San Mateo 13
13
Jempl c̱he beṉe' goz trigon'
(Mr. 4:1-9; Lc. 8:4-8)
1Na' ḻo žana' gwza' Jesúsen' yo'o gan' zoen' jac̱hi'e cho'a nisdaon'. 2Nach catec beṉe' zan juisyw besedobe' gan' chi'en' na' benten byen gwyo'e gwchi'e to ḻo' barcw. Na' yogo' beṉe' ca' besedoben' gosenite' cho'a nisdaon' ga nac yo biž. 3Nach da' zan da' bsed blo'e Jesúsen' ḻegaque' len jempl da' bi'e. Na' be'e to jempl, gwne':
―To beṉe' güen žin jeze' trigw, 4na' šlac zej chose' trigon' late' biṉ c̱he trigw dan' chazen' jasechazen chanez, nach be ca' žia x̱il be chaš ḻe'e yaba gosagwban'. 5Yelaten' jasechazen ga nac ḻo yej ga bibi yotec zoa, na' da' nga byob blan' ḻe bi jasechazen ga nac sitjw. 6Perw na' cate' bla' gwbiža' na' bzeyen ḻen na' gosebižen, ḻe gague zjayo'otec loenṉa' sitjw. 7Yelaten' jasechazen ga nac ḻo yag yeše', na' yag yešen' gosecha'on na' bosoḻoḻen ḻen. 8Perw na' yelaten' jasechazen ga nac yo šagüe' na' beselan'. Na' baḻen' gosebian to gayoa güeje to ton, na' yebaḻen gosebian gayon güeje, na' yebaḻen šichoa güeje. 9Le'e žia nagle da' chene, ḻe gwzenag xtižan'.
Jesúsen' be'e diža' bixc̱hen' bzejni'ide' beṉe' jempl
(Mr. 4:10-12; Lc. 8:9-10)
10Nach beṉe' ca' zjanaque' Jesúsen' txen gosebigue' lagüen', na' gose'ene':
―¿Bixc̱hen' chsed chlo'edo' beṉe' quinga len jempl?
11Na' gož Jesúsen' ḻegaque':
―Nono ṉa' ṉeze can' nac yeḻa' gwnabia' c̱he Diosen', na' ba chone' cont le'e chejnilaže'lene' ṉezelen. Perw bi chon Diosen' ca' len beṉe' bi chesaclaže' yesejnilaže'ne'. 12Note'teze beṉe' chosozenague' xtiža' Diosen', gwzejni'ich Diosen' ḻegaque' cont šanch dan' yesejni'ide'. Perw na' note'teze beṉe' bi chosozenague', da' daon' ba zjaṉezde', yeca'a Diosen' ḻen. 13Da'nan' chsed chlo'eda' beṉe' quinga len jemplen', ḻe chesele'ede' dan' chona' perw bitw chesacbe'ede' bi zejen, na' chesende' xtižan' perw bitw chesejni'iden'. 14Len beṉe' quinga ba chac can' bzoj da' Isaías, žan:
Da' ḻi yenele, perw bitw šejni'ile bi zeje dan' yenelen'.
Na' da' ḻi le'ele, perw bi gacbe'ele bi zejen dan' le'elen'.
15Nacle beṉe' güedenag na' bac̱h natcze yic̱hjlažda'olen'.
Bi chazlaže'le gwzenagle dan' chenele na' dan' chle'ele;
con nacle beṉe' güedenag.
Šaca' bi nacle beṉe' güedenag, šejni'ile bi zejen dan' chenele na' dan' chle'ele.
Nach yetiṉjele xtoḻa'le cont yeca'an na' yocoba' yic̱hjlažda'olen'.
16’Perw le'e nacle neda' txen, ḻeca mbalaz zoale dan' chle'ele da' ca' chona' na' chacbe'ele bi zejen, na' chzenagle xtižan' na' chejni'ilen. 17Da' ḻi žia' le'e, zan da' beṉe' ca' gosoe' xtiža' Diosen' cani' na' zan da' beṉe' ca' yezica'chle beṉe' bosozenag c̱he Diosen' cani', gosaclaže'chgüe' yesele'ede' dan' chle'ele ṉa'a, perw bitw goḻa' yesele'eden'. Na' gosaclaže'chgüe' yesende' dan' chenele ṉa'a, perw bitw goḻa' yesenden'.
