeenn ngaâ marə ndu bbar mə dara tə̂ nan: «Mɔsu gaji rim mban ngaâ mâ təl kɔsu bbay.» Dəwje kə̂ banya kə̂ eeje tə̂ənn ngaâ ooje ndu le paje nan: «To ndi â ndangə.» Marɛ̂je paje nan: «Anjə â pa saa tar.» A Jeju pa arəde nan: «Ndu nəənn le bbar mbase bbo mbam ang. Kar gangə sariya dɔ nangə tə̂ nəənn asə ngaa. Bbasinɛn, dâ tubba nje-kɔn dɔ duninya nəənn kə ddang. A əman, bbo dunnum dɔ nangə tə̂ nəənn n̂-tɔm taar a, mâ ndɔru dəwje tɔyn kə rɔm tə̂.» Jeju pa tarjeenn ta tɔju nɛ̂n yo kə̂ nâ koy. Dəwje kə̂ banya le ilɛ̂je tə̂ nan: «Makəturu-Ndu ləje pa nan Mesi a nayn kə ndɔ kə ndɔ. A əi, ə-pa nan maji karə dunn Ngonn lə dəw n̂-tɔɛ̂ taar tokə baânn wa? Ngonn lə dəw le to nân wa?» Jeju ilade tə̂ nan: «Lo-karɛ nayn horose tə̂ mba gɔju kar bbay. Maji karə ə-njaje kar tə̂ kə̂ lo-karɛ le nayn horose tə̂ bbay, yeenn bba lo ndul a tee dɔse tə̂ busu ang. Mba dəw kə̂ aw nja lo ndul tə̂ gərə lo kə̂ aw aw kə tə̂ ang. Kar kə̂ ə-naynje lo-karɛ tə̂ bbay nəənn le, maji karə ooje məse tə̂ kə lo-karɛ le. Baann bba â ddeeje to dəwje kə̂ lo-karɛ tə̂.» Jeju pa tar arəde baann ngaâ ɔtu aw iya rɔɛ̂ ddəw əw kə de.

Jeju dda nɛ̂n-mɔrije nya njaa kəm dəwje tə̂ le, a dooje məde tə̂ saa ang. Baann bba, tar kə̂ Ejayi kə̂ to nje-kila mbər tar lə Lubba pa le ddee to tar kə̂ tɔkɔrɔ. N̂-pa nan:
«Əbbə-dəwje, tar kə̂ n-pa le, nân bba ndiki tə̂ wa?
Nân bba Əbbə-dəwje tɔjɛ̂ singa-mɔngu laa wa?»
Dəwje le a kooje məde tə̂ ang mba ddi wa? Ejayi ɔru gəle nan:
«Lubba dda arə kəmde oo lo ang.
N̂-dda narə məde kətərə, bba karə dooje lo ang,
karə n̂-gərəje nɛ̂n ang,
bba karə n̂-turu ddəw ləde ang,
ngaâ, karə Lubba ajide rɔ-to tə̂ ləde ang.»
Ejayi pa baann mba noo piti lə Jeju ngaâ n̂-pa tar laa.
A marə njê-kɔn dɔ Jiipije nya njaa kara ooje məde tə̂ kə Jeju. A n̂-ndikije ta pa kə ddaka ang mba Parijinyɛje a tubbade kəy mbɔn-naanje tə̂ ləde. Mba n̂-ndikije nya karə dəwje â pitide uta karə Lubba â pitide.

Jeju pa kə taar nan: «Dəw kə̂ unn məɛ̂ arəm a, to əman kə karəm â nunn məɛ̂ narəm ang. Dəw kə̂ ulam â nunn məɛ̂ narɛ̂ tɔ, dəw kə̂ oom a, oo dəw kə̂ ulam tɔ. Əman, m-to lo-karɛ, m-ddee dɔ nangə tə̂ karə dəw kə̂ unn məɛ̂ arəm a, nayn lo ndul tə̂ ang.
«Bbo dəw oo tarje ləm, â bbo n̂-dda nɛ̂n kula ang a, əman â mâ gangə sariya dɔɛ̂ tə̂ ang. Mba m-ddee ta kaji dəwje kə̂ dɔ nangə tə̂, bbo m-ddee ta gangə sariya dɔde tə̂ ang. Bbo dəw mbətəm ngaâ taa tar ləm ang a, ddutu ndɔ tə̂, nɛ̂n kə̂ a gangə sariya dɔɛ̂ tə̂ to tarje kə̂ m-pa â a gangəje sariya dɔɛ̂ tə̂. Mba tarje kə̂ maw pa inje tam tə̂ njaa ang. To nduje kə̂ inje ta Bɔmje tə̂ kə̂ ulam. Ne njaa n̂-tɔjum tar kə̂ mâ pa ddəm nɛ̂n kə̂ mâ tɔju dəwje ddəm. A m-gərə to Ndu lə Lubba to təbbə kə̂ to kə ndɔ kə ndɔ. Yeenn a, tar kə̂ Bɔy pa arəm â maw pa.»

ฟัง Jan 12