Luke 6
6
1ဝမ်းဥပုဝမ်းနိမ်လော့် စောင့်ယေရှုတောင်းတပဲ့မွန်းလေန အောင်းဆွုန်ဂျုံ ခမ့်ကွာကော်လော့် တပဲ့မွန်းစောင့်လေန အောင်းဂျုံမောင်းဖောင် အောင်း(ဝ်)ဆီ အောင်းပေမွန်းလေ တောင်းဖာမေးတောင်း ဖယ်ဝေရောင့်(ဝ်) အောင်းမက်မွန်းလေ ကျဉ်းဟင်းကော်ဝိုက်။ 2ဖာရိရှဲလေန အောင်းစောင့်ယေရှု "မဆူလေ မေဝမ်းဥပုန တောင်းဥပဒေတောင်းအောင်းမညီလ ဟေဟောင်းဟေဟင်းန"ဆီ ဝါကော်ဝိုက်။ 3စောင့်ယေရှုဝါပေါက်အောင်းဖာရိရှဲလေကော်လ "ဒါဝိဒ်တောင်းတပဲ့မွန်းလေန ဟောင်ပေါတောင့်မိုက်ခေါင့်(ဝ်) ဟေနောင်နူးဝါလ မဆူလိလေ တော်တနယ့်ဖတ်ကောင်(ဝ်)ဟင်းကျဉ်းနော့်။ 4မွန်းန ခေါင့်(ဝ်)ခနောဝ်စလပ်ဆီ အောင်းစပုရောဟိတ်လေနဲဟော် သီးသန့် အောင်းကပ်ဝိုက် အောင်းခေါင့်(ဝ်)မွန်းလေ မွန်းကိုယ်တိုင် ကျဉ်းဆီမကား အောင်းတပဲ့မွန်းလေပါ လိမ့်ဟောင့်(ဝ်)ကော်အွန်"ဆီ ဝါရောင့်(ဝ်) မွန်းစောင့်န ဆက်ဆီ 5အောင်းပေးလူ့သားတော် ကောန ပေးစောင့်ဝမ်းဥပု"ဆီ ဝါကော်ဝိုက်။ 6ဝမ်းဥပုတန်းတီဝမ်းနိမ်လော့် ရာစလပ်န တကြားစောင့်ယေရှုဆောန်ပြားညော့ ကွန်းမေးကန့်ခွာမခွန် ကော်နိမ်ရောင်းဝိုက်။ 7တော်နယ်ကော့် ဖာရိရှဲတန်းတီတောင်း မောရှေဥပဒေကျမ်းစန်ဆရာတန်းတီလေန အောင်းစောင့်ယေရှု ဝမ်းဥပုန အောင်းကွန်းကော်နိမ်မကော်နိမ် ဟောင်ပေါရားဟောင့်(ဝ်) ဟပေါနယ့်စွပ်စွဲ ခခါအကြောင်းပြားချက်ညော့ ဟတွဲနွေ့အောင်းကောင့်(ဝ်)ကော်ဝိုက်။ 8တော်နယ်ကော့် မနော်လေထန်နောင်နယ့်ဝါလ ဟုဝိုက်ရောင့်(ဝ်)ကော်ညော့ စောင့်ယေရှုလ အောင်းကွန်းမေးမခွန်ဟောန့် ကွန်းတောင်းလုန်တော်ပေါဟောန် မွန်းစောင့်န ရာနေရာဟောန့် စိန်ကော်ဆီ ဝါကော်လော့် ကွန်းဟောန့်ကော့် စိန်ကော်ဝိုက်။ 9နယ့်ရောင့်(ဝ်) မွန်းစောင့်လ အောင်းကွန်းဖွန်လေ "အောင်းစမဆူ တူးနိမ် ကောတထန်(မ်)။ ဝမ်းဥပုလ အောင်းဟေအောင်းနီးလ တောင်းပညတ်တော်တောင်း ညီလေး။ နယ့်ပေါမစော် တနယ့်ဟေအောင်းမနီးလေး။ နောင်နယ့်ပေါမစော် အောင်းကွန်းကော်နိမ် ကောတနယ့်ကယ်လေး။ နောင်နယ့်ပေါမစော် တနယ့်ဖျတ်စီးလေး"ဆီ ထန်(မ်)ကော်ဝိုက်။ 10နယ့်ရောင့်(ဝ်) အောင်းကွန်းမေးမခွန်ဟောန့်" မေးမော ယောန်းအောက်ကော်နူ"ဆီ ဝါကော်လော့် ကွန်းဟောန့်န နောင်မွန်းစောင့်ဝါအတိုင်း အောင်းမေးမွန်း ယောန်းအောက်ကော်လော့် မေးမွန်းန