Lc 10
10
Schecjnac Jesús 72 eb' scuywum
1Xlajw xoj cha, xya'n 'och Cajlil yopiso jun tzo'n̈ xo eb' scuywum, 72#Lc 10.1 A 'a tic 70 xchi. 'Ay pax 'aj tzalxi 72. Tecn tzch'ox cot eb' 70 nacion̈ tzb'inax 'a Génesis 10. A 'a hebreo 70, xchi, ax 'a griego 72. sb'isl eb'. 'Ix sb'ab'l checj 'at eb'. Chatcwan̈il x'aj eb' s'at 'a junjn chon̈ab', yet' 'a junjn lugar 'aj 'oj 'ec' pax Cajlil cha.
2Yic mantzac 'at eb', xyaln 'ixtc 'a eb':
A eb' 'anma', lajn eb' 'icha 'ixm trigo stiempoal xo spolxi, wal yel caw niwnto eb', palta jaywn̈n̈ej mach tzmunlj 'a scal eb'. Yuj cha, leslwan̈c 'a jun 'aj munljel cha, sec 'oj schecb't smunljum 'at sic' chan̈ eb'. 3A ticnec 'ixquec. 'Icha jun tzo'n̈ calnelu tz'at 'a scal no 'oques, 'ixta tzex 'aj e 'at wu'uj. 4Man̈ eyic' e pa, e cartel, yet' e xan̈ab'. Man̈ ex comn 'och wan paxtinc yet' junc mach 'a yol b'e. 5A yic tzex laj c'och 'a junjn n̈a, tze b'ab'l 'a'j stzatzl sc'ojl eb', tzeyaln 'ixtc 'a eb': 'Ay cab' junc'ojlal 'a yojl jun n̈a tic, xe chi. 6Toto 'ay eb' tznib'j junc'ojlal ta', 'oj 'ajxc 'a eb' 'icha 'oj eyal 'a eb' cha. Toto may eb' tznib'ni, ma'oj 'el'choc jun chi 'oj eyal 'a eb'. 7An̈j 'a junc n̈a chi 'aj tzeyac' e posada cha, ata tzex cani. A tas tzc'ux eb', tze c'ux yet' eb', yujto a mach tzmunlji, smoj schan stojol. Matz tac' ton̈j tzex b'eyc' 'a cal n̈a. 8A yic tzex laj c'och 'a junjn chon̈b' 'aj tzex laj scha eb', tze c'uxn̈j tastc tzyac' eb' 'ayex. 9Tzlaj eya'n b'oxc sc'ojl eb' ya'ay 'ajtc tzex laj c'och cha. Tzlaj eyalnc 'ixtc 'a eb': Jab'xoj wal 'oj wach' 'och Dios yajlil 'ayex, xe chi 'a eb'. 10Palta toto 'oj e c'och 'a junc chon̈b' 'aj matz ex schaj eb', tzex laj 'ec' 'a yol caye, tzeyaln 'ixtic: 11A spoccal#Lc 10.11 'Ilt nota 'a Mateo 10.14. jun e chon̈b' tic xcan 'a coc on̈, tzqui ma'cn 'el on̈, yic tzqui ch'oxn chi, to man̈x 'a caln quic 'ayx on̈. Palta nachj cab' 'el eyu'uj, to jab'xoj wal ma'ex 'och 'a yol sc'ab' Dios, xe chi 'a eb'. 12An tzwal 'ayex, at yic 'oj jawc jun c'u yic sb'eyc'ojlal Dios, yel xo wal niwn yailal 'oj 'ajxc 'a eb' 'aj chon̈b' chi 'a yib'n̈ eb' 'aj Sodoma.
Jun tzo'n̈ chon̈b' man̈ yiclumoc
(Mt 11.20-24)
13A wal ex 'aj Corazín, caw 'oltac ex, yet' ex 'aj Betsaida, caw 'oltacx paxi. Octom a 'a Tiro yet' 'a Sidón b'ob'il jun tzo'n̈ milagro 'icha xb'o 'a e cal. Toto 'ixta', pectix am snajnac sb'a eb' 'anma cha. Tox am xya'ch eb' jun tzo'n̈ pichl n̈achtac, yet' stan̈l c'ac' tzyac' q'ue eb' 'a sjolom, sec tzcheclji, to caw tzcus eb' yuj smul. 14At 'a yic 'oj jawc jun c'u yic sb'eyc'ojlal Dios, yel xo wal niwn yailal 'oj 'ajxc 'ayx 'a yib'n̈ eb' 'aj Tiro yet' eb' 'aj Sidón. 15An̈jtona', 'ixta 'ex 'aj Capernaum, tzcob' e na', to smoj 'oj e q'ue'ch 'a satcha'an̈, palta ton̈j 'oj eyemcn 'a scal eb' chamnac, xchi Jesús.
