YASFADOCI LOKU 20
20
1Chena ini biamikvtwi, ina nakuti nili grsagiki, yasi pami kvgahgimrci nihi lanvwahi ini mvmrtumawi-kvmikugi, macimi ini uwasi-biadrcimowa bami kvgahgimiwaci, nihi ugimrwi mkv-taukulviahi chena nihi yrivwigalici gilagi nihi gigilanihi ’n’tvsi u bialudr-kuhi; 2macimi nihki kvlvweki, Wetvmvwi-nrga :
Nahiwa uci makufewa g’ uci Ivwi yolumv wiahi? walr nafvwa inv ma-melahkv yomv simakufewa gelv? u takuhi. 3Macimi rpvfsa chena, Nahfrpi nelv gah nvtuhdolapwv nvtuhsawa; macimi wet-vmvwiku : 4Hini u fvfvhqi-ulalhiwawa Jrne, hv ini wafapvh-kvmigigi uci, walr tuga ilaneki uci? u talvhi. 5Macimi nihki nvtvwrci tahaki pasiqi welvwv, Qahqi, Wafapvh-kvmigigi uci, ga hiupa; Gociwa mvtv ki dapwahtvwrwv? wa hiwv. 6Wakv qahqi, Ilaneki uci, ga hiupa; jrivhki nihki lanvwaki gah sekunhuku-nrki : xvga kulapgrmofoki nihki yasi Jrneli mrmosigesqawilici, iwvki.
7Macimi rpvfsaki nihki, yasi bur wrkutv-muwrci waciwigi ini.
8Chena Jesise, Mvtv nuhgi nelv gi tvh wetvmolapwv simakufewa wv uci lvweiv yolumv wiahi, u talvhi nihi.
9Macimi ut vlami kvlolvhi nihi lanvwahi yomv pamrtu-wawa : Ilani gtiga mfvlomi-gtikv, chena ini gtigawi-lanihi ut vuhvhi, macimi wapfa kutvgi drmqa hawv pihci. 10Chena ini nvhekv lrqv nihi gtigawi-lanihi uta laskvwrli vlolrkvnvli, wvhsi nihki melrwrci nili mvwifowa ini mfvlomi-gtikv uci : pvyaqv nihki gtigawi-laneki u pipvgtawhr-wrli nili, macimi ud rmaskvwr-wrli sasgifeli. 11Chena inv nuhgi kutvkvli uta laskvwrli vlolrkv-nvli : macimi nahfrpi nili u pipvgtawhr-wrli nihki, macimi u taqrci-panvlr-wrli, chena sasgifeli ud rmaskvwr-wrli. 12Chena inv nuhgi uta laskvwrli mvwi-nfwi : macimi nahfrpi nili u mv-myrlvghr-wrli nihki, macimi vlikv ut ipvgilr-wrli nili. 13Chena, Nahiwa nah si lvwi? iwvpi inv dabalatvkv ini mfvlomi-gtikv. Ni nah laskvwv ivhqalamvkv ni qihfv; manvwvhi nili wa hufaba-lamr-wrli nihki. 14Pvyaqv nihki gtigawi-laneki iah nawr-wrci nili, nvtvwrci tahahdwrdeki, Hinv yrmv lvyrpi-tabalacigatv; wahi nfrdrku, wvhsi manvwv’ hini Irpi-tabaiacigawa u welrmi-ivqa, iwvkipi. 15Chena nihki ini mfvlomi-gtigr-nagi uci luhfa-pvgilr-wrli nili, macimi u nfrwrli. Nahiwa waciganvhi wa ipanvlvhi nihi inv dabalatvkv ini mfvlomi-gtikv? 16Wah biawv inv chena wa iqinahvhi iuhumv gtigawi-lanihi, macimi kutvkhi wah melvhi ini mfvlomi-gtikv. Macimi nihki iah notvmuwrci ini, Tagi ini wi himwi, iwvki nihki. 17Pvyaqv utah wrpvmvhi, macimi iwv, Nahiwa uwa yomv mviahtv-wigagi,
Nili sekunvli yalvwinvwr-wrci nihki wrgigrcki,
Hinv ivskv machofu u wesiwi ini bojrgi?
18Jrgi wiyafv nili sekunvli yasi rgicfrtv wah pupusqih-sinwv; wakv goqanafvli inv wah si pansinwv, wa lfwaskvwrli nili brsi paqi. 19Chena nihki yrivwigacki macimi nihki ugimrwi mkvtau-kulvyaki u nvtunahr-nrwv wvhsi masanrwrci nili ina yrtafvgi tapilo; chena u kufrwvhi nihi lanvwahi : xvga nihki mosi-tahaki yasi inv kvlvwici yomv pamrtuwawa niheni ilrci. 20Chena u gcitvwrpvma-kuhi, macimi uta laskvwr-wvhi gemrpvcikvnhi, nvyaluhci tapvsv-wafewi lvwelici weyrwv, wvhsi manvwvhi masanrmrkuci u pagikv-lvwewa, wvhsi waciganvhi ini dabala-cikv-nagi macimi uta simakufewa-nagi inv kvpanvli si pvgfanakuci. 21Chena u nvtuhdr-kuhi, Ga-gahgimiwa, ni wrkudrpa yasi gelv mvyrwi iuivni macimi kvgahgimiwa-ivni, macimi bur utvhpanvci inv wiyafv goqanafv, wakv dabwawa gi kvgahgimiwa ini u myawi Mvnatu : 22Hv ini mvyrwvtwi kutala-dewa-nagi wvhsi nelvwa melvkici daxhofowa Sesv, walr tuga mvtv? u takuhi. 23Pvyaqv u molalatv-mvwvhi u nhafewani-lici, macimi, 24Wrpvtasiku salani. Nafvwa u geshowa yomv macimi u lspvwigrfowa bonota ’n’tvsi? u talvhi. Macimi Sesv iwvki nih-ki. 25Macimi, Waciganvhi patagi melahku Sesv nili wiahi wa-welrmici Sesv, macimi Mvnatu nili wiahi wa-welrmici Mvnatu, u talvhi. 26Macimi nihki rlwi ilafeki wvhsi foginvmuwrci ini iyowa yalvhfvmelici nihi lanvwahi : chena u qvqahdrnalatv-mvwr-wrli ud rpvfsawa, macimi nolaweki.
