San Marcos 12
12
Da dxulé'e na ca naca chee̱ benne' we̱n zrin quebe zaj naque̱' xrlátaje
(Mt. 21.33-46; Lc. 20.9-19)
1Nadxa guzú lau Jesús dxuchálajle̱ne̱' benne' ca' tu da dxulé'e na. Dxe̱'e̱ le̱':
―Zua tu benne' bde̱'e̱ lba uva ca' lu xe̱zr la xu chee̱', na' be̱ne̱' le̱'aj chee̱ na. Be̱ne̱' tu xiaj lutju naga guchuchuje̱' uva ca', ne be̱ne̱' tu bdupa' naga cue' benne' guxúe̱' da caní.
’Nadxa bdee̱' xe̱zr la xu chee̱' na' lu na' benne' we̱n zrin ca' chee̱ xelune̱' la'a lina chee̱ na, na' guzé̱'e̱ zéaje̱' xe̱zre zitu'. 2Ca gula zra chee̱ lina, na' gusel-le̱' tu bi we̱n zrin chee̱' cheajxezri'ibe' lu na' benne' we̱n zrin ca' ca naca lina da dxal-la' xezí' benne' xranbe'. 3Na' benne' we̱n zrin ca' gule̱l-le̱'-be', ne buluzalje̱'-be', na' belexesel-le̱'-be' dáchezebe'. 4Nadxa xránabe' gusel-le̱' bi we̱n zrin xula, na' bi nigá belú'e̱-be' xiaj, ne gulelé̱'e̱ xíchajbe', ne bulucháchale̱ne̱'-be'. 5Na' xránabe' na' gusel-le̱' xetube', na' bi nigá belútete̱ benne' ca' le̱be'. Ca gudé na' xránabe' gusel-le̱' bi zandxa bi xula, na' cá'anqueze belú'e̱ bál-labe', ne belútete̱' xebál-labe'.
6’Xránabe' zua tu zrí'ine̱' bi biu, bi nazrí'ile̱'e̱ne̱', na' naga bzé̱bete̱ gusel-le̱' zrí'ine̱' nigá, dxenné̱' lu xichaj lázrdawe̱': Dxal-la' xelape̱' ba lá'ana zri'ina'. 7Benne' we̱n zrin ca' gulenné̱', dxelé̱ ljwezre̱': “Bi nigá gueque chee̱be' xe̱zr la xu nigá. Gútete̱dxu-be' na'a, na' dxi'u xegá'anale̱dxu da nigá.” 8Ca'an guca, gule̱l-le̱'-be', ne belútete̱'-be', na' gulebéaje̱' be̱l-la' dxen chee̱be' lu xe̱zr la xu na'.
9Nadxa Jesús gunábene̱' benne' xudau' ca':
―¿Ájazra gun xrane xe̱zr la xu nigá? Walé̱'e̱, na' gútete̱' benne' we̱n zrin ca', na' gudée̱' xe̱zr la xu chee̱' lu na' benne' xula ca'. 10Ba blábale da naxúaj na lu xiche chee̱ Dios. Dxenná na:
Xiaj na' da quebe buluchine benne' we̱n xu'u,
xiaj na' naca na'a xiaj blau chee̱ xu'u.
11Da nigá be̱n Xránadxu, na' dxexebánedxu chee̱ na.
12Nadxa gulaca lazre̱' xele̱l-le̱' Jesús lawe' da zaj nézene̱' bchálaje̱' da dxulé'e nigá chee̱ gulé'ene̱' ca zaj naca le̱'. Quebe bi gulune̱' lawe' da gulezrebe̱' bi xelún benne' xe̱zre ca'. Chee̱ le̱ na' bulusane̱' Jesús, besí'aque̱'.
Da bchalaj Jesús chee̱ da dxuchizruj xu'u lawe'
(Mt. 22.15-22; Lc. 20.20-26)
13Ca gudé na' gulesel-le̱' lau Jesús bal-la benne' xudau' fariseo, ne benne' zaj de̱'e̱ Herodes chee̱ gulebéaje̱' Le̱' dizra' chee̱ xelezéquene̱' xelawe̱' Le̱' zria. 14Benne' caní belelé̱'e̱ lau Jesús, na' gulé̱'e̱ Le̱':
―Benne' wese̱de, ba nézentu' ca dxennáu' da li, ne quebe dxezí'u ca da dxelennaze bénneache, lawe' da quebe dxenná'u Lue' ca zaj naca cúzreze bénneache. Da li naca ca dxusé̱denu' bénneache da naca chee̱ Dios. ¿Dxunna da nadxixruj bea Dios lataj quízrujdxu da dxuchizruj benne' dxenná bea Roma dxi'u, che cabí? ¿Dxal-la' quízrujdxu, che quebe quízrujdxu?
