YA-SFADOCI JRNE 9
9
1Chena yasi inv pamfaci, u nawrli ilaneli wacitv kvgabeqali tv husgi-lanvwawilici uci. 2Chena u kvgahgimrfhi u nvtuhdr-kuhi, Labrye, nafvwa mvjesilvwi, hv yrmv ilani, walr tuga u gah-girmhi waci kvgabeqawi usgi-lanvwawici? u takuhi. 3Jesise rpvfsa, Mvtv yrmv ilani mvjesilvwi, nuhgi mvtv u gahgirmhi : wakv wvhsi nili u pakvtafewanv Mvnatu tapinvuqidodaki weyrgi inv. 4Qelvhi pakvtanrdrku nili u pakvtafewanv inv wa-wrwen-askvwitv, iahaia’ hini gesagigi : ini dapahgigi biaiv, ina ilani mvtv kvtvwi pakvtafi. 5Ia hvpiv ini ya-lakuqvh-kvmigigi, neiv ini wvivhfayrgi ini ya-lakuqvh-kvmigigi, iwv. 6Iah mah’ tuwaci inv, ini vsisgegi si faqiwv, macimi ini fagowa uci ustu bafvqrgi-vsisgi, macim u sasunvmvwrli u sgesaku-wilici ini bafvqrgi-vsisgi, 7chena Nhrlu, gifinulu ini pahqrkvmigi Svilomi, u talrli nili, (ini iah lrbrcimugi, Wrwenasgofu). Wacganv’ hinv wapfa, chena gifinu, macmi biaci tapinvmwv. 8Nihki mr-pvyaci-grlrcki waciganvhi, chena nihki na-nawrcki nhihtv lrqv nili, yasi kvtu-wawilici, Hv mvtv inv yrmv lamvtvpitv macimi kvtuwa? iwvki. 9Kutvkvki inv, iwvki : kutvkvki, Mvtv, wakv inv si nrkufi, iwvki. Neiv inv, isiwa inv. 10Nihki waciganvhi, Nahiwa uwa si tvwa-nota gi sgesaku? u talrwrli nili. 11Hinv rpvfsa, Inv ilani Jesise yr-lofutv ustu bafvqrgi-vsisgi, macimi ni sasunvmrqv ni sgesa-kugi, chena Nhrlu Svilomigi, macimi gifinulu, ni taqv : waciganv-hi ni wapfa chena ni gifinu, macimi n? utfaku tapinvmowa, isiwa. 12Macimi nihki Drnvwa inv? u talrwrli nili. Goqa, u talvhi inv.
13Nihki nihi Palasihi u tah bialrwrli nili iahgi ga-gabeqa-lici. 14Huwa ini vlwrkvhsiwawa tv hini si gesagigi ina Jesise ustu ini bafvqrgi-vsisgi, macimi u tvwanvmvwrli nili u sgesakuwi-iici. 15Nuhgi waciganvhi nihki Palaseki nahfrpi u nvtuhtvwr-wrli nili yasi inv utfakuci u tapinvmowa. Chena inv, Bafvqrgi-vsisgi ni sgesaku u tah bonv, chena ni gifinu, macimi ni tapinv, u talvhi nihi. 16Nrlatv waciganvhi nihki Palaseki, Mvtv yrmv ilani Mvnatu uci, xvga mvtv u kcitvwalatv ini vlwrkvhsiwawa, iwvki. Wakv kutvkvki, Nahiwa wihsi kvtvwi ilani ma-jesilvwetv siivwi yolumv yaki giginolowanv? iwvki. Macimi ntvsi vhdawi pvhfahgrwa alagenv nihki. 17Nihki waciganvhi nuhgi, Nahiwa gi taircimv yasi inv tvwanvmvwahgi gi sgesaku? u talrwrli nili gagabeqawi ’laneli. Macimi inv, Mrmosigesqatv inv, isiwa. 18Nihki Josvki waciganvhi mvtv nili si dapwahsaki, yasi inv iahgi kvgabeqaci, macimi mahci utfakuci tapinvmowa, brluhi nihki utvhpi-mrwvhi nihi u gahgirmhi inv mviahci utfakutv u tapinv-mowa, 19macimi u nvtuhtvwr-wvhi nihi, Hv yrmv ki qihfwv, wacitv kvgabeqawi negi ya-laqa? nahiwa uwa inv si nuhgi tapinv-mwv? u talrwvhi. 20U gahgirmhi rpvfsahi macimi, Ni wrkudrpa yasi yrmv u qihfiyrga, macimi yasi inv kvgabeqawi negici : 21pvyaqv yasi inv inugi tapinvgi, mvtv ni wrkudrpa; walr si wiyafv da-tvwanvmvwrtv u sgesaku wiliei, mvtv ni wrkumrpa : nvtuhtv-waku; kvtamu-iu; pasiqi wa hrtutv weiv, isiwahi. 