Lc 11
11
Yaljnac Jesús yuj lesal
(Mt 6.9-15; 7.7-11)
1A 'a jun 'el, 'ix leslwi Jesús 'a jun lugar. Ax yic xlajw sleslwi, 'ay jun scuywum 'ix aln 'a 'ixtic:
—Mamin, ¿comnoc tzon̈ a cuy 'a lesl on̈, 'icha yutjnac Juan scuyn eb' scuywum? xchi 'a 'a.
2Yuj cha, xyaln Jesús 'ixtc 'a eb':
—A yic tzex leslwi, 'ixtc tzeyutj eyalni:
Ach qui Mam, 'aych 'ec' 'a satcha'an̈, niwn yel'ch cab' a b'i. 'Ochc ach cab' Yajlil 'a tic, [b'o cab' 'icha tza nib'j 'a yolyib'n̈q'uinl tic, 'icha tzb'o 'a satcha'an̈.]
3Tzac' tas tzqui c'ux 'a junjn c'u on̈.
4'Ac' lajwc qui mul on̈, yujto an̈ tic on̈ tzcac' pax niwnc'ojlal 'a jantcn̈ej eb' tzlaj 'och smul 'ayn̈ on̈. Man̈ on̈ a cha 'ejmc yuj maysch'olnil on̈, [tzon̈ a coln can pax 'el 'a yol sc'ab' win syajlil maysch'olnil on̈,] xe chi, xchi 'a eb'.
5Xlajwn̈ej yaln Jesús jun tzo'n̈ cha, xyaln pax 'a eb' 'ixtic:
—Q'uinloc 'ay junc ex, tzc'och junc e wach'c'ojl 'ayx 'a chim'ac'wal, tzyaln 'ayx 'ixtic: Ach in wach'c'ojol, 'ac' in jel wal jaye'oc o'och. 6Yujto at wal sjaw jun in wach'c'ojl 'ayin, to najt xcoti. Palta an xo tic, caw may jac tas tzwac' 'a 'a, xchi. 7Q'uinloc ton̈j tzex ta'w 'elt 'a 'a, tzeyaln 'ixtic:
Man̈ in a tzuntzoc, sin̈n̈i yaj watut sch'apxi, to tzin way yet' eb' wunnal 'a in ch'at. Yuj cha, matz tac' in q'ue wan wac' jun chi tza c'an 'ayin, q'uinloc xe chi 'a 'a. 8An tzwal 'ayex, wach'xam e wach'c'ojol, tecn matz ex q'ue wan eyac' mu'c 'a 'a. Palta toto an̈ja yawj 'och sc'ann 'ayex, tecn tzeyac' 'a 'a, sec wach' tzyactj yawj 'och 'ayex. Jantcn̈ej tas 'ay tz'och yu'uj, tzeyac' 'a 'a. 9Yuj cha, tzwaln pax 'ayex: C'anec, 'oj yac' Dios 'ayex. Sayec, ax chax eyu'uj; 'awjan̈c 'och 'a te puerta, 'oj jacxoc te 'ayex. 10Yujto a eb' tzc'anni, 'oj scha eb'. Ax eb' tzsayni, 'oj chax yuj eb'. An̈jtona', eb' tz'awj 'och 'a te puerta, 'oj jacxoc te 'a eb'.
11Ax xo mamb'il ex, [toto tzc'an eyunnal yoch 'ayex, ¿tom a junc q'uen tzeyac' 'a 'a?] Toto a junc chay tzc'an 'ayex, ¿tom a junc chan tzeyac' 'a 'a? 12Toto a junc n̈olb' tzc'an pax 'ayex, ¿tom a junc sinan tzeyac' 'a 'a? 13Ax tic, wach'xam may e ch'olnil, palta eyojc tas tzeyutj eya'n jun tzo'n̈ tas wach' a eb' eyunnal. Ax qui Mamc 'ayc' 'a satcha'an̈, yel xo wal 'oj yac' Yespíritu 'a eb' tzc'ann 'a 'a, xchi Jesús 'a eb'.
