San Lucas 20
20
Ca naca xel-la dxenná bea napa Jesús
(Mt. 21.23-27; Mr. 11.27-33)
1Tu zra gate zua Jesús chale'aj xudau' dxusé̱dene̱' benne' ca', ne dxuchálajle̱ne̱' le̱' ca naca dizra' chawe' chee̱ Dios, na' belezrín na' benne' xíchaje̱ ca' chee̱ bxruze ca', ne benne' ca' dxuluxuzájle̱'e̱ da nadxixruj bea na, ne benne' gula sina ca', 2na' gulé̱'e̱ Le̱':
―Gunná bi xel-la dxenná bea napu' dxunu' da caní. ¿Nuzra be̱nna lue' xel-la dxenná bea nigá?
3Na' gunná Jesús:
―Cá'anqueze neda' guche̱ba' le'e tu. Le xeche̱be chia'. 4¿Nuzra gusel-la Juan guchúe̱' bénneache nisa? ¿Dios che bénneache?
5Na' gulezú lawe̱' dxelé̱ ljwezre̱':
―¿Bizra nnadxu? Che nnadxu gusel-la Dios le̱', na' guche̱be̱' dxi'u: “¿Bizr chee̱ na' quebe guxéajle̱le chee̱'?” 6Che xe̱dxu Le̱', bénneache gulesel-le̱' le̱', benne' zaj zre̱'e̱ nigá wuluzríe̱' dxi'u xiaj, lawe' da zaj neze xánnie̱' bchalaj Juan waláz chee̱ Dios.
7Nadxa belexeche̱be̱' quebe zaj nézene̱' nu gusel-la Juan bchue̱' bénneache nisa. 8Na' Jesús guzre̱' benne' ca':
―Cá'anqueze neda' quebe xapa' le'e bi xel-la dxenná bea napa' dxuna' da caní.
Da dxulé'e na ca naca chee̱ benne' we̱n zrin cale̱la ca'
(Mt. 21.33-44; Mr. 12.1-11)
9Na' guzú lau Jesús dxuchálajle̱ne̱' benne' ca' zaj zre̱'e̱ na', dxuchálaje̱' da dxulé'e na, dxenné̱':
―Guzúa tu benne' bde̱'e̱ lba uva lu xe̱zr la xu chee̱', na' ca gudé na' bca'ane̱' na lu na' benne' we̱n zrin ca', na' guzé̱'e̱ na' zane' iza. 10Gate bzrin zra xuluchibe̱' uva ca', na' gusel-le̱' tu bi we̱n zrin chee̱' zeajxenábabe' tu cue' chee̱ lina na' da dxal-la' xezi'e̱, san benne' we̱n zrin ca' buluzálaje̱'-be', na' belexesel-le̱'-be' cá'aze. 11Nadxa xrane lina na' gusél-le̱' xetú bi we̱n zrin chee̱', na' cá'anqueze bi nigá bulucháchale̱ne̱-be', ne buluzálaje̱'-be', na' belexesel-le̱'-be' cá'aze. 12Xrane na' gusél-le̱' xetú bi we̱n zrin chee̱', na' benne' we̱n zrin ca', cá'anqueze belune̱'-be' zi', na' belexebéaje̱'-be' lu lina na'.
13’Naga xeajche'te̱ na, xrane na' gunné̱': “¿ájazra guna'? Sel-la' zri'ina' nazrí'ite̱ lazra'. Gate xelelé'ene̱'-be' nalja xelape̱'-be' ba lá'ana.” 14Na' gate benne' we̱n zrin ca' belelé'ene̱'-be', na' gulé̱ ljwezre̱': “Bi nigá xezí' lu na'be' da de̱ chee̱ xránadxu. Gútedxu-be', chee̱ gácadxu xrane na dxí'uqueze.” 15Nadxa belexebéaje̱'-be' lu xe̱zr la xu na', na' belutie̱'-be'.
Nadxa Jesús bche̱be̱' benne' ca':
―¿Bizra gun xrane na' chee̱ benne' we̱n zrin ca'? 16Xelé̱'e̱, na' gutie̱' benne' we̱n zrin ca', na' gudée̱' xe̱zr la xu na' lu na' benne' xula ca'.
