Luka' 17
17
Monovo Golosoli'mo Evene' Do Goloso O-ngedaa' Neine' Nemu' Izesu' Lo-ngimine' Gamazi
(Mataio' 18:6-7, 21-22; Maleko' 9:42)
1Izesu' aza ne'mine lo izipahala zuho gamazi gohi ma ti' lo lo-ngimine': Evene' ngimimise' igi aka golosou' ngele'mizi milaliza nite' nene soto' amilizavoba mo vai' soto' ilisaha a'mine inite' di soto' ilizave nene O'moso'mo lihime naba ngemeleseinako engikumu' agae lo mulumo nogele-ngiduve. 2Neni' izipaha'ne limi minanguti' mene aka golosou' ma ngele'mizi milalizave nene O'moso'mo mulumo gono atoli'mine goloso ngemalive li a'mine izipaha'ne olihe aka golosou' ngele'mizi milalisa naveti luvo'ningu' nene geheni naba' naba izi-ngidi noso nabau' ngehuso' i hulikevo noso ni hililizani' nene lamine' oloseive. 3Nemu' lingine nene lutido' gizebo lamine' igi minilo. Ido' gei' zuho mali'mo monovo goloso do lihime nodavo ma gala do elemezo. Ne'mine oganivo lulo do velepe' izavo ma nene lihime've hulo-dezo. 4Ido' gamene hamokukovo' geita monovo goloso o-gedo lihime gamene seveni ogosa aza ogo do goloso okuve lo geita ogo lulo do velepe' noizivo ma nene lihime've gamene seveni ne'minesi nene ha hulo-deka' hulo-deka' olosane.
O'mosomu' Gili Ele'vole' Ilizadoti' Nene Atoli'mine Sunosi Ha Ilisave Lo Izesu' Line' Gamazi
5Ne'mine lavo aposolo ingine Guvelesi ve nene ti' li li-imani': Gaza gele ele'vole' ogate nene do naba o-ledezo. 6Ne'mine likevo Guvelesi ve aza ti' lo line': Lingine O'mosomu' gili ele'vole' igatine nene sakave' zuho ngomo ne'minesi ma minidiniko gihile izaa' ine' za menemu' luhivekasi kiselo vo guvo nosou' zuho' o minezo lilizadokisi nene ha gele lingimidine.
O'mosomu' Gelekele' O-daa' Unive None Li Oko'nine Di Dizamilizangumu' Izesu' Lo-ngimine'
7Lengikuti' ve mali'mi gelekele' izipe've ma minelidi'mo mingu' gono do minelihe ido' sipisipi izelo' gizebo ogo minelihe ilidoti' nivenga' gonou' osu' lo ogavo lite' lo gaza ogo mito' mino noso' niteka nonozo lo gizebo ve've ne'mo nene ha lo-delihe. 8Mo ngelo lo-damoloseive. Asi ti' lo lo-emeleseive: Noso' nite'ne gize vata' o-nedosa gono daliningumu' do nene ogo gonou' inite' do ngolo noso' nite' hizo do nemeka' nemeka' nanivo neni' no osu' lokuvosa gaza nene alinge' nalosane. 9Ido' gelekele' ve aza nene ei' lido' e'meto gamazi've gele davo aza ne'mine ingumu' nene tangezo' ve ha lo-delihe. O've, mo ne'mine lamoloseive. 10Lingine mo a'mine'mine igi neni' gamazi'ne gili di a'mido' e'meti osu' lii ma nene lingine ti' li gililo: Laza nene gono atoli'mine lamine' guvetesi ve lopo'ni liline' votigilelo' ma damune. Asi evene' gono daa' nani' ne'mine ha olonido' o minine' inite' ma nene okune li lilo.
Izesu' Ganadise Gizi Dave Teni (10) Ma Do Lamine' O-ngidine' Gamazi
11Izesu' nene mo Zelusalemi numuno ebeta volosa nGalilaia misubosi Samalia misubosi olusota vo 12numuno ebe' ngomo ma minido' vo nohetelivo ganadise gizi dave teni (10) ingine nete ningi siki zuho ngemalone li a'mida hota ha mini 13vise li-di ti' li lani': Evene' naba Izesuvo, leli' mulumote ningevo. 14Ne'mine li likevo ningo ti' lo lo-ngimine': Lingine lamine' ilizani' okodine nene ningisa eveneto' medeli mini O'moso inite' lehizi-daa' ave nete gili lingimikevo lingine evene' gomu' golise i-lingidaa' ani' ma nene gohi bizi monilizangisi vi ngelebizilo. Ne'mine lavo ganadise gizi dave teni (10) ingine nene ngimiselida nivavo oko'nido' ganadise nene osu' lo-ngidine'. 15Osu' lo-ngedavo engitati' mali'mo oko'noloti' ganadise osu' line' nene ningo do tine' molo ogo geke' geke' lo O'moso opo'ni lo'mo lo'mo 16Izesu' neida ogo lemo golo hizo ongo isaa' neve lo-dine'. A'mine ve nene heta ato' ve Samalia misubouti' ve minine'. 17Ne'mine ogavo Izesu' ti' lo line': Evene' teni (10) ne'mine nene ganadise engi' oko'nidoti' nene osu' lo-ngedani'za ve naeni (9) nene zala vave. 18Ingine nene igi O'moso opo'ni lilizado' o neine'za ingine gopo nivavo ato' ve Samalia ve hamo' eikovo' mene nahe. 19Ne'mine lo ti' lo lo-dine': Gaza gei' gele ele'vole' aine' ne'mo lamine' ogange. Oto vozo lo-dine'.
