San Juan 6
6
Jesús dxugawe̱' chi xun gaxúa benne' biu
(Mt. 14.13-21; Mr. 6.30-44; Lc. 9.10-17)
1Ca gudé na' guxíaj Jesús xecha la'a dxu'a nísadau' chee̱ Galilea, da nazíqueze le na nísadau' chee̱ Tiberias. 2Benne' zante̱ zjácale̱ne̱' Jesús lawe' da ba belelé'ene̱' xel-la' waca zren ca' da dxun Le̱', dxexune̱' benne' we̱' ca'. 3Nadxa Jesús guluéne̱' tu lu xi'a, na' gudxé'e̱ na' nen benne' ca' dxusé̱dene̱'. 4Ba zua gagu Laní Pascua chee̱ judío ca'. 5Gate ble'e Jesús benne' zan ca' zá'aque̱' zeaj nawe̱' Le̱', na' guzre̱' Felipe:
―¿Gazra cheajxridxu da xelagu benne' zan caní?
6Gunná caní Jesús chee̱ la' bi nna Felipe, lawe' da ba neze Jesús ca da gune̱'. 7Nadxa beche̱be Felipe:
―Che sidxu xeta xtila lazruj da sidxu chee̱ chupa gaxúa zra, quebe gueque na xelezí' benne' caní late' weaj.
8Nadxa Andrés, xetú benne' ca' dxuse̱de Jesús, ne naque̱' bi biche Simón Pedro, guzre̱' Jesús:
9―Ze̱ tu bi cuide' nigá nápabe' gazxu' xeta xtila zrua' cebada, ne chupa bela. ¿Ájazra gun da nigá gueque na chee̱ xúgute̱ benne' caní?
10Nadxa gunná Jesús:
―Le xe̱ xúgute̱' xelebé'e̱.
Naca lu daca lataj na', na' gulebé' ca du chi xun gaxúa benne' biu. 11Nadxa gucá'a Jesús xeta xtila ca', na' ca gudé guzre̱' Dios “Xcalenu'”, bnézruje̱' na benne' ca' dxusé̱dene̱', na' benne' caní gulísie̱' na láwele benne' zan ca' zaj dxe'e̱ na'. Cá'anqueze be̱n Jesús chee̱ bela ca', na' bnézruje̱' ca da gulaca lazre' benne' ca'. 12Gate gulélaje benne' ca', na' Jesús guzre̱' benne' ca' dxusé̱dene̱':
―Le xutupa da bízrujdu ca' da dxelexegá'ana na, chee̱ quebe bi gaca dítaje.
13Belexequé̱'e̱ na, na' buluzré̱'e̱ chazrinnu xcuite da bizruj ca' zaj nagá'ana na chee̱ da gazxu' xeta xtila zrua' cebada ca'. 14Nadxa benne' zan ca', gate belelé'ene̱' xel-la' waca zren nigá da be̱n Jesús, gulenné̱':
―Da li benne' nigá naque̱' bénnea' guchálaje̱' waláz chee̱ Dios, bénnea' dxal-la' le̱'e̱.
15Guque bé'ene̱' Jesús dxelaca lazre̱' xeleché̱'e̱ Le̱' xadía chee̱ xuluzúe̱' Le̱' ca benne' wenná bea, na' bezé̱'e̱ na', ne begüéne̱' lu xi'a sibe na' chee̱ sue̱' le̱ze̱'.
Jesús dxedé̱' lawe' nísadau'
(Mt. 14.22-27; Mr. 6.45-52)
16Gate ba za xrinne, benne' ca' dxuse̱de Jesús belétaje̱' dxu'a nísadau', 17na' gulu'e̱ lu da dxedá lawe' nísadau', ne gulezú lawe̱' zjaque̱' xeledée̱' xechalá'a nísadau' chee̱ xelezrine̱' xe̱zre Capernaum. Ca guxrinne, quebe ne xezrín Jesús na'. 18Nadxa guzú lau dxaca tu be' bdunu' lawe' nísadau' na', na' xeajxruza chee̱ nísadau' na' guxásale̱'e̱ na. 19Gate ba guledée̱' lu nísadau' na' catite sadxu tu chi'i zren, na' belelé'ene̱' Jesús ba dxezrine̱' naga ziaj da dxedá lawe' nísadau', dxezé̱'e̱ lawe' nísadau', na' belezrebe̱'. 20Nadxa Jesús guzre̱' benne' ca':
―Neda' na'. Quebe zrébele.