Gate belén benne' ca' ca gunná Jesús, na' gulenné̱':
―Dios quebe gu'e̱ lataj gaca ca'.
17Na' Jesús gunné̱'e̱ benne' ca', na' gunné̱':
―¿Bizra zéaje̱ da naxúaj na lu xiche chee̱ Dios? Dxenné̱' caní:
Xiaj na' da buluzúa benne' we̱n xu'u ca' chalá'ala,
le̱ na' naca na xiaj blau.
18Nútete̱ze benne' cheajchazie̱' lawe' xiaj na', na' chúzrujqueze bénnea', na' che xiaj na' xexruj na lawe' nu benne', gútute̱ na le̱'.
Ca naca chee̱ da dxuchizruj xe̱zre zi'tu'
(Mt. 21.45-46; 22.15-22; Mr. 12.13-17)
19Benne' xíchaje̱ ca' chee̱ bxruze ca', ne benne' ca' dxuluxuzájle̱'e̱ da nadxixruj bea na gulaca lazre̱' xele̱le̱' Jesús zra ná'queze, lawe' da guleque bé'ene̱' bchalaj Jesús da dxulé'e na ca zaj naca le̱', san belezrebe̱' da xelún bénneache ca'. 20Nadxa gulesel-le̱' benne' ca' xuluzuzre̱' Jesús, benne' xululé'e cuine̱' ca benne' xrlátaje ca'. Benne' caní dxelaca lazre̱' xelebéaje̱' Jesús dizra' chee̱ xelezéquene̱' xuludée̱' Le̱' lu na' bénnea' dxenná be'e̱. 21Chee̱ xelune̱' da nigá, buluche̱be̱' Le̱':
―Benne' Wese̱de, nézentu' dxennáu', ne dxusé̱denu' da naca li lazre', ne quebe dxuchi'u chee̱ bénneache cáte̱ze dxululé'e cuine̱', san lu da li dxusé̱denu' da naca chee̱ Dios. 22Guzre netu', ¿naca na chawe' quízrujdxu da dxuchizruj César, bénnea' dxenná bé'ene̱' dute̱ xe̱zr la xu, che cabí?
23Dxeque be'e Jesús ca naca da dxelaca lazre̱' xelune̱' chee̱', na' guzre̱' benne' ca':
―¿Bizr chee̱ na' dxaca lázrele gun xálele neda'? 24Le gulé'e neda' tu dumí. ¿Nuzra lu'a na' da na nigá, ne nu la naxúaj nigá?
Benne' ca' belexeche̱be̱':
―Chee̱ benne' dxenná bea na'.
25Nadxa gunná Jesús:
―Le gunezruj bénnea' da naca chee̱', na' le gunezruj Dios da naca chee̱ Dios.
26Quebe gulezéquene̱' xelún xálene̱' Jesús ca naca da beche̱be̱' lau benne' ca'. Belexebánene̱' ca naca da beche̱be̱', na' gulezúa zrie̱'.
Ca gaca gate xelexebán benne' gate
(Mt. 22.23-33; Mr. 12.18-27)
27Ca gudé na' bal-la benne' xudau' saduceo ca' belezrine̱' lau Jesús. Benne' saduceo ca' dxeléquene̱' quebe xelexebán benne' gate, na' gulé̱'e̱ Jesús:
28―Benne' Wese̱de, Moisés bzúaje̱' chee̱ntu' che tu benne' gatie̱', ne gucá'ane̱' zru'ule̱', ne che quebe nu chilá' zrí'ine̱', na' bi biche bénnea' dxal-la' guchaga na'abe' nen nu'ula na' gute benne' chee̱' chee̱ galaj tu bidau' gácabe' ca zri'ine bénnea' ba gútee̱'. 29Gulezrá' gazre benne' gulaque̱' zri'ine tuze xre̱'. Bi nedxu bchaga na'abe' nen tu nu'ula, na' gútebe', quebe nu chilá' bi chee̱be'. 30Bi gudxupe' bchaga na'abe' nen nu'ula na', ne cá'anqueze gútebe' quebe nu chilá' bi chee̱be'. 31Nadxa bi guxunne' bchaga na'abe' nen nu'ula na', na' cá'anqueze belún bi ca' xezica, na' bi gazre ca' gulátebe' quebe nu chilá' bi chee̱be'. 32Naga xeajche'te̱ na, na' gute nu'ula na'. 33Gate xelexebán benne' gate, ¿nula bi ca' gaca zrú'ulabe' nu'ula na', lawe' da ca naca bi gazre ca' buluchaga na'abe' nen nu'ula na'?