16'Ix yaln pax 'a eb' scuywum 'ixtic:
—A mach tzchan 'ab'noc 'ayex, tzyal 'el'chi, 'a 'ayn tzchaj eb' yab'i'. Ax eb' tzex patquiln can 'eli, tzyal 'el'chi, an tzin spatquilj can 'el eb'. A eb' tzin patquiln can 'el cha, tzyal 'el'chi, a Dios checjnacn coti, a tzpatquilj can pax 'el eb', xchi Jesús 'a eb'.
Jawnc pax eb' 72 'a Jesús
17A eb' 72 cha, caw tzaljc'ojlal xjapx eb' 'a Jesús. 'Ix yaln eb' 'ixtc 'a 'a:
—Mamin, an̈jtona ewin demonio, caw syiclj ewin tas xcal on̈, yic xqui c'anlb'an a b'i on̈, xchi eb'.
18—An tic, wiljnac tas 'ajnc win Satanás scot 'a satcha'an̈, yemt can win 'a yolyib'n̈q'uinl tic 'icha junc raya. 19An xwac' e poder sec tztac' e te'n no chan yet' no sina'an. Wu'uj, tztac' eya'n ganar 'a yib'n̈ jantcn̈ej spoder win Satanás. Toxn may junc tas tztac' ex yixtni. 20Palta man̈ yujoc to tzyiclj ewin demonio 'ayex, tzex tzalji. Palta tzaljan̈ec, yujto tz'ib'b'ilx can e b'i 'a satcha'an̈, xchi Jesús 'a eb'.
Tzalj Jesús
(Mt 11.25-27; 13.16-17)
21A 'a yic jun rato cha, caw tzalj Jesús yuj Yespíritu Dios. 'Ix yaln 'ixtic: Mamin, yajl ach 'a satcha'an̈, yet' 'a yolyib'n̈q'uinl tic. Tzwal wach' paxti 'ayach, yujto xa c'ub'j 'el jun tzo'n̈ tic 'a eb' jelan, yet' 'a eb' caw 'ay snab'en 'a sat eb' yit 'anma'il. Ax eb' 'icha 'unin, a eb' 'ix ac' 'ojcanc 'eli. 'Ixta x'aj Mamin, yujto 'ixta tza nib'ej, xchi 'a Dios.
22Xlajw cha, xyaln pax 'ixtc 'a eb' 'anma 'ayc' ta': A 'in Mam, ya'jnac 'och smasnil tas 'a yol in c'ab'. May junc mach 'ojtnacn an Yunnaln tic, cojxn in Mam 'ojtnac in. An̈jtona', may mach tzcomn 'ojcan 'el in Mam, cojxn in an Yunnaln tic wojtac, yet' pax eb' tzin nib'j tzwac' 'ojcanc 'eli, xchi 'a eb'.
23Xlajw cha, x'ec' q'uel-loc 'a eb' scuywum, xyaln 'ixtc 'a eb' sch'ocoj: Caw wach' yic eb' tz'iln jun wan eyiln tic. 24Yujto an tzwal 'ayex, til wal eb' schecb' Dios pecti', yet' eb' rey, snib'jnac eb' yil jun wan eyiln tic, palta ma'ix yil eb'. An̈jtona', snib'jnac eb' yab' jun tzo'n̈ wan eyab'n tic, palta ma'ix yab' eb', xchi 'a eb'.
Win 'aj Samaria wach' snab'en
25Xlajw cha, 'ay jun win cuywjum 'a ley yic Moisés, xq'ue lin̈an. Snib'j win yac' prowal Jesús. Yuj cha, sc'anb'n win 'ixtc 'a 'a:
—Mamin, ¿tas yowlal 'oj in b'o', sec 'oj in cha in q'uinl 'a jun 'ejmn̈ej? xchi win 'a 'a.
26—¿Tas tz'ib'b'il can 'a ley yic Moisés? ¿Tas xchi ta tzela? xchi Jesús 'a winac.
27Tzyal 'ixtic:
—Chamc'ojlejc Cajlil qui Diosalec yet' smasnil e c'ojol, yet' smasnil e pixan, yet' smasnil eyip, yet' smasnil e nab'en. Tze chamc'ojlan pax eb' eyit 'anma'il, 'icha tzeyutj eya'iln e b'a junjn ex, xchi, xchi win 'a 'a.
28—Wach' ton xotj aln 'ayin. Toto tza yiclj jun tzo'n̈ tic, 'oj a cha a q'uinl 'a jun 'ejmn̈ej, xchi Jesús 'a winac.