Jesúsen' bzejni'ide' bi zejen jempl c̱he ben' goz trigon'
(Mr. 4:13-20; Lc. 8:11-15)
18’Na' ḻe gwzenag, quinga zejen jempl c̱he ben' goz trigon'. 19Ca dan' byažen zejen xtiža' Dios da' chzejni'i c̱he yeḻa' gwnabia' c̱he'. Na' biṉ dan' beselažo' chanezen', zejen beṉe' ca' chesende' xtiža' Diosen' perw bi chesejni'iden'. Na' ca cheyoža' chžin gwxiyen' chebejen xtiža' Diosen' ḻo' yic̱hjlažda'ogaquen'. 20Na' biṉ dan' beselažo' ga nac ḻo yej na' bi ben loen, zjanaquen ca beṉe' ḻa' chesyebetede' xtiža' Diosen' cate' chesenden', 21perw zjanaque' ca da' bibi loe chontec, šložga chesejḻe'e c̱he xtiža' Diosen', na' cate' chac bi da' mal c̱hegaquen' o cate' chesegue'e beṉe' ḻegaque' dan' chosozenague' xtiža' Diosen', ḻa' chesebejyic̱hjte' xtižen'. 22Na' biṉ dan' beselažon' ga nac ḻo yag yeše', zejen ca beṉe' ca' ba zjanende' xtiža' Diosen', perw šlac zjambane' chesyelaḻ chesyežejde' na' da' chesaclaže' yeseṉi'e chziye'en ḻegaque'. Yogo' da' qui bi choen' latje yega'aṉ xtiža' Diosen' ḻo' yic̱hjlažda'ogüen', na' da'nan' bi chesejnilaže' ḻe' ca cheyaḻa'. 23Na' biṉ dan' beselažo' ḻo yo šagüe' zejen ca beṉe' chesende' xtiža' Diosen' na' chesejni'iden' na' chosozenaguen'. Baḻen gosebian to gayoa güeje, na' yebaḻen gosebian gayon güeje, na' yebaḻen šichoa güeje.
Jempl c̱he trigon' na' yix̱e'
24Na' gozoe'len Jesúsen' beṉe' ca' yeto jempl, goze'e ḻegaque':
―Yeḻa' gwnabia' c̱he Diosen' ben' zoa yaban' zaca'leben ca dan' goquen' cate' to beṉe' jeze' trigw ḻo yežlio c̱he'na'. 25Na' do šeže'le gwyej to beṉe' chgue'e ḻe' šlac chesetas beṉe' ca' yezica'chle na' jeze' xsa yix̱e' gan' ba naz x̱an yežlion' trigon', nach beze'e. 26Na' to ši'ize trigon' len yix̱e' ca' beselan', na' trigon' gwzolao chbian. 27Na' beṉe' güen žin c̱he x̱an yežlion', cate' gosacbe'ede' nach jaya'aque' gan' zoa x̱angaque' jasyeyeže'ne': “Beṉe', ¿gague biṉ trigon' goz yežlio c̱hion'? ¿Bixc̱hen' nc̱hix̱en len yix̱e'?” 28Nach x̱angaquen' gože' ḻegaque': “To beṉe' chgue'e neda' jen ca'.” Nach xmosen' gose'ene': “¿Che'ndo' ḻažo'to' yix̱en'?” 29Na' gože' ḻegaque': “Bitw ḻažo'len. Ḻe xož ḻažo'le lente trigon'. 30Jaseyenṉa'. Guac yesecha'on txen. Na' cate' ba goḻe' yotoble cosešen', cana' gona' mandadw zgua'tec ḻažo'le yix̱en' na' gonḻen manoj cont yeseyen. Nach šjaytoble trigon' co'ošagüe'len.”
Yeḻa' gwnabia' c̱he Diosen' naquen ca biṉ c̱he xomdas
(Mr. 4:30-32; Lc. 13:18-19)
31Nach gozo'e yeto jempl, gozne':
―Šanch beṉe' yosozenag c̱he Diosen' cont ṉabi'e yic̱hjlažda'ogaque'. Da'nan' yeḻa' gwnabia' c̱he Diosen' ben' zoa yaban' zaca'leben ca to biṉ c̱he xomdas dan' goz to beṉe' yežlio c̱hen'. 32Biṉ c̱he xomdasen' chnabia' nac da' dao' len biṉ ca' chazcho. Perw na' cate' chlan' chcha'ochen ca bichle yix̱e' cuan na' chaquen ca to yag cha'o, nach byiṉ dao' ca' chjasen ližda'ogacba' ḻo xozenṉa'.