Alb'il to a win diablo 'aych yet' Jesús
(Mt 12.22-30; Mr 3.20-27)
14A 'a jun 'el, 'ay jun winc 'aych jun demonio 'a 'a, matz tac' xon spaxtin win jac yu'uj. Ax Jesús, a 'ix 'i'n 'el jun demonio chi 'a winac. A yic x'el 'a winac, tzax stac' spaxtin winac. Yuj cha, caw 'ix sat sc'ojl eb' 'anma yu'uj. 15Palta 'ay jun tzo'n̈ eb' 'ix aln 'ixtic: A Jesús tic, tztac' ton yi'n 'el ewin demonio, yujto a win Beelzebú 'aych yet'oc, xchi eb'. (A win Beelzebú cha, yajl yaj 'a ewin demonio cha.)
16'Ay pax jun tzo'n̈ xo eb' tznib'j 'a'lnoc prowal Jesús sec toq'ue tz'ejm yuj eb', yuj cha, 'ix sc'ann eb' yil junc milagro tzcot 'a satchan̈ yu'uj. 17Palta yojtac tas wan snan eb', yuj cha, xyaln 'ixtc 'a eb':
Q'uinloc 'ay junc niwquil chon̈b' 'aj tzlaj spoj sb'a eb' yajal, tzlaj ya'nc eb' owal. Toto 'ixta', caw tzjuw 'el jun schon̈b' eb' cha. Q'uinloc 'ay junc n̈al eb' 'anma tzlaj spoj sb'a yuj owal, toto 'ixta', caw tzjuw 'el jun n̈al eb' cha. 18An̈jtona', 'ixta pax win Satanás, toto tzpoj sb'a win yet' ewin yit demonioal cha, ¿tom najtl 'oj yac' yopiso winac? Tzwal jun tzo'n̈ tic 'ayex, yujto wan eyalni, to a win Beelzebú 'aych wet'oc, yic tzin pechn 'el ewin yit demonioal winac. 19Palta toto yel tzeyala, ¿mach pax 'aych yet' eb' e cuywum chi ax tic, yic tzpechn 'el eb' ewin demonio chi jun xo? Yuj cha, mun a eb' e cuywum chi tzch'oxn 'el e paltail. 20Palta yujn̈ej spoder Dios, tzin pechn 'el ewin demonio chi 'an tic. Yuj cha, tzcheclji, chajtlto tox 'ix syamch Dios ya'n yajlil 'a qui calec.
21Q'uinloc 'ay junc winc caw 'ay yip, caw 'ay syamc'ab', sec tzyac' ganar scoln yatut. A tas 'ay 'a win cha, matz tac' scomn to'x 'ec' 'a winac. 22Palta q'uinloc tzc'och junc xo mach, caw 'ec'b'al yip 'a winac. Toto tz'ajx ganar win 'aj n̈a chi yu'uj, tzyi'n 'ec' jantcn̈ej syamc'ab' win 'aych yipc sc'ojl cha, 'oj lajwc cha, ax spojn 'ec' smasnil jantcn̈ej tas 'oj sto'c 'a win cha. 'Icha win 'aj n̈a cha, 'ixta pax win diablo.
23A eb' man̈ 'ayc 'och wet'oc, 'ajc'ojl yajch eb' 'ayin. Ax eb' matz molb'tzan cot eb' 'anma wet'oc, a eb' tz'a'n sactzic eb'.
