Tavaꞌu 4
4
Kaini Ilou Aveli
1Xe ili'i la sou Adamu mulai noxie semau la opoone. Xe ili'i la ane mivo'onu 'ilie e oposou la mivikala aloxo 'o, “IAUE musu'ulileli mole ane eni eno'u 'alixe mulu 'o.” La sou mimoxo'u ualasou lexe Kaini.#4:1 No anu vaikala Evalaio, uala e Kaini o tamaxu loxo “eno'u”. 2Xe ili'i la mivo'onu 'ilie mulu vile la. Mimoxo'u ualasou lexe Aveli anu itema sou usaxisaxila'a ta sipsip. Xe Kaini anu itema sou xai.
3Mixoxoolu mo mixaxai xoo xe, ili'i la Kaini mulai mumolo la'ilali no xaixu, ka mutavulenu mulai sou mu'elaxu mulai noxou IAUE Lataua. 4#Eva 11:4Xe Aveli kalumo ne mulai muno'a ta sipsip ta 'ili'a se'i ta laixe misevile ta laposalaxu, ka mupalepeine'i sou mu'elaxa'a milai noxou IAUE Lataua. IAUE Lataua mumaisou la mumasaxau mo mu'osasou Aveli ne ilou lolovolo noxou misevile. 5Ia Kaini ne uasi. Xe Kaini mulavu aloxo ne la, iou ne masua loxo. La'iaxu misevile. 6IAUE Lataua muavuti la muvikalanu Kaini aloxo 'o, “Nini la'iaxene mamu. Mo ieni ututuma loxo ne mamu. 7Alexe nini namulinu mo na'oxonu 'ilixo ane mulapu, la ano 'o ne nini na'osa'osasi. Ia tava'u xo nini ne'oxo 'ilixo masua, la sou anu 'ilixo masua ne ane anu ungiuleleine mo a ulolooxene ne. Anu umasaxa lexe utaloxolixene mo uatasine ulu'elai. Ia nini xavineni mo nataloxolixu ulu'elai.”
8 # Mat 23:35; Luk 11:51; 1Ioa 3:12 Ia Kaini ne opoonu lelemesou uasi manina. No voxo vile la mu'avalou vimou Aveli la muvikalanu aloxo 'o, “Nane'e mo nengei talai taxixaoxao.” Ilou milalai xoo xe, Kaini muavuti vaxa la muvau vimou Aveli musoli ne.
9Xe ili'i la IAUE Lataua mutali'isou Kaini aloxo 'o, “Vivine Aveli 'ava?” Kaini mukolinu aloxo 'o, “Eni alavusou uasi. Xo ma'i, eni amitema sou saxisaxila'u sou vivilo ne?” 10#Eva 12:24Xe IAUE Lataua muxiu vaxa la mutali'isou, “Loxovaa ane nini ne'oxonu 'ilixo masua ane ne? Eni elavu lexe nini vivine sialuxu munixi mulu'e no lia 'o mo sialuxu ne loxo itema mukatuleli sou lexe nini nano'u navunavu tatila sou lakoli 'ilixo masua ane nini ne'oxonu ne. 11Ioxe, eni vaimomo 'o eni alosine tu'umaxu vile aloxo 'o, umomomo sou nini naxaxai mo natotou mimii ulu'e no lia 'o la uasi, xo lia ne muaa mo muiexu vivine sialuxu no voxo ane nini nevau no anu. 12Ulai xe nini natovo mo lexe natotou mimii toxotoxosou ne la ulemeieni uasi. Xe nini ne sine tuala mo tani sou naxolu talo no anu uasi. Naxixaoxao no lia 'o vitavitanisi, ia naxoo talo uasi.”
13Xe Kaini muavuti vaxa la mukoli vaikalau IAUE Lataua aloxo 'o, “Tu'umaxu ane nini nelosilo 'o ne tatila misevile. Eni amomomo no anu uasi. 14Mo nini a nakusailo 'o sou eni alai axolu va'axu, ia axolu no lia no pa'umene 'o la uasi. Mo silo tuala mo tani sou axolu no anu la ua, axixaoxao mo avavaxa anene'e aloxo nesi, ia axoo talo no lia 'o la uasi. Itema vile uxalisilo ne la uvelosi mole asoli.” 15Ioxe, IAUE Lataua muavuti la muvikalanu lamana aloxo 'o, “Evile umomomo sou uvene uasisi manina. Ia lexe evile uvene xe nasoli la eni alosou navunavu tatila lakolineni.” La sou IAUE mumuxaxu sosovo vile noxou Kaini sou lexe ta mitema imaisou la ivau uasi. 16Ioxe, Kaini muavuti la mu'umesou IAUE sou mulai muxolu no lia xalee vile ilemo lexe “Nod”. Lia xalee ane ne muxolu no xale lia ne Eden loxo aso uxaxali utetelo no anu.
17Xe ili'i la Kaini mutaula'i, la sou ilee semau mipalaa 'ili'a vile mulu la mimoxo'u ualasou lexe Enoko. Xe ili'i la, la Kaini mu'ilii tuala vile tatila la mumoxo'u tuala ne ualasou noxou 'olu ualasou. 18Enoko mupalaa 'olu vile la mumoxo'u ualasou lexe Ielati. Ielati mupalaanu Meusaleli. Meusaleli mupalaanu Metusaeli. Metusaeli mupalaa Lameki. 19Xe Lameki muavuti la mu'uluxa'a ta sema tamei, eiae Ada ilee Sila. 20Lameki mulai noxie Ada xe opoone, la sou mivo'onu 'ilie vile la mimoxo'u ualasou lexe Iavala. Iavala anu 'ilusune'i ta mitema ane ilavusou isaxila'a ta kau xe ixoxoo no tani alelaxu. 21Xe vimou Iuvalu ane anu 'ilusune'i ta mitema ane ilala'ati xe itatau iuxoxo. 22Sila opoone la mipala'alixu Tuvala-Kaini. Anu mukoinu mimii iouiou ane sou taxaxai no anu. Mu'oxonu no anu kopa ilou aen. Anu Tuvala-Kaini ne vimou sema ane Naama. 23Xe Lameki muavuti la muvikalane'i ta semasemau tamei ne aloxo 'o,
“Ada, ngongie Sila ngalomu une'e noxilo.
Eni evau maulu vile mo musoli xo anu muvelo.
24 # Mat 18:22 Ia lexe evile uxalisou Kaini xe uvau usoli
la IAUE Lataua ulosou navunavu tatila.
Mo eni kalumo ne lexe evile uvelo asoli
la IAUE Lataua ulosou navunavu toxoxa'a misevile.”
25Adamu ilee semau mipalaa 'ili'a mulu vile la, la Iva mivikala aloxo 'o, “Lataua mulosilo 'o sou lakolisou Aveli e Kaini muvau musoli.” Ane mimoxo'u ualasou lexe Seti.
26Seti mutaula'i la ilee semau mipalaa 'ili'a vile mulu, la mumoxo'u ualasou lexe Enosi. No tauu ie ane ne, la ta mitema misokou sou mi'ava no anu ualasou IAUE anu uala tavuna no nano no anu xoluxolu noxi'a no anu lalotu.
Айни замон обунашуда:
Tavaꞌu 4: ataNTpo
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.