27Chena utfakuhi ’n’tvsi nr-nakuti nihi Satusihi, nihki yr-iucki yasi bur vhdagi rpafewi-unsgrwa; 28macimi u nvtuhdrkuhi nihi, Ga-gahgimiwa, Mosise nit vwigrkunv, qahqi ilani u janinrli naboli, u wewili, macimi mvtv ut vpaluhfameli, inv u janinv wih mvmrli nili sekvwi-iqali, macimi wih menkv-wrli u janinrli. 29Vbeki waciganvhi neswvhfwi ujaninrki : macimi inv nhihtv u mvmrli wewvli, chena napwv mvtv ut vpaluhfami; 30macimi inv mvwi-neswi : 31chena inv mvwi-nfwi u mvmrli nili sekvwi-iqali; chena inv neswvhfwi ini ivskv nahfrpi mvtv u nvkvlrli vpaluhfvli, macimi napwv. 32Mviuhqrci inv iqawv nahfrpi napwv. 33Hini rpafewi-unsgrwa-nagi waciganvhi nafvwa nihki wewvli wa hilafi inv? xvga nihki neswvhfwi u mahci bonrwrli wvhsi u wewi-wrci nili, u takuhi. 34Macimi Jesise, Nihi u qifhi yrmv inugi yalvh-kvmigigi wechadeki, macimi wechadewa-nagi si meliwapi : 35wakv nihki nvhekv iqalamakufeki yalvgimofucki wvhsi kvtv-wih-tvmuwrci vlvina yalvh-kvmigigi, macimi ini rpafewi-unsgrwa uci nihki napagiki, mvtv wechadeki, mvtv nuhgi wechadewa-nagi si meliwapi : 36xvga mvtv nuhgi gidani ivh kvtvwi naboki nihki : xvga u jaja lafemr-wvhi nihi ancvlihi; macimi Mvnatu u qifhi nihi, dawv’ hu qifhi inv rpafewi-unsgrwa. 37Wakv ini nihki napagiki unsgrnofoki, datapilvhi yasi wrpvtasiwaci Mosise, ini Bewvlugi tvsi, ina, nili u Mvnadomvli Aplahame, chena nili u Mvnadomvli Visigi, chena nili u Mvnadomvli Jakvbe, iah sinrci nili Dabalamiwalici. 38Huwa mvtv nileni u Mvnadomwrli nihki napagiki, nihki bami lanvwawicki wakv : xvga u lanvwawih-tvwrwrli nili, u talvhi. 39Chena nr-nakuti nihki yrivwigacki rpvfsa, Ga-gahgimiwa, g’uwasi mahtuwa, u talrli. 40Xvga nihi mvtv gidani wesv nvtuhdrkuhi wiahisi nvtuhsawa.
41Chena, Nahiwa iwvki nihki yasi Dapide u qihfici nili Klvisdeli? u talvhi nihi. 42Xvga iwv Dapide nahvlwrkv welv ini Srmewa-kvmowa-nagi puk,
Inv Dabalamiwatv u talrli ni Dabalamiwamvli,
Lamvtvpilu gelv ni mvyrwengigi,
43Brlu’ hini gi fitvli si vhpvlgewa nashrki gi mvdaladewa-nvki.
44Dapide waciganvhi Dabalamiwatv uta sinrli nili, macimi na-hiwa si nv u qihfvli?
45Chena u talvhi u kvgahgimrfhi ini u nodrgawa-nwrgi nihki jrivhki lanvwaki, 46Mvhgani nihki yrivwigacki, mr-mrtvwi brmfacki ginwi pihtvwi-betanikv-nagi, macimi u nrswaladr-nrwv usilvwrladewanv nili tvh we-wedgeki, macimi vliwi si vhpvbe-wanv betiga nili msi-kvmiku, macimi vliwi tvsi tvh we-wihfanci-gaki; 47jr-jrkvtvgiki sekvwi-iqahi yadrlici wegiwrpvli, macimi naluhci-lvwewa uci usdonrwv ganwrki mvmrtumawanv : iuhgoni vlikv myrlvh-kuwrfowa wa hutfakunrwv.
Айни замон обунашуда:
YASFADOCI LOKU 20: SJW
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
Published for Thomas Wildcat Alford in 1929