နောင်မေစောင့်ကျဉ်းနော့် နီးပေါက်မားကော်ဝိုက်။ 11မေနယ့်လော့် ဖာရိရှဲလေတောင်းဆရာကျမ်းလေန ခထားဟင်းဆီ ကော်နိမ်တောင်းကော်နိမ်တွဲရောင့်(ဝ်) "အောင်းယေရှု တနယ့်ဟေနောင်နူးဝါလ အချန်းချန်း တိုင်ပန်ဟင်းကော်ဝိုက်။ 12ဝမ်းနိမ်လော့် မွန်းစောင့်ယေရှုလ သကွာရောန်းဆုဆီ ခွန့်ကော်ရာခနေနွဲတီနိမ်ဆီ မွန်းစောင့်ရောန်းဆုကော်ဝိုက်။ မေခမ်ဟောန့်တောင်းခမ်းခမ် ရာဟောန့်ညော့ အချီန်မိုကော်ဝိုက်။ 13နောက်လောင်(န်) ဖလိမ်းကော်လော့် မွန်းစောင့်လ အောင်းတပဲ့သာဝကမွန်းဟောင့်ဆီ စူးဟင်းရောင့်(ဝ်) ဆီမေခနောဝ်မနော်န သာဝကဆစ်(ပ်)ဆောင်(န်)ကော့်နဲဟော် လိတ်အောက်ကော်ဝိုက်။ 14ကွန်းဟောန့်လေန ပေတရုလ အောင်းမွန်းစောင့်ဟောင့်ရှိမုန်တောင်း နောင့်စိုင်းပေတရု အန္ဒြေ၊ ယာကုပ်၊ ယောဟန်၊ ဖိလိပ္ပုတောင်း ဗာသောလမဲ၊ 15မဿဲတောင်းသောမ၊ လုစိုင်းအာလဖဲ ယာကုပ်၊ ကွန်းအကြီးကျယ်ဟောက် အမျိုးစောင့်ကောင်(ဝ်) ရှိမုန်၊ 16လုစိုင်းယာကုပ် ယုဒတောင်း နောက်လောင် ကွန်းအောင်းသစ္စာတဖောက် အောင်းစောင့်ယေရှု ယုဒရှကာရုတ်ဟော်ဝိုက်။ 17နောက်လောင်နော့် မွန်းစောင့်လ တောင်းသာဝကအောင်းမွန်းလိတ်ဝိုက်တောင်း ဆီမေခနေနွဲ လုန်းမားတော်နောင်နဉ်းပြန့်ကော်ဝိုက်။ ရာဟောန့် တောင်းတပဲ့မွန်းတောင်း မှိန်းယုဒ၊ မှိန်းဂျေရုဆလင်၊ မှိန်းဇိဒုန် တောင်းမှိန်းတုရု၊ ကွန်းအူရာမှိန်းခန့်ဟဉ်း(မ်)နမ့်လေကော့် ရာဟောန့် ထီန်ဟင်းမားဝိုက်။ 18မနော်လေန အောင်းစောင့်ယေရှုလောင်(ဝ်)ပြားလေ ဟပေါနယ့်ထောင်(မ်)တောင်း အောင်းကွန်းရောဂါရောင်းလေကော့် ခဟရားဟင်းဝိုက်။ အောင်းကွန်းဖီမနီးပူးဆီ ကွန်းနယ့်ခမ်တောင်းလုန်ကော့် ရောဂါမနော် ဟိုင်ဟင်းကော်ဝိုက်။ 19ရာမွန်းစောင့် အနာရောဂါဟပေါဟိုင် အစွမ်းလေရောင်းညော့ အောင်းမနော်တောင်းလုန် ရောဂါဟပေါဟိုင် ရားဟောင့်(ဝ်)ညော့ ကွန်းတောင်းလုန်န အောင်းမွန်းစောင့် ခထိဟင်းဝိုက်။ 20နောက်လောင်နော့် မွန်းစောင့်န အောင်းတပဲ့မွန်းလေတွဲဆီ "သာသနာတော်စောင့်ဖလားန ပေးအောင်းစကွန်းဖန်လေညော့ မဆူ ပျော်ဟင်းကော်မေ။ 21အစောင် ကွန်းစောင့်တောင့်မိုက်လေ မဆူလေကော့် အိဉ်(မ်)အိဉ်(မ်)တေမ်းတေမ်း တနယ့်ကျဉ်းညော့ စွုမ်းဟင်းကော်။ အစောင် ကွန်းနယ့်ဟိုင့်လေ မဆူလေကော့် တနယ့်ခိုဟင်းညော့ စွုမ်းဟင်းမေ။ 22ကွန်းတန်းတီလေန ကောပ့်လူ့သားတော်ညော့ အောင်းမဆူ ဟောင်ပေါစောန်းကော့်ခရောင့်(ဝ်)၊ ဟောင်ပေါဝေကော့်ခရောင့်(ဝ်) အောင်းပွန်နိစပ်နယ့်ခမ်ဆီ အောင်းပေထားနယ့်ခမ်ကော့်ခရောင့်(ဝ်) စွုမ်းဟင်းကော်။ 23ကောပ်နယ့်ညော့ ဟောင်ပေါပေးမားနောင်နယ့်လော့် စွုမ်းဆီ ကဟင်းကော်။ ဟေဟောင်းပေါဝါလော့် ဆုမောအောင်းရောင်းရာ"နိဗ္ဗာန်"န ရောင်(ဝ်)ညော့ဝိုက်။ မေတန်ဟာ ပေါ်မနော်မယ်မနော် ပူမနော်၊ ရာမနော်လေကော့် အောင်းပရောဖက်လေ နောင်နယ့်ညော့ ဟေဟင်းမားဝိုက်။ 24တော်နယ်ကော့် ကွန်းချမ်းသာလေ၊ မဆူလေန အောင်းဘဝ ငိုင်လွယ်လွယ်အင်တောင်း နယ်အူဟင်းမားညော့ အောင်းစမဆူလ အိုက်ဆိုးဝိုက်။ 25အစောင် အိဉ်(မ်)အိဉ်(မ်)တေးမ်တေးမ် ကွန်းနယ့်ကျဉ်းလေကော့် တောင်းအောင်းကိုင့်တောင်း တနယ့်ကြုံ။ အစောင် ကွန်းနယ့်ခိုလေကော့် တောင်းအောင်းဟိုင့်တောင်း တနယ့်ကြုံဝိုက်။ 26ကွန်းတောင်းလုန် အကြောင်းမဆူနီး ဟောင်ပေါဝါကော့် မဆူ တောင်းဒုက္ခတောင်း တနယ့်ကြုံ။ ဟေဟောင်းဆီဝါလ ပူမနော်ရာမနော်လေကော့် အောင်းကွန်းဟန်ဆောင်ပရောဖက်လေ နောင်နယ့်ကျဉ်းနော့် ဝါဟင်းမားညော့ဝိုက်။ 27တော်နယ်ကော့် အောင်းမဆူရီကော့်စီ ကောတဝါ။ ခနေကွန်းမနီးလေ မေတ္တာလေဝိုက်ဟင်း။ ခနေရန်ဆူဟောလေကော့် အောင်းမနော် အကျိုးအောင်းနီးလေ ဟေဟောင့်(ဝ်)ကော်။ 28အောင်းကွန်းဝါအောင်းမနီးမငမ်း အောင်းမောကော့် စောင့်ဖလားဟပေါဟောင့်(ဝ်)အောင်းနီးလေ ဆုရောန်းဟောင့်(ဝ်)ကော်။ အောင်းကွန်းနိစတ်အောင်းမောလေကော့် ဆုရောန်းဟောင့်(ဝ်)ကော်။ 29ကွန်း ကော်နိမ်မစော်ကော်နိမ် ဟောင်ပေါတင် အောင်းဖာကျင်(မ့်)မော ပါ့နိမ်လော့် တောင်းပါ့ပါ့နိမ်ပါ ဟတင်ကော်။ ကွန်းကော်နိမ်မစော်ကော်နိမ် ဟောင်ပေါရောန်း အောင်းဆေလုန်မော အောင်းဆေမော ခနောဝ်ပါဟောင့်(ဝ်)ကော်။ 30အောင်းကွန်းစောင့်မားရောန်း ရာမောလေတောင်းလုန်ကော့် ဟောင့်(ဝ်)ကော်။ ကွန်းစောင့်အောင်းဝိုက် ပစ္စည်းမောလေကော့် ဆီမေကွန်းဟောန့် ပီရောန်းပေါက်။ 31အောင်းပေ နောင်မောခဟဆက်ဆံညော့ ခနေပေကော့် မောတနယ့်ဆက်ဆံ။ 32အောင်းကွန်းစောင့်ဝိုက်မေတ္တာ အောင်းမောနဲဟော် မောပေါတဟောက်ဟောပေါဝါလော့် အောင်းစမော စောင့်ဖလားန တချီးမွမ်းနောင်နူး။ အောင်းကွန်းဟေအပြစ်လေကိုးသကော့် အောင်းကွန်းဝိုက်မေတ္တာအောင်းမနော် ဟောက်ပေါက်ဟင်းဝိုက်။ 33အောင်းကွန်းနီးခနေမောနဲဟော် မောန တနီးဟောင့်(ဝ်)ပေါက်ဟွန်းဟောပေါဝါလော့် ဆီမေစောင့်ဖလား ဆုလေပီမျှော်။ ကွန်းအပြစ်ရောင်းလေကိုးသကော့် နောင်နယ့်ဆီ ဟေပဲ့။ 34အောင်းကွန်းဟောင့်(ဝ်)ပေါက်ပဲ့နဲ့ဟော် မောတကူ့ဟောင့်(ဝ်)ပေါဝါလော့် မဆူ မင်္ဂလာအောင်းနီးလေ နွိုက်သင့်အွန်လေး။ ကွန်းအပြစ်ရောင်းလေကိုးသကော့် ခေါန်အောင်းတူ ဟပေါနွိုက်ပေါက် အချန်းချန်း တကူ့ဟင်းဝိုက်။ 35အောင်းအစားဟောန့် အောင်းကွန်းစောန်းအောင်းမဆူလေ ဟောက်ဆီ ခနေမနော် အောင်းနီးလေဟေဟင်း။ တူးနိမ်မတူးနိမ် တနွိုက်ပေါက်ဝါလ မမျှော်ဆီ တနယ့်ကူ့ဟောင့်(ဝ်)။ ဟောင်ပေါဟေနောင်နယ့် မဆူလေန ဆုအောင်းရောင်(ဝ်)တောင်း တပေးလအောင်စောင့်ဖလားဝိုက်။ ဟေဟောင်ပေါဝါလော့် စောင့်ဖလားန အောင်းကွန်းကျေးဇူးမဟုလေတောင်း အောင်းကွန်းမနီးလေကော့် ဟောက်ညော့ဝိုက်။ 36ခနေမော နောင်ပေါ်မဆူ အီနူညော့ ခနေပေကော့် တနယ့်အီနူ။ 37နောက်လောင်နော့် စောင့်ယေရှုဝါမားလ "ခနေပေ စစ်ဆေးဆီ အပြစ်ပီဟောင့်(ဝ်) နောင်နယ့်ဟောင်ဝါမှ အောင်းမဆူကော့် စောင့်ဖလားလ စစ်ဆေးဆီ အပြစ်အောင်းတဟောင့်(ဝ်)မစော်။ အောင်းပေ တော်ပေါယပ်ပီဟေ။ နောင်နယ့်ဟောင်ဝါမှ စောင့်ဖလားလ အောင်းစမဆူ တော်ပေါယပ် အောင်းတဟေမစော်။ အောင်းပေ ဟောင်ပေါခွင့်လွတ်ဟောင်ဝါမှ အောင်းမဆူကော့် စောင့်ဖလားလ တခွင့်လွတ်ဟောင့်(ဝ်)ဝိုက်။ အောင်းစပွန်လေ နောင်မောခွင့်လွတ်ညော့ စောင့်ဖလားကော့် အောင်းစမော တခွင့်လွတ်ဟောင့်(ဝ်)ဝိုက်။ 38ဟောင်ပေါဟောင့်(ဝ်)အောင်းပေ မဆူကော့် အောင်းဟောင့်(ဝ်)တနယ့်ခမ်။ နောင်မဆူဟောင့်(ဝ်)အောင်းပေညော့ စောင့်ဖလားန တဟောင့်(ဝ်)ပေါက် အောင်းမောဝိုက်"ဆီ ဝါကော်ဝိုက်။ 39နောက်လောင်နော့် မွန်းစောင့်ကော့် အောင်းမနော် ဥပမာတူးနိမ် ဝါပြားကော်ဝိုက်။ ကွန်းဟွေတားမဟောန်ကော်နိမ်လ အောင်းကျန်အောင်းကွန်းဟွေတားမဟောန်ကော်နိမ်ကော့် ခွန်တန်းတပြားပဲ့လေး။ မနော်တောင်းဆောင်(န်)ကော့် ခနောဝ်ဟောင် မဲတိုပဲ့မစော်လေး။ 40တပဲ့လေန အောင်းဆရာ ပညာလေ မဆာပဲ့။ တော်နယ်ကော့် အောင်းတပဲ့ထောကော့်ခရောင့်(ဝ်) နီးနီးငမ်းငမ်းပေါဆောန်ဟောင့်(ဝ်)လော့် မနော်လ နောင်ဆရာမနော်ညော့ တပေးမားမစော်လေး။ 41မောန ချီ့တားအောင်းခနောဝ်ဟွေတား