Yab'xil jun demonio tzc'ochx 'a yet'ul
(Mt 12.43-45)
24Q'uinloc 'ay junc demonio tz'el 'a junc 'anma ticnec. Tzlajw cha, c'uxn tzb'eyc' jun demonio chi 'a jun tzo'n̈ tacn̈ lu'um, tzsayn 'ec' 'aj wach' tz'ilji. Palta matz 'ilchj 'aj tz'aj winac, yuj cha, tznan win 'ixtic: 'Oj in pax 'a jun wet'l 'aj 'elnc in ta, xchi winac. 25Ax yic tzc'ochxi, tzyiln pax win jun 'anma cha, lajn 'icha junc n̈a caw mesb'il, caw wach' yilxi. 26Yuj cha, tz'at yi'nc cot win ucwn̈ocx yit demonioal 'ec'b'al xo stul 'a yib'an̈. Tzwach' 'och cajn ewin smasnil 'a jun 'anma cha. Yuj cha, yel xo wal caw maysch'olnil tz'aj jun 'anma chi 'icha 'a b'ab'el, xchi Jesús.
A eb' wach' yico'
27Yic wan yaln Jesús jun tzo'n̈ cha, 'ay jun 'ix 'ix x'awj chan̈ 'a scal eb' 'anma cha, xyaln 'ixtic:
—Caw wal wach' yic jun 'ix 'ix 'aj ach 'alji, 'ix 'aj ach chuwi, xchi 'ix 'a 'a.
28Palta xyaln pax Jesús 'ixtic:
—Yel xo wal 'ec'b'al swach'l yic eb' tz'ab'n tas tzyal Dios, tzyiclni pax eb', xchi.
Eb' tzc'ann yil junc milagro
(Mt 12.38-42; Mr 8.12)
29Til wal 'anma x'och oyn 'a Jesús, 'ix yaln 'a eb' 'ixtic: A wal ax 'anmax 'a jun tiempoal tic, caw may e ch'olnil. Yuj cha, ton̈j tze c'an eyil junc milagro tzch'oxn 'el spoder Dios. Palta cojxn jun milagro 'oj 'ajxoc eyila', atn jun 'icha sch'oxjnac Dios yet' jun schecb' Jonás sb'i. 30Yujto a win Jonás cha, sch'oxnb'il spoder Dios yaj win 'a eb' 'anma 'aj Nínive 'a pecti'. 'Icha win Jonás cha, 'ixta 'in an 'Ochnc in 'Anmal tic, sch'oxnb'il spoder Dios 'oj waj 'ayx 'a jun tiempoal tic. 31A 'a yic 'oj jawc jun c'u yic 'oj e b'eyc'ojlax yuj Dios, a 'ix sreinail Sur 'a pecti', 'oj q'ue wan 'ix, ax yaln 'ix e mul. Yujto caw wal najt cotnc 'ix, yic wul yab'xni 'ix 'a win Salomón yuj jantc sjelnal. An xo tic, 'ayn 'ec' 'a tic, 'ec'b'al wel'ch 'a yib'n̈ win Salomón cha, palta matz ex cot 'ab'xnoc 'ayin. 32A eb' 'anma 'a Nínive pecti', a yic 'ec' yalnc win Jonás yab'xil Dios 'a scal eb', caw snajnac sb'a eb'. An xo tic 'ayn 'ec' 'a tic, 'ec'b'al wel'ch 'a yib'n̈ win Jonás cha, palta matz e na e b'a. Yuj cha, a yic 'oj jawc jun c'u yic 'oj e b'eyc'ojlaxi, a eb' 'aj Nínive cha, 'oj q'ue wan eb', ax yaln eb' e mul, xchi Jesús.