29Palta ax winac, ton̈j tznib'j win scol sb'a, yuj cha, xyaln pax win 'ixtc 'a Jesús:
—¿Palta mach eb' wit 'anmal chi tzyal cha? xchi win 'a 'a.
30Yuj cha, xyaln pax Jesús 'ixtic:
—A 'a jun 'el, 'ay jun winc tzb'ey 'a yol b'e tz'at 'a Jerusalén, tz'emch 'a Jericó. Yic wan sb'ey winac, x'elt jun tzo'n̈ ewin 'elc'm 'a winac. C'uxn xyij 'ec' ewin jantcn̈ej tas 'ay 'a 'a, yet' spichul. Caw xma'x win yuj ewinac, x'atx can ewinac. Jab'xoj wal ma'ix chamcn win yuj ewinac. 31Ax jun win ya'mal 'och qui ti 'a Dios, 'ix 'ec' 'a jun b'e cha, ax xyiln sb'a t'ocn 'ec' winac, palta c'ax 'e'l x'eq'ui. 32Xlajw cha, 'ay jun yin̈tl Leví#Lc 10.32 A eb' levita ya'mal 'och sti eb' 'anma 'a Dios, 'ay yopiso eb' ya'n servil Dios, yuj cha, smoj wal yo'ch sc'ojl eb' 'a win lajwnac cha. x'ec' 'a jun b'e cha, ax xyilni t'ocn 'ec' winac, c'ax 'e'l x'ec' junx cha. 33Palta 'ay jun win 'aj Samaria wan sb'ey pax 'a jun b'e cha, ax xyilni t'ocn 'ec' winac; 'ix 'o'ch sc'ojl 'a winac. 34'Ix c'och 'a stz'ey winac, sucn 'och win sremelal 'a 'ajtc lajwnac win cha. Xyan̈tj win yet' aceite yet' yal uva. 'Ix sb'a'n 'och win jun tzo'n̈ nip 'a winac. Xlajw cha, xya'n q'ue win 'a yib'n̈ schej. 'Ix yi'n 'at win 'a mesón. Caw wach' xyutj yiln win jun 'anma cha. 35Ax 'a junx c'u, yic wan s'atx win 'aj Samaria cha, xyi'n q'uet win chab' stumin. Xya'n can 'a win yajl mesón cha, 'ix yaln can win 'ixt 'a winac: Caw tzel wal jac win lajwnac tic in c'ana'. Toto ma'oj yab' jab' tumn tic, 'oj wac' jacx 'aych in japx jun 'ejm xo, xchi can winac. 'Ixta yaln jun 'ab'x tic. 36Al ticnec, 'ay jun tzin c'anb'j 'ayach. A win xma'x yuj ewin 'elc'm cha, ¿mach junc yel yit 'anmal 'a 'oxwn̈ chi x'ec' 'a tza na'a? xchi Jesús 'a win cuywjum 'a ley yic Moisés cha.
37Atn win x'o'ch sc'ojl 'a win cha, xchi win 'a 'a.
—Atn winac, yuj cha, 'ixta wal tzotj a b'a jun xo, xchi Jesús 'a winac.
'Ayc' Jesús 'a yatut Marta yet' María
38'Ix 'atx Jesús, axta xc'och 'a jun aldea. Ata 'ay jun 'ix Marta sb'i, 'ix schaj 'och 'ix 'a yol yatut. 39'Ay jun 'ix snul'j Marta cha, María sb'i. 'Ix 'em wocn 'ix 'a stz'ey yoc Jesús, yic tz'ab'xni 'ix 'a tas tzyala. 40Palta ax Marta, caw witz'n yaj yuj tas 'ay sc'a'l tzb'o'o. Yuj cha, xjaw 'ix 'a Jesús, xyaln 'ix 'a 'ixtic:
—Mamin, ¿tom matz a na jab'oc, to in yactj can 'unx in nul'j tic yet' in munljel in ch'ocoj? Al 'a 'unix to tzcolwj 'unx wet'oc, xchi 'ix 'a 'a.
41—Marta, Marta, caw tzach 'och 'il. Til wal tza na yuj jun tzo'n̈ tza b'o cha. 42Palta junn̈j tas caw 'ay sc'a'l sb'o'i. Atn jun chi tznib'j María tic. Yuj cha, may junc mach 'oj 'i'nc 'ec' 'a 'a, xchi Jesús 'a 'ix.
Айни замон обунашуда:
Lc 10: CSS
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
Biblia Chuj San Sebastian © Sociedades Bíblicas Unidas, 1999.