21Nadxa lu dute̱ xel-la' dxelebé gulezí' lu ne̱'e̱ Le̱' lu da dxedá lawe' nísadau' na', na' chadite̱ belezrine̱' lu xe̱zr la xu naga zjaque̱'.
Benne' zan ca' dxelexílaje̱' Jesús
22Zra xula benne' zan ca', benne' belexegá'ana xecha la'a nísadau', guleque bé'ene̱' ba zeajxaca benne' ca' dxuse̱de Jesús lu da dxedá lawe' nísadau' tu licha' da dxe' chalá'a na', na' Jesús quebe guxíajle̱ne̱' benne' ca'. 23Dxácate̱ na' xezícala da dxeledá lawe' nísadau', da ca' beledxúaj na xe̱zre Tiberias, belezrín na tu lataj da zua gáguze naga gulawe̱' xeta xtila na' ca gudé guzre Xránadxu Dios: “Xcalenu'.” 24Chee̱ le̱ na' gate benne' zan ca' guleque bé'ene̱' québedxa zua Jesús na', ne cá'anqueze benne' ca' dxusé̱dene̱', na' gulu'e̱ lu da dxeledá lawe' nísadau', ne xjaque̱' xe̱zre Capernaum zeajlexedílaje̱' Jesús.
Jesús naque̱' xeta xtila da dxunna na xel-la' nabán li lazre'
25Gate benne' zan ca' belezrine̱' xecha la'a dxu'a nísadau', na' belexezrague̱' Jesús, ne buluche̱be̱' Le̱':
―Benne' Wese̱de, ¿bata bla'u nigá?
26Jesús guzre̱' benne' ca':
―Da li dxapa' le'e, dxexílajle le'e neda' lawe' da gudágule, ne béljele, ne quegá lawe' da ble'ele xel-la' waca ca' da ble'eda' le'e. 27Quebe cue'le gunne xue sile da gágule da te chee̱ na. Le cue' gunne xue sile da gágule da zeajlí canna, da na' gunna na le'e xel-la' nabán da zeajlí canna. Da nigá naca na xel-la' wagu da gunna' neda', Benne' Gulje̱' Bénneache, le'e, lawe' da bzua Xra' Dios nen neda' da dxunna bea na naca' Zrí'ine̱'.
28Nadxa buluche̱be̱' Le̱':
―¿Bi dxal-la' guntu' chee̱ gaca ca da dxaca lazre' Dios guntu'?
29Jesús beche̱be̱':
―Da dxaca lazre' Dios gunle naca na chéajle̱le chia' neda', naca' Bénnea' gusel-la Dios.
30Nadxa buluche̱be̱' Le̱':
―¿Bizra xel-la' waca gunu' chee̱ le'entu' na, na' chéajle̱ntu chiu'? ¿Bizra dxunu'? 31Xra xrtauntu' ca' gulawe̱' xeta maná le̱'e̱ xixre' lawe' lataj, ca naxúaj na lu xiche chee̱ Dios, dxenná na: Dios bgawe̱' benne' ca' xeta xtila da za xabáa.
32Beche̱be Jesús:
―Da li dxapa' le'e, quegá Moisés na' bnézruje̱' benne' ca' xeta xtila da za xabáa. Dios, Xra', dxunne̱' le'e xeta xtila da za xabáa da naca na li lazre'. 33Xeta xtila na' da dxunna Dios le'e naca na Bénnea' bétaje̱' xabáa, ne dxunézruje̱' chee̱ bénneache xel-la' nabán li lazre'.
34Nadxa benne' ca' gulé̱'e̱ Le̱':
―Xran, tu bé̱nnazqueze chee̱ntu' xeta xtila caní.