15Jesús dxéquebe'ene̱' quegá du lazre̱' dxelenábene̱' Le̱' da nigá, na' guzre̱' le̱':
―¿Bizr chee̱ na' dxebéajle neda' dizra'? Le dajguá nigá tu dumí da dxízrujle chee̱ le'eda' na.
16Na' bedajlegüé̱'e̱ na, na' ca ble'e Jesús le̱ na, na' gunábene̱' le̱':
―¿Nu lau da' dumí nigá, ne nu la naxúaj na nigá?
Na' gulé̱'e̱ Le̱':
―Chee̱ benne' dxenná bea Roma.
17Nadxa Jesús guzre̱' benne' ca':
―Le gunezruj chee̱ benne' dxenná bea Roma da naca chee̱', na' le gunezruj chee̱ Dios da naca chee̱ Dios.
Na' belexebánene̱' ca naca da bchalaj Jesús.
Da bchalaj Jesús ca xelexebán benne' gate
(Mt. 22.23-33; Lc. 20.27-40)
18Nadxa belezrín lau Jesús bal-la benne' xudau' saduceo. Benne' caní dxelenné̱' quebe xelexebán benne' gate. Ca'an guca, gulenábene̱' Jesús caní:
19―Benne' wese̱de, Moisés bzuaje̱' chee̱dxu da nadxixruj bea nigá: “Che tu benne' biu gatie̱', ne xegá'ana zru'ule̱', na' quebe nu zua bi chee̱ bénnea', na' benne' biche̱' dxal-la' xequé̱'e̱ nu'ula na' gute benne' chee̱' chee̱ sua zri'ine bénnea' gutie̱'.” 20Gulezrá' gazre benne' biche̱'. Benne' nedxu bchaga na'abe', na' gútebe' quebe nu zrí'inebe' zua. 21Na' benne' gudxupe' bequé̱'e̱ nu'ula na', na' cá'anqueze gutie̱' quebe nu zrí'ine̱' zúaqueze. Cá'anqueze guca chee̱ benne' guxunne'. 22Ca'an guca, benne' gazre caní gulezúale̱ne̱' nu'ula na', na' netue̱' quebe nu zrí'ine̱' guzúa. Naga xeajse̱te̱ na gútete̱ nu'ula'. 23Na'a xca', gate na' xelexebán benne' gate, ¿nula benne' biu caní gaque̱' benne' chee̱ nu'ula na', lawe' da gulezúale̱ benne' gazre ca' le̱'?
24Nadxa Jesús guzre̱' benne' ca':
―Nanítele le'e lawe' da quebe núnbeale da naxúaj na lu xiche chee̱ Dios, ne quebe nézele ca naca xel-la waca chee̱ Dios. 25Gate na' xelexebán benne' gate, québedxa xuluchaga ne̱'e̱, ne québedxa xuluchaga na' bi nu'ula ca'. Xelaque̱' ca zaj naca gubáz chee̱ xabáa. 26Na'a, ca naca chee̱ benne' gate che xelexebane̱', ¿quebe ne gulábale ca da naxúaj na lu xiche chee̱ Moisés ca gunná Dios gate na' bchálajle̱ne̱' Moisés tu lu xágadau' da dxala xi'? Gunná Dios caní: “Neda' naca' Dios chee̱ Abraham, ne chee̱ Isaac, ne chee̱ Jacob.” 27Dios naque̱' Dios, quegá chee̱ benne' gate ca'. Naque̱' Dios chee̱ benne' ban ca'. Ca'an naca, álega nanítele le'e.
Da nadxixruj bea Dios da naca blau
(Mt. 22.34-40)
28Na' zé̱queze tu benne' dxuxuzájle̱'e̱ da nadxixruj bea Dios, na' benne̱' da dxuchalaj Jesús, ne nézene̱' bzri'e̱ dizra' chawe', na' gunábene̱' Le̱':
―¿Bizra da nadxixruj be'e Dios naca na da blaudxa?
29Na' Jesús guzre̱' le̱':
―Da bdxixruj be'e̱ da naca na da blaudxa ca xúgute̱ dxenná na caní: Le xene benne' Israel. Xránadxu Dios tuze naque̱'. 30Bzri'i Xranu' Dios du lazru', ne nen dute̱ bénne'du xu'u, ne nen dute̱ xichaj lázrda'u, ne nen dute̱ xel-la wal-la da napu'. Da nigá naca da nadxixruj bea da blaudxa, 31na' da nadxixruj bea gudxupe' nácaqueze na ca le̱ na, da dxenná na caní: Bzri'i benne' xula ca nazrí'i cuinu'. Quebe zua xetú da nadxixruj bea da naca blaudxa ca da chupa caní.