Yeḻa' gwnabia' c̱he Diosen' naquen ca levadura
(Lc. 13:20-21)
33Nach gozoe' Jesúsen' yeto jempl, gozne':
―Yeḻa' gwnabia' c̱he Diosen' ben' zoa yaban' zaca'leben ca levadura dan' gwlec no'olen' len to rob yezj cont gwcha'o doxenen.
Jesúsen' bzejni'ide' beṉe' len jempl
(Mr. 4:33-34)
34Yogo' da' quinga bsed blo'e Jesúsen' beṉe' ca' besežag gan' zoe'na'. Bsed blo'ede' ḻegaque' be'e jempl, bitwbi bzejni'ide' ḻegaque' sin ca be'e jempl. 35Bene' ca' cont goc can' bzoj da' beṉe' be' xtiža' Diosen' cani', žan:
Gwsed gwlo'egacda'ne' len jempl,
na' yapegaca'ne' dan' nono ṉa' ṉeze da' ba ngaše' cate' gwxete yežlion'.
Jesúsen' bzejni'ide' bi zeje jempl c̱he trigon' na' yix̱e'
36Nach beyož bsed blo'e Jesúsen' beṉe' ca' zjaže' na', beze'e txen len beṉe' ca' zjanaque' ḻe' txen jaya'aque' yo'o gan' nite'na'. Na' cate' ba besyeyo'e ḻo' yo'on' beṉe' ca' zjanaque' ḻe' txen gosebigue' cuite'na' gose'ene':
―Bzejni'išque neto' bi zejen jempl c̱he trigon' na' yix̱en'.
37Nach Jesúsen' gože' ḻegaque':
―Quinga zejen: Diosen' gwseḻe' neda' golja' beṉac̱h na' zaca'lebda' ca ben' goze' biṉ c̱he trigon'. 38Na' doxen yežlio nga zaca'leben ca pedas yežlio gan' goze' trigon'. Na' beṉe' ca' chosozenague' c̱he Diosen' cont ṉabi'e yic̱hjlažda'ogaque' zaca'lebde' ca biṉ c̱he trigon'. Na' beṉe' ca' chosozenague' c̱he Satanás dan' chnabia' da' x̱igüe' ca' zjazaca'lebde' ca xsa yix̱en'. 39Satanásen' zaca'leben ca beṉe' chxi'a ben' goze' xsa yix̱en'. Na' žan' gac juisyw zaca'leben ca žan' yosyotobe' trigon'. Na' angl ca' zaca'lebegaque' ca beṉe' ca' yosyotobe' cosešen'. 40Na' can' šey yix̱en' yosyotoben', can' gac c̱he beṉe' ca' chosozenag c̱he Satanásen' cate' žin ža gac juisyon'. 41Diosen' gwseḻe' neda' golja' beṉac̱h na' cate' žin ža, neda' seḻa' angl c̱hia' ca' cont yosyotobe' yogo' beṉe' ca' chesego'oyeḻe' beṉe' yoble yesone' da' mal na' ḻecze yosyotobe' yezica'chle beṉe' cheson da' mal. Na' angl ca' yesyebeje' ḻegaque' cont bich yesenite' txen len beṉe' ca' chosozenague' c̱he Diosen' cont ṉabi'e yic̱hjlažda'ogaquen'. 42Nach yesyeseḻe' ḻegaque' ḻo yi' gabiḻ gan' yeseye' toḻi tocaṉe. Na' yesebežyaše' yesagwxejte ḻaye' tantw yesežaglaochgüe'. 43Cana'ch X̱acho Diosen' gone' cont beṉe' ca' cheson da' güen ṉite' len ḻe', ḻe zjanaque' xi'iṉe' na' yesaque' ca be'ni' c̱he gwbižen' cate' yesežine' yaban' gan' zoa Diosen' chnabi'e. Le'e žia nagle da' chene, ḻe gwzenag xtiža'na'.
Jempl c̱he mechw xen dan' ngaše' ḻo' yo
44’Yeḻa' gwnabia' c̱he Diosen' ben' zoa yaban' naquen ca to mechw xen dan' ngaše' ḻo' yo. To beṉe' bželde' mechw xen da' ngaše' to ḻo' yežlio. Nach bocuašen' da' yoble ḻecze na'ze na' chebechgüede' beze'e jayete' yogo'ḻoḻ bi da' de c̱he' cont gwxi'e yežlion' gan' ngaše' mechua'.