35Jesús guzre̱' benne' ca':
―Neda' naca' xeta xtila da dxunna na xel-la' nabán li lazre'. Benne' xide̱' naga zua' neda' cabátadxa tune̱', na' benne' chéajle̱'e̱ chia' cabátadxa bílene̱'. 36Naca na ca ba gucha' le'e. Le'e na' quebe dxéajle̱le chia', lácala ba ble'ele neda'. 37Xúgute̱ benne' ca' dxunna Xra' neda', xelelé̱'e̱ lawa', na' benne' ca' xelelé̱'e̱ naga zua', quebe guzúa' benne' ca' chalá'ala. 38Neda' guzá'a xabáa, quegá chee̱ guna' ca dxaca lázrequeza' neda'. Bla'a chee̱ guna' ca da dxaca lazre' Xra', gusel-le̱' neda'. 39Da dxaca lazre' Xra', nasel-le̱' neda', naca na chee̱ quebe gunitia' netú benne' ca' ba be̱nne̱' chia'. Nacan chee̱ gusebana' benne' ca' lu zra bze̱be. 40Da dxaca lazre' Xra', nasel-le̱' neda', naca na chee̱ xelapa bénneache xel-la' nabán da zeajlí canna, xúgute̱ benne' ca' xelenné̱'e̱ neda', Zri'ine Dios, ne xeléajle̱'e̱ chia' neda', na' chee̱ gusebana' neda' benne' ca' lu zra bze̱be na'.
41Gate belenne̱' da nigá, na' judío ca' gulezú lawe̱' dxelezí tizre̱' Jesús lawe' da gunné̱': “Neda' naca' xeta xtila da betaj xabáa.” 42Nadxa gulenné̱':
―¿Quegá benne' nigá zri'ine José? Dxi'u núnbeadxu xra xrne̱'e̱. ¿Bizr chee̱ na' dxenné̱' bétaje̱' xabáa?
43Nadxa Jesús guzre̱' benne' ca':
―Québedxa si tízrale. 44Quebe nu benne' gaca xide̱' naga zua' neda', che quebe xedajgúa Xra' nasel-le̱' neda' bénnea', na' neda' gusebana' bénnea' lu zra bze̱be na'. 45Lu xiche ca' naga naxúaj da gulenná benne' ca' buluchalaje̱' waláz chee̱ Dios, dxenná na: Dios gusé̱dene̱' xúgute̱ bénneache. Ca' gaca na, xúgute̱ benne' ca' dxuluzé̱ nague̱' ca da dxuse̱de Xra', dxelelé̱'e̱ naga zua'.
46’Quebe ne le'e nu benne' Xra'. Benne' tu licha', bénnea' blé'ene̱' Le̱', naca bénnea' guzé̱'e̱ naga zua Dios. 47Da li dxapa' le'e, nu benne' dxéajle̱'e̱ chia' neda' nape̱' xel-la' nabán da zeajlí canna. 48Neda' naca' xeta xtila da dxunna na xel-la' nabán li lazre'. 49Xra xrtáule ca' gulawe̱' xeta maná le̱'e̱ xixre' lawe' lataj, na' gudé na' xúgute̱ benne' ca' gulatie̱'. 50Xeta xtila nigá naca na da za xabáa, na' che nu benne' gawe̱' na, quebe gatie̱' tu chi'ize. 51Néda'queza' naca' xeta xtila da dxunna na xel-la' nabán da za xabáa. Benne' gawe̱' xeta xtila nigá waca bánqueze̱' chadía chacanna. Xeta xtila na' da dxunna' neda' naca na be̱la' dxen cheé̱zqueza', da gunna' chee̱ xelaca bánqueze bénneache.
52Nadxa benne' judío ca' gulezú lawe̱' dxuluche̱be ljwezre̱', dxelenné̱':
―¿Ájazra gun benne' nigá, gunne̱' dxi'u be̱la' dxen cheé̱zqueze̱' chee̱ gágudxu na?