A jun 'ab'x yic cantil
(Mt 5.15; 6.22-23)
33Xyaln pax 'ixtic: A yic tzca'nec 'och qui cantil, may 'aj tzqui c'ub'jec 'el 'a 'aj man̈ checloc. May 'aj tzca'c 'och 'a yaln̈ junc cajon. Palta a 'a yib'n̈ junc tas cha'an̈, ata tzca'c q'ue'i sec wach' sacq'uinl tz'aj 'ejm yoc 'a eb' tz'och 'a yol n̈a cha. 34A yol qui satec, 'icha junc cantil, 'ixta yaj 'a qui niwnalec. Yuj cha, toto junn̈j 'aj 'aych qui satec, sacq'uinl cajec. Caw wach' tzcutjec qui b'a yet' qui niwnal. Palta toto 'ayex, chucchc 'aj tzeya'ch e sat, tzex can 'a q'uic'q'uinl yu'uj. 35Tzeyil wal e b'a, sec a jun sacq'uinl 'aych 'ayex, ma'oj sutmjc 'och q'uic'q'uinlal. 36Toto sacq'uinl yaj e niwnal smasnil, toto may jac q'uic'q'uinl 'ayex, sacq'uinln̈ej eyaji 'icha junc cantil tz'a'n sacq'uinal, 'ixta tz'aj cab' e nab'en, xchi Jesús.
A smul eb' fariseo,*r* yet' ewin cuywjum 'a ley yic Moisés
(Mt 23.1-36; Mr 12.38-40; Lc 20.45-47)
37Xlajw xoj yaln Jesús jun tzo'n̈ cha, 'ay jun win fariseo x'i'n 'at wac yet' 'a yatut. Yuj cha, 'ix c'och 'a yatut win cha, 'ix 'em wocn swa yet' winac. 38Ax win fariseo cha, 'ix sat sc'ojl win yilni, yujto ma'ix sb'icl Jesús sc'ab', 'icha yaj sb'eyb'al ewinac to tzb'icl ewin yico'. 39Palta xyaln Cajlil 'a win 'ixtic:
—Ax fariseo ex tic, caw tze b'icl spatquil e vaso yet' e yuc'ab', palta ax tas 'ay 'ejm 'a yojol, ton̈j 'elc'b'il eyuj 'a scal maysch'olnil. 40Caw may e nab'en. ¿Tom man̈ eyojcoc, to a jun b'ojnac jun tzo'n̈ tas tzquilc tic, a b'ojnac pax jun tzo'n̈ tas matz quilec? 41Octom a yet' e nab'en tze ch'oxl e wach'il. Toto 'ixta', 'oj sacb'tzaxc e pixan yet' e nab'en. Tzyal 'el'chi, man̈x 'a maysch'olnil 'aych 'ayex.
42'Oltacx wal ax fariseo ex tic. Tzeyac' cob' sdiesmoal#Lc 11.42 Diesmo, tzyal 'el'chi jun tz'el 'a junjn lajn̈e', tz'ajx 'a Dios, a tzyal yaln ley Moisés. A eb' fariseo tzyac' eb' sdiesmoal smasnil tastac, wach'xam 'a te comn c'ultac, yuj sch'oxn 'el eb' chajtlto caw nan Dios yuj eb' yalni. jun tzo'n̈ te 'alwena, yet' jun tzo'n̈ te ruda. Jantcn̈ej jun tzo'n̈ xo 'itaj, c'uxn tzeyac' sdiesmoal. Palta tze na'a, to man̈ yowlalc tojl tzeyutj e nab'en. Man̈ yowlalc tze chamc'ojlej Dios. Octom wal xe b'eylb'ej jun tzo'n̈ tic, ax jun tzo'n̈ xo tze b'o cha, matz eyactj can cab' e b'oni.
43'Oltacx wal ax fariseo ex tic, a 'a yol e capiya, an̈j wal 'a yet'l jun tzo'n̈ eb' niwc winc 'aj tze nib'j tzex 'em wocan. Yet' pax 'a yic tzex 'ec' 'a caye, tze nib'j tzlaj yic' 'ejm sb'a eb' 'anma 'ayex.