O'moso'mi Gizebo Soto' Ilingumu' Gamazi
(Mataio' 24:23-28, 37-41)
20Halisaio' ve ingine Izesu'ni ti' li longo' i-dani': O'moso'mo gizebo o-ledeli gamene nene nanihe' soto' ilive. Ne'mine li longo' i-dikevo aza ti' lo lo-ngimine': O'moso'mo gizebo o-ledeline' gamene nene vetinedunu' ningi nizavo ato ato' suno soto' neivosa nene ma soto' amoloseive. 21Ido' evene' malite mela neize. Ningilo ma lamilisave. Ido' holela neize. Hole ningilo ma lamilisave. O'moso gizebo o-ledaa' neine' nene lengi' vovotingu' neive. 22Ne'mine lo izipahala zuho nene gohi ti' lo lo-ngimine': Mine do vo alinge' gamene ma soto' iline' gameneu' nene O'mosolati' ve gihile naza nene ogo soto' ivo ningelone li lanite' goloso gililizani'za ma ningamilisave. 23A'mine gamenelo' nene ti' li li-lingimilisave: Ningilo. Hole neive. Ido' ningilo. Me neive. Ne'mine nili-lingimavo ma nene ingine gamazilo' e'meti a'mida vamilo. 24Lingine mo ningi gili nizani' ma neive. Gopa'na ine' nene okulumoto' vai' mone osu' lavo soto' oga' neive. A'mine'mine ogo aloni' gamene soto' ilingu' nene O'mosolati' ve gihile neni' nene evene' mukilite ningi osu' lilisave. 25Ne'mine o neine'za olihe ne'mine amivo idise mene gamenela mine do nouvoda ningi nizani' aleve nete nene mehe'ine nimi mulumo inite' muki' goloso gihi-nidilizani' o neive. 26Noa' minine' gameneu' igi mili minaa' ani' ma'mine nene O'mosolati' ve gihile neni' aloni' gameneu' nesi nene ha igi mili minilisave. 27A'mine Noa' minine' gameneu' nene noso naba olihe velamivo evene' ingine nene O'moso'mo iline' initekumu' gilami oko'ine losuvoli'mi initekumukovo' gili mini ado' noso' nite' naa' ido' noso naa' ido' vene' alu hizaa' ido' vene' huki milaa' igi nizavo Noa' nene sipiu' dizavo noso naba nene velo ogo evene' vai' ngebele gese' ine' ve. 28Ido' Loti' gameneu' nene a'mine'mine ogosa soto' ine' ma neive. A'mine gameneu' nene evene' ingine noso' nite' naa' ido' noso naa' ido' inite' maketi milaa' meni hizaa' igi ido' mine zuho' iga' numuno gizaa' igi minani'za 29Loti' a'mine numuno ebe' Sodomu nene hulo novivo O'moso'mo lavo olo' gulumo ogo minine' geheni nene okulumokuti' goline izaa' neine' ne'mino lemo ngebele gese' ine' ve. 30Ne'mine ine' nenako O'mosolati' ve gihile neni' soto' oloni' gamenela nene a'mine'mine igi gopo minilizanguti' upuho' ilisave.
31-32O'moso'mo Sodomu aleve ngebele gese' neivo Loti' elenaho aza golise vido' nene lite' lo vamo a'mido' ha ninge miningumu' ezesi biline' ne'mino lengebelalize. Nemu' lingine gatine gili nge li minilo. A'mine gameneu' nene silibe ogo minaa' nene nominako ve ma ingine numu'ine avitasi nilizadoti' nene ihe' numu'ninguko vi inite' mata'ine nene di vamilisave. Ido' a'mine'mine igi mingukoti' nene tine' mili numunguko amilisave.
33Ido' ve ma aza helelohe helelohe lo oko'nomu' ehelele izivo minaa' ilive nene alinge' minevo' minevo' emeni dameni damoloseive. Ido' ve ma aza neni' ne'meto novilingu' bili hililizani' nene alinge' minevo' minevo' emeni dameni nene mo daloseive.
34Nemu' naza ti' lo nolo-lingimuve: A'mine gameneu' evene' sita' ma holuko' holomo hamoto' ingi minilisinguti' ve ma nene O'moso'mo do vavo ma ve nene ha mineleseive. 35-36Ido' vene' sita' noso' nite' di va'va' igi minilisinguti' ma nene O'moso'mo do vavo ma nene ha mineleseive. 37Izesu' aza ne'mine lo lavo izipahala zuho ingine ti' li longo' i-dani': Guvekasi ve, a'mine laine' inite' nene zala soto' ilive. Ne'mine li longo' i-dikevo aza ti' lo line': Evene' hilani' gonoso nolida nene gonoso naa' ani' namalite a'mida nene lite' li igi di gese' igi minilisave. A'mine'mine ogo evene' lu'nine unuvo o vine' minilizada nene O'moso'mo lihime ngemeleseive.
Айни замон обунашуда:
Luka' 17: aso
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.