53Jesús guzre̱' benne' ca':
―Da li dxapa' le'e, che le'e quebe gágule be̱la' dxen chia' neda', Benne' Gulje̱' Bénneache, ne che quebe xí'ajle dxen chia', quebe gápale xel-la' nabán li lazre'. 54Benne' dxawe̱' be̱la' dxen chia', ne dxí'aje̱' dxen chia' nape̱' xel-la' nabán da zeajlí canna, na' neda' gusebana' bénnea' lu zra bze̱be na'. 55Be̱la' dxen chia' naca na xel-la' wagu li lazre' chee̱ bénne'du xu'ule, na' dxen chia' naca na da xele'aj bénneache da naca na li lazre'. 56Benne' dxawe̱' be̱la' dxen chia', ne dxí'aje̱' dxen chia', naque̱' neda' tuze, na' néda'queza' naca' bénnea' tuze. 57Xra' nasel-le̱' neda' xu'u lu ne̱'e̱ xel-la' nabán li lazre', na' neda' naca bana' ne̱ chee̱ Le̱'. Cá'anqueze bénnea' dxawe̱' da naca chia' neda' gaca bánqueze̱' ne̱ chia' neda'. 58Da nigá naca na xeta xtila da za xabáa. Xeta xtila nigá quebe naca na ca xeta maná da gulagu xra xrtáule ca', na' gudé na' gulate xúgute̱'. Benne' dxawe̱' xeta xtila nigá waca bánqueze̱' chadía chacanna.
59Bse̱de Jesús ca naca da caní naga zaj zra' benne' zan ca' lu xu'u naga dxelezraga bénneache chee̱ xe̱zre Capernaum.
Ca naca dizra' na' da dxunna na xel-la' nabán da zeajlí canna
60Gate belén benne' zan ca' da nigá dxuse̱de Jesús, na' benne' ca' zjácale̱ Jesús gulenné̱':
―Dizra' caní dxenná Jesús zaj nácale̱'e̱ na ste̱be sidxu. ¿Nuzra gaca gun caní?
61Guque bé'ene̱' Jesús dxelenné̱' chee̱ xrtizre̱', na' bche̱be̱' benne' ca':
―¿Dxuzúa dizra' nigá le'e ste̱be? 62¿Ájazra gunle checa' lé'ele neda', Benne' Gulje̱' Bénneache, xegüéna' xabáa naga zua' nédxute̱? 63Be' naca na da dxunna xel-la' nabán li lazre'. Da naca na be̱la' dxen quebe bi zaca na. Dizra' ca' da ba gucha' le'e zaj naca na chee̱ Be', ne zaj naca na da dxelunna na xel-la' nabán li lazre'. 64Bál-lale le'e quebe dxéajle̱le chia'.
Caní gunná Jesús lawe' da nézene̱' nédxudaute̱ nu benne' ca' quebe dxeléajle̱'e̱ chee̱', ne nua' gudé Le̱' lu na' benne' guledábague̱' Le̱'. 65Nadxa gunná Jesús:
―Chee̱ le̱ na' gucha' le'e, quebe nu benne' gaca xide̱' naga zua' neda' che quebe xedajgúa Xra' bénnea'.
66Lu zra ná'queze benne' zan ca', benne' xjácale̱ne̱' Jesús, québedxa xjácale̱ne̱' Le̱'. 67Nadxa Jesús bche̱be̱' benne' chazrinnu ca' dxusé̱dene̱', gunné̱':
―¿Cá'anqueze le'e dxaca lázrele xexíajle?
68Beche̱be Simón Pedro:
―Xran, ¿nuzra chéajle̱ntu'? Dizra' chiu' naca na da dxunna na xel-la' nabán da zeajlí canna. 69Netu' dxéajle̱ntu' chiu', ne nézentu' nacu' Cristo, Zri'ine Dios ban.
70Jesús beche̱be̱':
―Neda' gucá'a le'e, benne' chazrinnu, na' tu benne' ládujla le'e xu'e̱ da xriwe̱'.
71Da nigá gunná Jesús, bchálaje̱' ca naca chee̱ Judas Iscariote, zri'ine tu benne' le̱' Simón, lawe' da gudé Judas nigá Jesús lu na' benne' guledábague̱' Le̱'. Naque̱' tu benne' chazrinnu ca' dxuse̱de Jesús.
Айни замон обунашуда:
San Juan 6: zat
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
© 1981, Wycliffe Bible Translators, Inc. All rights reserved.