44[Ax xo cuywjum ex 'a ley yic Moisés yet' ex fariseo,] caw 'oltac ex, caw chab'sat ex. Lajn ex 'icha 'aj mucn#Lc 11.44 A jun tzo'n̈ 'aj tzmucx eb' chamnac, tz'ajx 'och sac pintura 'a 'a, yic wach' matz juw 'el eb' 'anma 'a sat ley, toq'ue tztench sb'a eb' 'a 'a. junc xi'lb'a, man̈x checloc 'aj mucan. Tz'ec' eb' 'anma 'a yib'an̈, palta man̈ yojcoc eb', toto 'ay mach mucn ta', xchi Jesús.
45Xlajw yaln jun cha, 'ay jun win cuywjum 'a ley yic Moisés 'ix aln 'ixtc 'a 'a:
—Mamin, a yic 'ix aln jun tzo'n̈ tic, an̈ xo tic on̈, caw ya 'ix al xcab' on̈, xchi win 'a 'a.
46Palta xyaln pax Jesús 'ixtic:
—¡An̈jtona', ax cuywjum ex 'a ley yic Moisés caw 'oltacx paxi! A jun tzo'n̈ e checnb'il, lajn 'icha junc 'ictz toxn matz q'ue xon jac cu'uj, tze tusb'tzej, tzeya'n scuch eb' 'anma'. Palta toxn matz eya'ch jac yune e c'ab' e t'un̈n chan̈ yictz eb' cha.
47¡Caw 'oltac ex!, yujto tz'at e b'o jun tzo'n̈ yet'l eb' schecb' Dios 'a yib'n̈ 'a campusan, palta atn eb' e mam eyichm miljnac cham eb' 'a pecti'. 48Yuj cha, a yic tze b'on jun tzo'n̈ cha, tze ch'oxni 'eli to wach' yutjnac sb'a eb' e mam eyichm chi e yalni. Yujto atn eb' miljnac cham eb' schecb' Dios cha, ax xo tzat cob' e b'o yet'l eb' chi 'a yib'an̈.
49Yuj cha, yaljnac can Dios 'ixtc yuj sjelnal: 'Oj in checb't jun tzo'n̈ eb' 'oj alnc 'el in paxti 'ayex, yet' jun tzo'n̈ xo eb' in checab'. 'Ay eb' 'oj e mil chamoc. 'Ay pax eb' 'oj e pech b'eyc'oc, xchi Dios. 50Yuj cha, jantcn̈ej eb' schecb' Dios milxnac chamoc, yictax yel yich yolyib'n̈q'uinl tic, 'oj ya'ch Dios schaml eb' chi 'a eyib'n̈ ax 'ayx 'ec' 'a jun tiempoal tic. 51Til wal eb' schecb' Dios milxnac chamoc, yictax smilx cham Abel#Lc 11.51 'Ilt nota 'a Mateo 23.35. masnto c'ochnc stiempoal scham Zacarías, atn win milxnac cham 'a snan̈l jun yet'l xajmb'al yet' scajnub' Dios. Palta an tzwal 'ayex, jantcn̈ej eb' milb'il cham cha, 'oj ya'ch Dios 'a eyib'an̈.
52'Oltacx wal ax cuywjum ex 'a ley yic Moisés, yujto mun xcob' eya'ch eyopiso e jacn snab'en eb' 'anma yet' spaxti Dios. Palta 'in matz eya'ch e nab'en 'a spaxti cha. Ax eb' tznib'j tzya'ch snab'en 'a 'a, matz e chaj ya'ch eb', xchi Jesús 'a eb'.
53Yic xlajw yaln Jesús jun tzo'n̈ cha, ax eb' cuywjum 'a ley yic Moisés yet' eb' fariseo, caw xcot yowl eb' 'a 'a. Til wal jun tzo'n̈ tas xlaj cob' stz'ac eb' sc'anb'c 'a 'a. 54Stan̈wj eb' yab'i', toq'ue 'ay tas 'oj yac' palta yalni, sec tzyac' queja eb' snani.
Айни замон обунашуда:
Lc 11: CSS
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
Biblia Chuj San Sebastian © Sociedades Bíblicas Unidas, 1999.