22Yolumv wiahi hiwvhi u gahgirmhi, xvga nihki u kufrwvhi nihi Josvhi : xvga nihki Josvki mahdrcimoki naiahkv, wvhsi qahqi wiahsi ilani tapvsvwrcimrta nili yasi Klvisde-wilici, hinv wih luhfalgofu ini msi-kvmiqi uci. 23Waciganvhi, Kvtamu-in; nvtuhtvwahku, iwvhi u gahgirmhi. 24Yone mvwi-nesana nihki utvhpi-mrwrli nili ilaneli iahgi ga-kvgabeqalici, chena Meli wvhfrci-makufewa Mvnatu : ni wrkudrpa yasi yrmv ilani mvjelafici, u talrwrli nili. 25Waciganv’ hinv rpvfsa, Qahqi tuga inv majesilvwetv, mvtv ni wrkutv : nakuti wiahi ni wrkutv, yasi iahgi kvgabeqaiv, inugi ni tapinv. 26Nihki waciganvhi, Nahiwa git ipanvlaqv inv? nahiwa gi tasi tvwanvmrqv gi sgesaku? u talrwrli. 27Ud rpvftv-wvhi inv, Gi wetvmolapwv datapilv’ hinugi, macimi mvtv ki nodrgapwv; nahiwa uci hv kih nodrnrwv ini nuhgi? hv nahfrpi gelvwv ki hu kvgahgimrfe-makuwv? 28Macimi nihki u Isgimr-wrli nili, chena Hv u kvgahgimrfvli gelv; wakv nelvwa Mosise u kvgahgimrfhi, iwvki. 29Ni wrkudrpa yasi mahci kvlolrci Mosiseli Mvnatu : wakv yrmv ilani mvtv ni wrkudrpa waciwici, iwvki. 30Hinv ilani rpvfsa macimi, Gociwa, yoni ini qvqahdrni, yasi gelvwv mvtv wrkutvmaqa inv waciwici, chena waghi inv ni tvwanvmrqv ni sgesaku. 31Ki wrkudrpa yasi Mvnatu mvtv notv-wrci majesilvwelici : pvyaqv nahcipa’ hilani wa-usvsilvwahrtv Mvnadoli ilafita, macimi u ta sitahawanilici silvweta, nileni inv u notvwrli. 32Yalrqv ini yalakuqvh-kvmigigi vlamigi mvtvlrqv ini nodota yasi wiyafv nakuti tvwanvmvwrci nili u sgesaku ilani kvgabeqawi negi. 33Qahqi yrmv ilani mvtv Mvnatu uciwita, mvtv-wiahi ivh kvtvwi silvwi inv u talvhi nihi. 34Hrpvfsaki nihki macimi, Malsga mvjesilvwewa-nagi gi negi gelv, macimi hv gi kvgahgimipa? u talrwrli nili. Macimi nili u luhfa-pvgilr-wrli nihki.
35Nodrga Jesise yasi nihki mahci luhfa-pvgilrwrci nili; macimi nili u mkvwrli, Hv gi dapwahsa nili u Qihfvli Mvnatu? u talrli. 36Hinv rpvfsa macimi iwv, Chena, Dabalamiwatv, na-fvwa inv, wvhsi manvwvhi nelv dapwahsaiv inv? 37Gi mahci nawv inv, macimi inv inv ga-gekvlolademahkv, u talrli Jesise. 38Macimi inv, Dabalamiwatv, ni dapwahsa, isiwa. Macimi inv usvsilvwahrli nili. 39Macimi, Xvga mahtvh-kuwrladewa ni uci yomv yalakuqvh-kvmigigi si bir, wvhsi nihki ba-bur tapinvgiki manvwvhi tapinvmuwrci; chena nihki da-tapinvgiki wvhsi manv-wvhi kvgabeqawrci, iwv Jesise. 40Iuhkumv nihki Palaseki uci wa-weci vpicki nili nodrgaki yolumv wiahi, macimi Hv nahfrpi nelvwa ni kvgabeqapa? u talrwrli. 41Qahqi kvgabeqayaqa gelv-wv, mvtv kih bonrnrwv mvjesilvwewa : wakv, Ni tapinrpa, ki taiupwv : ki mvjesilvwewa-nwv ivskv vhdawi, u talvhi Jesise.
Айни замон обунашуда:
YA-SFADOCI JRNE 9: SJW
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
Published for Thomas Wildcat Alford in 1929