Иоанн 13
13
Иисус штасыне тонафниензон пильгснон
1Очижинь карша шиня Иисус ни содазе: сась Сонь пингоц кадомс тя масторлангть и меки мрдамс Алянцты. Сон кельгозень Эсь ломанензон, конат эрясть тя масторлангса, кельгозень синь педа-пес.
2Иисус и тонафниенза ётафтозь илядень ярхцамаснон-симомаснон. И идемэвозсь сувафтсь ни Иудать, Симон Искариотонь цёранц седис мяль мимс Иисусть. 3Иисус содазе: Аляц семботь максозе Сонь кядялонза, и содазе: Сон сась Шкайть ширде и туй Шкайти. 4Сон стясь илядень ярхцамада меле, каязень лангстонза лангань щамонзон, сявсь нардама и карксазе перьфканза. 5Тяда меле каясь штама кядьгоняс ведь и кармась тонафниензон пильгснон штама и нарнема перьфканза карксаф нардамаса.
6Мольсь Симон Пёторонь ваксс; и ся корхтай Тейнза: «Азор! Тонь мяльце штамс монь пильгонень?!» 7Иисус каршезонза мярьгсь: «Мезе Мон тиян, тяни тон аф шарьхкодьсак, а сяльде шарьхкодьсак». 8Пётр корхтай Тейнза: «Мзярдонга Тон аф штасайть монь пильгонень». Иисус каршезонза мярьгсь: «Кда аф штасайне, эста аф улят Моннекс». 9Симон Пётр корхтай Тейнза: «Азор! Эста аф аньцек пильгонень, но кядненьге и прязеньге штайть». 10Иисус мярьгсь тейнза: «Штафти эрявихть аньцек пильгонза штамс, сяс мес сон стадонга марнек ару. Тинь аруфтада, аньцек аф сембе». 11Иисус содазе Эсь мииенц и сяс азозе: «Аф сембе тинь аруфтада».
12А мзярда штазень синь пильгснон и щазень Эсь щамонзон, эста тага озась и мярьгсь тейст: «Шарьхкодесть, мезе Мон тейнть тиень? 13Тинь Монь лемнесамасть Тонафтыкс и Азоркс и видеста корхтатада, сяс мес афкукс Мон стаман. 14Стане, кда Мон, Азорсь и Тонафтысь, штайне тинь пильгонтень, эста тейнтьке эряви штакшнемс фкя-фкянь пилькт. 15Мон тянь тиине тейнть няфтеманди, тиньге тиеледе тяфта, кода Мон тиень тейнть. 16Видеста корхтан тейнть: покодись аф сяда оцю азоронц коряс, кучфське аф сяда оцю кучиенц коряс. 17Тинь павазуфтада, кда тянь содасасть и тянь корява тиенттяда.
18Ёткстонт аф сембонь колга корхтан; Мон содасайне, конатнень кочкайне. Аньцек пяшкодевоза Сёрматфкссь: "Мархтон кшида ярхцайсь кеподезе лангозон эсь кочкярянц"#13:18 Псалтирь 40:10. 19Тянь азондса тяни, улемдонза инголе. И тяфта, мзярда азфсь пяшкоди, кемаледе – тя Монан. 20Видеста, видеста корхтан тейнть: кие васьфтьсы сянь, кинь Мон кучса, ся Монь васьфтьсамань. А кие Монь васьфтьсамань, васьфтьсы Монь Кучиезень».
Иисус няфтьсы мииенц
(Матф. 26:20-25; Марк 14:17-21; Лук. 22:21-23)
21Тянь азомда меле Иисус прась ризфс и панжезе потмонц: «Видеста корхтан тейнть: ёткстонт фкясь мисамань Монь». 22Эста тонафниенза варжакснесть фкя-фкянь лангс, абонкшнесть: кинь колга Сон корхтай.
23Тонафниензон ёткста фкясь, конань кельгозе Иисус, озафоль Иисусть ваксса. 24Симон Пётр кядьса-сурса няфнесь тейнза: кизефтелезе Иисусть, кинь колга Сон корхтась. 25Ся лаподсь Иисусть мяштенцты и кизефтезе: «Азор! Ся кие?» 26Иисус каршезонза мярьгсь: «Ся, кинди максса шаваняти навсеф кши сускомть». И навазе сускомть и венептезе Симон Искариотонь цёранцты, Иуданди. 27И тя кши сускомть сявомда меле Иудань потмос сувась Сатанась. Эста Иисус мярьгсь Иудати: «Мезе срхксят тиемс, тик ни куроконе». 28Но озафнень ёткста кивок ашезь шарьхкоде, мезенди Сон тянь азозе. 29Иудань кядьсотольхть марстонь ярмакне, сяс конат-конат арьсесть: Иисус, улема, корхтай тейнза: «Рамак, мезе тейнек эряви Очижить ётафтомс», али: «Мезевок явонтт ашуфненди». 30Кши сускомть сявомда меле Иуда эстокиге лиссь; а ульсь ве.
Од кошардомвалсь
31Иудань лисемда меле Иисус мярьгсь: «Тячи няфтеви Ломанень Цёрать оцюшиц, Шкайтьке оцюшиц няфтеви Сонь эсонза. 32Кда Шкайть оцюшиц няфтевсь Сонь эсонза, эста Шкайське няфтьсы Эсьсонза Цёранц оцюшинц, и курок няфтьсы Сонь оцюшинц. 33Идне, аф ламос ни Тейне улемс мархтонт. Карматада Монь вешендемон, аньцек, кода ни мярьгонь еврейхненди, тяфта тейнтьке тяни корхтан: "Ков Мон молян, тинь тоза аф молефтяда". 34Мон максан тейнть од кошардомвал: кельгода фкя-фкянь. Кода Мон кельгодязь тинь, стане кельгода фкя-фкянь. 35Улендяряй ётксонт фкя-фкянди кельгома, тянь коряс сембе кармайхть содамонт – тинь Монь тонафниене».
Иисус инголькиге азонды Пёторонь потаманц колга
(Матф. 26:31-35; Марк 14:27-31; Лук. 22:31-34)
36Симон Пётр пшкядсь Тейнза: «Азор! Ков Тон туят?» Иисус каршезонза мярьгсь: «Ков Мон туян, тон тяни аф молеват мельган, а сяльде туят мельган». 37Пётр пшкядсь Тейнза: «Азор! Мес Мон аф молеван мельгат тяни? Мон ваймозень путса Тонь инксот!» 38Иисус каршезонза мярьгсь: «Ваймоцень путсак Монь инксон? Видеста корхтан тейть: атякшсь аф кенери моразевомс, кода тон колмоксть потат Монь эздон».
Айни замон обунашуда:
Иоанн 13: ОС16
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
Библиянь ётафтома институтсь, 2016