34Nadxa beche̱be Jesús:
―Lu xe̱zr la xu nigá dxuluchaga na' benne' biu ca' nen nu'ula ca'. 35Na' benne' ca' naca chee̱' xelexexú'e̱ xe̱zr la xu da za za', ne chee̱ xelexebane̱' ládujla benne' gate, québedxa xuluchaga ne̱'e̱, ne québedxa xulunézruje̱' zrí'ine̱' lu xel-la wechaga na'. 36Ca'an gaca lawe' da quebe nu gátedxa na'. Xelaque̱' ca zaj naca gubáz chee̱ xabáa ca', ne xelaque̱' bi chee̱ Dios lawe' da belexebane̱'. 37Moisésqueze, gate bzuaje̱' ca guca chee̱ bisigá da guzúa na' xi', dxulé'ene̱' dxi'u dxal-la' xelexebán benne' gate. Naga naxúaj da nigá dxenná na ca naca chee̱ Dios, naque̱' Dios chee̱ Abraham, ne Dios chee̱ Isaac, ne Dios chee̱ Jacob. 38Dios quebe naque̱' Dios chee̱ benne' gate ca'. Naque̱' Dios chee̱ benne' ban ca', lawe' da lau Le̱' zaj naca ban xúgute̱ bénneache.
39Nadxa bal-la benne' ca', benne' dxuluxuzájle̱'e̱ da nadxixruj bea na gulé̱'e̱ Jesús:
―Cháwedau' dxennáu', Benne' Wese̱de.
40Québedxa belexázrjne̱' bi xuluche̱be̱' Jesús.
¿Nu benne' naca Cristo zrí'ine̱'?
(Mt. 22.41-46; Mr. 12.35-37)
41Jesús guzre̱' le̱':
―¿Bizr chee̱ na' dxennale le'e naca Cristo zri'ine David? 42Davídqueze gunné̱' lu xiche naga zaj naxúaj salmo ca':
Xránadxu Dios guzre̱' Xrana':
“Gudxé'e cuita' xabe̱la chia',
43Cadxa guzúa' benne' dxelecuídene̱' lue' ca' zran ni'u.”
44¿ájazra chee̱ na' naca Cristo zri'ine David, na' Davídqueze dxe̱'e̱ Le̱': “Xran”?
Jesús dxenné̱' chee̱ benne' ca' dxuluxuzájle̱'e̱ da nadxixruj bea na
(Mt. 23.1-36; Mr. 12.38-40; Lc. 11.37-54)
45Ca naca benne' ca' zaj zra' na' dxuluzé̱ nague̱' chee̱ Jesús gate guzre̱' benne' ca' dxusé̱dene̱':
46―Le guxúe xanne' cuínale chee̱ benne' ca' dxuluxuzájle̱'e̱ da nadxixruj bea na, lawe' da dxeledánene̱' dxeledé̱' zaj nacue̱' zre̱' tunna, ne dxelaca lazre̱' xelapa bénneache le̱' ba lá'ana lawe' xi'a ca', ne dxelebé'e̱ lu lataj blau ca' lu xu'u naga dxezrágale, ne lataj blau ca' naga dxelawe̱' zrue. 47Benne' caní dxelequé̱'e̱ ca naca lizre nu'ula ca' ba gulate benne' chee̱', na' chee̱ xulucá'ana cuine̱' xrlátaje lau bénneache ca' dxululawízraje̱' Dios da tunna lu xu'u ca' naga dxezrágale. Benne' caní xelezaca zídxaqueze̱'.
Айни замон обунашуда:
San Lucas 20: zat
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
© 1981, Wycliffe Bible Translators, Inc. All rights reserved.