Geenesis 6
6
Pueya miijiosacari sacuaraatia
3Jiyanohua sacuaraatia pueya miijionuucua Pueyaso niquiara, Pueyasoori naa sequequiaari: “Quiarijiajiniji, majaari pueyano cua shanacunu quiniutianiya pueyaracaanu rishijia na quiniuria. Pueyanocuajaari saa sesa miiniuucua jiaatiajaja. Naacuatej majaari maninia pueyaracaanu rishijia na quiniuria. Janiyari quiarijia saaja ciento veinte marijia rishijiara na jiyatenutaniyani.”
5Pueyasoori mijiria quijiaca sacuaraatia nojori miijiosano niquiquiaari. Pueyari saaja sesa miiniuucua quijia. Nojoriiri saaja sesa miiniu niishiriojonuujua pueyaracaanu. 6Tama Pueyasojaarijia sequequiaari: “¿Casaara cua shipiniquiaari pueyanocuani?” Noojiajinia na taraajenuta jiyanohua, Pueyasoori naa sequequiaarijuhuaj: 7“Puetunu nio jiyajinia quijiaca cua shipinishano pueyajanaa shaajanutaniyanijia, puetunu pueya seesano casaajanaa, puetunu roshiyocuatujua casaajuhuaj, puetunu jaacuatujuaca casaajanaanio. Jiyanohua taraajeyanijia puetunu nio casaajanaa cua shipininiuucua najuhuanaj.”
8Saniniuujia, Pueyasoori Noee maniniucuaquiaari maninia miijia na quiniuucua.
Noee jeecasano na cuatajara
9Nioori Noeejiniji pohuatasano. Noeeri maniniu pueyano quijia. Nojuajaari pueyaracaanu Pueyaso tojijia quijia cutara. Puetunu narta pueyajinijiniojuanaani, saaja nojuajaari Pueyaso panishano miijiojua. 10Noeeri jiuujianaraca niquiohuaraca quijia. Nioori nojori sesaca: Sem, Cam, Jafetnio.
11Mijiria quiniaa pueyari tojetaarucuajanaa sesequiaari Pueyasora. Na shipinishano pueyari saaja pueyaracaanu quijia sesa miiniuucua. Naquiya miitioojuaca quijiaari. 12Puetunu pueyajanaari tojetaarucuajanaa sesequiaari. Sacuaraatia miijiacara quiquiaariiri. Naa Pueyaso niquishacari nio jiyajinia cuno sesa miijiaca pueyatej, 13jiyacari Noee sequequiaariiri:
—Tari jirii sacuaraatia nio pueya miijionunijia. Janiyari cunora niishiriojoreeni, maninia juhuari nojori cua shaajanu puetunujuanaa nio jiyajiniji. Naa sacuaraatia nojori miijionuucuacuaatej, narta pueyari puetunu tiquiyocua nio jiyajinia naa sesa miijiacajuhuaj. Janiyari naacua nojori puecanutaniyani, puetunu nio jiyajinia cua shipinijiosano casaajanaanio. 14Naacuatej pajaajinia quia cuatajara quiocuaji quia jeecare puereetuuca bote. Quiocua naana pishujiuneecata maninia na miirinioj. Quiocua mii matacojore sohuacacara. Quiocua maninia mishiquiojore roshitia na soteyacaca, na jiniacumaji na nijinijinio maja mohuacatuhuana na quiniuria. 15Naa quia jeecare quia cuatajarano cuno puereetuuca botetej: Na tucohuana cuaara quiirio ciento trenta y cinco metro. Na jiriquia cuaara quiiria veintidos metro socua na cajiniocuanio. Na jiyaconaja cuaara quiiria trece metro socua na cajiniocuanio. 16Quiocua jiuujianaraca natacoraca na miirijiuhuaj. Naajuhuaj quiocua na tacuhuara canetetare medio metro tucuru nacatucua puequeetaja cariquimiaji. Quiocua na shuucuaji canetetare quia tohuateyarajuhuaj. 17Janiyari jiyanohua nitiniutianiya maruni. Jiyari tojetaarucuajanaa pajaashitianutaniya. Pajaari puetunu paratu rijiojua quijia casaajanaa cusojuanutaniya nio jiyajinia. Puetunu nio jiyajinia quijia casaajanaari cusonuunutaniya. 18Quiajaniya saniniuujia Noeenaa, seetanujuanaa quia sequeyanijia, janiyari seetanujuanaa maninia quia miiniutianiyani. Quia jeecasano cuno puereetuuca botejinianij, tii tacatariquianoori quia niquiohua, quia niquiocua, quia niquiohua niquiocohuajuhuaj, quiajaniyanio. 19Naajuhuaj Noeenaa, quiata cureeriquiano quia botejinia puetunu nio jiyajinijinio casaajanaa quia tacanitiare caya, maajinio. 20Puetunu cuno casaajinijiniojanaa quia tiuquinitiare quia botejinia. Cuaara quiiria caya, maaji, puetunu jaacuatujuaca casaajinijinio, puetunu seesano casaajinijiniojuhuaj, puetunu roshiyocuatujuaca casaajinijiniojaajanio. Cunoori quiata cureeriquiano na nuhuaji nio jiyajinia caneriquianohua. 21Naajuhuaj, quia botejinia quia paatiri queraatia miaquesano. Cuno cuaara quiiria puetunu tamaatia miasanojanaa quia miasocoriquiano, quiata cureeno casami miasocoriquianojaajanio.
22Noeeri naa miiquiaari taa Pueyaso sequequiaari nojuacuajani.
Айни замон обунашуда:
Geenesis 6: arl
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
© 1986, 2008, Wycliffe Bible Translators, Inc. All rights reserved.