32Nadxa gunná bénnea' dxuxuzájle̱'e̱ da nadxixruj bea Dios, dxe̱'e̱ Jesús:
―Ca'an xanne naca ca beche̱bu', Benne' dxuse̱de. Da li naca ca dxennáu'. Zua tuze Dios, ne quebe nu zua xetú ca Le̱', 33na' che zri'idxu Dios du lázredxu, ne nen dute̱ xichaj lázrdaudxu, ne nen dute̱ bénne'du xú'udxu, ne nen dute̱ xel-la wal-la da nápadxu, ne che zri'idxu benne' xula ca nazrí'i cuínadxu, da caní zaj zácadxa na ca xúgute̱ be̱ xixre' ca' dxútedxu-ba' lau Dios, ne ca xúgute̱ da dxuzézxedxu lu cugu chee̱ Dios.
34Nadxa Jesús, ca benne̱' bchálaje̱' chawe', na' guzre̱' le̱':
―Xeláteze ne de̱ na chee̱ nna bea Dios xichaj lázrda'u.
Na' québedxa nu bexazre nábene̱' Le̱' dizra' ca'.
¿Nu zrí'ine̱' naca Cristo?
(Mt. 22.41-46; Lc. 20.41-44)
35Jesús dxusé̱dene̱' benne' ca' lu xudau', na' gunné̱':
―¿Bizr chee̱ na' dxelenná benne' dxuluxuzájle̱'e̱ da nadxixruj bea Dios naca Cristo zri'ine David? 36David ná'queze ca bzéajni'i Be' Lá'azxa le̱', gunné̱':
Xránadxu Dios guzre̱' Xrana':
“Gudxé'e chalá'a xabe̱la chia',
ca zrin zra ba nuzúa' benne' dxeledábague̱' lue',
chee̱ na be'enu' le̱'.”
37Che David ná'queze dxenné̱': “Xrana'”, ¿ájala chee̱ na' naque̱' zrí'ine̱'?
Benne' zan ca' du lazre̱' buluzé̱ nague̱' chee̱'.
Jesús dxulé'ene̱' zaj nachixre benne' ca' dxuluxuzájle̱'e̱ da nadxixruj bea Dios
(Mt. 23.1-36; Lc. 11.37-54; 20.45-47)
38Ca dxuse̱de Jesús benne' ca', na' gunné̱':
―Le gapa chi'i cuínale chee̱ benne' ca'an dxuluxuzájle̱'e̱ da nadxixruj bea Dios. Benne' caní dxeledánene̱' dxelácue̱' zra lane̱' tunna, ne dxeledánene̱' xulugapa bénneache le̱' diuzre nen dizra' ba lá'ana lau bénneache ca'. 39Benne' caní dxeledánene̱' dxelebé'e̱ lataj blau lu xu'u naga dxelezraga benne' dxelúe lá'ane̱' Dios, ne dxeledánene̱' dxelebé'e̱ lataj blau naga dxelawe̱' xrche'. 40Benne' caní dxelegüe̱' lizre xrlataj nu'ula ca' ba gulate benne' chee̱', na' chee̱ xululé'e cuine̱' ca benne' xrlátaje, dxelune̱' xel-la dxuluwizraj Dios tunna. Le̱' zaj nabágadxe̱' zria.
Dumí da gulú'u nu'ula xache' ba gute benne' chie̱'
(Lc. 21.1-4)
41Tu lasa gate na' dxe' Jesús lu xudau' cuita naga dxelegú'e̱ dumí, na' dxenné̱'e̱ ca dxelún benne' ca' dxelegú'e̱ dumí, ne ca dxelún benne' gunní'a ca', dxelegú'e̱ dumí zren. 42Ca'an guca, bzrin tu nu'ula xache' ba gute benne' chie̱', na' gulu'e̱ chupa dumí lásedau' da quebe zaj zácate̱ can. 43Nadxa gunné̱ Jesús benne' ca'an dxusé̱dene̱', na' guzre̱' le̱':
―Da li dxapa' le'e, nu'ula xache' nigá bnézrujdxe̱' ca xúgute̱ benne' ca'an gulegú'e̱ dumí. 44Xúgute̱ benne' ca' gulegú'e̱ da québedxa dxelechínne̱'. Nu'ula xache' nigá gulu'e̱ ca naca da nape̱', da nunte̱ gawe̱'.
Айни замон обунашуда:
San Marcos 12: zat
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
© 1981, Wycliffe Bible Translators, Inc. All rights reserved.