San Juan 2
2
Dxaca laní chee̱ wechaga na' lu xe̱zre Caná
1Zra guxunne zra, na' guca laní chee̱ wechaga na' lu xe̱zre Caná da nababa Galilea. Xrna Jesús zue̱' na', 2na' zua nu gunné̱ Jesús, ne benne' ca' dxusé̱dene̱' lu laní na'. 3Bebizre xrise uva wal-la, na' xrna Jesús guzre̱' Le̱':
―Québedxa bi de̱ xrise uva wal-la xelé'aje̱'.
4Jesús beche̱be̱':
―Nú'uladau', ¿bizr chee̱ na' dxu'u neda' caní? Quebe ne zrin zra gulé'e lau da naca'.
5Xrne̱'e̱ guzre̱' benne' we̱n zrin ca':
―Le gun ca naca da xe̱'e̱ le'e.
6Zaj nnita xrupa xesu' xiaj na', da dxuluchine judío ca' gate dxelibe ni'a ne̱'e̱ ca naca da zjácale̱ne̱'. Tu tu xesu' xiaj ca' dxeluzru na chupa u chunna dxe'e nisa. 7Jesús guzre̱' benne' we̱n zrin ca':
―Le gusezrá nisa xesu' xiaj caní.
Gulegué̱'e̱ nisa na, ne bulusuzrate̱' tu tu xesu' xiaj ca'. 8Nadxa Jesús guzre̱' benne' ca':
―Le ca'a na, na'a, ne le gua na lau benne' ze̱' dxu'a ga dxelawe̱'.
Ca'an belune̱'. 9Bénnea' zue̱' dxu'a ga dxelawe̱' bxue̱' nisa na' da bexaca na xrise uva wal-la, ne quebe nézene̱' ga za na. Benne' we̱n zrin ca' zaj nézene̱' ga za na lawe' da gulegué̱'e̱ nisa na'. Nadxa bénnea' zue̱' dxu'a ga dxelawe̱' gunné̱' benne' wechaga na', 10na' guzre̱' le̱':
―Xúgute̱ benne' dxelebéaje̱' nedxu xrise uva wal-la nácadxa chawe', na' gate ba gulé'ajle̱'e̱ benne' ca' zaj zre̱'e̱ laní, nadxa dxelebéaje̱' xrise uva wal-la quebe zúateca chawe'. Lue' bcuézaquezu' xrise uva wal-la chawe' na', ne guléaju' na na'a.
11Da nigá da be̱n Jesús lu xe̱zre Caná da nababa Galilea naca na tu xel-la' waca zrente̱ da be̱ne̱' nedxu, da ble'e na xel-la' szren chee̱', na' benne' ca' dxusé̱dene̱' guléajle̱'e̱ chee̱'.
12Gudé na' Jesús bezé̱'e̱ zexíaje̱' xe̱zre Capernaum, zéajle̱ xrne̱'e̱ Le̱' nen benne' biche̱' ca', ne benne' ca' dxusé̱dene̱'. Na' gulezúe̱' na' zane' zra.
Jesús dxucá'ana chawe̱' chale'aj xudau'
(Mt. 21.12-13; Mr. 11.15-18; Lc. 19.45-46)
13Na' Jesús guxíaje̱' xe̱zre Jerusalén lawe' da ba za Laní Pascua gate benne' judío ca' dxulusá lazre̱' ca be̱n Dios, bebéaje̱' xra xrtawe̱' ca' lu xe̱zr la xu Egipto. 14Lu xe̱zre Jerusalén blé'ene̱' lu chale'aj xudau' na' zaj zra' benne' dxelexutie̱' be̱zre ca', ne zrila' ca', ne bgúgudu ca', béadu ca' dxelutie̱' lau Dios. Cá'anqueze blé'ene̱' na' benne' dxuluxuché̱'e̱ dumí chee̱ xe̱zr zitu' ca'. 15Gate ble'e Jesús da caní, na' bgu'e̱ du ca' da güe̱'e̱ benne' ca', na' bebéaje̱' ca naca benne' ca' tu zrente̱ nen be̱zre chee̱' ca', ne zrila' chee̱' ca'. Na' gudxú'une̱' lu xula dumí chee̱ benne' ca' dxuluxuché̱'e̱ dumí, ne bdxixre̱' blaga' ca' chee̱ benne' ca'. 16Na' guzre̱' benne' ca' dxelexutie̱' bgúgudu ca':
―¡Le xebéaj da caní! Quebe gunle lizre Xra' ca tu lawe' xi'a.
17Nadxa benne' ca' dxuse̱de Jesús xeajlesá lazre̱' da naxúaj na lu xiche chee̱ Dios, da dxenná na: Dxácate̱ zi' lázrdawa' lawe' da dxé'le̱'a gunne xue chee̱ lizru'.
18Nadxa judío blau ca' buluche̱be̱' Jesús:
―¿Bi xel-la' waca da za xabáa gulé'enu' netu' da gulé'e na napu' xel-la' dxenná bea dxunu' da caní?
19Beche̱be Jesús:
―Le guzría xi' xudau' nigá, na' neda', te chunna zra xechisa' na.
20Nadxa judío ca' gulé̱'e̱ Le̱':
―Xrupe xun iza ba zeaj dxelune̱' xudau' nigá, na' Lue', ¿xechisu' na chunna zraze?
21Bchalaj Jesús chee̱ xudau' na' da naca na be̱l-la' dxen chee̱'. 22Chee̱ le̱ na', gate bebán Jesús ládujla benne' gate, na' benne' ca' bsé̱dene̱' xeajlesá lazre̱' ca da gunné̱', na' guléajle̱'e̱ chee̱ da naxúaj na lu xiche chee̱ Dios ca naca chee̱ Jesús, ne chee̱ da guzre Jesús le̱'.
Jesús núnbe'e̱ xúgute̱ bénneache
23Gate zua Jesús xe̱zre Jerusalén lu Laní Pascua chee̱ judío ca', na' benne' zan guléajle̱'e̱ chee̱' gate belelé'ene̱' ca naca xel-la' waca zren ca' da dxune̱'. 24Jesús quebe bde cuine̱' lu na' benne' ca' lawe' da nézquezne̱' quegá xúgute̱ benne' ca' dxeléajle̱'e̱ chee̱'. 25Quebe guchínene̱' nu benne' xe̱'e̱ Le̱' ca zaj naca bénneache lawe' da nézquezne̱' ca da zaj xu'u xichaj lázxdau bénneache.
Айни замон обунашуда:
San Juan 2: zat
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
© 1981, Wycliffe Bible Translators, Inc. All rights reserved.