တကော့်မောနဲ့ဟော် ဟောန်ပဲ့ဟော။ တော်နယ်ကော့် မောလ ခနောဝ်ဟွေတားမော ချီ့တား နောင်တိုင်မိုက်ပွန့်ရောင်းလ မောမဟေအလေး။ 42မောန ခနောဝ်ဟွေတားမော ချီ့တားနောင်တိုင်မိုက်ပွန့်ရောင်းဝါလ မောမဟောန်ဆီ "အိုက်ကော့် ချီတား အောင်းခနောဝ်ဟွေတားမော ကောတအောင်း(ဝ်)ဝေဟောင့်(ဝ်)" ဝါလ တဝါပဲ့နောင်နူး။ နောင်နယ့်ဟောင်ဝါ မောဟန်ဆောင်ကျဉ်းနော့်။ အောင်းခနောဝ်ဟွေတားမော ချီ့တားနောင်တိုင်မိုက်ပွန့်လ အောင်း(ဝ်)ဝေအောင်းတိုင်းအွန်။ နောင်နယ့်ဟောင်ဝါမှ ချီ့တားအောင်းရောင်းခနောဝ်ဟွေတားတကော့်မော တနယ့်အောင်းဝေနောင်နူးဝါလ အစောင်တဟု။ 43တိန့်မိုက်အောင်းနီးလ မတ်အောင်းမနီးမမတ်။ တိန့်အောင်းမနီးကော့် မတ်အောင်းနီး မမတ်ပဲ့ဝါလ ကွန်းတောင်းလုန် ဟု။ 44တွဲမတ်မွန်းဆီ အကြောင်းတိန့်မွန်း မဆူဝါပဲ့။ မဆူလေ ဆီမေခနောဝ်ယွန်း(မ်) အောင်းမတ်ဖနေအောင်း(ဝ်)ဆီ နောင်မနွိုက်ပဲ့ညော့ အောင်းမတ်စပျစ်ကော့် ဆီမေခနောဝ်ယွန်း(မ်) အောင်း(ဝ်)ဆီမနွိုက်ပဲ့။ 45ကွန်းအောင်းနီးလေန ဆီမေခနောဝ်စောင်း(ဝ်)မွန်း အောင်းနီးလေနဲဟော် စမ်ထုအောက်ဟော။ ကွန်းအောင်းမနီးလေကော့် ဆီမေခနောဝ်စောဝ်မွန်း အောင်းမနီးလေနဲဟော် စမ်ထုအောက်ဟော။ ခွမ်းမဆူလေန ပြားအောင်းစောဝ်မဆူကျဉ်းနော့်။ 46မဆူလ အောင်းခွမ်းကော မထောင်(မ်)ဆီ အောင်းကောစောင့်ဆီ ဟေဟောင်းဆီ ဟောင့်လ။ 47ရာကောမားစူးဆီ ကွန်းစူးခွမ်းကောလေန တောင်းဖောတောင်းတူဝါလ ကောသလောင်(ဝ်)ပြား။ 48ကွန်းဟောန့်န နောင်နဉ်းလိလိကွန်ဆီ ကောင့်(န်)ဟဉ်၊ ကောင့်(န်)ဖာလေတောင်း အုတ်မြစ်ချားဆီ တောင်းတောင့်ဟုန်းတောင်းတူ။ နမ့်ရောင်(ဝ်)မားလော့် ဟုန်းဟောန့်န နီးနီးငမ်းငမ်းတောင့်ဝိုက်ညော့ မယဉ်းယမ်ဆီ ခမ်ဝိုက်။ 49တော်နယ်ကော့် တလားကောလေထောင်(မ်)ဆီ ကွန်းမစောင်း(မ်)ဟေလေန အုတ်မြစ်မချားဆီ အောင်းတောင့်ဟုန်းနေနောင်နဉ်းတောင်တူ။ ဖုန်တိုမားဆီ နမ့်ရောင်(ဝ်)မားကော်လော့် ဟုန်းဟိုက်လ ချချန်းပြိုကော်ဆီ တောင်းအောင်းပျတ်စီးလုန်တောင်း တနယ့်ကြုံ"ဆီ ဝါကော်ဝိုက်။
Айни замон обунашуда:
Luke 6: ttpv-rv
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
This translation of the TaiLaing Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.