Jempl c̱he to perla da' zaca'chgua
45’Na' yeḻa' gwnabia' c̱he Diosen' ben' zoa yaban', ḻecze zaca'leben ca da' nga goc. Zoa to comerciant beṉe' cha'o perla dan' zjanacchgua xdan. 46Na' bželde' to perla da' ḻeca zacan'. Na' beyote' yogo'ḻoḻ bi da' de c̱he' na' gwxi'e perlan'. Ca'czen' zaca'lebe beṉe' ca' chesacbe'e zaca'chguan yosozenague' c̱he Diosen'.
Jempl c̱he yix̱jw beḻ
47’Na' yeḻa' gwnabia' c̱he Diosen' ben' zoa yaban' zaca'leben ca da' nga goc. Gwnita' baḻ beṉe' gwxen beḻ na' bosozaḻe' yix̱jw beḻ c̱hegaquen' ḻo' nisdaon' na' gwxenen zan cuen beḻ. 48Nach cate' ba gwža' ḻo' yix̱jon', besyebejen' yo biž, na' gosebie' be ca' zjanac güen par yesagüe' na' gosegüe'eba' ḻo' žome. Na' be ca' bi zjanac güen, gosecho'oṉe'ba'. 49Ca'czen gac c̱he yogo' beṉe' cate' žin ža te c̱he yežlion'. Angl ca' yesebeje' beṉe' mal ca' ladjo beṉe' ca' zjanaque' beṉe' güen lao Diosen' 50na' yosozaḻe' ḻegaque' ḻo yi' gabiḻ gan' yesebežyaše' na' yesagwxejte ḻaye' dan' ḻeca yesežaglagüe'.
Xtiža' Diosen' dan' byoj cani' len da' chsed chlo'e Jesúsen'
51Nach Jesúsen' gože' beṉe' ca' zjanaque' ḻe' txen:
―¿Zyejni'ile yogo' da' ca' ba blo'eda' le'e?
Nach gose'ene':
―Zyejni'iton'.
52Nach gož Jesúsen' ḻegaque':
―Note'tezle še chac chsed chlo'ele Xtiža' Diosen' dan' byoj cani', še ḻecze chzenagle can' chsed chlo'eda' c̱he yeḻa' gwnabia' c̱he Diosen', nachen' zaca'leble ca to x̱an yo'o beṉe' nape' yogo'ḻoḻ da' zaca' dan' chyažj chc̱hinde', baḻen zjanaquen da' cobe na' baḻen zjanquen da' gole.
Beṉe' yež Narzaret bi gosejḻe'e c̱he Jesúsen'
(Mr. 6:1-6; Lc. 4:16-30)
53Nach cate' beyož be' Jesúsen' jempl ca', beze'e latjen' len beṉe' ca' zjanaque' ḻe' txen 54jaya'aque' laže'. Na' jaysed jaylo'ede' beṉe' gualaž c̱he' ca' ḻo' yodao' c̱hegaquen'. Na' ḻeca besyebande' len xtižen' na' gose' ḻježe':
―¿Ga jasede' yeḻa' sina'? na' ¿nacxec̱hen' chac chone' yeḻa' guac ca'? 55Nombia'chone', ḻe naque' xi'iṉ ben' chonšagüe' yag. Na' xṉe'ena' lie' María, na' Jacobo, José, Simón na' Judas zjanaque' beṉe' biše'. 56Na' ḻecze beṉe' zane' ca' nite' lažcho nga. ¿Nacxe chaquen' cho'e diža' ca' na' chacte' chone' yeḻa' guac?
57Na' dan' gosone' xbab nac Jesúsen' con to beṉe' gualaž c̱hegaque', bi gosaclaže' yesejḻe'e c̱he'. Na' gož Jesúsen' ḻegaque':
―Yogo'ze beṉe' chonḻa'aṉe' beṉe' choe' xtiža' Diosen', perw beṉe' gualaž c̱he' na' beṉe' ḻo' yo'o c̱he' bi chesonḻa'aṉe' ḻe'.
58Na' to c̱hopze yeḻa' guac ben Jesúsen' Nazareten' dan' bitw gosejḻe'e c̱he'.
Айни замон обунашуда:
San Mateo 13: zpq
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
© 1987, Wycliffe Bible Translators, Inc. All rights reserved.